CARITO LEMBAK ALAM

Ado simaso dahulunyo nan di Taluak Talaga Paham antara Bayang jo Salido Asam Kumbang
Kampuang keteknyo. Nan tasabuik si Lembak Alam anak toanku Imam Mudo Duo jo Puti Ambun suto.
Anak sorang tungga babeleng supiak sinan sibuyung sinan nan dek diri si Lembak Alam nan taniek
didalam hati tacinto dalam kiro kiro nak pai karantau urang. Lalu diimbau ayah kanduang dimintak izin
ka bajalan.
Lembak Alam : Ampunlah ambo ayah kanduang
Ampun baribu kali ampun
salam sambah dianjung
diri manjabat mintak ampun.
Yo kabadan diri ayah kato
takuik kato tak jadi kato
ragu kato tak sampai kato bana nan dikatokan.
piak didiri badan ambo nan taniek didalam hati tacinto
dalam kiro kiro nan bak duri didalam dagiang nan bak tulang didalam rangkuangan
iyo taraso raso juo.
Nak pai karantau urang sambiak mambuang buang caliak sambiak malapeh lapeh
pandang
baok pikirian ati ayah
sakian rundiang dari denai pulang mak alun pado ayah
Ayah : nak kanduang silembak alam
mandanga anak dibakato tasirok darah didado
gumata tulang pasandian lamah anggota kasadonyo
sabab kah baa dibaito iko jiniah nyo gadang badan,
umua bara satahun jaguang
darek baru ditumpuak pinang
alemu jawueh sakali
alun rela ayah malapeh
sakian rundiang dari ayah pulang mak alum pado anak
Lembak Alam ayah kanduang dibadan denai
alah mandanga kato dari ayah iyo pulo itu kironyo
tapi simantang pun baitu ayah nan usah cameh bana
jan lah ragu tentang itu.
Iyo didiri badan ambo kudo malompek batu balah,
tibo dilereng pandakian, indak nyo duo kandak allah suratan sudah jo janjian.
Lapeh lah ambo pai bajalan,untuang barubah nasib dibadan.
pulang mak alun pado ayah
Ayah Nak kanduang silembak alam,
jarek simato badan ayah ubek jarieh palarai damam
sidingin tanpa dikapalo balahan diri badan ayah.
putuih tak ado panggantinyo kini bak itu lah dianak .
kok iyo ati kareh juo danga dianak pasan ayah .
carinek di tapi aia lah mati mangkok babuah
ingek ingek anak balaia lauik sati rantau batuah.
kok jadi anak kapakan iyo bali balanak bali ikan panjang bali dahulu .
kok jadi anak bajalan ibu cari dunsanak cari induak samang cari dak ulu .
Kok mandi di ilia ilia kok Mangicek di bawah bawah
muluik manih kucindan murah Budi baik baso katuju
Sakian rundiang dari ayah pulang mak alum pada anak
Lembak Alam Ayah kandung di badan diri
Mandanga Kato dari ayah sanang raso dalam hati
sunyi di dalam kiro-kiro nan bak mandi di anak sungai nan tagak bapayuang awan
Raso baureh aia Rimbo sajuak anggota kasadonyo sagalo
 Sagalo umanak Jo pitaruah dari ayah di Pacik di ganggam arek di buwua dalam
rangkai Ati
malam diambiak kapakalang siang diambiak kapatungkek
di latak dalam rankai ati
alah kasanang Ati ayah
Baa taanyo di nan kini tarago paneh alun garang tarago Ari alun tenggi
pulou talan pulou tarika ka tigo pulau bantuak Taji jawek salam ayah Katingga
Denai bajalan ajo lai
Kato putuih runding salasai lah bajalan si lembak alam. Lah di ilaikan labuah nan panjang, labuah pendek
baliku liku pudiang ameh sabalah lua pudiang itam subalah dalam, manampuah padang baribu ribu,
masuak kadalam rimbo gadang, dima panek sinan baranti dima patang sinan bamalam alah sahari duo hari
alah sapakan kalamonyo. sadang bamanuang dalam rimbo tampak lah asok manggajuju tabik panggana
maso itu lalu dituruik asok Nantun kironyo pondok iniak paladang lalu baimbau silembak alam rundiang
bamulai anyo lai samo di danga caritonyo
Lembak alam Kok lai parimbo rang disiko rambah la baa batang bolai
kok lai paibo rang disiko baok lah tompang dagang sansei.
