Leka Biau Gawai Dayak Semua kitai!

Sa, Dua, Tiga, Empat, Lima, Enam, Tuuuuujuh.

Enda aku busung ilang laya,
Megai langgai manuk banda,
Kena aku miau ranyai gawai kita,
Laban aku tu nampung jaku sera nyawa,
Enggi aki kitai Rekaya,
Iya endang landik ngajar kitai bebasa,
Ka semua bala pengabang.

Nyadi baka gawai ke taun tu,

Kami minta jalai bidik enggau lansik,
Minta betuah enggau belimpah,
Minta gerai enggau nyamai,
Minta chelap minta embap.

Nya alai ranyai udah ga didegi,

Kami ngelaluka bala kita pengabang
Nyaup aku ngupas padung, ngupas tilung,
Ngupas panggang, ngupas ruang,
Ngupas penuduk, ngupas peninduk,
Ngupas ruai, ngupas tikai.
Ngambika iya bau rengu, bau garu,
Bau empenit, bau bangkit.
Ngambika endur betunggah, endur besembah.
Ngambi tampak Tuan, tampak Sultan,

Tampak China, tampak Belanda,

Tampak Laut, tampak Bunut.
Tu endur besauh, endur belabuh,
Endur betanya, endur bepinta.
Ngambi kami mansang, kami nyegang,
Kami ngebung baka langit,
Empusung baka bukit.
Ruai kami baka danau,
Tampak meh kami tu baka pulau.
Gayu guru! Gerai nyamai!