CARITO RANDAI PANGLIMO GAGA

YANG DIPERANKAN OLEH :

1. Puti Reno Nilam

2. Bujang Baganto

3. Panglimo Gaga

4. Galang Sapik

5. Tuak Leman

6. Ciak Menan

DISUSUN OLEH :

H.MAWARNI DT. RAJO BANDARO

SAOK LAWEH, 16 MEI 2011

 KATO PASAMBAHAN
Assalamualaikum kato pamuloan
Bismillah pambukak kalam
Hari baiak kutiko elok
kami pasambahkan randai nan jo curito
Sairiang balam jo barabah
Barabah lalu balam mandi
Sairiang salam nan jo sambah
Salam lalu salam kumbali
Mano sagalo niniak mamak
Rang gadang basa batuah
Nan di anjuang tinggi
Nan di amba gadang
Urek kabakeh rang baselo
batang ka bakeh rang basanda
daun katampek rang balinduang
banda urang kami bandakan
banda urang tangah koto
kaba urang kami kabakan
jikok salah tolonglah sapo
kami barandai jo curito
antah sanamo jo rang siko
antah sagalo jo rang siko
rila jo maaf kami di bari
randai banamo minang sarumpun
carito banamo panglimo gaga
kami nan datang dari solok,nan dari nagari soak laweh, jorong banamo bungo tanjuang,nan
basasaran di sawah kandih
Anau ketek anau lambah
Jikok tinggi tolong juluakkan
 Kami ketek jolong katangah
Kalau salah tolong tunjuakkan
Nak urang talang batagak
Randai basanggua lipek tigo
Elok randai di baok tagak
Buliah nak sanang panonton kito

JATUAH CURITO MASO ITU

Panglimo : Manolah tuan leman jo galang Sapik, kalian kamari aduonyo, di denai
ado nan takana
sapik : Ampunlah kami tuan Panglimo, ampun baribu kali ampun, kami
takuakan kapalo nan satu, baunjuakan lutuaik nan duo, mamintak
ampun bakeh tuan, kami gantuang kami ka tinggi, tuan buang kami ka
jauah, tuan juo nan karugi,
Leman : Apo kok sabab karanonyo, makok kami tuan panggia, adokah salah
badan kami, atau dubalang rabuik rampeh, atau nyo rang dapek malu,
dek tuan tarangkan bakeh kami, buliahnyo sanang dalam hati, sajuak di
dalam pamikiran, pulang maklum pado tuan
Panglimo : Manolah kalian kaduonyo, tantangan kalian den panggia, jikok nyo
kalian denai imbau, dangakan dek kalian elok-elok, nak denai curahi
den papakan, indak do musuah nan manyarang, indak dubalang nan
rabuik rampeh, indak ado parik nan lah rompak, indak ado rando nan
dapek malu,

Dalam samalam tadi, denai tamanuang duduak surang, takana dibadan

diri denai, lah tigo tahun lamonyo kito indak baralek, malu kito dek
urang banyak, cakak nan indak babalasan, tapuak nan indak batimbalan,
tapi sakarang iko kini, denai nan baniek nak baralek, ba a pikiran hati
kalian, pulang maklum pado kalian.

Leman : Ampun lah kami tuan panglimo, dibawah salo kabasaran, tantangan
maksud tuan nan tun, satitiak nan indak kami tumang, sabarih nan indak
kami lupokan, satuju kami tantangan itu.
Panglimo : Manolah kalian sadonyo, mandanga rundingan dari kalian, sajuak
rasonyo kiro-kiro, sanang dalam pamikiran, iyo basuo bak papatah
urang,