manolah iniak urang paladang baolah tampang badan ambo.
alah taraso latieh bana alah sapakan dalam rimbo.
baok tompang ambo bamalam sagitu rundiang dari ambo
pulang mak alum pado iniak
Iniak Paladang Mano urang mudo nan baru datang naiaklah buyuang kaateh pandong
sambia malapeh payah nak iniak buek kan minum buyuang kan raso latiah bana

Lembak Alam Manolah iniak urang paladang tarimo kasih banyak banyak
pintak buliah kandak lah dapek lah buliah ambo manumpang
jaso jo apo ka ambo baleh nan bak pitua urang tuo
tabantang tampak aia tagak,ari paneh pasangan bungo .
iniak kanduang lapeh kan kandak kamudian dibaleh guno
kini baikolah di iniak bari luruih ambo batanyo
kalau dak salah pandangan ambo tatukiak pandang kabaruah
tampak lah lampu bakijauan sarupo kampuang rami bana kampuang apo itu namonyo
pulang mak alum pado iniak
Iniak Paladang Mano rang mudo nan baru datang
kok itu nan batanyokan
itu nan kampuang ranggo malai dalam daerah bankaulu dipimpin rajo unggeh layang
rajo siko rajo rang bagak
bakitab kapakalangan nan babanak ka ampu kaki paranduak suko matarimo.
Kok utang pantang mambaia
tapi simantangpun baitu alah katarang di rang mudo .
bari luruih iniak batanyo
tapi simantang pun baitu siapo namo rang mudo,dimano dusun jo nagari ,
apo tujuan jo singajo
man kok sampai buyuang Kamari
pulang mak alun ka rang mudo
Lembak Alam Mano lah iniak janyo ambo kok itu iniak tanyokan.
namo ambo silembak alam kampuang ambo nan jauah bana ditaluak talago paham
antaro bayang jo salido asam kumbang kampuang ketek nyo
alah katarang tu diiniak .
balam caranggo ateh tanggo babunyi murai ateh pintu salam tak asih caritoko baraliah kaba tantang itu
aliah kakampuang ranggo malai . iyo karajo unggeh layang duo jo puti reno ali . dicaliak dipandang
pandang anak lah gadang dipandang , anak surang tungga babeleng siupiak sinan sibuyuang sinan . banamo
puti nilam cayo .gadang lah patuik bajunjuangan .piak dirajo unggeh layang diimbau bujang salamat surau
gua tabuah larangan didiri bujang salamat . mandanga rajo nan manyuruah diambiak camati perak digua
tabuah larangan mandanga tabuah lah babuni manjawab tabuah dimudiak manikah tabuah di ilia tabuah
jumaik pangabisan. Datanglah dubalang nan barampek mamintak ampun pado rajo.andai lah jatuah maso
itu rundi bamulai anyo lai
Dubalang Ampun daulat rajo kami
ampun baribu kali ampun
ampun dibawah tapak kaki dibawah selo kabasaran
kato takuik kato tak jadi kato ragu kato tak sampai kato bana nan den katokan.
apo sabab tabuah babunyi ,
ado kok parik nan lah runtuah atau marawa nan baturiah ado kok rando dapek malu.
Sakian rundiang dari kami
pulang mak alun bakek rajo
Rajo Mano dubalang nan barampek
indak lah ado nan bakian tak ado parik nan runtuah tak ado marawa nan baturiah
tak ado rando dapek malu.
kini baitu dikalian pancang molah galanggang kito ramikan galanggang siang malam
adokan tuak dengan parang sarato sabuang dengan judi.
