Ensera Lama Iban

Sakeda Ensera Lama Iban 1. Ensera Engkejemu Seduai Engkejuang Nyadi sekali dulu kalia di menoa ti dikumbai Lubok Meram Lansar Kerangan Betumpu Man enggau Rantau Rutan, ti endang diwan Raja Ganali enggau Bunsu Ikan, bisi dua iko indu benong dara, benong beramban mansang. Nama seduai nya, siko benama Endu Engkejemu lalu nama siko Endu Engkejuang. Gamal seduai sama bajik, tang iya ke lebih agi bajik nya Endu Engkejemu. Lalu ba pasal penemu enggau pengelikun pendiau serta enggau pengelandik ngereja samoa macham pengawa pan enda mega telaban ka Endu Engkejemu. Nyadi Endu Engkejuang tu jauh lain agi perangai enggau gaya. Iya cherdit bendar bejako sereta ketik-ketik pendiau enggau tak gilik-gilik gamal, reti nya linggarlinggar agi ari Endu Engkejemu. Enti temuai bisi datai, dudi orang bukai, dulu iya datai nunga. Iya ke bendar Endu Engkejuang endang sigi jegit ari samoa sida ti sama sarambau. Ba pasal ngereja pengawa iya endang enggai alah laban orang. Ni pengawa endang diuji iya magang, tang gamal utai digaga iya nadai tentu menuku, tak samina nama tembu. Ti numboh ka pengawa iya enggai dudi. Ko ati iya, awak ka tembu dulu ari enggi orang. Tang suah pengawa iya nya tadi lalu enda tembu. Nyadi sekali leboh Endu Engkejemu seduai Endu Engkejuang benong mandi, dia Endu Engkejuang nanya Endu Engkejemu. Nama utai kena ngasoh buok panjai awak ke sabaka enggau enggi nuan, wai? ko Endu Engkejuang. Eh! Wai, nadai nya bisi utai macham-macham dikena aku deh wai sulu, semina diasoh aku sugu tulang tilan. Pia ko Endu Engkejemu nyaut. Ninga munyi nya Endu Engkejuang lalu enda chachamang lalu ngambi tulang ikan, lalu diasoh iya nyugu buok iya. Sugu buok aku tulang tilan, sugu abis, sugu lengis. Ko Endu Engkejuang. Tulang tilan lalu nyugu buok iya munyi ti endang diasoh iya. Peda udah nya tak nadai selambar agi buok Endu Engkejuang tinggal, nyau lasu meh buok iya. Meda utai bakanya, iya lalu beguai-guai sereta enggau sabak-sabak ngagai Endu Engkejemu, madah ka buok diri nadai agi tinggal selambar, udah abis disugu tulang tilan. Anang ke ngasoh panjai, ngasoh buok aku abis. Pia ko Endu Engkejuang muchau kediri. Meda utai udah nyadi bakanya, Endu Engkejemu lalu madah ke iya jalai nyugu. Ka agi ila wai, munyi tu nuan ngasoh tulang tilan nyugu buok nuan. Oh! Tulang tilan! Aku minta nuan nyugu buok aku enggau manah awak ka iya mansang panjai merundis galak melesak. Pia ko Endu Engkejemu ngajar Endu Engkejuang. Ninga munyi nya, nya baru Endu Engkejuang nitih ka ajar Endu Engkejemu. Enda lama udah bekau nya, Endu Engkejuang tepeda ke lelaki siko ti sigat serta gangam bendar dudok ba ruai sida Endu Engkejemu dia. Tama iya ke bilik, dia iya lalu nelai Endu

Engkejemu. Oh wai! Sapa lelaki ke sigat bendar gamal dudok ba ruai kita dia? Eh wai! Utai ulih aku nempap ari limau rangan. Pia ko Endu Engkejemu. Ninga munyi nya Endu Engkejuang lalu beguai-guai pulai. Udah nya iya lalu nyau ngambi daun limau rangan, tang enda milih iya ke manah, iya ke chukup tuai, tak sebarang ambi. Laban ko ati iya, asal nya daun limau deka aja nyadi. Nya alai ambi iya daun ke tuai serta udah bisi charik udah diempa ulat. Daun nya lalu ditempap iya, peda lalu bebali nyadi aki tuai orang. Iya ga tuai, gamal iya ga jai ditambah ka agi enggau ikil nyau penoh tuboh. Meda baka nya Endu Engkejuang lalu mansang ngagai Endu Engkejemu madah ka penyai utai olih iya nempap ari daun limau rangan. Nadai aku nemu belaki orang ngenuai nya. Ko iya madah ngagai Endu Engkejemu serta enggau sabak-sabak. Kati alai enggi nuan sigat bendar gamal lalu enggi aku jai sereta tuai deh wai? pia ko iya nanya. Kati ko enda pia, nuan ga enda milih-milih daun limau ke manah. Tak ambi sebarang ambi, dini enda bakanya deh utai ulih nuan. Pia ko saut Endu Engkejemu. Enda lama udah nya Endu Engkejemu seduai Endu Engkejuang bedurok mantun ba umai seduai. Leboh seduai iya mantun nyamok maioh bendar datai makai seduai iya. Meda bakanya Endu Engkejemu lalu bejako nganu bala nyamok. Naka ga kita tu nyamok, deka bendar kita makai darah aku. Uji ambi ka bini kita skali aku tu. Ninga munui nya bala nyamok lalu naban ke Endu Engkejemu terebai ngagai rumah Raja Nyamok. Datai din, ba rumah Rajah Nyamok. Endu Engkejemu lalu nyadi bini Raja Nyamok. Nyau kelama udah nya, Endu Engkejemu nyau mansang tusah ati laban iya enggai nyadi pemakai ti diempa sida nyamok. Kitai sama nemu nyamok endang beridup ke darah mensia tauka jelu. Nya alai iya nyau enda nemu runding agi. Enti baka tu mati meh aku tu. Ko Endu Engkejemu bejako kadiri. Taja iya empu enda enggau Raja Nyamok makai, iya selalu mela laki enggau naka pemanah. Iya ngayan ke penusah ati diri ba moa Raja Nyamok. Nyau puas iya ke berunding ka penusah diri, dia iya lalu ngaga diri sakit. Meda iya sakit dia deh Raja Nyamok bekenanas ngiga jalai ngubat iya. Iya lalu ngambi manang. Dia deh Endu Engkejemu lalu dipelian ka jaban, dipesaut ka likup, tang anang ke ngasoh iya gerai, ngasoh iya majak balat agi. Udah nya tadi Endu Engkejemu lalu ngaga diri mati. Meda iya mati, lalu disenggai bala Raja Nyamok enggau cukup gaya serta enggau cukup basa. Diberi Raja Nyamok bai iya enggau cukup ngepan, cukup pekayan bansa Iban. Nambah ka nya mega, iya dibaiya enggau setawak, enggau dumbak, enggau bendai, enggau menyarai, enggau engkerumong, enggau guong, enggau benda, enggau cukup tengkira. Nyau maia nganjong antu, Endu Engkejemu lalu dianjong bala nyamok ngagai pendam. Datai din, Endu Engkejemu enda ditumbak, tang diengkah ka sida iya ba atas panggau ke endang udah digaga sida.

Kabuah alai iya enda ditumdak, laban endang nitih ka baka adat Raja Nyamok, samoa turun menurun Raja enggau bini sida iya enda ditumbak enti leboh sida bisi mati, tang diengkah ka ba atas panggau. Lepas nya bala orang ti nganjong antu lalu pulai karumah ke samoa. Leboh sida udah pulai samoa, Endu Engkejemu lalu ngesai ka diri angkat lalu ngesai ka kain ke dikena Raja Nyamok malut tuboh iya. Udah bungkus tubuh iya tebuka ari tuboh iya, iya lalu pulai ngagai rumah iya empu, lalu mai samoa utai ti udah diberi Raja Nyamok ke baiya iya. Nyau baka ke pindah gaya pendiau Endu Engkejemu empa pemaioh utai dibai iya. Datai iya dirumah sida, orang lalu begau ka utai ti dibai iya. Bala sida sarumah lalu nanya iya, dini alai iya bulih utai ngemaioh nya. Iya lalu madah ngagai sida, samoa utai nya olih iya belaki Raja Nyamok. Ninga rita nya, Endu Engkejuang laban iya enggai alah laban orang lalu sengit-sengit, lalu nurun ka umai, minta bai nyamok awak ka bolih pengeraja baka enggi Endu Engkejemu. Datai iya dumai endang baka selama, maioh nyamok nutu serta makai iya. Meda bakanya iya lalu bejako. Eh nyamok! Deka bendar kita makai aku tu. Ambi ke bini kita skali aku tu nyah. Ko iya. Ninga munyi nya, nyamok lalu naban ka iya pulai ngagai rumah Raja sida iya. Datai din Endu Engkejuang lalu diambi Raja Nyamok ka bini iya. Nyau maia orang ti berapi apa indah, Endu Engkejuang lalu begiga ka beras, tang iya nadai nemu beras seleka. Samoa benda enggau tibang dipeda iya penoh laban darah magang. Kati ko enda bakanya, nya ga endang pemakai nyamok, baka padi ti endang pemakai kitai. Laban iya ke enda liat ati baka Endu Engkejemu, iya lalu ngeransi laki iya Raja Nyamok, ko iya, Nadai apai aku kala ngajar tauka mai aku makai darah baka kita tu. Ukai orang tau enggau begulai sejalai baka kita tu. Ninga ransi bini iya munyi nya Raja Nyamok lalu ringat sereta pedis ati ngagai Endu Engkejuang. Nuan tu meri aku malu ba moa seribu, sereta lalu mechat pemakai kami, nya alai nuan kena ukom, dibuai ari menoa tu. Ko Raja Nyamok nganu Endu Engkejuang. Ka pengujung nya tadi Raja Nyamok lalu ngasoh anembiak iya nanchang kaki-jari Endu Engkejuang lalu narit iya ngagai menoa sunyi didalam kampong din. Iya lalu ditinggal ka nyamok didalam kampong kadiri, udah nya sida lalu pulai karumah. Nyau kapuas tudah Endu Engkejuang ke engkasak kakiba, engkasak kakanan, nya baru tanchang jari enggau kaki iya tebuka serta lalu merubus ari tuboh iya. Iya lalu beguaiguai mulai ka diri ngagai rumah sida empu enggau naka pemedis ati. Tubuh iya nyau abis malui sereta generam bekau pantang bala nyamok. Datai iya dirumah, sida sarumah lalu begau meda iya nyau nadai temu gamal agi. Anang ka bulih utai mesai bulu mata, nyema jako, kain ba punggung enggau baju ba tubuh deh abis ridang.Ka pengujung jerita tu, tau bendar pulai ngagai ajar kena kitai ngadu ka pengelikun pendiau diri, lebih agi ba sanentang sida ka agi dara biak, ke benong agi belajar dalam skula secondary. Adu ka pendiau kitai nitih ka pemandai ti ulih kitai ari skula. 2. Ensera Gajah Lelang

Nyadi agi jeman dulu kalia, leboh samoa jelu dalam dunya tu agi mereti ka jako pangan diri. Dia kenu ko leka ensera tu bisi siko Gajah Lelang datai ari menoa bukai ngagai menoa kitai kitu. Kitai sama nemu Gajah tu endang jauh besai ari samoa jelu bukai. Ari pemesai gamal iya, dia iya nyamai bendar ngemba tauka ngenakut ka orang ti mit agi gamal ari iya. Nyau puas iya ke lelang dalam kampong din, dia lalu tetemu ka danau ke besai bendar. Nyepi diri peloh serta ikak udah bekau ke bejalai, iya lalu terejun mandi ba danau nya. Meda Gajah bangat nadai basa baka nya, dia samoa jelu enggau burong bukai ke endang bempu danau nya udu amat ringat. Sida enda lantang ati meda olah temuai ke baru datai bakanya ngalah ka danau sida. Tang laban samoa tuboh sida ke endang bempu danau nya nadai ngemesai tuboh Gajah, sida lalu deka berunding ngiga jalai ngajar Gajah nya awak ka iya enda mandi dia agi. Nyadi samoa bala jelu enggau burong ke dia lalu milih siko ari sida nuntong ka pengeringat samoa jelu enggau burong ngagai Gajah. Leboh maia nya nadai jelu bukai ke besai agi ari Baya ti lalu dipilih nyadi pengari bala jelu enggau burong ke dia. Leboh iya udah kena padu ka jadi pengari bala jelu enggau burong, dia Baya lalu nyelam ngenselor ngagai tunga Gajah ke benong bekechimbong ngelantang ka diri mandi. Datai din, iya lalu enda chachamang tak lalu nangkap pah kanan Gajah. Untong bulih beliong enda ngamboh, mudah bulih peredah enda ningkoh, keno ko jako tudah Baya. Ensepi diri ngemedis nya, Gajah lalu melit Baya enggau belalai iya, Baya lalu disagu ka Gajah kalangit kin serta dikesai ka iya bulih peninggi tengan batang kayu. Leboh ari atas Baya lalu ninggang batang engkeranji ke dendang lama udah chundong nyuntai ba tebing seberai. Baya nyau nadai agi chara, amat ga enda parai, tang tulang belakang iya patah, ke ngasoh iya pedis bendar bai meragau. Udah nya Gajah lalu niki begadai-gadai ke pantai. Ari pantai, dia iya meda rusa benong kebut-kebut nyanggut daun lengkan. Tang rusa ngaga diri enda meda iya lalu majak ka diri ngulam. Gajah lalu ngangau ka iya, ngasoh iya nesau samoa jelu enggau burong ti nguan danau nya. Iya mai sida bebunoh. Tang enti ngeli sida nadai mesai enggi aku tu, anang ngasoh sida iya mansang, enggai ka nadai dikekah aku, pia ko Gajah bejako enggau rusa. Udah nya iya lalu nyua ka Gading iya ngagai Rusa, ngambi ka bisi dipeda sida. Ninga jako Gajah Lelang munyi nya dia rusa lalu kebas-kebas, pala nyau gilik-gilik mandang ke pemanah tandok nesau kengka samoa jelu enggau burung ke bisi semak dia. Nyau kelama, nya baru samoa jelu enggau burong pupus ditesau rusa. Tang siko pan nadai meh bala sida dipeda rusa sebaka pengering enggau pemesai tuboh baka Gajah Lelang. Lepas nya rusa lalu nikal ngagai samoa bala jelu enggau burong ti endang udah nganti ba tisau Danau. Benong sida ke nyau bekakisoh sebelah nya dia, berunding ka sapa patut nyatup Gajah Lelang, dia Gajah Lelang lalu ngangau ari danau. Udah bulih manok sabung kita? ko

