PELANDAI KARUNG MENGANDAI

Sapa kala ada ari bungkung kayu

Sapa kala pansut ari mulut jagu
Nya mih ke deka ditiu ngena leka jaku
Deka diansah ngena leka entelah

Karung mengandai peruji ati

Semilan bulan semilan hari
Nuan mai kami
Ke ulu enggau ke ili
Sanggup tusah diasaika diri
Sanggup napi tubuh diri
Nyentukka kami ada di dunya

Ari mit nyentuk ke besai

Maya kami sakit enggau maya kami gerai
Maya tusah nuan enda kala madah
Maya nyamai kami ke ngasai
Bulan enda meruan manchar
Bisi maya keleman
Gaya hari enda selalu beseri
Bisi maya ujan labuh ba laman
Tang karung mengada tangkai nyawa
Sanggup bekikis bulu betis
Sanggup bebuai bulu gundai
Meruan ngiring sereta ngembing
Meruan nyukung sereta nulung
Ari mit nyentuk ke besai
Maya nuan tusah kami nyamai
Maya nuan gerai kami ngasai
Bisi ga maya nuan sanggup nyadi arang
Maya abis besi enda bepijar
Nya mih maya kami ke enda masuk ajar
Bisi maya kitai enggai ninga
Bisi maya kitai enggai mending
Karung mengandai semampai ngemata
Karung mengandai semampai berunding
Semampai baka alu belunjak tutuk
Semampai bejaku balat tatuk
Jaku mengandai mih ngasuh kitai pandai di chunggai tunjuk tiga
Ngasuh kitai ulih napi pemansang dunya
Ngasuh kitai bejalai nujah menua
Ngasuh kitai bulih reta bulih tengkira

Pementas budi nuan enda alah ditiu

Pemanah basa nuan enda alah disebut enggau jaku
Laban nuan enda kala ngambu
Baka ambu kayu tebelian punggu
Jadika sulu nganjung parai.
Nya alai kitai ke anak
Anang enda ngasai
Ai tusu anang dibalas enggau ai tubai
Maya kitai gerai
Maya kitai nyamai
Anang enda ingatka karung mengandai.

Selamat Hari Indai

Nuju semua indai;
Indai ngada
Indai bini
Indai ambu
Indai iru
Indai tiri
Indai abang
Indai orang.

Ditusun: Umang Orang (5S1)