Siapo pamuncak digalanggang nan mangalahkan ayam kito inyo nan kajadi jodoh
anak ambo banamo puti nilam cayo
alah katarang dikalian.
Dubalang Mandanga kato rajo tadi lah sanang pula ati kami
sagalo parentah dari rajo jalankan kasadonyo
alah kasanang ati rajo.
Pulang mak alum dubalang nan barampek .
Dipancang galanggang maso itu diagiah kaba ilia mudiak . nan jauah dilayangkan surek nan dakok
palansiang tibo . lah barimpun urang kasadonyo dari bukik datang manurun dari lurah datang
mandaki.indak tabedo rami galanggang manjadi tuak dengan parang sarato sabuang dengan judi lah babuni
buni bunian ado barabab bakacapi , ado bagandang jo talempong cukuik bapupuik jo sarunai . kaba baraliah
tantang itu , aliah kadiri lembak alam tadanga buni bunian dimbau iniak paladang. Andai lah jatuah maso
itu rundiang anyo lai
Lembak Alam Manolah iniak janyo ambo mankok nyo iniak ambo imbau
bari luruih ambo batanyo.
kalau ndak salah pandangaran ndak tanggung buni bunian
sarupo galanggang rami
sakian rundiang
dari ambo pulang mak alun pado iniak
Iniak Paladang Nak kanduang silembah alam
mandanga kato dari anak iyo pulo itu kironyo.
itu galanggang rajo siko banamo rajo unggeh layang sadang mancari jodoh anak nyo
banamo puti nilam cayo.
alah katarang tu di anak
Lembak Alam Mano lah iniak janyo ambo mandanga kato dari iniak sanang rasonyo dalam ati .
sunyi didalam kiro kiro kini baitulah iniak ambo taniek nak manyabuang .
bari izin ambo di iniak
yo nak pai kagalanggang sambia mambuang buang caliak sambia malapeh lapeh
pandang
diiniak bari lah izin sakian rundiang dari ambo
pulang mak pado iniak
Iniak Paladang Nak kanduang silembak alam
mandanga kato dianak cameh lah iniak mandangakan
sababkan baa dibaitu rajo siko rajo rang bagak bakitab kapangka langan
babanak kaampu kaki
tapi simantang pun baitu
kok ati kareh juo iko lah cincin nan sibantuak bao dianak cincin iko
Palawan musuah kok nyo ado kaganti paga badan buyuang
pulang mak alun pado buyuang
Lembak Alam Mandanga kato dari iniak sanang raso nyo dalam ati
sunyi didalam kiro kiro
kini baiko lah diiniak disaru ayam ambo dolu .
ayam kinantan putiah cotok siang bakawannyo jo alang, malam bakawannyo jo
musang diambiak api parasapan dibaka kumayan putiah karatan
 kumayan baru asok manulang ka udaro bakawua tampek nan kabuliah
mamintak tampek nankuaso .
kandaknyo sadang nan kabuliah pintaknyo sadang nan kadapek
tibo ayam nyo maso itu.
Cukuik jo ameh taruannyo iyo sabanyak tigo kaco
dimintak izin kabajalan .