Gajah Lelang nanya. Bedau! Bedau! ko Pelandok nyaut. Tang iya ke bendar, sida sigi nadai tetemu ka pengari ti patut nyatup Gajah Lelang. Samoa sida jelu ke endang sigi tampak nama, jelai berita pan udah ditanya magang, tang siko pan nadai berani ngelaban Gajah Lelang. Datai ke beliau Ingkat seduai manang Menarat pan madah ke diri enda nemu jalai ngelaban orang ngemesai nya gamal. Lemambang Simpiliau pan enda ga berani. Samoa ke selalu belelang pan enda ga berani nguji ngemedis ka Gajah Lelang, sereta madah nadai kala meda jelu bisi besai ari Gajah Lelang. Udah nya ngetu kenu kaban jelu baka puyu mabok amboh, sama ngenong baka empelekong mabok keroh. Nadai tetemu ka runding enggau akal kena medis ka Gajah Lelang. Nyau kelama udah sida ka sama ngetu, nya baru tudah Landak bejako ari belakang tugong bala bejako apas-apas didinga laban kerah kera ke enda ngetu bejako. Cheh! ko Kera. Gamal ke baka nuan nya, chuyuk-chuyuk ngapa. Kamaia kala pansut ari lubang tanah enggai enda bejako. Ngerichau ke penemu orang maioh nuan nya, ko Kera, kerahkerah dudok atas urat engkeranji chundong nyuntai. Nadai nya ngerichau deh, ko Pelandok. Kada enda utai ke apin ditemu kitai deka dipansut ka iya, sebut dia meh buat. Kitu ka agi nuan, ngansak semak awak ka bela sama ninga penemu nuan, enda tentu ninga pending laban gaum bala maioh. Pia ko Pelandok nganu Landak. Amat nya ko Semawa. Enti baka ke akar tubai tak, nadai siko kitai bisi ngembuan tipang bias baka enggi Landak, ko iya. Landak lalu nengkelak sereta nidit chayukchayuk mansang ka mua. Pelandok pan pia mega nengkelak lalu dudok entap ngambi ka nyamai mending ka jako Landak. Udah nya baru tak berupai bebali moa tudah Landak, udah ninga jako Pelandok seduai Semawa tadi. Udah nya iya lalu bejako. Enda iboh tak ba tengah-tengah bala pan aku dudok punggal. Ari tu pan aku, ko iya. Nyadi kitai sama udah nemu Gajah Lelang udah nyua ka gading iya ngagai Rusa. Reti nya Gajah Lelang madah ke pemesai gamal enggau pengering iya ngagai samoa kitai jelu enggau burong ba menoa tu, Ko Landak. Tang kitai anang takut, anang alah kena emba Gajah Lelang. Nya alai diatu aku ngasoh nuan ga Sambi Pelandok, nyua ka bulu aku dua iti tu ngagai Gajah Lelang. Enti bulu iya tajam sereta enda mesai bulu aku, anang ngasoh iya niki ka pantai, pia ko tudah Landak. Iya mega lalu ngisai ka bulu diri ba moa bala jelu enggau burong dia. Jelu bukai ke bisi dia, nadai engkeretik siko. Tudah kera lalu begaru ka jumbal burit, serta lalu ngerising ka ngeli. Nyema jako, daun laboh pan didinga meh. Beliau Ingkat malik kabelakang, malik kamoa, mulut kulap-kulap muchau anak leka puchau. Semawa nyau temati kutu.

Nyau kelama udah nya, baru Pelandok lalu baka ke tedani ari tindok, beselimban ngumpul bulu Landak dua iti. Iya lalu nurun ka tebing Danau. Iya lalu dientudi ka Rusa regap-regap ari belakang nyan gading Gajah Lelang. Datai ba danau, Pelandok lalu ngangau ka Gajah Lelang. Oh Buat, ko iya. Udah kami bulih manok kena ngelaban nuan. Satup meh manok kami tu lagi. Ko iya ngangau ka Gajah Lelang ke benong mandi. Ninga kangau Pelandok, Gajah Lelang lalu mupok ngeradayau begadai-gadai mansang ka tebing. Leboh iya nyau semak, Pelandok lalu bejako baru enggau iya. Tu bulu manok kami ke diagih ka kami nyatup nuan. Ko Pelandok. Tang enti bulu nuan enda mesai enggi iya tu, nuan anang ngemalu diri niki ka pantai. Pia ko Pelandok. Iya tu endang udah disabong kami ngelaban orang ke kering, ke besai gamal, ko Pelandok. Ensumbar iya Landai Indu Landak bebulu burak putting juring ngujong geraji, Ko Pelandok baru. Eh! Sapa Landak tu? ko Gajah Lelang. Mata Gajah Lelang samina tak kesap-kesap, laban ati iya udah takut serta rawan meda pemsai bulu Landak ti jauh besai ari bulu iya. Orang tu tentu dua-tiga kali besai ari aku, ko iya. Udahnya tak enda badang-adang Gajah Lelang lalu minta gading iya pulai ari Rusa, lalu deram-deram ngelari ka diri ari menoa nya. Sebedau iya ngelari ka diri, iya madah ke diri enggau samoa peturun iya, sigi enggai nguan menoa Sarawak tu agi. Meda pemesai bulu Landak nya ti udu ngenakut ka iya lalu ngujong ka iya lari ngagai menoa bukai.Jeman kalia kitai ngulih ka pemisi ngena akal bala maioh. Maioh agi bala, maioh agi ga runding, lalu maioh agi ga jalai temu kena ngereja pengawa, ngulih ka pemisi enggau pengidup ti menyana. Tang diatu pemisi kitai mensia olih ari kitai ke besekula. Pandai agi kitai dalam skula, bulih agi ga kitai penemu kena kitai ngiga pengidup enggau pengeraja dalam dunya tu. 3. Ensera Injat Nyadi dulu kalia bisi orang lelaki siko benama Injat. Injat tu orang ti pemadu iya deka umang, seranta belala, lalu iya mega dipanggong kait-kupit, singkong-belong, endang sigi nadai tau mindah. Naka pengawa ti diketau ka iya bekelansat seblah rumah serta enggau dudok besahari-sahari. Siti utai ti nyelai ba iya, iya nadai kala ringat ngagai sabarang orang, iya sigi orang ti pemadu nelap, iya deka berandau enggau sida ti sama anembiak. Nyadi Apai Injat parai leboh iya agi mit. Iya sigi enda ingat ka apai iya, tang iya di idup ka indai iya. Seduai mindai iya diau kediri-diri ba gari langkau di tisau tembawai serta jauh ari rumah panjai orang bukai. Kenu ko leka ensera, sinu meda pendiau sida balat merinsa belala ba samoa utai, sebarang orang ti kasih leboh bisi mansa seduai menyanak suah ngetu ngadu ka langkau nulong seduai. Kati ko enda nulong, laban sinu meda tudah Injat tak kesap-kesap mata enti leboh hari ujan, basah laban tuduh. Anak dinding langkau anang nyebut, ngenjing sedandang remang baka ke udah dipangka ka ribut kudi. Tudah

indai Injat pan enda mega tau ngadu. Suah mega seduai ngelaung makai laban nadai tulih ka utai diempa. Nyadi skali leboh umor Injat nyau manggai enam taun, iya pen nyau nemu berunding ka perinsa diri ti nadai tau mindah. Dia ati iya sinu bendar ngenang tudah indai iya ke gawa kadiri ngidup ka seduai iya. Leboh anembiak bisi datai bejalai ari rumah panjai ngagai langkau seduai, Injat tetengok bendar deka besulu serta bemain enggau sida, tang mar bendar laban ke enda tau bejalai baka orang bukai. Ai mata iya suah tak lilih nurun tungkul idong, leboh iya ti kelalu berunding ka penusah pendiau seduai indai iya. Bisi skali leboh Injat gali garing-garing dalam rumah berunding ka pemerinsa diri, dia iya ninga utai tak semerap ba belakang atap langkau seduai. Iya lalu malik. Peda iya burong naka pemanah-manah nya bulu, ngenjing bemas-mas, inggap atas tudong perabong langkau. Udah nya, dinga Injat tak bejako burong nya. Sumpit aku tu Injat, ko iya. Aku tu burung Titi Apong, patok tujoh ranggong, betada ngelong patong. Nyadi Injat tu tadi alit bendar ati ninga burong nya tau bejako. Tang deka iya nyumpit laban nadai sumpit enggau laja dilangkau. Enti Injat tak regas baka orang bukai, tentu iya bekira nginjau sumpit orang. Tang laban iya ke kait-kupit nadai tau mindah, nama chara, tak samina nat ka pemerinsa. Nyadi burong nya tadi agi itok minta sumpit Injat. Ninga burong bangat ngenatok nya, dia Injat lalu bulih runding, laban untak iya endang tajam. Nyadi ko runding iya, Pama ti aku ngeran temiang baur kibong kami duai Indai nya kena nyumpit iya. Nama iya bangat ngenatok nya deh? ko iya bejako kediri. Udah nya Injat lalu kelansat meragau mansang nyengkau temiang ke baur kibong seduai mindai iya. Udah Temiang ke baur kibong olih jengkau lalu digeran iya muai buku ngena lungga. Tembu nya digeran iya lalu kelansat baru ga iya mansang ngambi tanah dapur, ka embal sumpit iya. Lepas samoa utai udah disedia ka iya magang, nya baru iya nengkadah ka tulang perabong meda ka senentang burong, lalu dikesoh ka iya embal sumpit. Iya ke ngesoh ka embal sumpit nya ari seling lubang atap ti nyau udah jai bendar, laban atap seduai senentang nya itong ka samina tinggal engkawan agi. Injat ke nyumpit tu endang enda ngadang burong nya tau olih iya, tak semina bebuti enggau burong nya, ko ati iya. Seninjik endar burong nya lalu kena sumpit iya, lalu laboh ninggang tanju ari baroh grutu atap. Nyah, lapa deh! Parai iya, ko Injat. Nganti Indai pulai lagi ngambi bangkai iya, ko iya dia. Tang deh bangkai burong nya bejako baru, ko iya. Ambi aku Oh Injat. Aku tu burong Titi Apong, patuk tujoh ranggong, betada ngelong patong.

Eh! Nyelai bendar burong nya, ko Injat bejako kadiri, berandau nengali. Udah mati, agi ga bejako. Ninga nya bangat nyelai Ingat lalu kelansat baru ga mansang ngambi bangkai burong, lalu diengkah ka iya ba telok dapor seduai. Nganti indai datai lagi baru nunu iya, ko Injat bejako baru. Udah nya Injat lalu gali baru. Dinga iya agi ga burong nya bejako minta tunu Injat. Alit bendar ati iya ninga utai nyelai nya. Ninga cherita pan nadai ga iya kala ninga utai munyi nya. Nya alai udah nya iya lalu angkat baru ari iya ti gali, serta lalu bekelansat ke dapor, lalu menjadi ka api. Bangkai burong nya lalu ditunu iya. Tembu iya ke nunu lalu diengkah iya ba atas dapor. Nganti Indai datai lagi baru netak. Ko iya. Udah nya lalu ngerayap pulai ke dalam lalu gali baru, nat ka diri. Burong ti udah mansau ditunu iya tadi lalu bejako baru ga, rauh-rauh minta tetak Injat. Tetak aku Oh Injat. Aku tu burong Titi Apong, patuk tujoh ranggong, betada ngelong patong, ko burong nya tadi. Hah deh! Balat meh penyelai burong tu deh, ko Injat. Nya baka nyau udah retong agi ga bejako. Iya nyau enda liat ati, nya alai iya lalu angkat baru bekelansat ngiga duku kena netak iya ba sengkalan. Nyau rengkong-rengkong iya ke netak burong dia. Udah tembu ditetak, lalu simpan iya dalam jagan, Nganti Indai datai baru mandok, Ko Injat. Udah nya iya pulai baru, gali nat ka diri. Baru udah ngali ka diri iya, dinga kerat burong bejako baru minta pandok Injat. Apo! ko Injat, nyelai bendar ga utai tu, datai ka kerat pan tau mega bejako. Enda liat ga iya, lalu bekelansat baru ga mansang ka dapor deka nanggar ka belanga lauk, serta lalu pandok iya kerat burong dia. Serta udah mansau lalu ditudong iya manahmanah, laban iya deka nganti Indai datai baru makai iya. Iya lalu bekelansat baru pulai ngagai endor iya ti gali. Tang udah nya tak enda mukai-mukai kerat burong ti udah mansau dipandok iya dalam belango lalu bejako baru, minta empa Injat. Empa aku tu oh Injat, aku tu burong Titi Apong, patok tujoh ranggong, tada ngelong patong. Ninga burong nya minta empa iya, tudah Injat lalu bekelansat begadai-gadai mansang ka dapor. Datai iya didapor, Injat lalu makai kerat burong nya. Skeda digalau iya ka indai iya. Badu makai tudah Injat, dia iya lalu berasai nyilu bulu serta pedis perut. Tang leboh iya ke nat ke pemedis udah makai, gamal iya lalu berubah besai serta sigat, kaki enda agi kait kupit. Patong enda agi singkong belong. Iya nyau tau bejalai serta umba gamal naka iya penyigat gamal orang. Ati iya naka pengaga ensepi diri nyau gerai serta tau bejalai. Baka ke diajih ke Petara meh asai sepi iya. Enda lama udah iya nat ke perut iya ti pedis, iya lalu brengkah bira chirit. Enda sempat iya ngajong diri katanah, lalu ditungge ka iya ba tanju langkau. Dia utai pemadu penyelai nyadi udah iya ke badu bira, laban tai Injat nyau nyadi reta-tengkira. Nyadi setawakdumbak, nyadi bendai nyarai, nyadi intan, nyadi berlian, nyadi pirak enggau mas, nyadi duit ringgit. Naka pemaioh utai, nadai utai dikenadai ka agi Injat. Langkau seduai mindai