karajo elok kito pacapek, nak jan ditimpo di nan buruak, karajo buruak
kito lalaikan, antah di timpo di nan elok, elok lah kito pagagehkan,
pulang maklum bakeh kalian.
sapik : Tuan kanduang panglimo gagah, saketek tanyo dari denai, kok iyo alek
kadimulai, nak tantu galanggang ka kami pancang, nak jaleh karajo nan
kami kakok, dek tuan tarangkan bakeh kami, nak sanang dalam hati, nak
sajuak dalm pamikiran, pulang maklum bakeh tuan.
Panglimo : Kalau ba itu kato kalian, iyo pulo itu kironyo, pakan datang kito ka
baralek, dihari satu malah harinyo, tantangan karajo bakeh kalian, tugeh
dibagi masing-masing, tuan leman ka jadi juaro, galang sapik ka jadi
janang, lah ka jaleh dek kalian,
sapik : Tuan kanduang panglimo gagah, mandanga rundingan dari tuan, sanang
rasonyo dalam hati,

Datuak leman diangkek jadi juaro, galang sapik ka jadi janang iko kini,
kok iyo diangkek ka jadi janang, apokah sifat ka kami pakai, limbago ka
tampuak pinang, umua nan alum satampuak jaguang, kok tumbuah kilaf
jo kilafat, butolah kami tantang itu, dek tuan tolong jalehkan, nak sanang
dalam hati, pulang maklum bakeh tuan.
Panglimo : Kok baitu kato kalian, cubo dangakan elok-elok, den tunjuakkan ciek-
ciek, nak tantu karajo kalian kakok,

Tibo di diri si datuak leman kan awak jadi juaro, tau jo angin nan
basawik, tantu jo ombak nan basambuang, jaleh di susuak sisiak katiak,
tau di cakak nan ka kanai, tibo dicakak kamalarai,

Tido didiri si galang sapik, di jadi janang tangah galanggang, muluik

manih kucindan murah, budi baiak baso katuju, pandai mananai jo
maminang, kok ado alek nan datang di bao masuak ka dalam
galanggang,

Tambahan karajo bakeh kalian, tibo dihari nan baisuak, layangkan surek
dalam kampuang, patuik panggia kalian panggia, patuik undang kalian
undang, nan jauah buliah nyo tibo, nan dakek buliah nyo datang, di nan
sakarang ko kini, samintaro hari alum tinggi, samintaro paneh alum
garang, denai bajalan anyo lai

TALEMPONG

Panglimo : Manolah tuan leman jo galang sapik, kini lah tibo masonyo kito baralek,
cubolah caliak ka galanggang, kok lah ado alek nan datang, baolah
masuak ka dalam galanggang, alah kan tarang dek kalian.
Sapik : Tuan kanduang panglimo gagah, kalau baito kato tuan, sanang rasonyo
hati kami, basaba tuan mananti, nak kami caliak alek nan datang, alah
ka sanang hati Tuan.
panglimo : Kalau baitu kato kalian, basaba malah denai manantikan.

BASOBOK B.BAGANTO JO SI NILAM

Bj baganto : Adiak kanduang puti si Reno Nilam!agak kamari adiak sabanta

Nilam : ondeh tuan Bj Baganto, tasirok darah didado, tapacak paluah badan diri,
apo kasabab tuan datang kamari, dek tuan tolong jalehkan.
Bj baganto : Manolah nilam janyo denai, mako denai datang kamari, dek buruak
untuang jo badan, danga dek nilam karanonyo.

Puyuah jo punai sadang tabang, Mati di tembak kaduonyo, Takicuah

denai di galanggang, Ayam sikua talinyo duo

R.Nilam : Ondeh tuan Bj baganto, usah tuan bakato baitu, jauah ta ibo hati nilam,
usah manyindia caro itu, makasuik tuan denai maklum

Lapeh nan dari bukik tinggi, andak manjalang padang gaduik, sinan
balabuah kapa tabang, kasiah tuan lah denai uji, bak cando ambun di
ateh rumpuik, datang paneh bagansua hilang.

Bj baganto : Manaolah nilam gadih nan jombang, rupo nan elok ka pamenan,
limpapeh rumah nan gadang, sumarak anjuang paranginan.