kini baikolah ka iniak
pulau tolan pulau tarika katigo pulau bantuak taji
jawek salam iniak katingga ambo baok bajalan anyo lai
Iniak Paladang Balayiak pincalang soa masuak kualo aia aji
bajalan tolong jo doa mintak salamaik pulang pai

Kato putuih rundiang salasai lah bajalan silembak alam dikapik ayam kinantan dijinjiang ameh tigo kaco
nan dipaluik jo kain merah babungkuih jo kasumbo aluih diayun letang samo lanjuik diayun langkah samo
jarang lah di iliak kan labuah nan panjang labuah pendek liku baliku lah tibo ditapi kampuang taruih lah
inyo ka galanggang tagak didakok tonggak jago tampak sakali didubalang lalu dituruik maso itu dibao ka
dakok rajo lalu bakato sidubalang ka bakek rajo unggeh layang
dubalang Ampun lah ambo di angku rajo
kalau dicaliak dipandangi lah tujuah ari galanggang rami
dak ayam kito kalah tunangan nilam alum jo dapek
iko lai ado urang sasek baru tibo nyo disiko
mangapik ayam saikua cukuik sarato taruhannyo
pulang mak pado rajo
Rajo Mandanga kato dubalang
bakato rajo unggeh layang
mano lah buyuang nan baru datang dimano dusun jo nagari
apo tujuan datang Kamari
curai papakan bakek ambo
alah katarang tu dibuyuang
Lembak Alam Ampunlah ambo rajo siko
ditadanga galanggang rami
ado taniek tasingajo nan pai manyabuang ayam
kok kampuang rajo tanyokan danga dirajo dikatokan
karayia jinjiang lah boto kapulang baok lah labu
dilayiak ambo urang siko batin nyo dagang indak tantu
pulang mak alun pado rajo
Rajo Mano buyuang nan baru datang
Pandai bana buyuang barundiang
bijak bana buyuang bakato kini baiko lah dibuyuang
barapo taruah buyuang baok
nak sipadan bumi jo langik
piak ditaruah ayam ambo anak kanduang dibadan diri banamo puti nilam cayo
lah ka tarang tu dibuyuang
Lembak Alam Mano lah rajo rang disiko
kok taruah nan batanyokan ambo indak mambaok taruah
tapi ado bingkisan ketek
suruah pareso didubalang ka ganti taruah ayam ambo
pulang mak alun ka bakek rajo
Rajo Mano dubalang nan barampek
pareso bingkisan itu piak didiri dubalang gagah
lalu diambiak bingkisan ketek dibaok kadakek rajo
lalu dibukak maso itu kironyo ameh tigo kaco bakato rajo maso itu
mano lah buyuang nan baru datang
usah wakatu dibuang buang
elok disabuang ayam kito dibulang taji anyo lai
Lah balago ayam maso itu manjadi sorak deng sorak satangah batapuak tangan malang tak dapek kaditulak
mujua dak dapek ka dirayiah lah malang silembak alam lah kanai ayam kinantan tagalebai kapak sibalah .
lah garebai kapak ayam nyo piak didiri lembak alam diambiak ayam maso itu lalu bakato ka ayam nyo
manalah sikinantan putiah cotok . sajak keteng kakak gadangkan dibari makan patang jo pagi siang
bakawan ang jo alang malam bakawanang jo musang usah kakak dibari malu cabuik kan baleh sakaliko .
mandanga kato nan bak kian lah bakukuak ayam kinantan malompek baliak ka sabuangan mulai lah baliak
ka balago. Sakali malambuang tinggi duo kali malambuang randah lah kanai mariah ayam rajo nyo semba
ditaji kida bacarai liyia jo kapalo sarupo caciang kanai pangkua. Mancaliak ayam rajo kanai, mati aniang
sagalo buni bunian ilanglah sorak jo sorai tapana urang nan banyak lalu bakato lembak alam mano lah rajo
nan disiko lah patuik ayam dipacotok nak tantu kalah jo manangnyo lah nyato ayam rajo kalah lah jaleh
ayam ambo manang ambo baok taruah ayam ambo banamo puti nilam cayo baok pikiran ati rajo
Rajo : Manolah rang mudo nan baru datang
mandanga rang mudo nan bakato tasirok darah didado
maramang bulu mandangakan sabab kan baa dibaitu dan salaruik salamo namko
lah acok galanggang rami alum pernah ayam ambo kalah
kini co iko sabananyo dangakan bana dirang mudo
mangkok galanggang diramikan ambo mancari jodoh anak ambo banamo puti nilam
cayo.