nyau bebali nyadi rumah ti menyana serta manah. Serta enggau kuli nganjing baka kayau sebelah rumah. Gamal Injat nadai endor nyema ka penyigat gamal. Nadai siko orang ba menoa nya ngenyigat nya gamal. Iya ga sigat ditambah pintar dalam samoa pengawa. Leboh Indai Injat pulai turun lemai nya, dia iya rangau-rangau ngangau ka Injat leboh iya datai ba endor langkau seduai iya, laban langkau nadai agi dipeda iya dia. Asai ke ambi mimpi sepi iya meda rumah baru nyau regah-regah ba endor langkau seduai iya. Ninga Indai iya ngangau, Injat pan lalu nyaut ari dalam rumah, serta lalu nyengok ari jendila. Tu aku Indai, ditu, ko iya. Malik iya ngagai jendila meda Injat tak baka ke ukai Injat selama. Samina iya ngelala Injat ari serenggong jako, bedau baka selama. Indai lalu tama kadalam rumah nengah pintu batu, serta ngema anak badey penoh laban paku tubu atas belakang tudah tuai. Dia iya tak getar-getar, takut, tang semadi ninga nyawa Injat. Leboh tepeda ke Injat iya lalu tekenyit, nyau deka enda ngelala, laban Injat ke nyau tau bediri, gamal nyau sigat, bejako nyau pintar. Pakaian dikena nyau manah, nyau enda besirat agi. Udah nya bala orang ke bekereja dalam rumah nya lalu mela Indai Injat enggau chukop pementas. Iya lalu diberi orang mandi serta dibela sida makai. Enda lama udah nya, udah indai Injat badu makai nya baru Injat nunga Indai iya. Tang indai iya lalu enda tetanya ka iya, laban tekelalu alit ati. Injat lalu ngangau ka kuli iya, ngasoh mai utai ke di-irup seduai mindai iya dia. Nyau kelama seduai ke udah dudok serta ngirup dia, nya baru Injat nusoi ngagai indai iya samoa pasal utai ti udah nyadi ba iya. Udah ninga samoa utai ditusoi Injat pasal burong Titi Apong tadi, nya baru indai lalu berubah gaga ati. Au, enti bakatu anak, badu meh tua tu agi merinsa baka ke udah. Kenu ko jako tuai, laboh daun buloh ditangkap ikan juak, antu ke munoh petara ngambi ka anak, laboh daun buloh ditangkap ikan empelasi, antu ka munoh petara ngambi ka menjadi. Manah meh Petara enggau tua, nimbang samoa pemerinsa tu ke udah, ko Indai Injat. Nyau ke pengujong randau seduai, dia Injat lalu bejako, ko iya Amat meh ko sempama jako tu; LANSAR TAU NYADI LUBOK. Ko Injat. Belaboh ari nya, Injat seduai Indai iya lalu diau lantang senang. Reta-tengkira seruran nambah-menambah, muka pengawa nyadi serta maju magang. Pengelantang anang ngira seruran majak lantang. Samoa orang dalam menoa nya nadai enda rindu ka Injat. Rita iya jauh serta jelai dedinga orang. Apin lama udah lepas nya umor Injat pan nyau chukup ga maia endor niri ka rumah tangga, dia iya lalu bebini jadi enggau anak indu pemesai di menoa nya. Pengerami leboh Indai Injat ke nanya enggau melah pinang ukai nama agi meh, ga sama kaya raja diau. Nyadi baka tudah Injat pan lantang senang, lalu bini laban ke nguai ka Injat lalu beranank betelesak begulai enggau diri melaki-bini. Pendiau sidah menyanak lepas nya, nyau ngebong baka langit, betuchong baka bukit, nyau bepunchak baka jala betuchong baka bukit Lingga. Bilik pan nyau dalam baka lubok, batuchong baka Sadok. Kaya raja nguan menoa.

4. Ensera Malu Tekuyong Nyadi sekali jeman kalia leboh Tekuyong bejalai ngiga pemakai ba atas batu siti ti besai semak tebing sungai, enda mukai-mukai Pelandok ti bejalai gining-gining nengkadah puchok buan, lalu tepa ka iya ke benong nilat-nilat batu. Oi! Sambi Tekuyong, ko Pelandok ngangau. Nama gaga nuan tak dugau-dugau ngapa lalu enda ngisit? Eh! Nadai Sambi, nilat-nilat batu aku tu, ngumpol lunik babi tu, ko Tekuyong nyaut iya. Pelandok tu tadi lalu ketawa rakah-rakah. Udu amat Pelandok ketawa ka Tekuyong. Nyau pegari kemi iya ke ketawa. Meda Pelandok ngemendar nya ketawa, dia Tekuyong lalu nanya ka kabuah alai iya ngemendar nya ketawa. Nama utai diketawa ka nuan ngemendar nya Sambi? ko tanya Tekuyong. Pelandok enda nyaut samina majak ka diri ti ketawa ka tudah Tekuyong. Tekuyong pan nyau bisi berasai malu ga diketawa ka Pelandok. Udah nya baru Tekuyong lalu bejako enggau Pelandok, ko iya. Nadai nya diketawa ka nuan bangat ngemendar nya deh Sambi. Pegila nuan madah ka samoa jelu asoh datai kitu, laban aku malu bendar udah diketawa ka nuan, ko iya. Nya alai nambah ka nya, saminggu udah tu, aku mai nuan berumpak belanda, ngambi ka nemu bagi sapa ke tegar agi enggau enda. Nama agi deh, Pelandok gaga bendar ati ninga jako Tekuyong mai iya berumpak belanda, laban iya endang ngadang diri tentu menang. Nyadi adan seduai iya berengkah ari kaki bukit ke endor seduai berandau, lalu ngagai batu ti semak tebing tasik. Udah nya mega Pelandok lalu nyau mupok madah ka skeda bala jelu sebelah nya dia. Tudah Tekuyong mega mupok nesau sida skaban, pasal utai ti udah nyadi antara seduai Pelandok. Dia Tekuyong madah ngagai samoa sida skaban pasal Pelandok ti udah ketawa ka iya. Ari nya iya tak enda berasai mai Pelandok berumpak belanda. Laban Tekuyong nemu diri enda talah ke Pelandok, ari nya iya nanya ke runding ngagai samoa sida skaban ti bisi datai dia. Tang kaban iya ti bisi datai kia, nadai nyaut, laban sida mega endang nemu Pelandok tegar belanda. Nama kabuah nuan enda berunding dulu sebedau nuan nyebut jako nya deh? ko bala kaban maioh nganu Tekuyong. Kami nadai nemu runding. Nya-alai ba penemu kami, manah agi nuan anang ngelaban Pelandok berumpak belanda. Ko sida nganu iya. Enti kita Aya, kita Apai, kita menyadi nadai runding, ko Tekuyong, Ka enggai pan, runding aku empu ga dikena kitai, ko iya. Nyadi runding baka tu, ko iya. Nuan apai diasoh nganti ba batu ti ba tebing tasik, nuan aya diasoh dudok ba tengan adan, nuan aki nganti ba pun kayu ke besai enda jauh ari pun adan. Samoa kita diasoh ngangau ke Pelandok, ti iya bisi mansa kita, ngambi ka iya nyangka sida nya aku empu ke enggau iya berumpak. Nyadi aku empu lalu berintai enggau Pelandok ba pun adan.

Udah apus saminggu lepas nya. Nya alai tumu pagi siti Tekuyong seduai Pelandok, sereta enggau skeda jelu bukai ke bisi dia, ngator diri deka berengkah berumpak belanda. Pelandok seduai Tekuyong sama setuju ngasoh Badak niap ka seduai. Udah nya Badak pan lalu berengkah ga niap. Sa! Dua! Tiga, belanda seduai! ko Badak. Nyah! Pelandok seduai Tekuyong pan lalu nyau tabun-tabun belanda enggau naka penegar tulang seduai ke belanda. Udah Pelandok nyau nadai dipeda iya agi udah jauh ninggal ka iya, dia Tekuyong lalu maring ka diri ngagai madang rumput repa. Pelandok tu tadi nama agi deh tudah Tuai ka belanda. Sema ka nyau baka leka sumpit peneras iya ti belanda. Tak nadai meda Tekuyong bisi mansa ngelih ari moa iya. Tang deh, leboh iya datai ba endor Aki Tekuyong, iya lalu tepeda ka Aki Tekuyong endang udah dugau-dugau dudok nyangak ba batu nganti iya. Apu! ko ati Pelandok meda Tekuyong udah dulu datai ari iya, Laju bendar iya tu! Lagi meh, bedau nemu penegar aku iya tu, ko iya dia. Udah nya bebendar agi ga iya belanda. Tang leboh iya datai ba tengan adan, Tekuyong siko ga udah nganti iya, iya nya Aya Tekuyong, endang sigi dikumbai iya Tekuyong ti enggau iya berumpak belanda. Med Tekuyong dua kali udah nganti iya, dia Pelandok naka olih belanda, laban adan seduai iya nyau enda tentu jauh agi. Dia iya belanda ngabis ka tulang, enggau naka penegar tudah tuai, kejang deka ngenatai ka diri ba adan. Tang tak enda mukai-mukai, leboh Pelandok nuntong ba adan, dia iya meda Tekuyong udah dugau-dugau dudok ba batu adan. Pelandok enda nemu nya Apai Tekuyong. Nama agi tudah Pelandok tak nyau seput-seput jarang. Peloh iya nyau nelusor batang idong. Utai dipeda nyau mega ensabi. Kaki nyau gitik-gitik laban kelalu lelak. Apu! Alah meh aku tu laban Tekuyong, ko iya bejako bediri muchau nengali. Enda lama udah nya baru Apai Tekuyong ngangau ka Pelandok. Ho! Sambi! ko iya. Iga nuan ngelubah nya belanda. Nyau puas aku udah nganti nuan datai ba adan tu. Ko Apai Tekuyong. Apai Tekuyong samina naka tak tuchom-tuchom tekuyong aja, laban iya nemu Pelandok udah kena akal sida. Nya penulah kitai ketawa ka orang enggau nadai tentu kabuah. Enti bakatu alah meh nuan laban aku, Sambi, ko Tekuyong. Alah meh tu, Sambi, ko saut Pelandok. Enda tentu nyamai tudah tuai ke nyaut munyi nya, Tak Malu Tekuyong. Enti udah ngaku diri alah, ko Tekuyong, kadudi hari ila, anang sumbong enggau orang. Anang ensepi diri tak kering, lalu ketawa ka orang. Laban kitai enda nemu bulu orang, enda nemu pemintar enggau pengering orang. Ko Apai Tekuyong nganu Pelandok. Udah abis lumba nya tadi, samoa sida sama bela mulai ka diri magang. Belaboh ari nya Pelandok pan lalu badu agi ketawa ka Tekuyong.

5. Ensera Mimpi Rimau Nyadi dulu kelia samoa jelu endang diau dalam kampong dalam magang. Sida begulai endang nitih ke pendiau enggau jalai pengidup bansa diri empu. Jelu ke diau dalam ai endang diau sereta nitih ka pengidup diri empu magang. Jelu enggau ikan endang bisi jai lalu bisi mega manah. Nyadi skali leboh maia tu kalia Rimau nurun ari rumah iya lalu bejalai nuju rumah Kambin. Rumah Kambin enda bangat jauh ari rumah Rimau, kira pejalai satu jam ari rumah pangan diri. Sida endang bekelala enggau pangan diri. Nyadi Kambin ti dituju Rimau bisi bini siko enggau anak bujang pan siko. Anak bujang Kambin endang anak ti dikerindu ka apai seduai indai Kambin nya. Datai Rimau ba kaki tangga rumah Kambin, iya lalu negong ngangau, Kati tau ditiki rumah nuan punggal? ko iya. Kambing endang nemu nyawa Rimau ti ngangau nya, lalu nyaut. Tau punggal! Niki meh! pia ko saut Kambin ari rumah. Rimau tak enda chachamang lalu niki, peda liur Rimau nyau bekerenjui neritik ari dagu iya. Nyema enda pan Kambin ngasoh niki, sigi niki meh iya ba rumah Kambin. Udah Rimau dudok, Kambin lalu nanya. Nama pejalai nuan tak tumu-tumu tu deh punggal? ko Kambin. Aku tu besai amat pejalai punggal. Nya kebuah aku tak tumutumu pagi tu dipeda nuan. Ko Rimau. Besai enda besai pan punggal tusoi dulu meh kabuah nuan ngagai aku. Enti bisi penusah awak ka aku jampat nemu. Awak ka nyamai ga alai kitai berunding ka penusah nuan. Ko Kambin. Nya meh punggal, ko Rimau, Dimalam leboh aku tindok asai ke enda, dia aku bekalih bisi mimpi. Mimpi asai ka meda antu besai bendar gamal datai ngagai aku. Antu nya lalu ngasoh aku makai anak bujang nuan, tang aku madah kadiri enggai ngereja pengawa nya, laban aku ngenang nuan pangan aku. Agi ga antu nya, ko iya, ti aku enda makai anak nuan, aku deka mati tauka gila. Pia ko Rimau madah ka mimpi diri ngagai Kambin. Enti munyi nya punggal, ko Kambin, enda meh aku olih nulong nuan, laban nya tak anak aku ti deka asoh antu pakai nuan. Pasal mimpi nuan tu aku endang enda besetuju enggau nuan, ko kambin madah ka runding diri empu ngagai Rimau. Udah nya, lama Rimau seduai Kambi bechakah ke jako enggau pangan diri. Sama nyau terit urat rekong seduai bai bekelikoh ka jako enggau pangan. Nyau kelama nya baru seduai sama setuju deka bechara ba Hakim Singa. Rimau lalu nurun ari rumah Kambin, bejalai nuju rumah Hakim Singa. Rumah Singa nya tinggi bendar ba tuchong bukit nunga ngagai padang ke besai. Singa endang udah meda Rimau ari jauh bejalai nuju rumah iya. Iya lalu bediri ba moa pintu nganti penatai Rimau.