Nyo bulan-bulan nan tarang, nyo bintang- bintang nan janiah, nyo nilam
nilam nan sayang, nyo denai, denai nan kasiah.

Nak duo pantun sairiang, danga dek nilam sabuah lai

Ayam kuriak rambayan tanduang, ikua manjelo masuak padi, ambiak
tampuruang bari makan, tujuah daerah dalam kampuang, nilam surang
tapatan hati, nan lain buliah den haramkan.

R.Nilam : Urang gaduik ka bukik tinggi, hari nan sadang pukuah duo, mambao
baki jo karanjang, dari ujuang rambuik ka ujuang kaki, indak ado nan
punyo, kasiah ka tuan surang.
Bj baganto : Toko kumango di padang panjang, nan punyo urang payokumbuah,
urang mambali tiok hari, kok nilam sabana sayang, tompangkan denai
dalam sanggua, buliah di bao kama pai.
R.Nilam : Padi sijirak-jirak jantan, padi sipuluik elok ka tampang, jikok itu tuan
katokan, jo bulu mato tuan den baduang.
Bj baganto : Manolah nilam janyo denai, mandanga kato bak kian, sanang rasonyo
dalam hati, sajuak dalam pamikiran, hanyo sakarang iko kini, ado dek
denai nan takana, dek nilam tolong simakkan buliah nak jaleh banyo,
denai nan dapek kaba angin barito, nan datang dari jauah, bak raso
nilam lah batunangan, jo rang kayo dalam nagari, nan banamo panglimo
gaga.
R.Nilam : Ondeh tuan bujang baganto, usah tuan pancameh bana, urang pancameh
mati Hanyuik, urang panggamang mati jatuah, nan bak kian usah di
sabuik, janji den arek iman den taguah.
Bj baganto : Kok iyo kaba nan bak itu, denai nan indak kamangalah, di badan denai
nilam kan tau, basuo bana bak pantun urang,

Rumah gadang di lubuak tirih, dulu rancak kini lah rabah, untung
sapantun biduak tirih, pulau tampak pandayuang patah, tapi samantang
baitu, kayu dagang di singkarak, tampek balinduang hujan jo paneh,
ureknyo jelo bajelo, bulan sapantun buruang merak, kadiam disangkak
ameh, janji kamurai kana juo.
R.Nilam : Ondeh tuan bujang baganto, iyo pulo bak pantun urang,

Walau barakik batang pisau, walau upin jadikan sampan, usah lai
sampai ka subarang, walau basambuang ombak jo galombang, walau
bacarai nyao jo badan, cinto nilam ka tuan surang, indak nan lain ka
nilam kana.
Bj baganto : Kalau baitu kato nilam, lah sanang bana dalam hati, lah sajuak dalam
pamikiran, kini bak itu malah lai, samantaro hari balum tinggi,
samantaro balum paneh bana, hambo bajalan hanyo lai, denai nak pai
manyabik rumpuik
R.Nilam : jikok baitu kato tuan, denai lapeh jo hati sanang.

DISUMUA TAMPEK MANDI

Panglimo : Diak kanduang sirano nilam, lah payah denai dek mancari, hilia
kampuang mudiak kampuang, bukik tinggi lah denai daki, lurah dan
dalam lah denai turuni, nak pincuran aia tabik, nak ulam pucuak
manjulai, disiko mah nilam mah kironyo.
R.Nilam : Ondeeeh tuan panglimo gagah, tasirok darah di dado, tapacak paluah di
kaniang, apokah sabab jo karanonyo, mangkok tuan tuan datang kamari,
kok di caliak-caliak bana, bak tuanku lareh pulang kumisi, kok di liek-
liek bana alangkah malu badan diri, sabab baitu kato nilam, nilam nan
sorang padusi di siko.
Panglimo : Upiak kanduang si reno nilam, usah adiak baduto juo, angin indak
garisiak indak, disiko bak bunyi urang barundiang, dimanyo urang
surang lai.
R.Nilam : ondeh tuan panglimo gagah, usah tuan tuduah mancaco, nilam surang
nan sajak tadi, indak ado kawan, indak kok tuan salah danga, balam jo
punai basautan.
Panglimo : Diak kanduang balahan diri, jarek samato badan denai, limpapeh rumah
nan gadang, sumarak anjuang paranginan, pamenan mato patang jo pagi,