Kini ayam rang mudo manang
Lah jaleh rang mudo nan kajodohnyo
iyo kajodoh anak ambo
pulang mak alun ka rang mudo
Lembak Alam : Ampunlah ambo dituanku rajo
mandanga kato tasirok darah didado
gumata tulang pasandian sababkan baa dibaitu piak didiri badan ambo .
ambolahlah nyato anak dagang nan bak kiambang dilautan
tarandam randam ndak basah tarapuang rapuang indak kariang
tampan kajadi bungo luluak
sakian rundiang dari ambo
pulang mak alun pado tuanku rajo
Rajo : Kini baiko dirang mudo
dangakan kato sabananyo dak usah batangguah tangguah
mulai jak ari kini nan ko rang mudo lah asah batunangan jo anak kanduang ambo
nan banamo puti nilam cayo
di imbau dubalang nan barampek
agiah tau kaurang banyak
lah tau urang kasadonyo anak rajo lah dapek jodoh
lalu diimbau anak kanduang puti nilam cayo .
nak kanduang puti nilam cayo
anak Kamari molah tagak
ado rundiangan kadisabuik raik tasimpan kadibaco
iyo kabadan diri anak
sakian rundiang dari ayah
pulang mak alum pado nilam
Nilam Cayo : Ampunlah ambo ayah kanduang
ampun baribu kali ampun
ampun dibawah tapak kaki dibawah selo kabasaran .
kato riang kato talompek kato takuik kato tak jadi kato bana nan dikatokan
apo sabab ambo diimbau
diayah barilah tarangan sanang pulo ati denai
sakian rundiang dari denai
pulang mak alun pado ayah
Rajo : Nak kanduang sinilam cayo
mandanga anak dibakato iyo pulo itu kironyo
mangkok nyo anak ayah imbau
ado nan bana kadisabuik iyo kabadan diri anak
nan salaruik salamo iko
lah acok galanggang diramikan lah babagai urang pandatang
alum mancubo ayam kito kalah kini lah maso katikonyo
 iyolah kalah ayam kito
ayah indak manyabuang lai
mungkinlah tuhan manggarakkan
nilam lah ado nan kajodoh
iko rang mudo baru datang nan mangalahkan ayam kito
lai alah katarang tu di nilam
sakian rundiang dari ayah
pulang mak alun pado nilam
Nilam Cayo : Ayah kanduang jonyo dinilam
mandanga ayah bakato nilam nan indak tau pandai
sagalo parentah dari ayah nilam manuruikkasadonyo
tapisimantangpuhn baitu danga dek ayah kato nilam
pucuak kacang silaro tabu sarumpun pandan jo rambio bialah banyak nan maragu
alum jo tantu nan kapunyo
pulang mak alun pado ayah
Rajo : Mandanga kato dari nilam lah sanang pulo ati ayah
bao to anyo dinan kini anak kanduang pulang lah dulu
bao sakali rang mudo tu
alah katarang tu di nilam

Nilam Cayo : Kalau baitu kato ayah kami bajalan anyo lai

Bajalan puti nilam cayo duo jo lembak alam bajalanan siganjuik luluah pado pai suruik nan labiah alu
tataruang patah tigo samuik tapijak indak mati balayia biduak duo duo kapataganang di lawitan lah bajalan
nilam baduo lintuah sagalo pasandian indak do lamo antaronyo nan indak kito rantang panjang jauah
basarang ampia juo diampiak tibolah kini tibo dilaman rumah gadang langsuanglah naiak kaateh rumah lah
duduak ateh kurisi tangan ta ampa diateh meja eloknyo sajo nan bakaji buruaknyo alum kabakana piak
didiri nilam cayo lalu di imbau mandeh kanduang banamo puti reno ali
: Ampunlah ambo mandeh kanduang
Nilam Cayo mangkok nyo mandeh denai imbau ado nan batin dikabakan iyo kabadan diri mandeh.