Leboh Rimau datai ba rumah Singa dia Rimau lalu nabi iya. Tabi Hakim Besai, ko iya, Aku bisi pejalai, ke deka betemu enggau nuan ditu, laban aku bisi pechara ngelaban Kambin. Ari pengawa nya aku minta nuan Hakim Besai nulong mutus ka pechara aku enggau Kambin. Pia ko Rimau. Enti seduai Kambin bisi laya ti deka asoh seduai putus ke aku, nama deh kabuah aku enggai, ga endang pengawa mutus ke pechara orang, ko Singa. Tang, enti pia panggil Kambin datai kitu. Ko singa. Singa lalu ngasoh Landak manggil Kambin. Enda bangat lama Landak udah nyau madah ke Kambin, dia deh sida Kambin menyanak lalu datai ba rumah Hakim Singa. Nambah ka sida tiga menyanak jelu bukai pan bisi mega datai sama enggau mending ka pechara nya. Udah abis samoa randau bukai, pechara pan lalu belaboh. Dalam pechara tu, dia deh tudah Rimau lalu nusoi mimpi diri ke diasoh Antu makai anak bujang Kambin. Udah nya, iya lalu nekan ka jako madah Kambin enda arap ke mimpi nya, lalu enda skali-kali ngasoh makai anak iya. Nyau kelama sida udah besaut ke jako ari spiak-spiak, nya baru Singa Hakim Besai mutus ka runding diri empu, ko iya, Nyadi pemutus pechara Rimau seduai Kambin ba penemu aku enda tentu bangat panjai. Jako ari spiak-spiak sama udah terang bendar. Baka kita maioh sama udah mega mending ka cherita Rimau ke diasoh antu makai anak Bujang Kambin. Ari nya tudah Rimau laban ti apin deka mati, apin deka gila, endang keras deka makai anak bujang Kambin. Iya ke deka makai nya ukai kategal ati enda manah, ukai kategal peneka ati iya empu, tang nya endang terang bendar ari mimpi munyi ko iya tadi. Baka tudah Kambin pan udah mega ninga ke penemu Rimau enggau silik, tang iya enda agi arap ke mimpi, lalu enda skalikali ngasoh Rimau makai anak bujang iya. Nya alai ba pechara tu dalam penemu aku Rimau enggai nyadi enda menang, ko Hakim Besai mutus ka pechara nya. Serta pemutus pechara nya udah dijatuh ka Hakim Singa, madah ka iya alah, dia kambin lalu kaat-kaat bejako serta lalu bediri nanya ngagai Hakim Singa, nanya ka pechara nya tau diapil. Singa lalu madah ka tau, tang timpoh iya ngapil ka samina tiga hari aja. Udah nya samoa orang ke bisi datai sama mending ka pechara nya, sama bela mulai ka diri magang. Samina Kambin sebilik enda pulai. Ari rumah Hakim Besai Singa sida menyanak lalu bejalai nuju rumah luya pelandok, laban sida menyanak deka ngambi ka Pelandok nyadi luya ngari ka sida ba pechara tu. Datai sida menyanak ba rumah Luya Pelandok, iya lalu ngangau. Tau ditiki rumah nuan Luya Besai? ko iya. Laban Luya Pelandok tu endang orang ti pintar, iya nyenggok deka nemu sapa orang ke ngangau. Iya lalu tepeda ka sida Kambin menyanak, lalu ngasoh sida niki. Udah sida menyanak dudok, dia Kambin lalu nusoi berita ngagai Luya Pelandok. Iya mega lalu madah ke diri deka minta tulong Pelandok nyadi Luya sida, leboh bechara apil tu ila. Pelandok pan nadai mega maioh jako, laban nya endang sigi pengawa orang ti nyadi Luya.

Betul-betul chukup tiga hari udah nya sida Kambin menyanak lalu mupok ga mansang ngagai bilik ke endor bechara. Datai din sida meda bilik endor bechara endang udah penoh laban bala jelu bakai ke sama datai deka mending ke pechara apil Kambin ngelaban Rimau. Nyadi hari maia nya kira benong tengan niki matapanas. Apin lama udah sida Kambin menyanak enggau Luya Pelandok datai ba bilik pechara, dia Singa Hakim Besai pan datai ga entudi sida. Singa lalu dudok ba kerusi Hakim Besai ti endang endor iya mutus ke pechara. Udah nya Luya Pelandok lalu bediri serta lalu bejako, ko iya, Nyadi tiga hari ti udah dia nuan Tuan Hakim Besai bisi ngator pechara Rimau seduai Kambin. Dalam pechara seduai nya suba, bepun ari Rimau ke bemimpi diasoh antu enda tau enda makai anak bujang Kambin, lalu pemutus runding nuan Tuan Hakim Besai, ba pechara nya suba Rimau menang, ko iya. Tang laban Kambin enda puas ati ba pemutus runding nuan ba pechara nya suba. Nyadi saharitu aku diambi iya jadi ka Luya dalam pechara apil tu. Tang diatu, aku minta ngagai nuan Tuan Hakim Besai nanggoh ka pechara pagi tu ngagai ngalih hari tu lagi, laban diatu aku buntau bendar, bekau ke udah berunding ka pasal pemutus pechara tu, ti lalu diapil Kambin baru. Aku deka nat ka diri enda lama. Pia ko Luya Pelandok. Datai ba maia ngalih hari, nya baru orang datai baru ngagai bilik pechara. Datai dia sida meda Pelandok benong tindok ba atas mija. Tuan Hakim Besai pan udah ga datai. Pelandok lalu ensugau angkat dani ari iya ti tindok, lalu meda bilik pechara endang udah penoh laban bala jelu. Tekala nya mega Luya Pelandok lalu ngasoh samoa orang ti bisi datai kia ngambi rangkang sa-san siko. Nyadi Kambin diasoh iya ngambi minyak gas sabutol. Udah samoa sida ti diasoh iya ngambi rangkang kayu datai samoa, luya Pelandok lalu lalu ngasoh sida nugong ka rangkang kayu ba tisau mija Tuan Hakim Besai. Udah nya iya lalu nuang ke minyak gas ngagai tugong kayu, sereta lalu ningkoh ke machis. Meda iya baka nya dia Tuan Hakim Besai Singa lalu bejako, ko iya. Hey! Luya Pelandok, nama pengawa nuan baka nya? ko Hakim Singa nanya iya. Pelandok lalu nyaut. Nadai maioh pengawa aku tu Tuan Hakim, Ko iya. Tak semina nitih ke mimpi aku ke tindok ba atas mija tadi. Leboh aku ke tindok enda lama dia tadi, dia aku lalu enda mukai-mukai bekalih bisi mimpi diasoh antu enda tau enda nunu rumah pechara tu. Enti aku enda nunu rumah pechara tu, aku deka mati tauka gila. Laban aku apin deka mati serta enggai merinsa laban gila, nya alai aku deka nunu rumah tu. Ko iya. Enti pia anang nuan nunu rumah tu, ko Tuan Hakim Besai Singa. Tu nadai anang-anang Tuan Hakim, ko saut Pelandok. Nuan empu udah ngator pechara baka nya. Enti nuan deka nyaman aku, alah meh nuan, laban nuan ba senentang pechara Rimau seduai Kambin, ngator Rimau menang, laban iya bisi mimpi diasoh antu makai anak bujang Kambin. Nya alai dalam pechara apil, laban aku bisi mimpi aku mega menang, lalu enda tau enda nunu rumah tu. Ko Pelandok. Enti munyi nya, tebuai meh pechara Rimau seduai Kamnin, menang meh Kambin ba dalam pechara apil tu. Nya alai ari diatu datai ka pengujong dunya jemah ila, Rimau enda

tau skali-kali ngachau anak Kambin. Enti Rimau bisi ditemu teketik jari lalu ngemansut ka darah anak Kambin sebilik, deka ganti Rimau enggau dagin iya saketi, tu adat. Ko Hakim Besai Singa leboh iya mutus ka runding diri ba pechara Rimau seduai Kambin. Manah penemu nuan Tuan Hakim Besai Singa, ko saut Luya Pelandok. Enti munyi nya enda meh aku nyadi nunu rumah pechara tu, sebaka enggau Rimau ke enda nyadi makai anak bujang Kambin. Ti nuan nentu ka Rimau nyadi makai anak bujang Kambin, aku tunu mega rumah tu, laban kami duai Rimau sama bisi mimpi, pia ka Luya Pelandok. Udah nya tebuai meh pechara Rimau seduai Kambin ketegal pimintar enggau pengelandik Luya Pelandok ke ngaga diri bisi mimpi, nunda mimpi Rimau. Lepasnya, serta udah abis pechara Rimau seduai Kambin, gaga meh sida Kambin menyanak. Anak Bujang Kambin nyau ngingkak gaga ke diri enda nyadi diempa Rimau. Sida Kambin menyanak lalu meri besai-besai terima kasih ngagai Luya Pelandok, serta lalu meri Pelandok sa sintong buah buan ke upah iya nulong ngator pechara nya. Pelandok pan gaga mega nerima buah buan ngemaioh nya. Bisi endar ka dempa aku saminggu tu, ko iya. Bakanya mega bala jelu bukai lalu madah ka diri besemaia deka beguna ka Luya Pelandok, enti semua sida bisi bechara dudi ari ila. Tudah Tuan Hakim Besai Singa nyau enda nyamai asai ketegal ati iya udah bisi deka ngering ka Rimau, enggau ensepi diri alah penemu enggau pemintar laban Luya Pelandok. 6. Ensera Pelandok Numbit Bandir Tapang Nyadi skali kenu ko sida niang Ini kalia, Gajah sida Badak baum ba pulau tanah siti. Nyadi ba pulau nya tumbuh kayu ka bebesai baka tekam, keladam enggau madang tapang. Bandir tapang maioh agi ke nyau ka baka dinding empa pemesai. Nyadi seduai baum laban deka muka pengerami mimit, serambi ka dikena ngingat ke pengelama seduai ke udah bepangan enda belaya agi. Tembu seduai ke baum, seduai lalu ngiga maioh macham utai ke nyamai-nyamai diempa, baka buah sebelah kampong enggau buah bukai semak kampong melayu. Udah nya seduai lalu ngambi buah nyiur enda jauh ari kampong melayu enda jauh ari tebing tasik. Ko seduai buah nyiur kena ngupah sapa orang tetumbit ke bandir tapang sereta lalu tekebus ka iya. Nyadi endor bandir tapang tu enda jauh ari seduai ti deka muka pengerami nya. Seninjik bendar leboh nya mega, Pelandok pan datai ngagai seduai kia. Nama agi deh Pelandok tu endang orang pintar. Apu! Nama utai dikerja seduai ditu deh sambi? ko Pelandok nanya seduai. Dia Gajah seduai Badak lalu nusoi samoa leka aum seduai ti deka muka pengerami mimit ngagai Pelandok. Dilah Pelandok seruran kelur-kelur serta tuchum legup ninga berita

seduai. Gajah seduai Badak lalu ngasoh Pelandok nesau samoa jelu dalam kampong ngasoh sama datai ngagai pengerami nya. Pelandok lalu madah ke pengaga ati diri ninga berita nya, lalu iya pan lalu nyanggup betesau sebelah menoa nya dia. Udah nya Pelandok lalu mupok madah ke Sambi Tekura ti endang sulu iya. Seduai iya baum lemai nya. Leboh seduai ti baum tu tadi dia Pelandok lalu tulih ke runding enggau akal ti manah. Sambi, ko iya nganu Tekura. Pala Tekura lalu enchekol mimit mending ka jako Pelandok. Manah nuan ngambi buor ba sida Baginda Rajah Landak. Eh! Kapa guna nya Sambi? ko Tekura nanya. Anang guai nanya dulu, ko Pelandok. Lagi nuan nemu, ti aku madah ka nuan. Udah nya lalu nyau meh tudah Tekura tu tadi ringkap-ringkap mansang ngambi buor ngagai rumah Baginda Rajah Landak. Nyau kelama datai tudah Tekura mai buor ngagai Pelandok. Mai buor nya seduai lalu mansang ngagai pun tapang ke deka alai orng bepekit numbit bandir pagi siti. Datai dia, seduai lalu berengkah ngebur bandir tapang ke enda jauh ari endor Gajah seduai Badak ke deka muka pengerami. Nyadi seduai ke ngebuor bandir tapang endang semalam-malam nya. Udah tembu seduai ngebur bandir tapang nya seduai lalu ngadu ke lubang abi buor nya manah-manah, isi ke seduai abok buor ke dalam lubang mimit awak ke orang enda ngelala bekau buor seduai iya. Pagi hari siti Pelandok lalu berengkah nesau samoa orang datai ngagai pengerami ti dibuka Gajah seduai Badak. Samoa jelu ti enggau iya betemu diasoh iya sampal datai magang. Iya bejalai sepagi-pagi nya, bukit diturun bukit ditiki, sungai diulu, sungai di ili, laban enggai ke samoa jelu enda enggau ngabang pengerami Gajah seduai Badak. Iya meh samoa jelu udah abis kena tesau iya lalu pulai baru. Kira nyau tarik mata panas, samoa jelu pan nyau udah datai magang. Leboh bala jelu sama udah terentak datai, dia Gajah seduai Badak lalu bejako enggau bala jelu madah ka kabuah seduai ke muka pengerami nya. Badu Gajah seduai Badak nusoi kabuah diri ke ngaga pengerami, bala jelu maioh pan berengkah serta belabuh makai enggau ngirup. Udah kemas makai enggau ngirup, dia Gajah seduai Badak lalu madah ngagai orang maioh pasal sida ke deka bepekit numbit bandir tapang. Ko seduai iya, sebarang sapa bagi kitai tekebus ka bandir tapang nya lagi, deka diberi upah buah nyiur. Ninga nya, nama agi deh bala jelu ke bebesai, nyau bechakap dia. Nya meh tudah Pelandok seduai Tekura nyau abis deka kena indik bala sida ke bebesai. Nyau pedis ati seduai ensepi diri bangat digaga orang baka nya. Udah nya lalu bejako Pelandok.

