Pantun Puji

Aiih… uji anang chapuh ragak kita banyak ke duduk beterimbai di kerusi mayuh betugung,

Enti kita deka ningaka aku nusi ensera pelandai karung’

Pelandai kechai nyabakka rambai rambu ubung,

Enti kita deka ningaka tubuh imun aku nusun pantun ari pun nyentukka ujung,

Endur tubuh ramping aku nerantingka kita puting ujung dabung,

Nebah sanggah dilah tengkurung batang rekung,

Angka sema iya salah empai nuntung,

Tubuh imun aku minta ampun meremika lepi aku wai menyadi pala patung,

Enti sema iya ngemediska ati kita orang laki,

Tubuh ruri aku nusun jari dua bebandung.

Lanji selanji nadai ngemadas nya batang pauh bali kena sangkut kakigeruna ngindang,

Semata urat beguna amat tau diambika ubat penikal semengat penabar mimpi awakka iya enda
nyadi lalu puntan,

Aih batang iya tau diambika peransang nyadi berani tau serang,

Bungkung tau diambika puchung jayau mengeri ngasuh ati orang laki berai menatika emperuji ati
tinduk dipaji papan dipantang,

Dan jurai tau diambi jempulai ke ubat padi mali singgang,

Bungai tau dijapaika ubat pandai landik nengkebang,

Daun iya Raja Mijom tau ambika engkerabun antu gerasi, pengelemi tulang antu dundang.

Aiih udu malu meh tudah aku kita ke runggu batu Apai Sali,

Enti pemandai enggi aku nadai laban aku ukai Jawai dikumbai Menti,

Kada meh aku tau muji kita orang laki ke sidi di jari tunjuk butang,

Kada meh aku tau ngela kita Majin Aka mantap sawa sengkalan sima ular kendawang,

Kada meh aku tau ngaga ke nuan geguluk mantap sambuk sengkalan puchuk dan tapang,
Aih enda lebu penipu nuan liba kedu ngelagu tangkai lempuang,

Mula mit empai nuan besai teberusut pansut ari perut tampang lempuang,

Dia indai nuan kedai ambai beempakakechala mega gantang,

Kita orang laki mengat meraya-raya beseraka ati naga berambau mansang.

Hari nya indai nuan kedai ambai enda tau nachai gajai baka perambai manuk menang,

Apin nuan lalu bepenti enda tau munuh serenti babi belang,

Aih dia nuan lalu dikandut karung pengikut enggau perut tampung lempuang,

Dia ada nelesa ujan nyala labuh jarang,

Ribut pen lalu bepuput angin kenchang,

Kilat nyelar jampat nyelambai selikap pintu remang,

Ngangau buau di kampung puang,

Aih udu meh pengada nuan remaung sana, sebaka enggau pengada Kiai

Ria pungka laki orang di Nanga Panggau Dulang.

Dia nuan ada digalaika indai nuan di tikai bebuah bekebirai baka bungai jelumpang tumbang,

Dibumbu enggau kumbu bali tengkebang,

Dibamah enggau buah pinang mekang,

Disembur enggau chekur pemantuk burung rindang,

Dia nuan lalu ditelentangka indai nuan dalam dulang tapang,

Lalu diretat enggau ubat seribu sakang,

Lalu digagaka pedara lima piring kelingkang,

Dinga lalu begigit rawak mit ngilah jerit tatai bintang,

Aih ada peda lelenggi deh Meni datai ari ai menyadi Beriak Bujang Sepuchuk Benang,

Ada lelanji Kuchi Hari mai sugi nanti ngentudika lepi sanggul lintang,

Jejindung Mabong begagung kulit tegung remaung lubang.

Dia nuan lalu dianjung orang ke ai asi menyadi iring reni baya butang,

Dinga ada rerengung gong penutung dipangkung Lulong seduai Kumang,

Megu dulu nangkin duku gembar berayang,

Menani dudi ngirit serenti babi belang,

Gendai megai tambai menira perang,

Dia ai lalu disambi indai nuan enggau rangki pelaga umang,

Ada dipantap Rechap enggau dajap mata pedang,

Dia nuan lalu disunggaka indai nuan kili tumpur geraji Pulau Pinang,

Disungga indai nuan kulu tumpur batu galang melintang,

Aih amat laju meh nuan selantang anak aku ari peluru leka senapang,

Amat lasit ari sumpit betibung punggang,

Sebaka enggau pemandi Patinggi Keling Aji laki Kumang,

Aih udah nya nuan lalu dibai indai nuan pulai ke penyakai rumah panjang,

Lalu dikemilai enggau ensugai bali tengkebang,

Lalu disandik enggau batik batang selindang.

Dia nuan lalu serintak nyabak kerarau rang,

Lalu diwa indai nuan baka ke ngua sawa ular belalang,

Lalu disemaka iya enggau Apai Sabit Bekait pungka laki orang di langit mit bejelepang remang,

Enggai ga nuan badu meraya ai mata sereta dua labuh beketalang,

Ari nya indai nuan ngumbai nuan sebaka enggau Keling Gerasi Nading Bujang Berani Kempang,

Aka Laja Lelinggi Tinggi Aka Baroh Merabong Kijang,

Aih dia ada tuchum mulut nyingkum enggi nuan baka ke ngulum gendum rampang pinang,

Aih kita orang laki sigi sidi di jari tunjuk butang,

Sigi disadang tubuh ruri nyadi ke jematan jaku Iban,

Gudang penemu jaku kitai empu,

Ngambika penemu jaku kitai empu,

Ngambika kitai maju, orang nya sawa lunang, ngilah orang.