mandeh Kamari malah duduak
pulang mak alum pado mandeh
Mandeh : Nak kanduang puti nilam cayo
mandanga anak dimaimbau tasirok darah didado gumata tulang pasandian
dianak cubo tarangkan nak sanang didalam ati sunyi didalam kiro kiro
sakian rundiang dari mandeh
pulang mak alun pado nilam
Nilam Cayo : Mandanga kato dari mandeh
iyo pulo itu kiranyo mangkok mandeh nilam imbau
ado nan batin di katokan dimandeh tolong dangakan
nan silaruik silamo kan nan ko lah acok galanggang rami alun mancubo ayam kito
kalah
kini lah tibo katikonyo
lah nyato ayam kito kalah di ayam tuan nan baru datang
ayah manyuruah badan nilam baok rang mudo pulang
untuak kajodoh badan nilam usuik pareso lah dimandeh
pulang mak alun pado mandeh
Mandeh : Nak kanduang puti nilam cayo
kalau baitu kato nilam tinggalah nilam di nan tanang
nak mandeh tanyo rang mudo ko
manolah nak kanduang nan baru baru datang
bari luruih mandeh batanyo,
bari asa mandeh barundiang
siapo namo nak kanduang dimano dusunnyo jo nagari dimano kampuang jo halaman
curai papakan pado mandeh nak sanang pulo ati mandeh
sakitu rundiang dari mandeh
 pulang mak alun pado anak
Lembak Alam : Ampun lah ambo mandeh kanduang
ampun baribu kali ampun
ampun dibawah tapak kaki dibawah selo kabasaran
kalau itu mandeh tanyokan nak ambo jalehkan pado mandeh
namo ambo silembak alam
kok kampuang mandeh tanyokan iyo nan jauah dari siko ditaluak talago paham
antaro bayang jo salido asam kumbang kampuang ketek daerah rantau jo pasisia
sakian rundiang dari ambo
pulang mak alun pado mandeh
Mandeh : Nak kanduang silembak alam
mandanga kato dari anak lah sanang pulo ati mandeh
kini baitu lah dianak manunggu ari pernikahan
agak sahari duo ari tau saminggu ko lamonyo
anak istirahat malah dulu
alah kasanang ati anak
pulang mak alum pada lembak
Nan dibilang silembak alam alah sahari duo hari nan tingga dirumah gadang dirumah puti nilam cayo ati
ragu bacampua cameh sadang bamanuang manuang jo tabayang kampuang jo halaman sarato mandeh jo
bapak ati nan indak sanang lai mato nan indak amuah lalok mandeh diruang ruang mato lalu diimbau nilam
cayo rundiang bamulai anyo lai andailah jatuah maso itu
Lembak alam Diak kanduang puti nilam cayo
adiak Kamari malah duduak ado nan batin nan kadikabakan
pulang mak alum pado nilam
Nilam Cayo : Tuan kanduang silembak alam
tunangan diri badan ambo
mandanga tuan di mainbau tasirok darah didado gumata tulang pasandian lamah
anggoto katujuah nyo
apo sabab nilam diimbau dituan cubo tarangkan
nak sanang pulo ati nilam
sakian rundiang dari ambo
pulang mak alum pado tuan
Lembak Alam : Adiak kanduang sinilam cayo
mangkonyo nilam ambo imbau
ado nan batin kadikatokan iyo kabadan diri nilam
cubo dangakan elok elok iko nan bana ka disampaikan piak didiri badan ambo
nan taniek didalam ati tacinto
dalam kiro kiro
nan bak duri didalam dagiang
bak tulang dalam rangkuangan
taraso raso juo sajak di nan kapatang
marupo rupo mandeh jo bapak
tabayang kampuang jo halaman
sarato labuah jo tapian
ati nan indak namuah sanang baa tu anyo dinan kini
bari izin ambo bajalan pulang kakampuang lah daulu
sakian rundiang dari ambo
pulang mak alum pado nilam
Nilam Cayo : Tuan kanduang silembak alam
tunangan badan diri ambo
rusuah rasonyo didalam ati lamah sagalo pasandian
ati nan indak sanang lai danga dituan kato nilam
patah lah sumbu disinggalang tadayuak cando balai-balai