Anang bangat bechakap ngudu nya kita, ko iya. Enti ka, ti bangat ngumbai diri kering tak tumbit meh bandir tapang nya ulih kita. Enda nyamai bendar tak nyau besap-besap abis ka kena indik kita. Ko iya. Ninga jako Pelandok munyi nya, lalu angkat Gajah nguji numbit bandir tapang. Tumbit Gajah dia nyau temegum-temugum bandir tapang laban kaki Gajah, daun nyau besepur laboh laban renyang puchok tapang ditumbit Gajah, tang bandir enda bumbus, samina kulit ngeliti mimit. Suah Gajah nguji deka mumbus ke bandir tapang, nyau machammacham chara iya, tang tak enda olih iya. Samoa jelu, lebih agi sida ke besai sama bela nguji numbit bandir nya magang tang siko pan nadai meh tulih deka ngebus ka bandir tapang nya. Nyau abis samoa jelu bela nguji deka numbit serta mumbus ka bandir tapang, tang enda olih magang. Nyau kelama, nya baru Pelandok angkat junok-junok. Au! Enda olih kita meh nya, ko iya. Uji lak ka kami duai sambi Tekura nguji ka pengering diri. Bala samoa jelu ninga jako Pelandok munyi nya, lalu baka rakah ketawa. Bisi nyau pegari kentut bai ketawa. Gamal ke mesai nya deka nguji numbit bandir tapang. Deh kami ke besai serta kering agi enda tebumbus ka iya. Ko jelu bukai bejako. Anang guai bejako munyi nya meh samoa kita. Ni kita nemu nasit siko. Gamal kita amat besai, tang keda enda kita biak agi ari aku deh, ko Tekura. Pengering enggau penggemit gamal enda tau ka banding. Bah! Sambi, tumbit bandir tu ulih tua, ko Tekura nganu Pelandok. Lama Pelandok enda nyaut iya. Iya tembu neranting ka anak buah isi iya, lalu mulut iya tembu kulap-kulap baka ke muchau ka menserum iya. Nyau kalama iya ke udah ngering ke isi diri, serta mulut pan lama ga udah kulap-kulap, nya baru iya madah ke diri deka belabuh numbit bandir tapang nya. Dia seduai lalu ba-bah sereta numbit bandir tapang nya. Peda tak sama tembus ari spiak kaki seduai. Tak nyau besebun seku bandir tapang kena rejang kaki Pelandok. Udah nya seduai sama narit kaki seduai. Meda utai baka nya, ngenong samoa bala jelu ti bisi datai ngagai pengerami nya. Nadai siko sida sangka ka Pelandok seduai Tekura tekebus ke bandir tapang nya. Sida iran bebdar ati meda pengemit gamal seduai ti ulih mumbus ke bandir tapang. Pedis bendar ati sida Gajah, Badak enggau jelu besai bukai, tang deka sida ngayan ka pemedis ati diri, nyau takut ga sida udah meda pengering Pelandok seduai Tekura. Nyadi Pelandok seduai Tekura, sama gaga bendar ensepi diri tetembus ka bandir tapang nya. Dia seduai engkechit kiba kanan sabelah nya dia. Pelandok lalu ngetis-ngetis ka kaki diri ngerawis tanah sebelah nya dia. Baka ke agi deka numbit bandir nya baru, kenu ko gamal iya dipeda jelu bukai. Nyau udah puas seduai ke ngayan ke pengaga ati diri ti udah menang bepekit numbit bandir, nya baru seduai nerima upah buah nyiur, upah seduai ke tanda pengering seduai ke udah olih mumbus ke bandir tapang, ti enda olih dikereja jelu bukai. Gaga amat

seduai, lebih agi leboh seduai ninga jako puji orang maioh. Tembu nya, samoa bala jelu mupok mulai ka diri magang, tang lalu enda nemu diri udah alah laban akal Pelandok seduai Tekura. 7. Ensera Puntat Ensera tu berengkah ngenang pendiau Puntat seduai indai iya ke belangkau kadiri-diri, enda betampung enggau rumah panjai orang Gelong Batu Nakong Nyingit Nyingong Ngelentik Punggong. Ba langkau nya seduai iya betanam betupi baka orang bukai ba menoa nya. Nyadi Puntat kenu ko leka ensera, nyau bujang raya, tang enda terus jako, bisi ka kat-kat mimit. Nya alai enti leboh iya bejako sereta berandau enggau orang, leka jako ti dipansut ke iya suah bendar betandu-tandu. Nyau kelama seduai ke udah diau dilangkau, pagi siti Puntat bejako enggau indai iya. Indai, ko iya, A-aku de-de-ka bin-bin Indai. Nama utai ko nuan nya anak? Tabin nuan? ko Indai iya nanya. Enti nuan tabin aku ngambi ke nuan manang ngubat nuan. Ko Indai iya. A-aku de-de-ka bin-bin kum-kumang. Ko Puntat. Deka bebini nuan tu anak? ko Indai iya. A-a au. Ko Puntat. Puntat lalu ngasoh Indai iya ngambi lanji siti ke besai. Enggau lanji nya Puntat lalu nurun ka Gelong. Lanji nya keno ko ati iya, dikena ngema Kumang. Datai ba kaki tangga rumah orang Gelong, iya lalu ngangau nanya ka penyadi rumah orang. Oi! U-unggal Nge-Nge-Ngelai! Ja-ja-di ru-ru-rumah ki-ki-kita? ko iya. Leboh maia nya Ngelai baru ngebak ke pintu baru pansut makai ari bilik. Malik iya ngagai kaki tangga, meda Puntat. Oh! Jadi Unggal, lalu meh niki. Ko Ngelai. Iya lalu niki sereta dudok ba ruai Ngelai. Iya lalu disua ke orang ruku enggau baku pinang. Udah nya samoa bujang sida dia lalu sama datai ngulu iya magang. Nama pejalai nuan Unggal Puntat? ko Duat Bulan Menyimbang. Na-na-dai pe-pe-jalai bu-bu-kai. A-a-ku mi-mi-na de-de-ka be-bi-ni Kum-Kum-mang. Ko iya.

Ninga iya madah ka diri deka bebini Kumang, tak ngenong magang samoa orang ke ninga iya dia. Udah nya baru Duat Bulan Menyimbang nyaut. Oh deka bebini Puntat tu. Lagi meh Unggal Puntat, nganti aku dulu bejako enggau Kumang empu. Ko Duat Bulan Menyimbang. A-a-au, ko saut Puntat. Kati nuan bisi mai ma dikena nuan ngema iya? ko Duat Bulan Menyimbang, nanya iya baru. Bi-bi-si. Nya-nya la-la-nji a-aku. Ko iya. Duat Bulan Menyimbang lalu nyengkau lanji Puntat, lalu dima iya bejalai niti rumah. Datai iya ba ruai sida Kumang lalu tepeda ke ukoi beranak dua pasang, mangah bendar. Tang bisi siko ke lebih agi mangah agi ari sida bukai. Makai pan enda meh sida berani teberi ka iya, enti enda Indai Kumang empu meri iya makai. Datai Duat Bulan Menyimbang dia lalu ditunga ka iya moa lanji nya. Udah nya ukoi lalu dikaul iya ke dalam lanji. Dinga tak mengkaing ukoi tama lanji, tang iya nadai tetemu ke utai kena nudong moa lanji. Seninjik bendar Kumang pan mansa ga deka mansang nganchau tikai dikena iya nyembui padi. Oh Endu! Nuan ngiga utai dikena alu nudong moa ma Puntat tu! ko Duat Bulan Menyimbang. Iya minta ukoi kita ke mangah tu, awak ke bisi dikena ngasu. Eh! Kapa nya deh Bulan Menyimbang. Beri meh, enti iya minta. Maioh ukoi iya nya dia, nyau enda olih beri makai, nyau enda alah tupi agi. Nya keba manah, enti iya deka bempu indu ukoi mangah nya. Ko Kumang. Iya lalu ngiga utai dikena Duat Bulan Menyimbang nudong moa lanji Duat. Bulan Menyimbang lalu ngema lanji nya baru pulai ngagai Puntat. Datai dia, gaga bendar at tudah Puntat meda lanji tak berat. Tentu Kumang, ko ati iya dalam nyin. Nama agi pengaga ati tudah tuai. Iya lalu angkat ngerampas lanji nya ari Duat Bulan Menimbang, lalu nyau nurun pulai. Laban pengaga ati iya naban ke Kumang dalam lanji, dia iya nyau enda tepadah ka diri mupok agi ngagai sida Ngelai. Skumbang dirantu jalai dia ukoi selalu ngaar dalam lanji. A-a-nang I-I-nggar Kumang. A-a-pin da-da-tai. Ko iya. Nyadi ukoi nya enda nemu agi seruran ngaar berari dalam lanji iya. Nyau datai ba pendai sida, dia Puntat lalu bejako enggau Kumang ke dalam lanji. Ma-ma-ndi Kum-Kum-mang, ko iya. Puntat lalu muka tudong lanji. Tak tekenyit iya meda indu ukoi lalu pansut ari lanji. Dinga lalu ngaar-ngaar iya, ngeli lalu ngerising deka ngetup iya. Ngaa! Ngaar! Ko indu ukoi nya. Iya lalu merejuk ngigit idong iya Puntat. Udah nya, nama agi deh, abis samoa tungkol idong iya tingkil digigit ukoi. Iya lalu lari ka rumah mai moa diri nadai agi idong.

Darah idong iya nyau kerenjui nurun moa iya. Ukoi lalu ngagai iya mansang deka ngigit kaki tang seruran rapas bari-ari. Tegar ga iya belanda. Datai dirumah, dia indai iya nyau enda ngelala iya agi laban ti nadai agi tungkol idong. Jako iya ga endang kaat-kaat lalu ditambah ka idul laban nadai idong. Lapa nuan Puntat? ko Indai iya nanya. Di-gi-gi-git uk-oi di-be-be-ri Bul-Bul-lan Ma-Ma-nyi-nyi-mbang. Ko iya nyaut Indai iya. Udah nya, malu meh tudah Indai Puntat digaga Duat Bulan Menyimbang bakanya. Iya lalu berunding deka nunggu Bulan Menyimbang. Agi tumu hari siti leboh idong iya nyau udah gerai ke diketup ukoi dia Puntat lalu mansang ke Gelong, mansang deka nunggu Duat Bulan Menyimbang. Datai iya din lalu niki, endang enda nanya ke penyadi rumah. Nyau tekenyit tudah Ngelai meda Puntat ngenumu nya datai. Apo! Nama pejalai nuan ngenumu nya Punggal? Ko Ngelai nanya iya. A-a-au, bi-bi-si, de-de-ka nu-nu-nggu Bu-Bu-lan Ma-Ma-nyi-mbang. I-I-ya me-meri aa-ku u-u-koi ma-ma-ngah, ko Puntat. Bulan Menyimbang pan bisi ga dia sama dudok enggau Ngelai ngulu temuai. Au, enti aku salah nya tunggu meh. Kati ka pemesai adat dipinta nuan deh? Deka ke duit, mas, deka ka tajau nuan? ko Bulan Menyimbang nanya iya. En-en-nggai a-a-ku ut-u-tai nya, ko Puntat. Bah! Nama utai dikedeka nuan deh? ko Bulan Menyimbang nanya iya baru. Te-te-lu ma-ma-nok ri-ri-nti, ba-gi-gi ta-tang-ga. Pe-pe-noh a-a-ri ka-ki sa-sam-pai ka-ka pa-pala. Ko Puntat nyaut. Ninga nya tak lalu angkat Duat Bulan Menyimbang ngema badok niti rumah, mupu telu. Ukai nya baka ke nadai telu ba rumah orang Gelong, nya alai enda lama iya lalu datai ngema badok penuh laban telu manok. Udah nya lalu diengkah ka iya ba tiap-tiap tangkal tangga kenyau ari kaki nyentok ke pala tangga nitih pinta Puntat. Peda tangga kenu nyau penoh, bisi laboh skeda art tangkal tangga nya. Angkat Puntat, lalu ngisi lanji enggau samoa telu manok nya tadi. Udah lanji iya penuh, iya lalu mupok mulai ke diri. Leboh iya datai dirumah nama agi deh, tak moa pengaga meh tudah indai meda Puntat bulih telu manok ngemaioh nya. Udah nya, telu lalu dipandok seduai mindai iya ba kawah besai siti. Kawah nya nyau penoh laban telu manok. Udah mansau telu seduai menyanak lalu sama berengkah makai telu sampai abis, endang nadai tinggal sigi agi. Berasai sama kenyang meh seduai mindai udah badu makai telu manok nya tadi, ti bulih sekawah besai.

Enda lama, udah seduai menyanak tembu makai telu sekawah besai, dinga tak kentut Indai iya. Udahnya kentut ga Puntat. Kentut siko, kentut siko. Nyau betmbal-timbal kentut seduai menyanak semalam-malam nya. Tawas hari siti Puntat seduai Indai iya pan lalu sama mati ga. Mati kentut makai telu manok kelalu maioh. Nyadi kenu ko leka ensera tu, dia deh Indai Puntat bebali nyadi Nendak. Nya alai enti kitai ngasu beburu, bisi ninga nendak kiba lalu saut nendak kanan, nya burung manah, laban nya burung surong Unggat. Ngayu ke kitai mandok jelu ulih ngaga sahari nya. Nyadi Puntat kenu ko ensera tu, mati lalu bebali nyadi salabuan satawak. Nya ali enti bisi gendang rayah, dinga bakaraong bala ukoi nyalak ninga munyi nyawa satawak. 8. Ensera Tekura Abis Akal Nyadi skali kelia bisi Tekura siko ti diau ba menoa iya di munggu madang pudu diteku gelong ka tibang, ba pelepah sabang sampah baka rumah Ini Manang. Iya endang diau kadiri-diri saorang-orang. Umur iya endang enda kala begulai enggau orang nyerumba iya ke udah serara enggau sida apai indai iya menya. Ba menoa ke endor iya dia endang maioh bendar madang riang batu enggau riang nandan ti pemakai Tekura. Nya alai iya baka ke tau diau kediri, laban pamakai endang nadai penusah ngiga. Samina sebengkah utai ke ditengok ka iya nya, iya nyau deka begulai enggau orang laban deka meda pengerami di menoa orang bukai. Nyau kapuas iya ke diau kediri dia iya nyau bisi berunding deka mindah ngagai menoa bukai awak ka bisi orang enggau begulai, enggau berandau ngicha ka bisi orang enggau bepangan. Siti utai ti ngasoh Tekura tu tusah ati laban iya berunding ka jalai ngasoh iya jampat datai ba menoa bukai. Ka terbai nadai ga sayap. Deka merau enda ga iya tau beban perau. Deka bejalai, kaki ga pandak. Nya alai tusah ati meh tudah Tekura, tusah ati ngenang diri ke enda badu diau kadiri-diri saorang-orang. Akal bisi ga iya akal, tang enda temu empa, laban enda kala diuji ka iya. Seninjik pagi hari siti, leboh iya regap-regap ngadu ka dinding rumah iya ke nyau udah jai ari luar rumah iya, dia iya lalu betemu enggau itit dua iko. Ragak bendar itit dua iko nya, seruran rah-rah bejako enggau pangan diri. Dia Tekura lalu nyapa seduai iya. Oh! Ka kini ka seduai tak ngena bendar gaya pejalai? ko iya. Eh, deka bejalai ngagai menoa bukai kami duai tu, ngicha ka tau betemu enggau orang bukai. Enda nyamai bendar kami duai tak samina guot-guot diau kediri ngelamatu, ko saut itit. Enti bakanya ngena bendar meh nya. Aku tu pan berunding deka bejalai ngagai menoa bukai meh. Tang aku tak nadai jalai mindah. Sayap aku tu nadai, kaki enda panjai, ko saut Tekura.

