JAWAB PEREMPUAN

Lah sampai mak . .

di kami pihak sepangkal sembah tatuju kawan rapat, titah katibo kawan
banyak. Salingkung bedul di tepi saedaran bedul ditengah tentang unding
yang di katengah tadi la babondong mamak tadi dari suku sebelah. Mudik
dari suku sebelah ulu. Arak iring sepang jalan menuju rumah ka kampung
iko. Gung kulintang jadi tepung surak surai jadi bungo, meletus bedel pusako
tegak. Marawa bungo adat tabuh larangan larangan mamak masuk, ko
kakapung iko kini lah duduk di ateh rumah. Tikotiko maso kini 4 lembago
nan dipakai. Pertamo sembah menyembah, kad duo basa basi, ka tigo sireh
pinang ka empat minum makan. Tasebut sembah menyembah di mulio
meliokan tando hidup benegeri tando kampung babalan. Rukun damai dalam
negri bakato basa jo basi ngimak ereng dengan gendeng. Makai saham rebah
tegak, kok ado runcing kama nyucuk tajan kama luko. Dek tuo sireh pinang
adat tuo pusako usang di negri pamarap dengan pamuncak.
Sireh dicabik lah di makan pinang lah di kunyah. Tanda wali banusanak
tando Islam puteh hati.
Tentang sembah mamak tadi dipandang iluk rupo di denga baek bunyi. Dari
awal lah kami simak dari so la kami bilang basimak kato satu-satu walaupun
begitu.
Dari kami sapankal tanganai umah dan tuo kampung. Tabido salah kacak
takao salah gamak. dek tekejut di timpo upeh tagamang selero nan melayang
ngapo sebab kato baitu mak.
di denga kato mamak tadi
pucuk kempeh selaro kempeh
kempeh semak baluka mudo
isuk lepeh kini lepeh
lepeh kanusanak di siko nan macam tu. kato mamak tadi sepanjang kato
mamak nan tawalak kepado kami itu lah kato nan sebena nyo. Allah Ta’ala
kayo sungguh mak. Anak sorang la baduo baik nasib orang di rumah ko
karno anak sekato bapak panakan nan sekato mamak. Idak ado nan
manungak karang pun tido senang hati ibu bapak suko lah hati sonak meman
bulek lah buleh kami giling pipih lah buleh kami layang makan mengabih
kami mak. Mancung mutus entah menangih amai di rumah.
 JAWAB LAKI-LAKI
Tentang titah nan tawalak kepado kami entah menageh amai dirumah.
jangan mamak salah paham
usah mamak salah terimo.
denga dek mamak kato haro denga sebena nyo nian kami idak patah tebu
arang mak kami beserah patah tebu. Bak papah dek orang dulu bak andaidek
orang rini baik dipintak ilik tibo buruk disebut iluk datang nyampang
ponakan kami ko isuk languk idak tasapo bingung idak ta ajatumbuh
mamukit mangunung atau ba akit ba dayung kepak ba biduk ba kayuh simba
mak lum mudo matah umur belum sataun jagung darah setampuk pinang
akal selilit tunjuk. Idak biawak duduk idak kalo ayam berenang dekat
kamipesan beturut jauh kami use bajemput. duduk kito batentang tapak
tegak kito batentang muko. Kabukit bagaleh panting ka ayek samo basapung
buluh. ka darat samo paburu ka ayek samo di pa ikan. pak selamat anak
penakan kito sario rumah tanggonyo.
=SEKIAN MAK=
 KATO-KATO SEMBAH
1. Yang kami hormati Bapak Kepala Desa.
Pucuk jala pemumpun ikan nan memegang teruntun basimak jalo nan
memegang sireng basimak pukek.
Kayu gedang di tengah padang badaun cupak gantang baranting barih
balebeh, daunyo imbun di adat babuno, mungkin nyo patut babuah kato
nan bena urat nyo tempat basila batang nyo tempat basanda, daunyo
tempat bateduoh, dahan nyo tempat bagantung.
Ingiran silang dengan seliseh pegi tempek batanyo, balek tempek babarito.
Nan tumbuh karno ditanam, nan gedang karno di ambak, tinggi karno di
ajung. Bakato dulu sepatah, bajalan dulu salangkah.

2. Yang kami hormati, Datuk Pemangku Adat nan cedek pandai ba undang.
ba undang tau magak dengan mageh. pandai mauku dengan menyako,
yang memegang Tali Udang Tambang Teliti. Kok kusut tempek bausai, kroh
tempek bajeneh. silang nan mamatut, ngang nan mamadu.

3. Yang kami muliakan Cedik dengan Pandai, Alim dengan Ulamak. Seluruh
bindang dalam negri. Kok ujan nyo nan mamageh payung, kok kelam nan
mamageh suluh, kok licin nyo nan mamageh tungkek.

