Pelandai selamat Hari Pengajar

Sebedau aku bejaku panjai

Dulu aku meri basa ngagai bala pemacha
Ke duduk macha taja nda betungga mua

Ngagai bala pengajar ke pandai dichunggai jari tiga

Laban bala sida ke sehari tu
Sida iya ngintu Hari Guru
Ngerami Hari Teacher

Aku nesau kita pengajar ke begelar tampuk pemandai

Kita teacher dalam jaku Europa ke dibasa pemadu besai
Mai kita ngangkatka adat cherita tuai
Ayanka macham leman main kitai
Enggi sida aki ke udah rimpi laya sulai
Ngambika bisi ke penemu nembiak kitai
Nyadika pesaka sida selantang anak dara
Bisi dibantai ditengah ruai lebuh maya gawai

Aku nabur ngagai kita selantang pengajar sidi

Ti endang mutus ati berani kempang
Mai bebatak bala nembiak belajarka urat cherita nyadi
Enggi sida aki kitai ke udah rimpi laya bebadi
Enggi sida aya ke udah lama midang dipangka gumbang begilik segi
Ngambika bisi ke penemu nembiak rebak dudi
Awakka ngelala pengawa sida ke udah lama lesi
Muka kunchi tanah lang.

Nya alai
Anang malu
Anang rawan mih kitai pengajar Iban
Anang enda ingatka adat macham leman
Enggi sida aki kitai ke udah rimpi laya danjan
Kala diatu agi bisi awak
Kala diatu agi bisi jam.qw
Anang kitai enggai betanya ngagai sida mengua karung menyimpan
Nangika adat kitai lesap laya serepan
Nyelikap kapir langit besuran
Enggaika adat tuai dibai parai
Tama mandai menua sebayan

Baka nya mega pengajar

Adat Iban asuh tegap nyerupa meruan
Jaku Iban asuh tembu sereta engkeman
Nya baru tanda enggi kitai nyengala
Bisi kelai meruan tegeran
Dunya global ngelala bansa Iban
Megai tambai tampuk pemansang
Nya baru semua bansa beansak-ansak
Ngiga awak ngambi kitai nyadika pangan
Keba kitai diangkat enggau martabat
Meruan pengarap tebalan Wawasan.
Selamat Hari Pengajar
Pengajar penempa penemu nyeratan ulah ti manah

Ditusun: uchutedung.blogspot.com