Itit lalu nyaut iya. Nadai nya kirau ka nuan deh sambi. Enti nuan nyenggala deka amat mindah ari menoa tu, kami dua olih naban ka nuan terebai. Tang ni maia kitai angkat deh? ko Tekura nanya. Nadai nya iboh dianggor ke lama, ko Itit. Enti nitih ka aku tak pagila pan tau meh kitai angkat. Nya alai hari siti sida lalu ngator diri mindah ari menoa nya. Nyadi atur sida terbai bakatu. Nyadi Itit diasoh manggum lumpong kayu ba putting setak-setak. Tekura diasoh ngetup kayu, ngambi ka nyamai ditaban ka seduai terebai. Udah nya Tekura lalu ngepit samoa anak bungkus barang enggau tungkat lalu ngetup kayu munyi ka penemu Itit. Udah kayu diketup iya, Ititi lalu angkat terebai naban ka tudah Tekura. Peda kebap-kebap sayap Itit dua iko nya terebai. Nyadi Tekura tak samina kating-kating ngetup lumpong kayu. Nadai utai ngenyamai nya iya ditaban ka Itit dua iko nya terebai. Nyau kelama sida udah terebai dia sida lalu mansa rumah anak mensia. Angkat deh, tak enda mukai-mukai maia leboh nya anak mensia bisi malik ka langit, lalu tepeda ka Tekura terebai. Bala anak mensia lalu ngerara, Apu! Nama nya tak tekura terebai deh apai? Ko anak mensia. Tentu nya Raja Tekura, enti Tekura ngapa dini nemu terebai. Angkat deh ninga jako kelangkong anak mensia munyi nya, dia tudah tak berasai berai moa, sengo lubang idong, ngambi ka bala anak mensia amat ngumbai iya nya tadi Raja Tekura, dia iya berunding deka madah ka diri amat Raja Tekura. Iya lalu bejako Amat, aku tu meh Raja Tekura, ko iya. Leboh nya, iya meranggap ka mulut diri bejako laban nyaut langkung anak mensia. Iya lalu tebelengka ari papong kayu ti diketup iya nya tadi. Udah nya nama agi deh lalu labuh kabaroh meh tudah tuai, datai dibaroh lalu redak meh iya ninggang gerugu batu galang melintang semak rumah anak mensia. Apu! Sayau bendar meh Raja Tekura nya laboh deh apai, pia ko jako anak mensia. Kamaia kitai kala ningga Tekura ngelulu ka diri terebai. Tekura langkong nya anak ditaban ka Itit terbai. Ko saut apai anak mensia. Nyadi Itit dua iko nya tadi lalu nyau lapu-lapu terebai ngagai menoa bukai, baka penerebai burung tajai belanggai panjai bekengkang panggang kepai-kepai ngumba diri terebai ka Brunai pulai ari, nya terebai jampat baka serap peluru besi. Lalu inggap ba menoa orang bukai, ke ngujong ka seduai idup senang lantang. 9. Ensera Tekura Pechah Kerubong Nyadi enti nitih ka leka ensera Tekura kalia besai bendar, jauh besai ari Tekura ke diatu. Ti iya bediri bisi nyau ka ninggi kitai mensia. Diatu nadai jangka aku kitai bisi meda

Tekura mesai nya, lalu kalia kerubong iya alus enda besingkap-singkap baka ke diatu. Tekura mega pintar seta landik bejako bejalai ke penemu. Ngelakar orang pan Tekura endang beberita bendar didinga kitai. Laban penemu maioh, mulut pan bias, suah bendar Tekura olih ngelakar orang. Tang suah ga akal iya makai diri empu. Nyadi skali kalia kenu ko leka ensera tu leboh musim lapar pungkang, kengka pemakai dalam kampong udah abis dipakai samoa jelu bukai. Semoa jelu rambau nya lapar magang. Tang lebih agi lapar tudah Tekura. Laban tudah tuai ti lubah bejalai bagiga ka pemakai iya endang balat agi lapar ari jelu bukai. Perut iya nyau ngelempis, mata rapa, enda tentu meda utai agi. Dalam ati iya din endang ngadang diri lama laun pan mati dipantai, iya mupok ngerayap naka olih ngiga ai endor mati. Nyau kelama iya keudah ngerayap iya pan datai ba Sungai mit siti. Udah lelak bekau ke bejalai, nya alai leboh iya datai ba ai nya iya lalu ngrirup naka pemendar muai aus. Lepas nya iya lalu tindok. Mata iya pejam, kaki iya nyengkulong enda kebut-kebut. Samina ai bisi perbubok kena kesoh idong iya ti enseput. Kira sejam iya udah nganti diri mati, dinga iya burung nyau richah, datai mansang mandi ngagai sungai ti endor iya nat kediri. Leboh Tekura ninga bala burong datai iya lalu ngaga diri mati. Enda mukai-mukai leboh nya mega Tekura tak deka kentut. Makin balat agi iya nan ka diri makin deka agi kentut iya pansut. Nyau kelama, kentut iya pan lalu meletup inggar bendar. Ai kena kesoh kentut iya nyau ngelegua, iya pan lalu telentang. Ninga utai nginggar nya burong ke mandi lalu ngetu mandi. Sida lalu badu bejako. Udah nya malik sida kulu, meda Tekura telentang. Kumbai sida udah mati meh tudah Tekura. Au, kasih meh nuan Tekura, enda enggau kami ngabang ke langit, laban udah mati. Ko bala burong dinga iya dia. Udah nya burong pan lalu terebai. Tekura lalu angkat berunding deka enggau burong ngabang ka langit. Pelut ka iya mata, kering ka iya isi, lalu mupok ngerayap beguai-guai nitih ke burong nya tadi. Nyau kelama iya pan datai ga ba bala burong ke baru ka angkat ke langit. Dia Tekura lalu madah ka diri bisi ati deka enggau ngabang ke langit. Kami enda nemu jalai mai nuan ngabang, laban nuan nadai bisi sayap. Ko bala burong nganu iya. Eh! Enda nya tusah, ko Tekura. Uji kita meri aku bulu siti siko kena aku ngaga sayap. Ko iya. Kami enggai meri nuan bulu, ko burong. Lagi datai dilangit din nuan ngakal kami, kami sigi nemu kita Tekura endang Raja Penggelakar. Ko burong nyaut iya.

Hi! Kita burong amat beli seta pandak runding. Ko Tekura. Tekura tu maioh Tekura, Tekura ngelakar bisi, Tekura tambit bisi, Tekura jaong bisi, Tekura umang bisi. Kati Tekura nama aku tu peda kita deh? ko iya ngelaban bala burong dia. Ninga Tekura Munyi nya, bala burong lalu enda bemunyi agi. Tak samina merening moa pangan diri. Lama sida nadai bemunyi. Udah nya baru samoa burong nyau berunding deka meri Tekura bulu siti siko ari tuboh sida, lalu dikena sida ngaga sayap Tekura. Udah nya sida Ruai, sida Tajai, sida kenyalang, tekana, kuki, menaul enggau samoa burong ke besai-besai lalu bela sama meri iya bulu siti siko. Udah sayap Tekura tembu digaga, sida lalu sama terebai mansang ngabang ngagai Raja Langit. Nyau kelama sida udah terebai, sida lalu datai ba pendai Raja Langit ti begawai. Sida lalu mandi, udah badu mandi lalu begari. Bunong sida begari nya meh bau utai datai ari rumah Raja Langit ti begawai nyau enda nemu agi. Bau ai tuak nyau ngesoh. Nya ga baka bau penganan nyau bau rengut. Tudah Tekura lalu berunding, Tu baru iya lagi, ko iya Lama udah enda nemu utai. Ngelamatu ngumbai diri mati laban nadai utai diempa. Ti baka tu dini tau mati. Ko ati iya. Tembu sida begari, sida lalu belator deka niki ka rumah. Tang bedau sida niki dia Tekura lalu bejako. Nyadi enti ka adat orang menoa tu bedau kitai niki ka rumah, kitai enda tau enda nukar nama diri ngagai nama bukai. Ko Tekura madah ngagai burong. Bala sida burong pan arap bendar ka jako iya, laban ko runding sida, Tekura endang maioh adat ditemu, laban iya selalu bejalai ngagai menoa orang. Sida lalu setuju nukar nama diri. Nya, udah nya sida burong lalu nukar nama sida, macham-macham meh nama baru sida digaga leboh nya. Tekura lalu madah ngagai sida nama baru iya. Nyadi nama baru aku. ko iya, Samoa kita. Nya alai kenyau ari diatu lalu datai ka kitai pulai ngabang ila kita patut ngangau ka aku ngena nama baru nya Samoa Kita ko iya. Udah nya samoa sida lalu belator niki ka rumah Raja Langit, Tekura dulu ngulu ka bala. Iya rungkak-rungkak nyan, lalu ditangkan ka bala burong. Datai dirumah, sida lalu diator orang dudok ba panggau. Tekura laban ti disangka orang tuai pengabang lalu didudok ka Raja Langit ba tengah sida. Sareta sida udah diator orang penudok, lalu betanggung ka samoa macham utai diempa. Dia Raja Langit lalu bejako madah ka pengaga ati diri meda sida sampal bendar enggau ngabang ngagai rumah iya. Abis jako Raja Langit iya lalu ngasoh sida makai samoa pemakai ti udah dibantai ka ruai. Ninga jako Raja Langit nya, Tekura lalu angkat, bejako. Nyadi tu bakatu tuai, ko iya, Laban bala kami tu maioh bendar, nya alai sapa kami tu diasoh nuan makai utai nya deh? ko iya nanya Raja Langit. Eh! Nadai nya sapa-sapa deh unggal Tekura. Tak ke samoa kita, ko Raja Langit nyaut. Ninga Raja Langit nya nyebut Samoa Kita, laban nya nama baru Tekura, iya lalu nguing ngagai bala burong. Nya kita udah ninga sapa bagi kitai ti patut makai utai nya, anang ngumbai aku jai, kita. Ko iya. Aku ka ga mai kita makai utai tu, tang Raja Langit ga udah madah ka samina aku aja ke dibri makai tu. Ko iya nganu bala burong.

Udah nya nama agi deh tudah Tekura makai utai dia, tambah agi, iya endang lama udah lapar nadai utai diempa. Bala sida burong tak semina peli-peli leka mata, ngemata ka iya ke makai. Leboh perut iya nyau kenyang, nya baru iya ngasoh sida burong dia makai teda iya. Maioh burong enggai makai teda iya, laban sida pedis bendar ati udah diakal iya bakanya. Semina tudah menaul aja ke deka makai teda Tekura. Burong enda peduli ke diri lapar, enggai meh makai teda nya. Nya alai nyau kapuas sida ke nat ka ati pedis sida lalu angkat mantun bulu sida ari tubuh Tekura. Udahnya sida lalu terebai ninggal ka menaul ke agi benong makai teda Tekura. Udahnya lalu tusah meh ati Tekura, deka terebai pulai, nadai agi sayap, laban ka samina siti bulu menaul agi lekat ba tuboh iya. Udah nya kejang menaul deka angkat terebai, Tekura lalu mesan, ngasoh unggal iya Pelandok nyendia ka panggal libut ke lembutlembut dianchau endor iya terengkah leboh iya ke laboh muai diri ari langit. Datai menaul ditanah iya lalu nusoi pesan Tekura ngagai Pelandok. Ninga pesan Tekura tak berat bendar bakanya, dia deh Pelandok lalu nesau samoa bala raban jelu, mai sida nyendia ka pengelaboh Tekura ari langit. Sida mai nyendia ka pelasar alai Tekura terengkah. Tang utai ke dikena sida bala raban jelu nyendia ke endor iya terengkah ukai munyi ti dipinta Tekura. Sida nugong ka batu ke besai-besai, laban menaul salah tampong ke nusoi pesan Tekura ngagai Pelandok tu tadi. Sereta pelasar udah tembu disedia ka bala raban jelu, Tekura pan lalu muai diri ari langit. Iya laboh deras amat laban ke nadai agi bulu enggau sayap, endang nadai utai ngeribat agi. Samina kaki enggau jari iya kepai-kepai ngapa. Anti iya terengkah apin ga terengkah. Mata iya laban rawan, ama nya pejam, lalu ama ga enchelak. Perut iya ama gentung ama nya ngelempis, burit ama munching ama ga nya ngeleput. Ati tudah tuai ama nya berani, ama ga nya takut. Nyau kelama ke udah tayun-tayun laboh ari langit sepi iya diri tak merempat Laboh ninggang batu meh iya nya tadi. Iya lalu enda nemu utai agi. Ninga utai nginggar nya mermpas Pelandok lalu nyengok serta lalu guai-guai belanda kia. Datai dia iya meda Pelandok nyau enda temu gamal agi, laban samoa kerubong iya pechah seta pambar kiba kanan. Meda utai bakanya Pelandok lalu nyabak ka pangan iya Tekura ke udah bulih penusah ngudu nya, agi ga iya ngenang diri nadai pangan agi enggau besulu. Nyau kepuas iya ke udah nyabak, iya lalu ngumpul kerimpak kerubong Tekura ke pechah sebelah nya. Datai dirumah iya lalu ngambi Manang Menarat, ngasoh iya belian ngidup ke Tekura. Malam nya Manang Menarat lalu berengkah belian mupok nampil ke kerubong Tekura pulai baka selama. Nyau kelama iya udah belian, kerubong Tekura pa ulih ga tampil ka iya baru. Tang laban kerubong Tekura tu pechah enda abis gumpol Pelandok, nya alai Tekura nyau jauh mit gamal ari ke udah. Nambah ka nya, kerubong nyau alus baka ke selama. Ari pemimit kerimpak kerubong Tekura ti olih tampil ka manang, nya kabuah

datai ke saharitu Tekura jauh mit agi ari gamal Tekura dulu menya, sereta kerubong agi alus baka kalia. 10. Ensera Telu Baya Nyadi skali agi tumu pagi Pelandok bejalai ngiga pemakai. Kira sa-jam iya udah bejalai ngejang ke rumah, iya pan datai ba paya madang melai bechampur enggau madang buan. Pagi nya Apai Tuai Laut benama Dullah endang udah dulu datai dia. Pengawa Dullah nebas paya nya endor bumai. Pelandok, laban ke nyau lapar, tetengok bendar ka buah buan. Deka iya mansang takut ka Dullah. Lama iya berunding ngiga jalai ngulih ka buah buan. Buah buan endang pemakai Pelandok. Enda lama udah nya, iya pan lalu mansang bejalai begadai-gadai ngagai madang buan. Seninjik bendar, laban Dullah ke bendar ngasak kadiri nebas, enda meda iya. Udah Pelandok nyau kenyang ngulam buah buan, iya pan lalu mulai ka diri ka rumah. Tang tak enda mukai-mukai, leboh iya agi dirantu jalai iya lalu tekenyit besatup enggau baya indu siko. Dia baya tak lalu nekan ka Pelandok makai telu iya ba madang melai ke udah ditebas Dullah. Nama agi deh, telu baya nyau abis tekusai, lalu pelanting kiba kanan kena pantap Dullah. Tang kabuah baya nekan ka Pelandok makai telu iya, laban iya bisi meda bekau tunjing kaki Pelandok sebelahnya dia. Pedis bendar ati baya ngagai Pelandok. Iya endang ngengkang bendar ngumbai siko nya makai telu iya. Aku nadai makai telu nuan, ko Pelandok. Anang bula nuan, ko Baya. Uji abas kin, nadai bekau utai bukai din, tak bekau nuan magang. Nya alai nadai orang bukai endang sigi nuan makai telu aku. Ko Baya. Nadai! ko Pelandok. Bisi! ko Baya. Nyau ka-puas seduai udah bebelit ka jako, tak angkat indu Baya lalu nerekam Pelandok. Tang laban Pelandok bangat sikar serta jampat, lalu mengkechit ngagai lebak spiak kin. Seninjik bendar salah. Datai di lebak Pelandok pan lalu nyakap Baya. Kami bansa Pelandok enda takut ke kita Baya enti di darat. Tak sebarang pengawa bai kita, ko Pelandok dia. Iya lalu ngentak ka kaki, ngering diri nyakap Pelandok.