4. Selain dari pado itu idok-idok, amai-amai orang penyantun baik budi orang
caruah iluk baso. aus tempek minta ayek, lapa tempek mintak nasi sebab
inyo nan memedang bakul nasi, inyo nan memegang tabung kawo.

5. Begitu pulo adek-adek nan mudo-mudo cepat kaki ingan tangan, cepat
kaki idak menarung, ingan tangan idak memecah. nan di suruh cepat pegi
kok di ibau. pamain di galanggang pausek di balai panjang.

6. Anak umah tango umah, anak semang paro jaka. kecik idak di sebut
namo, gedang idak di ibau gela.

7. Sairing balam dengan barebah, balam lalu barebah mandi.

sairing salam dengan sembah, sembah lalu salam kembali.
8. Kapuk iyo rotan pun iyo. kayu dibelah tengah padang, belah dimano di bao
kan. Datuk iyo sutan pun iyo. sembah dimano di tibokan.

9. Nenek mamak yang kami mulio kan. sungguhpun nenek mamak kami
sebut kan namo, baimbau kan gela sembah tajilo kawan tatabo di tengah
kito di nan banyak. nan duduk baimpit lutut, tegak basing bau di lingkung
bendul nan batumbuk. di pampu lantai nan bajalin nan di sungkup atap
nan basangit di lingkung dinding empat segi.
 KATO-KATO ULU ANTA LAKI_LAKI
Nenek mamak yang kami muliakan, ujung baluk kapal melintang, incung
luan patah kemui. dari jauh kami kami datang, ado niat dalam hati.
Sebelumkato sebuah nak kami sampai, unding sebuah nak kami sebut, kami
mohon maap kepado nan tuo-tuo. bajalan kami nak dulu selangkah, bakato
kami nak dulu sepatah.
Nenek mamak yang kami muliakan, ado pun pihak kami nan datang
selangkah turun dari tanggo, bareh tabentang nan kami turut, jalan panjang
nan kami tempuh masuk ka kampung iko. Kampung indah bukan kepalang,
teduh dek nio nan baralek. imbun dek pinang nan bajajo. rumah di renah
lereng bukit di lingkung parit nan bajilo nan di paga kuto nan bajajo. masjid
nyo gedang suraunyo rami, kagum mato kami dek mamandang. latibo kami di
laman rumah nyo gedang laman nyo ujo. naek kami babukakkan pintu duduk
kami lapek la tabentang, baru duduk panapan la tibo, ayek mangiring di
belakang kue taidung kiri kanan.
Adopun sekarang kini pihak kepada penganten kito la duduk babandung duo,
senang la ati dek mamandang, senang dalam kiro-kiro. la bekebek kato
mamak babuwul mati babuwul sentak sebagian nan bana batimbang tangeh
lah di pakai sepanjang sarak la di bao sepanjang adat nan bano adat nikah.
Pada hari nan sehari ko, hari baek bulan batuah. angin tenang umbak selesai.
kini kapal la di laye kan kano janji nan di karang, karang mamak disiki
karangan tuo kampung mamak nan datang, kami mambao kato masak hari
naek sianu ka rumah tanggo nyo. kami anta sepanjang adat kamilepeh
sepanjang sarak.
bak papatah jo patitih, bak pantun jo saluko. pucuk kempeh selaro kempeh,
kempeh semak-semak baluka mudo.
lepeh kandusanak di siko selain dari pado itu kalu mujo indak mengandung
tajalo mamak di ikan, nyampang malang ayah maminang tasauk mamak di
ludak, tapi pintak pinto dari kami latibonyo disiko, kalu inyo jadi bido nan
baek untuk tungkat jalan nan licin, untuk suluh jalan nan kelam, jadi kayu
pemaga adat, dalam beradat pulo nyampang iluk retak tangan nyo kalu
singkat bao mauleh, kok centeng bao mamilai. kalu iluk retak lidah nyo kusut
bao mnenyelesai, kau keruh bao manyeneh. kalu duduk di balai adat, duduk
bao lah samo rendah, tegak baolah samo tinggi.
namun demikian mak, susah la aku nak bakato suka la aku nak ba andai
tentang diri si anukoraso manyadap manga pinang mak ntah ba ayek ntah
idak bak umpama padi seribu awak tumbuh musim ta lampau urat tagantung
di jerami, bilek tinggi nan di adang. tapi sementang nan bak itu mak, pintak
kami dari nan datang yo mintak di terimo anak buah penakan kami dengan
hati nan suci muko nan jerneh
 JAWABAN PEREMPUAN
Kalu macam tu mak, lah babalek darah ka muko. senang lah bae hati mamak
tentang anak manantu kami lah digantung di nan tinggi, lah disanda di nan
gedang, lah didalam genggaman tangan.
tentang serah mamak tadi kami terima dengan hati nan suci muko nan
jerneh.

=SEKIAN MAK=