Bukan denai kamari sajo Nilam, kinari anak urang padang, bukan denai
kamari sajo nilam, gadang mukasuik ka denai jalang, nak duo pantun
sairiang, danga dek nilam sabuah lai, singkarak batuang rang tarah,
ditarah ateh tapi danau, buruang alah tampek ka denai gatah, jinak alah
ka tangan balum
R.Nilam : Dikarek batuang rang tarah, ditareh ateh tapi daun, jikok buruang ka
tuan gatah, buruang lah ado urang na punyo.
Panglimo : Diak kanduang si reno nilam, nak urang koto malanca, nan barumah
dipariaman, kandak den palimo gagah, pantang di ambek ditagahkan.
R.Nilam : ondeeeeh tuan panglimo gagah, heran denai bukan ka palang, manga
tuan bangih bana, sirawik tajam sabalah, talang di rimbo rang
landuangkan, didahan buruang kanai gatah, manga kok tuan
manangguangkan.
Panglimo : Adiak kanduang sireno nilam, indak kok adiak dapek kaba, iyo di bulan
dahulu, nilam alah denai pinang, ka mamak nilam ka pancukupanan
tunku tigo sajarangan, dibulan datang kabaraleknyo,

Sungguah samantang baitu, danga dek nilam denai katokan, diak

 kanduang si reno nilam, urang mamikek udang lalu, kanai kapitiang jo
sirangkak, urang mamikek jo balam mau, denai mamikek jo ameh perak

R.Nilam : Ondeeh tuan panglimo gagah, yo pulo bak pantun urang, anak urang
tanjuang barulak, barulah barulai pulo, tuan mamikek jo ameh perak,
balam nak iyo jo suaso.
Panglimo : diak kanduang si reno nilam, usah disingguang karuntuang miang, indak
kok nilam dapek kaba,iyo di bulan dahulu, bahaso nilam alah denai
pinang, ka mamak nilam ka pancukupan, tungku tigo sajarangan,
dibulan datang ka baraleknyo,

Denai indak namuah kanai bak nanko, denai bari kaba ka mamak nilam,
tangguang rasiko dek nilam surang, anak bincacak bincacau, anak
singiang ngiang rimbo, anak bingkatak kambiang hutan. Denai bari kaba
mamak si nilam, tangguang rasiko dek nilam surang, denai bajalan
hanyo lai.

Panglmo gaga mangadu ka mamak si nilam, hati sakik tak

tabedo, awak panglimo kayo, urang bagak dalam nagari, dihariaknyo
mamak si nilam, dikabakan si nilam mancaci diri ampanglimo, lalu di
turuik nilam dek mamaknyo, lalu cik menam manuruik kamanakannyo.

: RANDAI JATUAH MASO ITU

C.menam : Nilam….! O, nilam

R.Nilam : Yo, siatu,,,
C.menam : Mamak.
R.Nilam : O mamak, Naiaklah mamak,

Manolah ciak menam mamak denai, tasirok di dado,tapacak paluah

badan diri, apokah kaba jo barito, makok mamak datang kamari

C.menam : Kamanakan denai si reno nilam, litak badan tampek pamintak nasi, awih
katampek mintak aia,

Mangkoknyo mamak datang kamari, mamak mandapek kato sadiah,

kato di bao angin lalu, antah iyo antah indak, panglimo gagah datang
kamari, batang dek mamak manyampaikan.

