BIAU NGELALUKA PEMESAI Sa! Dua! Tiga! Empat! Lima! Enam! T-u-j-u-h!

Enda aku busung ngelanggah gunung, Enda aku tulah ngelanggah tanah, Enda aku lesi ngelanggah hari, Enda aku sulai ngelanggah lemai. Baka wie tampung tali, Baka rotan tampung danan, Baka sega tampung bila. Nya alai charik labung batik ganti labung pelangi, Parai orang ke tuai ganti tubuh kami. Aku ke miau aku ke nesau, Aku ke nyada aku ke nyapa. O ho! O ho! O ho! Nya alai kaki aku ke bekenji bediri di segi baja segala Mulut ngetup pulut mata changka, Belakang tap seludang baju ara, Pala tangkup puga tanggi nasa. Aku ke miau selanjau ijau manuk kubah banda. Asai ke lebih-lebih meh aku sehari tu luba-luba, Asai ke enda beradat meh aku sehari tu Enda bebasaka kita sebala. Tang enda pia, lempang bela tubuh baka, Laban aku udah diambi bala menyadi, Udah dipaduka sida iya. Diasuh sida iya ngelaluka penatai orang besai, Iya nya tuan Y.B. kitai enggau semua bala iya. Nya alai enti pengerindu enggi kami ditu Ukai diteju ngagai siku enggau ke indu, Enggau ke tuai enggau ke besai, Semua enggau ati gaga, Nerima masa penatai sida iya. O ho! O ho! O ho! Nya alai aku agi minta tulung Tuk Pek Kung petara Cina. Minta adu petara Melayu penemu tuju jalai bekereja. Minta chuan petara Iban ngambika meruan nguan menua. Minta peda petara Dayak ngambika kita ila badu merinsa selama-lama. Nya alai jaku nya aku lekaka dia, Tinggal dua tiga leka. Aku minta sagu sida Biku Raja Petara. Minta katung sida Lambung ngagai Tuchung Rabung ruya-ruya, Ngambika kitai sama bela gerai, ku Sempandai. Sama gayu ku antu, nadai apa ku petara. Lantang senang ngintu pemansang. Gerai nyamai, chelap lindap, gayu guru, selama iya.

BIAU PENGABANG Sa! Dua! Tiga! Empat! Lima! Enam! T-u-j-u-h! Nya alai enda aku busung laya lela, Miau selanjau manuk lia, Laban kaki aku udah bediri ba segi batu tangga, Belakang tinggang seludang baja mata, Berang tanchang ibang ngeli sawa, Perut rutup-rutup nangkin rajut batu lukut danan sedepa, Ngeli nanyi ngetup badi mata lungga. Nya alai kenu ku aku ke nyampi, Tang nyangka leka tu enggai nyadi, Enda manah didinga kita, Itahka kejaku bala indu, Ke gempuru duduk dia. Itahka kenang kita apai orang, Ke betentang mangkang kelimbang baku lama. Itahka ngeragak sida ke nembiak sambil ketawa. Tang ka enda Semadi randa nembu pengawa kereja orang. Nya alai kitai tu udah datai ba balan ba palan, Baka pengawa ke lemai tu. Baka bala pengabang udah gempuru udah gelumu, Udah besaruk udah duduk; Nya alai tu nampung adat orang kelia, Orang ke udah ruat lama nyaya. Nampung pengawa sida aki ke udah lama jaga, Lakka tu enda punas; Lakka tu tampung orang ke rebak dudi. Nya alai tu udah biau aku enggau manuk selanjau manuk jelayan, Semua kita tu diajih aku begamal melan-melan, Indah enda baka terebu baku chuan, Baka ti ulih digenggam telan segala. Nya alai ngajihka jari kiba kita tu, Bepegai ba tangga Anda Mara. Jari kanan kita sama bepegai ba jematan Raja Petara. Semua kita lantang senang nuju jalai pemansang!