untuang sinilam kok nan malang baru bagantuang lah tagurajai
danga dituan sabuah lai
nak duo pantun sa iring
silasiah di ampang pulai rang buek palantiang pawuah
 jatuah batimpo masuak padi
kasiah sayang baru bamulai tuan bao bajalan jawuah iyo gak rusak dalam ati
kok jadi tuan kapakan iyo kapakan paninggahan kapulang ari ah sanjo
kok jadi tuan bajalan nilam nan usah ditinggakan samo pai kito baduo
Lembak Alam : Diak kanduang sinilam cayo
dangaan dinilam kato ambo
gadang lah lai batang kalang urang memikek buruang murai
kok dak diuntuang nan pamalang sitapak indak ka bacarai
ayam kuriak rambainyo sami disabuang anak koto tuo kini tapawik dihalaman nilam
sapantun silan sari
salamo iduik tak kalupo antah kok ilang nyawo dibadan
Nilam Cayo : Kini coikolah dituanku
kok tuan paibajalan sorang alun rela nilam malapeh
kok elok rayu urang dikampuang kok lupo tuan pado nilam
itulah nan labiah dicamehkan
bunga cimpago kambang biru kambang dibawah sayak lokan dibaok sutan kamalako
iliak kan ranah padang panjang iyo sulik manangguang rindu
nan bak kabuik dikisai topan nan bak bumi diguncang gampo antah dibadan nilam
sorang
Lembak Alam : Diak kanduang sinilam cayo
kalau baitu kato nilam iyo pulo itu kironyo
kini baikolah dinilam sababnyo kito kabajalan usah di taang lamo lamo
mintaklah izin pado mandeh sarato ayah kanduang nilam
alah kasanang dalam ati nilam
didiri nilam cayo duo jo bujang lembak alam lalu dituruik ayah kanduang sarato mandeh kanduang didiri
lalu bakato nilam cayo

Nilam Cayo : Manolah ayah dengan mandeh

mangkok mandeh ambo jalang danga dimandeh dikabakan
piak diri tuan lembak alam simanjalang kito baralek
taniek pulang kakampuang lah tadanga jo bapak mandeh sarato kawan samo gadang
maminta izin pado bapak sarato mandeh kanduang
baok pikiran ati mandeh
Mandeh : Nak kanduang si nilam cayo
mandanga kato dari anak iyo pulo itu kironyo lah sanang pulo ati mandeh
mangkok baitu kato mandeh supayo nak sanang timba jo baliak
ayahnyo silembak alam sarato mandeh kanduangnyo
tapi sabuah pasan mandeh
kok nyampang silembak pai usah dilapeh pai sorang
baduo kalian samo pai
alah katarang tu dinilam
Nilam Cayo : Manolah mandeh kanduang
nilam mandanga mandeh dibakato sanang rasonyo dalam ati
sunyi didalam kiro kiro
indak katuan bajalan sorang
kami badua samo pai kini baitulah dimandeh sarato ayah kanduang diri
pulau talam pulau tarika katigo pulau bantuak taji jawek salam mandeh katingga kami
bajalan anyo lai balaia pincalong soa masuak kualo aia aji bajalan tolong jo doa
mintak salamat pulang pai
Kato putuih rundiang salasai turun kalaman anyo lai diansua juo pajalanan ati cameh bacampua rusuah
balaia biduak duo duo kapataganang dilawitan bajalan nilam baduo lintuah nan tiok pasandian lah di
iliakan labuah nan panjang labuah pendek liku baliku pudiang ameh sibalah lua pudiang itam sibalah dalam
aua cino salo manyalo mango katenggeh rang rambahi nak samo tenggi jo nan sanjai sisanjai namo rang
solok pandai mak ayun ayun letong tagajai nasi jo suok tampak gurenah rang nan ilang di ansua juo
pajalanan basuo bukik lah nyo daki basuo lurah lah nyo turuni dima panek sinan baranti dima patang sinan
bamalam ado kapado satu ari malang dak dapek kaditulak mujua dak dapek diraiah sadang digunuang lekok
tigo dilurah bancah simambu sadang baranti maso itu datang panyamun tigo urang nan sorang pandeka
regak nan sorang pandeka kacak nan sorang biawak kasek nan dibilang urang panyamun manampak
