Aiih… uji anang chapuh ragak kita banyak ke duduk beterimbai di kerusi mayuh betugung,
Enti kita deka ningaka tubuh imun aku nusun pantun ari pun nyentukka ujung,
Tubuh imun aku minta ampun meremika lepi aku wai menyadi pala patung,
Lanji selanji nadai ngemadas nya batang pauh bali kena sangkut kakigeruna ngindang,
Semata urat beguna amat tau diambika ubat penikal semengat penabar mimpi awakka iya enda
nyadi lalu puntan,
Aih batang iya tau diambika peransang nyadi berani tau serang,
Bungkung tau diambika puchung jayau mengeri ngasuh ati orang laki berai menatika emperuji ati
tinduk dipaji papan dipantang,
Daun iya Raja Mijom tau ambika engkerabun antu gerasi, pengelemi tulang antu dundang.
Aiih udu malu meh tudah aku kita ke runggu batu Apai Sali,
Enti pemandai enggi aku nadai laban aku ukai Jawai dikumbai Menti,
Kada meh aku tau muji kita orang laki ke sidi di jari tunjuk butang,
Kada meh aku tau ngela kita Majin Aka mantap sawa sengkalan sima ular kendawang,
Kada meh aku tau ngaga ke nuan geguluk mantap sambuk sengkalan puchuk dan tapang,
Aih enda lebu penipu nuan liba kedu ngelagu tangkai lempuang,
Mula mit empai nuan besai teberusut pansut ari perut tampang lempuang,
Kita orang laki mengat meraya-raya beseraka ati naga berambau mansang.
Hari nya indai nuan kedai ambai enda tau nachai gajai baka perambai manuk menang,
Apin nuan lalu bepenti enda tau munuh serenti babi belang,
Aih dia nuan lalu dikandut karung pengikut enggau perut tampung lempuang,
Aih udu meh pengada nuan remaung sana, sebaka enggau pengada Kiai
Dia nuan ada digalaika indai nuan di tikai bebuah bekebirai baka bungai jelumpang tumbang,
Aih ada peda lelenggi deh Meni datai ari ai menyadi Beriak Bujang Sepuchuk Benang,
Ada lelanji Kuchi Hari mai sugi nanti ngentudika lepi sanggul lintang,
Dia nuan lalu disunggaka indai nuan kili tumpur geraji Pulau Pinang,
Aih amat laju meh nuan selantang anak aku ari peluru leka senapang,
Aih udah nya nuan lalu dibai indai nuan pulai ke penyakai rumah panjang,
Lalu disemaka iya enggau Apai Sabit Bekait pungka laki orang di langit mit bejelepang remang,
Ari nya indai nuan ngumbai nuan sebaka enggau Keling Gerasi Nading Bujang Berani Kempang,
Aih dia ada tuchum mulut nyingkum enggi nuan baka ke ngulum gendum rampang pinang,