AI ANSAH NGASUH ORANG BEJAKU Ai pugu semambu ngandong Ai mayang pinang segupong Kelimbak ari tapak tasik lepong Puput ka selulut ribut angin nyabong Pangka ka bua gumbang basabong Mudik ka Sarawak nuju awak bukit santubong Lalu sambut tuan bishop niang dato basil temenggong Enggau kuku ujong kudong Nya alai enggi iya Kena sida gelumu duduk betugong Nyebut ujong leka sembiang Nya alai kelimbak ari Sarawak kubu pumpong Lalu tepan ka tuan commandan di luan kapal lambong Mudik batang roban (nitih ka manoa) jendong Serapit kami (orang ka datai/kitai sarumah) enggau Paranchit ringgit burong Niri ka sadong tiang kelingkang Tang enggi aku ke malam (pagi) tu Di engkah aku manah manah Di kalasah tikai tampong Sua aku enggau tapa ujong kudong Kena aku ngasak terinting putting Ujong dabong enggi nuan Ngambi ka iya benyawa taung taung Munyi udut laut semananjong Nimang peringai ambai sulu sangkong Minta orang surong tinchin tunang Nya alai nuan tu meh punggal (aya/wai/esan) Magai tampok jako sempekat (enti tuai rumah/sapit iya) Nemu nangkap leka ujan lebat Keberembat mali salah Nya alai nuan tu(unggal)di gelar aku Randau jerangau merah Di uji orang ka tuai enggau babi kebediri atas darah Pucuk bangat pengarakah, batang kemelang merah Nya ali dempa tau, tang anang ngunyah Tebang tau tang anang ngerebah Dan juring anang matah Laban nuan begulai enggau Sragindah Nya orang ka tau ngaga tanah Mesai buah langgu embawang Nya alai tuai kenama sragindah Nyumpah nuan enda tau enda bebuah nyelinting gagang

AI ANSAH Ai gemiri tali benang betabu Ai pugu buloh pengerindu Nyamai endar kena bejako Ta tau ngada ka dilah Ai batang lengan kubah Bejako kecah kecah Di tengah bala tuai Tu ga kena aku ngansah Terinting putting dabong betatah enggi nuan Ngambi ka bejako enda bangat jampat Tang enda ga lubah Tang anang ngasoh salah Ngambi ka nyamai dinga kitai Kebesilah dudok berintai. BIAU PENGABANG Aku ka miau manok dua Manok tiga, manok ayam, manok pinan Manok bejalak, manok bekuak Labang lebus engkechung terus Burik kesa tuntung blaja Nyangka kita ka bisi mimpi, salah ari Bisi kenyap salah pengangkat Nyangka kita kebisi raup nutup mua Bisi pimpin atas bala Manok tu endur iya telempai, alai tepanggai Nya alai tak kepai kepai pasingan Tangan jari pemakai Aku ka miau selanjau ijau manok tawai Ensera ka moa kita Kekadunga dudok berintai Tak enda malu meh tudah aku Di lempedu kandang kamai Tang ka enda laban aku meda Betis enggi nuan(kita) piit anis aping kirai(tembawai) Meda punggong enggi nuan Bejong lumpong sirat sigai Meda belakang kilang kilang Pandang seludang baju gajai Meda dada sangking santika taring beluai Meda tangan tanggam jam tali rantai Meda rekong sengkong gelong tali neck tie Meda pala enggi nuan (kita) lingga lingga Lekat tempuga bulu ruai

Nya alai enti maia bumai Nuan endang teleba ngempong Paong burung tambak bragai Ti maia berumah nuan endang dulu Ngentak ka kaah talibah kirai Aya alai pantar enggi kita Begegar anchau tikai Rumah ka begagah tiki temuai Nadai lepa tiki temuai Laban nuan endang di padu Ka orang nyadi tuai Nemu ngarintai adat pechara Nya alai agi ga kinda kinda Pasingan tangan tunjok kiba Aku kemiau enggau selanjau ijau manok lia Ensera ka moa kita kemumok dudok betunga Kejah kejah dikelasah tikai empeda Nya alai ke tadi bagi sida ketuai Megai penyamai rumah lada Nya alai ketu bagi sukong bandong sanga Kita sama nemu sukong bandong sanga Gelar kitai bragai panjai lima Jampat entachar kin kia Laban randa nemu jangka uta benda Nya alai tak kindang kindang Tapa kiba jari ngenkang Aku kemiau ka selanjau manok labang Ensera ka moa kita ka kedunga dudok bepangkang Kelah kejah nengah klasah tikai bakuang Tak enda malu tudah aku di lempadu kandang lempuang Tak enda supantudah pangan Tatam iban segang bala pengabang Tang ka enda laban ke tadi Bagi sukong bandong tiang Nya alai ketu bagi sida ka jepu Benong mansang, biak benong bujang Nya alai tak bisi kudi batang ai ulu simanggang Kacau negeri sibau ngili batang rajang Nya alai enti ngayau bedarat Sida ngambu dulu, laban sida nemu Perepat jalai mansang Enti ngayau merau sida ga ngambu dulu Nepan perau indu penchalang Nya alai sidar di gelar kitai Petugang manok labang Tada ngelong ngelingkang,iko layu Chelom galembang nya manok endang