R.Nilam : Ondeh mamak janyo denai, tampek baiyo jo batido, tampek mangadu
siang jo pagi, tantangan kato mamak nan tun, indak ado salah jo
saseknyo,itulah kato nan sabananyo. Danga dek mamak nilam katokan

“Waktu nilam di tapian,sadang manyasah kain jo baju, tibo panglimo

gagah, inyo nan datang berang-berang, dikatokan basonyo nilam alah
batunangan jo tuan palimo gaga”

C. menam : Reno nilam sanyo mamak, katantangan di diri panglimo gagah, lah
sipeknyo kacaro itu, indaknyo pandai basilunak, indak pandai
balambuik, tapi panlimo gagah hatinyo elok, mamak lah tau salamoko.
R.Nilam : Ondeh mamak janyo nilam ,tapi samantan pun baitu indak patuik inyo
bakato sarupo tu

Sabab denai ko anak gadih .

C.menam : Reno nilam janyo mamak ,usah itu kito tantang ,jikok di rantang
namuah nyo panjang,elok di puta naknyo singkek ,kito ambiak nan
paralu,danga dek nilam mamak katokan ,yo dipakan nan daulu,panglimo
gaga datang ka rumah mamak,inyo mintak di patunangkan jo
kamanakan mamak reno nilam ,baa dek pikiran nilam ???
R.Nilam : Ondeh mamak janyo nilam ,jikok tuan anglimo gaga ,denai tak suko
samiang juo ,urang likareh dalam nagari ,urang mamakan masak
matah,urang barajo di hati ,rajutan di mato urang ,indak den takuik dek
bagak urng ,indak den harok di kayo urang,indak den suko saketek juo.
C.menan : Reno nilam janyo mamak ,danga dek nilam mamak katokan ,usah
maino ino urang usah mancaci caci urang,dek nilam cubo pikia mamak
bautang sapanjang tahun ,utang sapacik ka saganggam utang sameh 50
satail,kok indak nilam mamak runggukan jo apo utang ka mamak
bayia ,itu di mamak nan marusuah.
R.Nilam : Ondeh mamak janyo nilam ,urng nan arif bijaksano ,utang mamak bayia
dek mamak,utang nilam,nilam nan punyo.
C.menan : Reno nilam janyo mamak ,usah muluik talompek lompek,usah kato
tadorong dorong,lawik sari rantau batuah,urang dnia banyak
karamek,kok indak namuah manuruik parentah ,usah bamamak juo
,carilah mamak ka urang lain .kamanakan cilako malah kironyo.

DENDANG

Dek iyo sireno nilam ,indak tabedo sakiknyo hati ,jatuah badarai
si aia mato.
Di japuik kisah bujang baganto ,sadang bamanuang manuang juo,datang
nilam maso itu.

R.nilam : Ondeh tuan bujang baganto,lah panek nilam dek mancari ,masuak
kampuang kalua kampuang ,masuak parak kalua parak tampaklah tuan
sadang manyabik ,sanang lah rasonyo dalam hati.
B.baganto : Manolah nilam adiak nyo denai ,tasirok darah di dado tapacak paluah di
badan diri,apokok karanonyo nilam datang kamari.
R.nilam : ondeh tuan bujang baganto ,tampek mangadu siang jo pagi ,mangkonyo
nilam datang kamari buruak untuang di badan diri.
B.baganto : Manolah nilam janyo denai ,apoko garangan nan tajadi ,dek nilam
sampaikan bakeh denai ,buliah nak sanang dalam hati.
R.nilam : Kalau indakado barando ,indak tampuo basarang randah iyo malang
nasib denai nangko ,katabang anyok bagatah.

B.baganto : Usah nilam ba andai juo ,ragu denai mamikiakan sampaikan sajo
baritonyo ,buliah nak sanang paratian.
R.nilam : Jikok baitu kato tuan ,bialakan nilam jalehkan bana ,apo sabana kajadian
,pihak di hari nan kapatang ,mamak mananti ateh rumah,lalu barundiang
maso itu,mamak mangatokan bakeh nilam ,bahaso nilam alah
 batunangan jo tuan panglimo gaga.
B.baganto : Ha,,,ha,,, mano nilam janyo denai ,,, kok iyo itu nan tajadi kabaa pulo
janyo denai iko basuo bak pantun urang.

