BAHASA IBAN POM SATU

TANYA KARANG: Tulis siti karang pasal pekara di baruh tu:

Pangan aku
Chunto Karang:
Pangan tu bisi guna iya ba pengidup kitai. Nyau deka genap kitai bisi pangan
magang. Baka nya mega enggau aku empu. Aku bisi siku pangan ti chukup manah
enggau begulai. Kelimpah ari apai indai, diri menyadi enggau kaban belayan,
pangan mega ulih mantu sereta nulung maya kitai bulih penusah. Nya alai, kitai
mesti bisi pangan.
Nama pangan aku tu Jabing anak Letu. Iya tu sama umur enggau aku iya nya
tiga belas taun. Jabing tu ada kena 12 Jun 2003. Iya ada ba Sepital Besai Kuching.
Taja pia, iya udah ba menua Miri kenyau ari taun 2005. Kebuah pia, apai iya pindah
gawa ari Kuching ke Miri.
Jabing tu siku nembiak ti landik bemain bol. Iya kala ngarika Sarawak taun
nyin kemari. Taja pan, suah enggau orang ba aktiviti kokurikulum, Jabing enda
ninggalka pelajar iya. Iya ngemeratka pelajar sekula. Iya ending seruran nganjung
latih diberi pengajar. Enti bisi pekara ti enda ditemu, aku mih orang ti suah ngajar
iya. Tambah mega, iya enda malu betanya ngagai pengajar enti bisi pekara ti enda
ditemu iya.
Jabing ngembuan juluk ati ti sama baka apai iya. Iya deka nyadi polis enti
udah besai ila. Nyadi polis tu ulih nangkap orang jai sereta nyaga pengelikun
menua. Enggau nya, Jabing belajar bebendar ngambika juluk ati iya nya ulih nyadi
nyata. Iya endang enggai enggau orang ngaga pekara ti enda menuku ti ulih
ngerusakka diri sereta enda ulih nyapai juluk ati.
Ba maya lepa, Jabing rindu meda cherita televisyen. Iya rindu meda cherita
orang nyumai. Ukai semina iya aja ti rindu meda cherita baka nya tang sida sebilik
pan sama mega. Sida sebilik suah begulai meda televisyen maya ujung minggu iya
nya hari Enam enggau hari Minggu.
Aku amat bebasaka pangan aku tu. Ukai semina nembiak ti rajin sereta
pandai, iya mega siku nembiak ti manah ulah sereta nemu begulai enggau orang
bukai. Jabing tu mega nembiak ti bebasaka apai indai, pengajar enggau orang tuai.
Aku ngasaika mayuh amai penguntung bisi pangan baka Jabing tu.