Poh tandang ka kitai di tekang moa mensia Nya alai agi ga kindong kindong Pasingan tangan jari ujong Aku kemiau ka selanjau ijau manok sabong Ensera ka moa kita ke kedunga dudok batugong Tak baka ke enda malu tudah aku Di lempedu kandang jantong Tang laban ketadi bagi sida jenayang bujang lempong Nya alai ketu bagi sida ka mit Bakalachit, benong bakaligong Lambu bejako keru changka (kelampau) sumbong Nyangka sida bisi di inang kumang kandong lulong Di iring bunsu telanjing Datai ari taengkaching pancar wong Ai imbai sempadai datai ari tatai nyabong Nyangka diew sida ila bisi di asoh Nyadi penghulu megai pasu kubu kabong Nyangka jenti sida ila di ambi Nyadi kerani megai kinchi ringgit burong Nya alai ninga tuan rajah (gavernor) Datai ari kuala tasik (kuching) lepong Dia sida di asoh orang muka bop lama Teruba ngaga pasar betong Nyangka medong sida bisi tetamu Ka papong adat rakaya Nya alai naka tu aku ngelulu Ka kita enggau jako nyampau di itong Naka tu aku ngeka kita enggau rasa ujong dabong Nya alai lepas tu ila, nasit kita pun nait Ari tumbit kaki nanggong Tuah pan nyau nambah Ari dilah ujong dabong Nya alai emti maia nebas enda berasai Kita ngerimbas babas repa Meda utai umai udah besai balat bekebong Ti maia nebang enda berasai kita Niri ka bantang tiang tangga, meda rebaan Udah nyapan baka di lumpong Ti maia nunu enda berasai kita nguru sempun bara Peda api udah menyadi maau durong Ti maia nugal enda berasai ngentak Kabalang tugal bapangka Peda udah nait ka bukit datai di tuchong Ti maia mantun enda berasai kita Turun lelak gawa, peda padi udah nyadi Ngampoh ka punggong

Ti maia ngetau enda berasai kita segau balat rua Peda udah penuh engkalauh bingkai sintomg Enti maia berangkut enda berasai Kita mugut lelak ngema Peda tak udah penuh bidai pakan tekalong Ti maia besimpan enda berasai Batekan ngedar ka baka Peda udah penih simpai tibang betampong Nya alai ambong buah, ambong mengkudu Tuah pun udah manah ngijong ka pengayu Nya alai gayu ko aki kitai setuku Buban pala munjong bajumpong Gerai belama ko aki kitai manang menyaya Nya orang kebetalaga baroh rekong Orang nya enda bejako ngapa bejako bula Laban iya ngembuan batu sega Sedepa paras lumpong Putting sangking keeling Enggau taring babi begelong Punggang tanchang kumang Enggau balembang lambar ubong Ujong sangkom tutong Enggau puchong mali rampong Ubat penyangga nyawa anak mensia Gayu guru, kaya raja nguan menoa AI ANSAH Tu ai besebun ambun belaboh Ke bebuih ngampoh menoa Tu ai seregang pasang menuh Ngampoh ka kuala pauh laba Tu ai pelam madu rentuan Tata sedan bulan pernama Tu ai kumbai kechapah batu belah Panjah darah babi sesapa Tang ukai dipulah puan seri Jeanne Abdullah Bini prime minister Malaysia Ukai di gaga indu dayak Di paku, sila rampa N.22 Tang ka bendar ai tu ipar (unggal) Di udar ari menoa luar, dunya eurupa Nya alai rempah cukup manah, seribu bansa Rakit enggau buah grape Champor enggau buah anggur segala Begulai enggau alcohol, ngambi ka bisa Lalu di injin uchi queen ke benama princess ann

Ba injin ke bamain nyadi lepa Lalu bebali nyadi ai naka pemisa Lalu di churong tama puchong butol segala Peda puchong betegong sangkom temaga Lalu dilekat ke sida iya chap Tulis English jako antarabangsa Tang dama ai tu unggal, aku enda nemu Nemu nya amat sekali ka tiru Tang enti nitih ka company ke bempu Johnnie walker (hennesy ox/ otard xo) dama Nya alai tak lalu tusun jayah manah manah Dalam sarah kotak ngelepa Nya baru di idar di serata dunya Ngena kapal cargo Nya alai ketawa lekik lekik butol perintik tu suba unggal Di bai orang nengah tasik, rapas tilik leka mata Nya alai sekeda arak buka tu suba Bisi di jual comandan tambi negri India Nya alai di beli sida niang rajib ghandi Laban ai tu manah ka peransang ati anak lelaki Nyadi army nyaga negeri, nyaga pengelikun menoa Sekeda jayah arak butol merah Kirom ka menoa timur tengah Beli perintah sheik al-shabah Laban tu manah ka ganti dadah bansa ganja Nya alai sekeda arak buka tu suba Di bai kapal ke benama grang wesdom Ke menoa jepun negri Tokyo Sekeda medong di bai kapal lambong Kindong kindong mansa semananjong west Malaysia Tak batok nerakan ai brandy butol besuran Nengah tasik laut cina selatan Siang malam pangka geman gumbang bebunga Nya alai malik nentang butol balang Meda silak kuala rajang Besenentang batang lalang ke betumpu tiga nanga Nya baru gumi kapal besi Lalu berenti tanjong mani tumpu negri Tibam sawmill company pusaka Lalu ngetu ai butol biru tu suba, ngeju basila Nya alai gumu aku tu suba mai bala Tak lalu lantar kami bidar Berangai indai panjai tiga Enda kakang dia jawing Lalu niki kapal panjang