Kasariak mambali dadiah

Katalang mambaok jamba
Iyo sarik baayam putiah
Kok tau sikok alah manyamba

R.nilam : Tapi samantan pun baitu ,tantang kato mamak itu ,nilam tuialak mantah
mantah nilam katokan bahaso nilam alah batunagan,iyo jo badan diri
tuan ,tapi mamak katiko itu inyo berang indak kapalang ,mahariak
mahantam lantai,sampai kalua kato kato ,bahaso mamak indaka ka ba
kamanakan bakeh nilam
B.baganto : Puyuah nak urang koto nopan baok bapikek malah daolu ,guruah kok
indak jadi hujan bumi jo langik dapek malu.
R.Nilam : Padi sipuluik elok katapai, di bao urang ka pitalah, cinto ka tuan kok
indak sampai, bialah mati bakalang tanah.
B.Bgnto : Manolah nilam janyo denai, jikok baitu kato nilam lah sanang bana
dalam hati, sajuak dalam pamikiran,putiah kapeh lah dapek di liek,
putiah hati kaba radaan, kini baitu malah lai, kapalang basah bialah
mandi, mandi di lereng bukik putuih, mandi bagusuak daun pandan,
eloklah kito samo pai, etan karanah Rangkiang luluih ,di sinan kasiah
kito sampaikan.
R.Nilam : Ondeh tuan bujang baganto, iyo pulo bak pantun urang
Pado mananam lobak lambau,
Elok lah sawi di tugakan
Pado mananam hati risau,
Elok nagari ditinggakan
Kini juo kito bajalan
Disitu hatinyo mangko sanang
Kito bajalan hanyo lai

:
LAH BAJALAN B.BAGANTO JO SI NILAM

: Kato putuih mundiam salasai, nan bajalan bujang baganto,samuk ta

injak indaknyo mati, alu tataruang patah tigo, di ansua juo pajalanan,
nan bak buruang duo sakawan.

Nan karimbo mamikek balam

Dapek balam tigo gayo
Manga nan masak tuan paran
Nan mudo lai kaelok rupo
 Kami kamano kanduang buang
Jauah basarang dakok juo,Ampia katibo hanyo lay,Tabik pikiran
panglimo Gaga,Lalu di himbau-himbau tuak laman jo galang sapik