silembak alam duo jo puti nilam cayo dak tangguang gadang atinyo lah kadapek durian runtuah lalu bakati
urang panyamun andailah jatuah maso itu sinan tabukak kato kato
Panyamun : Manolah buyuang nan baru datang
dari mano handak kamano dimano kampuang jo nagari
indak ang danga baritonyo
iko nan gunuang lekok tigo dilurah bancah simambu
sia nan lalu tak babaliak
katib lalu katib pun mati
bilal lalu bilal pun mati
kunun kok kalian mudo mudo kini baiko lah dibuyuang
ibo kami dirancak wa ang
sayang kami dibujang wa ang
elok barangkek disiko tinggakan sagalo nan dibao sarato jo gadih nan rancak ko
alah katarang di wa ang tu
Lembak Alam : Manolah angku rang panyamun
baok panggana ka nan elok
suruik ati kanan bana usah turuik an rayuan setan
angku kan alah tuo tuo
elok lah cari barang halal nan nyo salamaik iduik angku
: Manolah buyuang paja ketek
Panyamun kami pulo wa ang ajari
anak micacak simimcacau anak singiang ngiang rimbo a
nak minkatak kambiang utan
nak tau ang dipadeh lado nak ang tau diasin garam ang dibunuah ari kini
Lembak Alam : Man kalian rang panyamun
kalau baitu kato kalian kok dak bisa dibaok kanan elok
tak bisa dibaok kanan bana ambo nan indak kamanyarah
ambo kan anak laki laki
sitapak turun dari janjang musuah nyo indak ka dicari
basuo pantang diilakkan
nan cirocok batu badamai basimpang jalan Bangka ulu
kok nak ucok lawan badamai kok nak parang giliang paluru
kok balari lari dari kappa tibo di kappa main catuik tampek ulando baniago
kito cubo buliah parang sibanta sambia maliek bumi ancua
kok iyo silembak alam kabinaso
Panyamun : Manolah paja kaciek sirah
usah wa ang banyak carito
galigaman den mancaliak wa ang
beko den lulua iduik iduik
tahan di ang makan padang ko kok iyo wa ang laki laki dipancuang dirang panyamun
Na diasak asak lah bajak di asak ateh pamatang sitapak indak Kaden asak antah kok padang dak kasadang
kudo malompek batu balah tibo dilereng pandakian indak nyo duo kandak allah suratan sudah jo janjian nyo
pancuang dirang panyamun padang manenggieh nyo marandah padang marandah nyo manenggi padang
manukiak nyo pijakkan lah patah padang rang panyamun mak ariak silembak alam
Lembak alam Co iko kuek tulang angku
elok kasawah jo baladang elok lah gurun ditaruko gurun ambo laweh tak jadi

Batambah paneh rang panyamun

: Kini co iko diang buyuang

Panyamun kok dak talok ang dimakan padang kok dak nyo makan dimalelo
kito cubo tangkok manangkok
Malang tibo dilembak alam dapeklah buyuang ditangkoknyo, dikabeknyo tangan barantai kaduonyo sarato
Mariah dengan kaki di anta kadalam lurah . iyo lurah bancah simambu. Dibilang puti nilam cayo mamakiak
mamintak tolong manjadi ratok maso itu lalu bakato urang panyamun
panyamun : Upiak nan elok rupo
tak guno upiak manangih
elok pai upiak jo kami pado tingga didalam rimbo
lah katarang tu diupiak
Nilam Cayo : Mano kalian rang panyamun
payah sajo digaek gaek dak ado utak jo banak indak pikiran kanan elok suko
mamakan masak matah
pado denai pai jo kalian bialah mati didalam rimbo
alah kajaleh dikalian
Malang tak dapek ka di tulak mujua dak dapek ka dirayiah malang lah puti nilam cayo padang nan sadang
dilatakkan sadang basentak dari saruang dibaok lari maso itu nyo kaja dirang panyamun dalam balari
dimaso itu jatuah lah puti nilam cayo tatikam dimato padang matilah puti maso itu mati sarato jo ajanyo

TAMAT