Nyerumba petang jauh lina Nya alai lalu di beli aku suba Arak butol brandi tu ngena Cash money sua segera Aku ke meli beabis ati betunggang nyawa Engai ke kena tan bala kastam Di baris polis denda masok penjara Tak beguai aku pulai berumban naka iya Bai jawang aku ngelayang batang rajang bilak dua Nyemerang batang lalang, ngena bangkong panjang Nengah entubah, musin melungkin Ngelimpas menoa keranggas, tama gerang Nyidi ulu sedie ngumbang pati lemayong rinda Lalu di bai gelai aku pulai Nepat penyurai rumah raya Taroh kami tegoh tegoh Kunchi kami ba jemari berimbai dua Nya alai arak tu ipar (unggal) Manah kena kitai bungah Di kena ngintu hari kristmas nyambut pengada tuan isa Agi ga manah, kena bugah rami nikah Besebelah sebelah pinang seleka Bejadi ka nanyi rampang bunga Tang saritu, laban randa kitai bisi pengawa besai kerja Gawai dayak, satu hari bulan enam Di intu samoa kitai bansa Nya alai di bai aku ka ruai Ngagai bala besai tugong mensia Nya alai iri aku ari lenggi butol segala Peda tak lejah lejah Chawan mirah tu ipar (Unggal) Ningang kelasah tikai sana Kena aku ngansah terinting putting dabong seleka Enggi nuan, meda gamal nuan sental tambah begaya Meda ngepan (pekayan) enggi nuan chukup raban (moden) Style kemaya, tanchut me-irut irut lepi terika Baju manah udu, belinsu biru bejalir jera Jam tangan ke meruan ke meruan angka kalinda Bok pisin ukai main nudong ke moa Pala tata lala minyak lunda Agi ga jayah nuan tu endang betuah beri petara Besai nasib nyelit di tumbit tapa dua Bisi di jeling keling seduai laja Dintu antu datai ari peru puak kerapa Tulong tegung ramaong sana Agi ga tinda nuan tu endang bisi Kemata ka baya bujang senang Nyamai kitai tu ila tulih ka pengeraja

Nya alai ka tungkah Tenbai nuan ke pandai dalam sekula Bisi degree pangkat engineer. (Doctor / surveyor) Tunjok nipis nuan tu endang teleba nulis di atas mija Tunjok empat nuan pandai Narachat ball pen ai dawat Rejat rejat dalam surat kertas kerja Tunjok putting enggi nuan endang landik Nulis chok kuning di dinding papan bebunga Tunjok besapit endang landik naib Tak bejarit betol semoa Nya alai jayah nuan muai diri ari kerja perintah Muka bisness ngaga pegong undang rimo Nuan tu sema ka aku ngagai lamba teras segala Bejuluk pelamping dulang chenaga Ni enda pia, laban tinda nuan tu Nemu nulong mensia semoa orang Nya alai duit enggi nuan ukai mimit Teda empa laluh belanja Muka nuan pengawa maioh bansa Menoa lawas nyau luas Endor gumi nanam kayu jati Rapas mata, berpulih hecter Nya alai melayu bla nemu Cina udah nemu cherita Nyadi menteri megai menoa Ngambi kitai ila nyamai idup menyana Nya baru jawing kitai ila Tak senang betambah kaya Segang pemansang buah merdeka kitai semoa Bangat manah lentur tangkai Nya baru tinda kitai tu ila menyana Titie ka jeraya Tetemu ka nanga jalai pemansang Nya alai ai tu, ti udah di irup Enggau mulut tangkup dabong seleka Tu anang ngelua nuan ipar (unggal) Kandut di perut selangka dada Tu ngasoh runding nuan tekuing tajam bekira Ngulih ka penguntong jalai kaya Agi ga tu ko aku ai pengayu beri biku Bunsu antu petara Ngambi nuan gerai nyamai blama Gayu guru nguan menoa Tanggong chelong kaban sada Ngambi ka tinda nuan ila berita Lebih senang lantang ari bangsa orang