SABAI NAN ALUIH

Dahulu kala ado sabuah carito yang bajudul “ Sabai Nan Aluih “ . Di Caritoan di Nagari Agam
Sabaleh Lareh yang marupokan nagari yang amaik subur sawah jo ladangnyo manjadi dikalilingi bukik
. Disinan adat badiri , syarak pun kokoh yang saliang sanda manyanda anak kamanakan
bakakambangan sahinggo nagarinyo tacelak tampak jauah , nan tabarombong tampak hampia tapatan
nagari Bungo Satangkai .
Hiduiklah sabuah kaluarga dalam rumah gadang . Bapaknyo banamo Rajo Babandiang ,
mandenyo banamo Sadun Saribai . Keluarga itu punyo 2 urang anak nan padusi banamo Sabai Nan
Aluih nan laki – laki banamo Mangkutak Alam . Sabai Nan Aluih anak gadih yang sabana – bana
indak ado tandiangnyo . Badan rampiang lamah samampai , muko janiah , mato ketek , muluik bak
dalimo rangkah , kulik kuniang kamerahan . Sampai ka garak gariknyo pun aluih . Budi bahasonyo
elok , sasuai bana jo namonyo Sabai Nan Aluih . Namun amaik babedo jo anak laki – lakinyo yang
barajo dihati , gilo bamain pagi patang , gilo malapeh alang – alang . Sangaiklah dimanjo bapaknyo .
Sagalo kandak yang dipintak balaku . Dek maraso inyo anak sanang karano Bapak urang kayo sadang
mande batuah . Bapaknyo urang yang sangaik dipandang dikampuang , karano cadiak , arif sarato
bijaksano sahinggo pai tampek batanyo pulang tampek babarito .
Dikampuang lain di Luhak 50 koto , tinggalah disinan Rajo Nan Panjang . Inyo sangaiklah
bakawan dakek jo Raja Babandiang . Pado suatu hari , nampaklah dek inyo gadih kamek Sabai Nan
Aluih yang taruih tabayang – bayang dipalupuak matonyo . Sahinggo timbullah niek untuk maminang
anak gadih tu . Disuruahlah urang untuk maminang ka bapaknyo Rajo Babandiang . Sungguah takajuik
Rajo Babandiang manarimo pinangan itu . Namun karano inyo urang yang sangaik arif , sungguahpun
harimau dalam paruik , kambiang juo yang dikaluakan . Indak mungkin inyo bisa manarimo pinangan
Rajo Nan Panjang karano Rajo Nan Panjang sangaik tanamo .
Udang indak tahu dibungkuaknyo tiok kampuang inyo barumah tiok janjang inyo baranak ,
pantang karandahan . Dek ditolaknyo pinangan Rajo Nan Panjang , mambuek 2 orang yang saisuak
dakek manjadi jauh , nan dulu elok kini lah timbua masalah sahinggo mambuek urangko baduo baadu
silek . Sampai akhirnyo Rajo Babandiang tasungkua dan tabariang surang . Rajo Nan Panjang indak
surang inyo ditolong dek kawan – kawannyo . Itulah yang mambuek Rajo Babandiang rabah , tingga
surang tabariang disikaduduak karang tigo dibawah cubadak condong . Untuanglah ado urang yang
malinteh , tacaliaklah dek inyo Rajo Babandiang taguliang . Balarilah inyo ka rumah maimbauan Sabai
Nan Aluih yang sadang batanun . Mandanga kaba bapaknyo kalah bacakak jo Rajo Nan Panjang raso
karuntuah nagari ko . Bagagehlah Sabai Nan Aluih mancaliak bapaknyo . Sabalunnyo diambiaknyo
badia dipakainyo pakaian sagalo hitam , bakodek sarawa dalam , kain kapalo kipeh takambang . Inyo
indak lupo pulo basimpuah maminta izin ka mande . Kamudian inyo pun bagageh sabalunnyo inyo
bapasan kalau Mangkutak Alam adiknyo pulang suruah manyongsongnyo beko .
 Sampai ditampek bapaknyo , dilieknyo bapaknyo alah payah sampai akhirnyo bapulang ka
nanciek itu . Dilapehnyo bapaknyo jo ratok dan inyopun langsung basorak mamanggia urang
sakampuang kalau inyo ka pai , mancari Rajo Nan Panjang . Namun alun sampai mancari , Rajo Nan
Panjang pun datang jo karetanyo . Tajadilah tikam manikam lidah antaro Sabai Nan Aluih jo Rajo Nan
Panjang . Daripado itu datanglah Rangkayo Narawatu yang marupokan padusi dari Rajo Nan Panjang .
Inyo maajak Rajo Nan Panjang untuak pulang indak usah mandanga caracau dari Sabai Nan Aluih .
Namun Rajo Nan Panjang urang yang pantang katalintasan jan ko kalah , samo – samo sajo inyo tak
namuah . Sampai akhirnyo inyo bacakak tangan dan tatembak pulo Rajo Nan Panjang dek Sabai Nan
Aluih .
Tamaiklah hiduik dari Rajo Nan Panjang . Urang gaek ndak tau runtuang , indak takana jo
hiduk ka mati . Mancaliak gadih rancak raso mancaliak asam langsung tabik salero untuk mangawini
Tapi yang namonyo suratan takdir indak bisa dilawan inyo mati ditangan Sabai Nan Aluih , gadih
rancak yang timbua bagaknyo mambela bapak yang sangek dicintoi .
Walaupun bagitu dandam alah tabalehkan . Namun mancaliak bapak alah tiado raso padiah
dalam hati ndak tatahankan ditambah mandanga ratok Mande kanduang yang ditinggaan urang tampek
bagantuang .