RANDAI JATUAH MASO ITU

Panglimo : Mano Tuan Leman jo Galang sapik, agak kamari kalian tagak, kito
barundiang sakutiko gadang,niatan dalam hati, sarato mukasuik nan
sangajo.
G. Sapik : Tuan kanduang Panglimo gaga, tarangkan malah dek tuan bakeh kami,
apo sabab kami tuan panggia, buliah nak sanang dalam hati, pulang mak
alum bakeh tuan.
Panglimo : Mano Tuak Leman jo Galang Sapik indak kok datuak dapek kaba,
Denai mandapek kaba dari urang kampuang, si bujang baganto inyolah
lari, lari nan indak surang sajo, inyo mambaok si reno nilam, pikia dek
datuak tanntang itu, sungguah malunyo badan diri.
G. Sapik : Kalau baitu kato tuan, jatuahkanlah perintah ateh kami, jalehkan karajo
kakami kakok, pulang mak alum bakeh tuan.
Panglimo : Usah kalian balalai juo, sadiokan sagalo alek-alek,Padang janawi janlah
lupo “pusako niniak dahulunyo” alah kasanang hati kalian.
G.Sapik : Tuan kanduang Panglimo Gaga,kalau baitu kato tuan, kami kumpuakan
sagalo sanjato,sarato karih patah sambilan, karih pusako dari niniak.
alah kasanang hati tuan.
Panglimo : Mano datuak nan baduo ,usah datuak balalai-lalai juo, samintaro
matohari alun tinggi, samintaro paneh balum garang,elok kito ansua
pajalanan, nan menuju rangkiang luluh.
G. Sapik : Kalau baitu kato tuan, bajalan lah tuan nan dak ulu, kami mairiangkan
dari balakang,,,
Panglimo : Mano tuak leman jo galang sapik, caliak suok nan jo kida, kok lalu
bujang baganto, capek imbau ambo.
G. Sapik : Kalau baitu kato tuan, sanang rasonyo dalam hati, pihak kadiri badan
denai, buek dilakuak lurah itu, indak ado ulek nan manggata, indak ado
tadung nan biso, tak ado sangkak pado mangga salain kito nan batigo,
alah kasanang hati tuan.
Panglimo : Mano tuak leman jo galang sapik, usah kalian carito juo, cubolah caliak
bujang baganto, mungkin inyo sadang di jalan.
T.leman : Kalau baitu kato tuan, sugiro kami manyongsong, tapi samantang pun
baitu,caliak juo kami dek tuan, kami sonsong bana bujang baganto, alah
kasanang hati tuan, ba’a galang sapik,
G.sapik : Yo tuak leman !
T.leman : Lai ang caliak suok jo kida,
G.sapik : Lai tuak leman,
T.leman : Lah nampak bujang baganto tu?
G.sapik : Alun lai tuak leman ,sabanta lai mungkin inyo datang, bia kito nanti
disiko,jadi padang janawi lai, dek tuak leman ?
T.leman : Lai galang sapik,kito lameh sampai mati yo pik !
G.sapik : Ha,,, ha,,, ha,,,
T.Leman : Hai galang sapik, ikonyo bujang baganto,manolah waang bujang
baganto, hari kamih pasa sirukam, anak sikola pulang baduo, hari kan
sadang tangah hari, alah jaleh ampanglimo gaga jo si reno nilam, dek
 bujang baganto babaok juo, indak takuik badan kamati.
B.Bgnto : Mano pandeka nan baduo, alek dimano na bapakai,limbago dimano nan
dituang, apokok salah badan denai, mako dirimbo denai diadang.
G. Sapik : Anolah waang bujang baganto,,pikia dek wa’ang kasalahan badan
wa’ang, dari tadi kami katokan, lah jaleh reno nilam jo panglimo gaga
dek bujang baganto babao juo, indak katakuik badan ka mati, eloklah
bujang babaliak pulang,

ha,ha,ha,ha,ha,

manolah wa’ang bujang baganto, denai nan bagala si galang sapik,

dalam silang denai manyapik, dalam rami denai bagak, din an langang
denai panakuik, ha, ha, ha,

T.leman : Lameh galang sapik,manolah wa’ang bujang baganto, ang balun tau
didiri denai, buang di lakuak lurah itu, indak ado ulek nan
manggata,indak ado taduang nan biso, indak ado rang jongkek pado
mangga, salain kami nan batigo,ha, ha, ha, ha, ha, ha, kati lalu, kati
mati, bilo lalu, bilo mati,alah kajaleh itu dek ang bujang baganto, labiah
rancak ang babaliak pulang ha, ha, ha ,ha
B.Bganto : Cih,,, kurang aja kalian, pancarinek di dalam aia, babungo magko
babuah, elok-elok kalian balaia,lauik sati,rantau batuah, urang dunia
banyak kiramat,manolah wa’ang galang sapik,dangakan juo dek ang
galang sapik, nak bak pucuak cinto kabulan ,tangih buliah pucuak tak
dapek tingga galang sapik, manggigik jari kok indak dapek,usah tarimo
taruah urang.
G.Sapik : apo katenggang biduak pincalang
Angin barambuih tiang lah patah
Dima katampek tapi pantai
Apo ka tenggang tupai janiang
Hitam hanguih rimbo rang kambah
Kamano bada manggapai lai,
Jikok busuak badan nan buruak.
Ha,,, ha,,, ha,,,