Anang banggar-banggar ngapa. Ko Baya. Gamal ke baka nuan nya, enda chukop telan aku segala. Enti nuan keras ngumbai diri nadai makai telu aku, manah tua bebatak tali, nya baru temu sapa bula, awak ka sama meda pengering pangan diri, ko Indu Baya. Udah nya Pelandok lalu nyanggup bebatak tali ngelaban baya. Gamal nuan amat besai, tang untak nuan mit, ko puchau Pelandok. Pelandok lalu minta timpoh tiga hari, baru bebatak tali. Udah nya Pelandok lalu mulai ka diri ka rumah, ngiga akal dikena ngelaban baya. Datai dirumah, iya lalu nudok ke diri. Enda lama udah nya iya lalu ngangau ke Tekura. Oh Sambi ko iya. Mati aku tu Sambi, di bai indu Baya bebatak tali, laban aku enggai disangka iya makai telu iya ba madang melai ba tebas umai laut Dullah din tadi. Ko Pelandok nganu Tekura. Oh Sambi, ko Tekura nyaut. Anang tusah ati nuan Sambi. Tu aku agi bedau ditu nulong nuan. Nya meh utai ke dilaban kitai, utai ke baka Baya Indu nya. Nama runding nuan deh Sambi? ko Pelandok. Nadai runding bukai tu Sambi. Ko Tekura. Leboh seduai bebatak tali ila, aku nulong nuan nanchang ka ujong tali nuan ngagai batang bandir nyior. Ukai Baya Indu nya meda deh Sambi, enti iya udah dalam ai din, ko Tekura madah ngagai Pelandok. Udah chukop timpoh tiga hari, Indu Baya pan datai ngagai pengkalan laut, ke endor seduai iya Pelandok deka bebatak tali. Datai iya dia lalu enda chachamang lalu ngangau ka Pelandok. Kati nuan udah datai Sambi Pelandok? ko iya. Aku tu Punggal, ko Pelandok, Dulu mimit datai ari nuan. Tak baru badu ngeruku aku tu, ko iya nyaut Baya. Nya alai, ko Indu Baya, pagitu tua endang bebatak tali, laban endang udah samaia suba. Au meh Punggal, ko Pelandok. Ti nuan nadai datai tadi endang deka madah ka nuan kin aku tadi. Kitai ga sama udah semaia enda tau bula skali-kali ke semaia kitai nya suba. Udah nya seduai lalu sama berunding ngiga orang diasoh nyadi Hakim ke pengawa ti deka belaban bebatak tali. Meda tudah Tekura bisi kaya-kaya semak dia, Baya lalu minta Tekura nyadi Hakim seduai. Pekandok lalu lantang bendar ati ninga Baya munyi nya, laban seduai iya Tekura endang udah bejurai ka utai nya. Baya lalu ngangau ke Tekura ngasoh iya pansut ari iya ke dudok

dugau-dugau. Tekura lalu ngaga diri tekenyit ninga penginggar nyawa Indu Baya ti ngangau ka iya. Tekura kamaia nya lalu ringkap-ringkap tudah tuai mansang kia. Udah nya Tekura lalu ngator adan endor seduai ti deka bebatak. Seduai diasoh Tekura siko, ari tebing lalu siko ari dalam ai. Iya ke ari tebing nya Pelandok, lalu Indu Baya ari dalam ai. Enti kaki baya udah datai didarat reti nya baya alah. Pelandok, enti spiak kaki iya udah terejun ka ai, reti nya Pelandok alah, lalu Baya meh menang. Seduai enda tau ngakal pangan. Aku ke nyadi Hakim tu tau didarat lalu tau mega ka dalam ai kin kai, ko Tekura. Udah nya Pelandok lalu diasoh iya ari tebing, Baya lalu diasoh iya terejun ka dalam ai. Udah nya baru Tekura lalu terejun ka ai nganjong tali ngagai Baya. Pansut ari dalam ai, iya lalu nganjong putting tali ngagai Pelandok ke didarat. Dia seduai Pelandok lalu sama besaup nanchang ka putting tali ngagai batang nyior ke enda jaoh ari endor nya. Pelandok pan lalu dudok ngelulu ka diri matak tali. Tembu Hakim Tekura ke nerang ka adat, lalu ngatur seduai ti deka bebatak, Tekura lalu mansang ngagai tengah tali. Dia iya lalu ngasoh Baya seduai Pelandok lalu sama sedia. Udah seduai iya sedia Tekura lalu niap sa! Dua! Tiga, batak! Ko Tuan Hakim Tekura. Udah nya Baya pan lalu matak penapat-inat. Peda ai nyau bebual serta nyau besimpor kiba kanan laban iko Baya. Batak iya enda ga olih. Empa pemendar iya ka matak baka ke deka terengkah ditanah kenu puchok nyior. Batak iya baru enda ga olih tarit, asai ke matak chagak bedil besi. Tarit Baya, enda ga olih tarit, asai ke narit Bukit Tuchong Sebangki. Nyadi Pelandok tu nyau abis rebah kiba-kanan ditaban ka tali ti ditarit Baya. Nyau spagi-pagi, sahari-ari Baya matak tali, enda ga olih. Insak Baya kenu nyau enda olih ensing ke agi nyau lilih ka diri ari lubang idong. Lior nyau bepupu pansut ari nyawa. Nyau ke lama ai mata Baya nyau renjai-renjai laboh ari mata. Tudah Sambi Pelandok nama agi tau nyau dugau-dugau dudok ngelulu ka diri nan ke tali, ngila ka Baya matak pun nyior. Tak enda berasai, Baya lalu ngelengka ka tali. Iya lalu niki ka pantai nyengok tudah Pelandok, meda tudah Pelandok bebendar agi ga ngelulu ka diri matak tali. Baya tu tu tadi lalu meradai ba pantai dia, nat ka pengelelak diri. Udah nya Pelandok lalu ngetu, meda Baya udah ngetu matak tali. Meda tak lama Pelandok seduai Indu Baya udah nadai agi bebatak nya baru Tuan Hakim Tekura ngansak ngagai tengah tali. Meda seduai lama udah ngetu bebatak, dia Tuan Hakim Tekura lalu nanya seduai iya. Kati seduai agi deka bebatak? ko iya. Aku tu nadai maioh jako, barang bai Punggal Baya nya, ko Pelandok nyaut. Ngenong Baya ninga jako Pelandok munyi nya, laban iya empu nadai tulang dianjong agi.

Meda bakanya, Hakim Tekura bejako baru, ko iya. Ba pemutus pechara seduai ti udah bebatak sahari-hari tu baka tu. Seduai sama kering sama enda tentu talah ka pangan, tang laban nuan Baya udah ngindik darat, nya alai nuan alah, ko Tekura. Ari diatu nuan enda tau nyangka Pelandok enchuri telu nuan agi. Amat meh telu nuan, ti munyi ko Pelandok dikachau Laut Dullah. Nya orang ke bumai ba tanah nya dia. Penyalah endang enggi nuan empu, laban betelu ba tanah Laut Dullah. Lapa deh ko Pelandok, bedau nemu pengering kami Pelandok nuan Punggal, ko iya nganu Baya. Ba ati aku sahari da tua agi bebatak nya baru puas. Pengering kita Baya lalu nadai endor aku nguji ka pengagah tulang, ko Pelandok. Angkat Pelandok ari iya ke dudok ninga ke pemutus pechara lalu ngaga diri baka ke deka narit tali nya baru ba moa Baya. Tudah Baya tak samina besap-besap leka mata. Ati iya malu bendar. Baya lalu ngelantar terejun ka ai nat ka urat nyau asai ti enda betampong agi udah bekau bebatak tali ngelaban Pelandok. 11. Ensera Tubu Indai Aloi Nyadi Apai Sali-Ali Saluli Tajung Pelikat tu endang orang ti pintar bejako, sereta landik nipu orang maioh dalam menoa nya. Taja iya pintar, tang suah agi iya saru pengawa dikereja. Nyadi skali, agi tumu pagi, dia Enchelegit bini Apai Sali-Ali angkat berapi. Leboh iya mandok lauk dia iya nemu garam sida udah abis, lalu nadai kena ngulai lauk agi. Oh! Abis garam aku tu, ko iya bejako kediri. Nama utai dikerandau ke nuan deh Enchelegit? ko Apai Sali. Eh! Kitai nadai agi garam. Alai nuan nemuai ngagai sida indai, minta garam. Ko Indai Sali. Nama nguna engau ngaram? ko Apai Sali. Endang munyi jako iya idol-idol. Eh! Dikena ngerami paku tubu meh. Pia ko Enchelegit nyaut iya. Au! Lagi meh aku nemuai minta ngaram. Ko Apai Sali. Udah nya iya lalu beguai-guai begari. Pasuk ka iya baju tibak labik, pasok ka tomekut abis rubik. Belit ke iya labong gari batik, sereta lalu tangkin iya duku tunggak tunggik. Udahnya iya lalu nurun. Nyadi rumah sida mentua iya numbas penyauh ari nya. Enda bangat berasai iya bejalai lalu datai dia. Tak enda chechamang meh iya, lalu tama kebilik. Iya lalu nudok ke diri dibilik. Akai-rai, lelak ikak bejalai. Ko iya.

Oh! Nama kabuah nuan bangat ngenumu nya deh Apai Duat? Nama utai dipeguai ka nuan? ko indai Enchelegit nanya iya. Hes! Ah! Nadai kebuah mukai, semina diasoh Enchelegit minta ngaram kena ngerami paku, tubu. Ko saut Apai Sali. Au! Apai Duat. Pia ko saut mentua iya. Udah nya lalu ditungkus mentua iya garam ngena upih, sereta lalu disimpan iya kedalam ma Apai Sali. Nya Apai Duat, udah aku simpan garam ba ma nuan. Ko mentua iya. Au, badah meh nya. Ko iya. Udahnya iya lalu mulai ka diri. Datai iya ba tanjong madang paku, dia iya meda paku maioh bendar. Iya pan lalu ngetu. Lama iya ngenong dia. Oh! Nya madang paku. Tentu paku nya diasoh Enchelegit digerami aku engau ngaram. Ko iya bejako kadiri. Udah nya lalu ambi iya upih garam ari ma iya, lalu gerami iya samoa madang paku ngena garam. Udah tembu iya ngerami madang paku iya lalu ngejang ke diri ari nya lalu datai ba tanjong madang Rigai. Peda iya sulur tubu munti rigai nyau baka chuit, ngenjing jerembun ba pun munti. Bah! Nya madang tubu! Tentu tubu nya ke diasoh Enchelegit digerami aku enggau ngaram. Untong aku nemu tubu paku enda ulih ngema. Ko iya. Iya lalu ngerami sulur tubu ngena garam. Enda lama udah nya garam iya pan lalu abis. Lapa deh! Masin paku, tubu munti udah digerami garam aku. Ko iya. Udah nya, iya pan datai ga ba rumah sida iya empu. Hari pan nyau tengah hari, lalu diengkah ka iya ma ba tempuan bilik. Lalu beguai meh tudah Enchelegit nyerungkai upih garam. Peda iya upih garam tak puang, nadai agi utai dalam upih. Ni garam olih nuan deh Apai Duat? ko Enchelegit nyapa iya. Garam ni? Nama utai ditanya ka nuan. Udah abis kena aku ngerami madang paku madang tubu dirantu jalai din tadi. Ko iya. Kasih-kasih deh nuan nya tambap-lap, enda nemu reti jako. Ukai nya dikena ngerami paku-tubu ba rantu jalai ko aku tang dikena ngerami paku-tubu kitai ke dalam belanga, dalam periok di rumah tu. Ko Enchelegit.