B.Bgnto : Mano kalian nan baduo, usah kalian banyak carito juo, induak-induak
awak kato urang, kok lai bapisak galembong kalian, bukaklah langkah
dari sinan, nak denai iriangkan dari siko,ha ,ha ,ha ,ha
G. Sapik : Manolah wa’ang bujang baganto, usah waang cancang kaladi, pandan di
hulu aladuangkan, usah wa’ang bakalo duo kali maramang bulu
mandangakan, indak tau wa’ang iko didalam rimbo gadang, indak
wa’ang takuik jangek kabanteh, indak takuik nyawa kamalayang,
eloklah bujang babaliak pulang, tinggakan sinilam ditampek nangko,
baitu hati kami mangko sanang, alah kasanang di bujang baganto.
B.Bgnto : Mano tuak leman jo galang sapik anak buah panglimo gaga, kalau iyo
nilam denai tinggakan, langkahi dulu bangkai denai, baru nilam kalian
 bao.
G. Sapik : Manolah wa’ang bujang baganto, kareh pulo kapalo wa’ang, nak
marauang-rauang rang gaek wa’ang kamari, kok bacarai nyawo jo
badan, itu dek kami nan kasanang, eloklah wa’ang babaliak pulang.
B.Bgnto : mano rang mudo janyo hambo,mandaki jalan kasirukam, manurun jalan
tantang rimbo tabek, dagang di laia lai tak karam, konon kok balaia
dalam tabek.
G. Sapik : Manolah wa’ang bujang baganto muluik wa’ang kalua sangek
kasa,kami kaluko indak wa’ang kana, kini baitulah malah dek bujang
baganto, mari kito cubo agak sabanta, sambia mambuang-buang
langkah, sambia mangaluaan paluah buruak, eraklah langkah dari sinan,
nak kmai nanti dari siko,

: B.BAGANTO SADANG BACAKAK JO G. SAPIK

B.bganto : Hep,hep…. Iko nan yo dek kalian ???

T.leman : Taruih galang sapik hep hep,,,
G.Spik : Apo nan kanai tuak leman,
T.leman : Ampang limo tolong, tolong,tolong, mati kami panglimo,tolong kami
panglimo,tolong,,,
Panglimo : Manolah wa’ang bujang baganto, iyo pandai bana wa’ang mambuang
langkah,sia guru maaja, siapo urang manunjuakan, bia jo denai
batantangan, nak tau jantan jo batinonyo, sambia mambuang paluah
buruak, sambia mamasiah-masiah langkah, ang balun tau di diri denai,
denai bagala panglimo gaga, mambajak di tangah koto,nan juaro tangah
galanggang, indak paja ketek nan gadang sirawa.lai ka jaleh dek ang ,,,
B.Bgnto : Cih,,, manolah tuan Panglimo gaga, sajak ketek denailah tau, Panglimo
nan gadang di nagari, juara di tangah galanggang, tapi samantang pun
baitu, kok kayo,kayo diharato rampasan, gapuak maungguak lamak,
wak gaek taruang asam, lah gaek salero tajam.
Panglimo : Kurang aja wa’ang bujang baganto, manolah wa’ang tuak leman jo
galang sapik, capeklah bunuah bujang bagannto sabalun denai berang
bana.
G.Sapik : Kalau baitu kato tuan bialah kami bunuah paja nangko.
T.Leman : Manolah a’ang galang sapik, bialah kito bunuah paja nangko, kok indak
kito mati kaduonyo, alah kajaleh di ang.
B.Bgnto : Mano kalian nan baduo, kareh juo kapalo kalian, tapi samantang pun
baitu, kok disinan bana niek hati, bukaklah langkah dari situ.

: NYO ULANG BACAKAK SAKALI LAI

T.leman : Indak talok dek ambo lai do panglimo ,tolong panglimo ,,,

: DENDANG

: Malompek ampang limo, sakali lompek

Tidak disangko-sangko malayang saparati sikok

Ampu kaki bujang baganto

 Hinggok dijakun ampang limo

Talilantang bagaruh hangok dibueknyo.