Nuan ke tambap lalu enda nemu bejako, minta ngaram dikena ngermi paku tubu ko nuan. Nya alai samoa ngaram abis dekena aku ngerami paku tubu ti ko nuan. Dini agi bisi ngaram. Ko saut Apai Sali. Tubu ditanah diri masin, tubu dirumah tu tabar. Ko indai Aloi. Au! Tabar tubu indai Aloi. Ko Apai Sali. Seduai lalu betundi enggau pangan diri, iya lalu ngeremok tusu Indai Aloi. Indai Aloi lalu ngaga diri nyerauh. Udah nya sida lalu makai enda begaram, laban samoa garam udah abis dikena Apai Sali ngerami paku tubu sebelah rantu jalai. Amat tabar tubu indai Aloi tu, ko Apai Sali. Enchelegit nyau ketawa rakah-rakah betati ka pengelap Apai Sali. Nya alai enti orang bisi udah nyabak, udah lalu ketawa tau ke tuchom, nya ke dikumbai TABAR TUBU INDAI ALOI. 12. Jerita Antu Kara Nyadi dulu kalia bisi orang siko ti benama Assan. Iya tu udah bebini, jadi enggau indu siko serta beranak lelaki siko ke benama Salau. Assan seduai bini iya gaga bendar ati meda diri bisi anak lelaki siko ke sigat sereta sikar dalam samoa main enggau pengawa. Nya alai endang kenyau ari mit iya arap ka Salau tau nyadi orang ke menyana ka ganti iya nampong bilik nampong pemaik sereta nyaga reta tengkira, enti leboh nyau datai ba maia seduai bini nyau udah nadai agi jemah ila. Nyadu leboh maia Salau nyau udah bujang, iya selalu belajar ke samoa pengawa ti tau pulai ke pengidup ti menyana kena ngidup ka diri empu. Salau tu anembiak ke rajin bendar, serta enggau liat ati ngereja pengawa ti mar sereta pedis dikereja. Nyadi skali leboh hari agi tumu pagi, dia Assan nurun bejalai ngagai tembawai buah tuai ti enda berapa jauh ari rumah sida empu. Nyau puas iya ke malik kiba malik ka kanan merening sereta nengkadah puchok buah, dia iya bisi tepeda ka manyi inggap sereta nepan ba puchok kara. Puchok kara nya enda berapa tinggi iga, tang rakah bendar dan. Assan lalu besindang pun kara enggai ka bisi orang bukai deka ngambi manyi nya. Udah tembu iya ke besindang pun kara iya lalu mulai ka diri ka rumah. Datai di rumah iya lalu madah ka diri deka mai Salau muar manyi lemai nya ngagai bini iya. Nyadi leboh maia hari nyau penumbas iya alai nurun, seduai iya lalu mupok mega bejalai, mansang deka muar manyi nya tadi. Datai seduai ba pun kara, dia Salau lalu begaga ka tangga Antu nya. Salau pan lalu beregkah maji enggau natok batang kara. Iya pan lalu manggai ba pun dan, udah nya Salau lalu nurun ka baroh ka baru. Samoa utai enggau perenka ti deka dikena muar manyi baka tali panjai, rintong enggau samilu

endang udah sedia magang. Baka nya mega sempun kulit engkajang ti endang udah rangkai pan nyau udah rembun-rembun udah ditungkun ka apai iya Assan. Udah tembu ngeruku indah, dia Salu pan lalu mupok niki. Dia iya ngambi tali enggau samoa utai bukai ti dikena, lalu ditanchang ka iya ba punggong iya magang. Udah nya iya lalu mansang bejalai gadai-gadai serta ngeradayau niki ngagai dan ti endor manyi nepan ba puchok kara. Leboh iya ke berenkah niki tadi malam endang udah jauh, lalu panchar bulan pan enda berapa terang, laban bulan baru ka tumboh, tambah agi laban bisi moahari, ujan bisi beberis sereta mesi-mesi mimit. Nya kabuah sempun Salau enda berapa maioh bara lalu enggai merumum. Leboh iya baru datai ba pun kara ke alai manyi nya nepan, dinga iya daun kara nyau gerisih. Puchok kara lalu berenyang tiga kali. Meda utai bakanya, dia bulu iya lalu tumboh, bulu pegu lalu nyeregu, tapak kaki lalu pegeremai asai sepi iya, laban kelalu takut sereta geli bendar ati. Iya lalu enda engkebut, agi engketut ba pun dan kara, agi nganti utai ti ngasoh puchok kara nya berenyang ayan. Nyau kelama udah Salau ke ngetu baka puyu mabok amboh, ngenong baka empelekong mabok keroh, Antu kara pan lalu ayan lalu nangkap Salau. Nadai daya meh tudah Salu tu tadi, laban ba puchok kayu nadai jalai tudah tuai ngelaban. Antu kara tu tadi lalu nelan iya segala-gala. Samina pah iya spiak agi digalau antu nya. Pah Salau spiak nya tadi lalu disimpan Antu kara ke dalam rintong, serta lalu diulor iya ka baroh. Meda rintong bisi diulor bakanya, dia Assan lalu gaga, nyangka Salau udah tembu muar manyi ba puchok kara. Nyau kelama rintong ke begitang kating-kating lama agi baroh agi ga rintong peda iya dalam petang dia Assan tepeda ke utai dalam rintong baka pah mensia dalam nya. Leboh rintong nyau ulih tilik iya nya baru Assan nyau ngelala nya pah Salau dalam rintong nya. Pedis ati ka anak ti pemadu di kesayau ka iya digaga Antu baka nya, Assan lau narit tali rintong nya enggau pengabis tulang iya. Dinga iya lalu semerap sereta lalu meredup laboh ari puchok kara, tak mereding ninggang tanah. Udah nya Assan lalu bejalai belubah-lubah nuju ngagai endor utai ti laboh. Datai dia, iya lalu tepeda ka bangkai Antu nyau abis tebelimbor untak kiba kanan, pala pechah tepangka sebelah bandir kara engga kayu bukai ti nyarok batang kara nya. Enda berapa lama udah nya, dia Assan lalu bisi ninga nyawa orang munyi tu, Isa antu kara. Suah bendar nyawa orang nya didinga Assan, tang tuboh nadai dipeda iya. Iya pan berasai takut sereta geli, lalu beguai-guai ngambi pah Salau, lalu ditaban ka iya pulai ka rumah sida. Dia deh Assan seduai bini enda nemu utai nusah nya ngenang anak ti dikerindu seduai nadai enggau begulai sejalai agi. Ngutok diri meh tudah Assan laban ti udah mai anak iya muar manyi, laban enti enda dibai iya muar manyi tentu enda ga anak tulih ka badi enggau penusah ke baka nya.

Pah anak iya nya tadi lallu dikubur ka seduai ba pendam sida serumah. Assan seduai bini lama ngulit ngenang penusah tinggal anak parai ditangkap serta dipakai Antu Kara. 13. Ensera Mali Tiong Nyadi jerita tu diambi ari bup iban kalia ti ngenang penusah bansa Iban ke selalu kena ipa munsoh dalam babas leboh menoa tu agi siga munsoh. Nyadi bala munsoh ke selalu agi datai ngachau bansa iban di menoa tu kalia iya nya bansa Kantu. Kantu nya nama menoa begulai enggau bansa Iban ti diatu kena pegai Kalimantan, ba ulu Sungai Kapuas, Indonesia. Penusah tu bepun ari laya bansa kitai Iban enggau bansa Kantu serambau enggau tuai kitai Iban ke benama Sarapoh lalu pengabis laya tu datai ba serak Jelian ke jadi enggau Tiong, anak tuai Kantu siko ti benama Meringgai. Leboh maia nya kalia, lebih agi indu bansa Iban di menoa tu, endang takut bendar turun kadiri dalam babas tauka ngagai umai sida, laban Kantu selalu bisi datai ngayau anak serta ngipa sida. Munsoh seruran datai lalu munoh bala kitai Iban ti bisi ayan tauka dipeda nadai maioh raban sabelah babas tauka umai. Nya alai ti maia sida ke indu bisi deka turun, sida selalu minta ulu ka orang lelaki ke endang sigi berani. Sida iya enda berani ngerja pengawa umai tauka begiga sabelah babas enti nadai orang ke lelaki ngulu serta ngemata ka sida. Maia nya kalia bisi lelaki dua iko ba Rumah Nasat ke berani bendar. Nyadi nama siko nya Ajau Nyempitau Lembang, lalu nama siko nya Janggok Telok Nyempayang. Meda Ajau seduai Janggok nya berani bendar sida ke Indu selalu deka bendar minta ulu ka seduai turun ka babas enggau umai. Nyadi sida lelaki bukai ke sama diau dalam Rumah Nasat balat bendar malu ka diri enda dikumbai sida ke indu nya berani baka Ajau seduai Janggok. Malu kitai ke lelaki dalam rumah tu laban sida ka indu selalu minta ulu ka Ajau seduai Janggok. Seduai nya orang datai ari rumah bukai. Kati kitai ditu nadai lelaki ke berani siko, alah laban seduai nya magang? Pia ko jako Tuai Rumah sida dia. Nyadi dalam rumah nya mega bisi lelaki siko ti benama Ranggong. Iya pedis serta enda lantang ati meda bala indu sida sarumah selalu deka minta ulu ka Ajau seduai Janggok barang maia sida deka turun ka babas, maku, ngiga ikan, ngiga lampan serta leboh sida gawa ba umai sida laban seduai ditemu berani. Nyadi hari siti sida ke indu deka turun ke umai diulu ka Ranggong siko aja. Sida lelaki bukai dalam rumah nya nadai siko deka enggau Ranggong ngulu ka bala indu turun sahari nya. Nama kabuah kita bangat selalu minta diulu ka seduai nya ke datai ari rumah bukai? Kati ka samina seduai nya aja ke berani? Ko jako Ranggong enggau bala indu. Aku tu pan berani meh baka seduai nya. Aku tu pan tau meh ngulu ka kita turun, pia ka jako Ranggong.

Udah nya sida lalu nurum ari rumah diulu ka Ranggong. Datai sida di umai, sida ke indu lalu berengkah mantun ba umai diri. Benong sida gawa mantun kira urong tengah niki mata panas, dia sida lalu tekenyit meda bala Kantu datai deka munoh sida. Sida lalu begau kiba kanan, serta lalu lari, ngangau ka Ranggong. Rari kitai! Rari kitai! Munsoh datai deka munoh kitai! Ko sida ke indu. Ninga nya Ranggong lalu angkat mansang ngelaban bala Kantu nan ka bala indu. Gasak iya katas, peda bako ke ditebas. Ansak ka iya kebaroh peda abis bebaring laboh. Teruju iya kulu peda abis tingkil dagu, rembang iya kili abis tingkil ngeli. Dia meh iya belaban enggau bala Kantu. Bala Kantu enda nyamai dijamah iya siko. Nyadi bala Kantu ke deka bendar ngaga pengachau bisi kira duapuloh iko. Ranggong siko aja ngelaban sida. Penapat inat iya ngelaban bala Kantu, serta nan ka bala indu ti turun ba umai sida. Udah parai Kantu siko dibunoh Ranggong, iya lalu manjong minta tulong kaban, nadai ga kaban datai nulong. Enda lama udah nya parai baru ga Kantu siko dipumpong iya, manjong baru ga Ranggong minta tulong kaban, tang nadai ga kaban bisi datai nulong iya. Dia bala Kantu makin maioh agi parai makin maioh agi ga datai. Nadai ga pangan sida datai mantu sida Ranggong. Dia Ranggong nyau kirat-sa-kirat. Udah nya manjong baru ga iya minta bantu orang, tang nadai ga orang bisi datai mantu iya. Nyadi leboh nya tak nasib bendar datai kaban burong Tiong maioh bendar serta chapuh amat. Sida datai lalu nepan ba puchok ragai tebelian ti besai bendar enda jaoh ari sida ke bamok. Sida inggap dia, lalu bemunyi inggar bendar. Tiong! Tiong! Tiong! ko sida bemunyi inggar serta nyaris bendar. Ninga Burong Tiong inggar bendar munyi nya, dia deh bala Kantu ti agi ngelaban Ranggong tekenyit bendar ati lalu rari, laban sida ngumbai nya bala Ranggong datai mantu iya. Nya bala iya datai! Aram, rari kitai! Pia ko jako tuai bala Kantu. Bala Kantu ke agi idup lalu rari magang, laban ngumbai nya nyawa bala Ranggong datai ninga panjong iya ke kaong-kaong minta bantu. Nyadi bala Kantu saru bendar ngumbai nya guom nyawa bala Ranggong datai ari jauh, enda nemu nya tak nyawa Burong Tiong ke datai mantu Ranggong ti ngasoh bala Kantu rari enda bapai enda baindai. Baka nya meh pengalah bala Kantu dijamah Ranggong ke nan ka bala indu ke gawa turun di umai. Iya ngelaban sida endang nadai takut mimit serta beperansang ka diri ka nan ka kaban bala indu. Munsoh udah parai bisi empat-lima iko, lalu Ranggong endang nadai telih mimit. Udah pukas pengawa Ranggong ke bamok enggau bala Kantu nan ka sida ke indu di umai, sida lalu pulai ka rumah. Datai dirumah sida lalu nusoi berita Kantu ke alah dijamah Ranggong. Amat berani meh Ranggong. Balat meh pemerani iya. Taja bala Kantu lebih duapuloh iko. Sida ke enda olih mantap Ranggong lalu rari magang dijamah iya. Iya ngelaban endang nadai takut mimit. Enti Ranggong nadai enggau kami turun pagi tadi, tentu abis kami ke indu parai dibunoh Kantu, ko jako sida ke indu. Udah lepas nya, samoa iban dalam rumah enggau iban ke ari rumah bukai bekelingi sabelah nya dia

endang samoa muji Ranggong serta lalu ngemesai ka iya ngumbai iya endang amat betul berani belaban ke munsoh lebih duapuloh iko. Sida ngelagu pengeran iya ke munoh munsoh parai empat parai lima iko. Nyadi malam nya, sida laun mimit tindok laban ke gaga ka Ranggong ti udah ngalah ka bala Kantu. Chapuh amat sida sarumah sebedau sida nindok ke diri. Nyadi leboh sida Ranggong nyau udah tindok, dia iya bemimpi. Dalam mimpi iya asai ka tepeda ka Raja Tiong begamal baka mensia tang bepatok baka burong. Ko Raja Tiong nganu iya, Tegal sah kami nuan menang ngelaban bala Kantu, lalu nuan agi idup. Enti bala Tiong enda bemunyi di pucok ragai tebelian tadi, nuan tentu alah dijamah bala Kantu. Sida ke indu pan tentu parai magang dibunoh Kantu. Tegal saup kami Tiong, sida Kantu rari samoa lalu kita enda parai. Nya alai, ko Raja Tiong, Kenyau ari tu nyentok ka sida uchu-ambu, ichit-wit nuan jemah ila enda tau sakali-kali munoh Tiong. Kita enda tau makai Tiong. Barang sapa purih enggau peturun nuan, enti bisi makai Tiong, sida nya deka parai laban besi. Barang sapa indu ari purih nuan enti bisi munoh tauka makai Tiong deka parai beranak. Nya alai nyentuk ka saharitu agi maioh kitai Iban mengkang mali munoh tauka makai burong Tiong. Jerita tu digumpul Gregory Nyanggau Mawar E-Mail: gnmawar@pd.jaring.com.my