SABAI NAN ALUIH

SCENE 1. RAJO NAN PANJANG JO DATUAK KALEK

Rajo Nan Panjang : Manolah Datuak Kalek janyo denai nan capek
kaki ringan tangan, capek kaki indak panaruang
ringan tangan indak pamacah. Agak Kamari
Datuak tagak ado raik nan ka denai bukak.
Kamari bana Datuak tagak nak samo jaleh
pandangaran.
Datuak Kalek : Ampun denai dek tuanku ampun baribu kali
ampun. “Dari dusun kasitujuah, sirawik
parunciang kalam, disusun jari nan sapuluah
sarato simpuah nan jo salam”.
Mandanga tuan nan maimbau tasirok darah
didado, gumanta sabatang tubuah, lunak sagalo
pasandian. Ado ko dubalang rabuik rampeh
ataupun musuah datang manyarang. Curai
papahkan kabakeh denai nak jan bahati ragu juo,
pulang mak alum pado tuan.
Rajo Nan Panjang : Manolah Datuak Kalek janyo denai, kato nan
datang dari Datuak itulah kato nan sabananyo,
indak nyo dubalang rabuik rampeh bukanlah
musuah datang manyarang tapi ado sabuah nan
takana adok kadiri badan denai. Datuak ka denai
suruah sarayo, etan karanah Padang Tarok, iyo
karumah Rajo Babandiang untuak mambawok
siriah jo carano ka maminang Sabai Nan Aluih.
Alah katarang tu dek Datuak.
Datuak Kalek : Kalau baitu kato tuan, lah siang cando nan bak
ari, lah tarang cando nan bak bulan, manarimo
sanang sajolah tuan.
SCENE 2. DATUAK KALEK JO RAJO BABANDIANG
Rajo Babandiang : Manolah Datuak Kalek janyo denai, utusan
luhak limo puluah, pisuruah Rajo Nan Panjang,
apo mukasuik Datuak datang kamari, curia
papahkan ka bakeh denai, nak jan bahati ragu juo.
Datuak Kalek : Manolah tuan Rajo Babandiang, Bukanyo denai
kinari sajo, Kinari nak rang ampang, bukanyo
denai kamari sajo, gadang mukasuik nan denai
jalang. Disiko cando surek nahu, kalam talatak
diateh kasau, tuan manaruah Balam mau, denai
baniek nak mancakau, pulang mak alun bakeh
tuan.
Rajo Babandiang : Kalau baitu kato Datuak, lah mak alun denai
tantang itu. “Anak urang baladang timbakau,
baladang nak urang ditabek patah, lai mah datuak
ka mancakau, manga ko Datuak indak mambawo
gatah”
Datuak Kalek : “Anak urang ditabek patah, nak lalu karambatan,
denai nan indak mambawok gatah, denai tembak
sajo jo sumpitan” pulang mak alun bakeh tuan.
Rajo Babandiang : “Anak urang dirambatan, nak lalu kasitinjau
lawik, Datuak manembak jo sumpitan, buruang
manyilam masuak lawik” alah ka tarang tu dek
Datuak.
Datuak Kalek : “Anak urang sitinjau lawik, nak lalu kasungai
kamuniang, buruang manyilam masuak lawik,
denai manubo sampai paniang” Disinan buruang
dapek dek denai, denai tangkok denai bawok
pulang, barunyo sanang dalam hati. Alah katarang
tu dek tuan.
Rajo Babandiang : Manolah Datuak Kalek janyo denai, usahlah kito
tingkah batingkah, apo bana mukasuik Datuak
datang kamari, curia papahkan kabakeh denai nak
jan bahati bimbang juo.
Datuak Kalek : Kalau baitu kato tuan, denai disuruah dek Rajo
Nan Panjang, mambawok siriah nan jo carano
untuak maminang Sabai Nan Aluih kajadi padusi
Rajo Nan Panjang, pulang mak alun bakeh tuan.
Rajo Babandiang : Manolah Datuak Kalek janyo denai, kalau baitu
kato datuak, lah siang cando nan bak ari, lah
tarang cando nan bak bulan. Kini baitu malah dek
datuak, nak denai paiyo patidokan jo Sadun
Saribai, iyo mandeh dek Sabai Nan Aluih, alah
katarang tu dek Datuak.
Datuak Kalek : Kalau baitu kato tuan, sugiro tuan tantang itu,
denai mananti di nan tarang, alah kasanang hati
tuan.
Rajo Babandiang : Kalau baitu kato Datuak, tinggalah datuak dinan
sakutiko denai bajalan hanyo lai.

SCENE 3. RAJO BABANDIANG JO SADUN SARIBAI

Rajo Babandiang : Diak kanduang Sadun Saribai, ubek jariah
palarai damam, sitawa tampa dikapalo, jarek
samato denai kanduang, putuih jo aa lah ka
diuleh, agak kamari adiak tagak, ado sabuah ka
denai katokan.
Sadun Saribai : Mandanga tuan nan maimbau, tasirok darah
didado, gumanta sabatang tubuah, lunak sagalo
pasandian. Ado ko tuan sakik jo damam, kok
sakik nak denai carikan ubek, kok damam nak
denai carikan tawa, barilah denai batin sungguah,
nak jan bahati bimbang juo.
Rajo Babandiang : Kato nan datang dari adiak iyolah kato nan
sabananyo, indaklah denai sakik jo damam,
bukanlah denai ngilu jo paniang, tapi ado sabuah
nan takana, adok kadiri Sabai Nan Aluih. Denai
like denai padangi, alah gadih gadang nyo tu kini,
siriah lah patuik naiak junjuangan, gadih lah
patuik basuami, kok kito carikan ka junjuangan
nyo, baa pandapek adiak tantang itu.
Sadun Saribai : Kalau baitu kato tuan lah mak alun denai tantang
itu, lai ko tampak junjuangan nyo, pulang mak
alun bakeh tuan.
Rajo Babandiang : Kalau baitu kato adiak, lai tampak urang nyo dek
denai, iyolah diri Rajo Nan Panjang, manjadi rajo
di Payokumbuah, kini Datuak Kalek nan lah
kamari, mambawo siriah nan jo carano untuak
maminang anak kito, kok ito tarimo pinangan nan
tu, baa pandapek adiak tantang itu.
Sadun Saribai : Manolah tuan janyo denai, tantangan pintak
Datuak Kalek, denai tak suko tantang itu,
tantangan diri Rajo Nan Panjang, denai lah tau jo
lakunyo, tiok kelok tiok babini tiok janjang tiok
baranak, denai tak suko tantang itu, alah katarang
tu dek tuan. Kini baitu malah dek tuan, pailah
tamui Datuak Kalek, katokan kato sarupo iko,
pulang mak alum bakeh tuan.
Rajo Babandiang : Kalau baitu kato adiak, samo-samo malah kito,
denai tak suko pulo tantang itu, tinggalah adiak
sakutiko, nak denai jalang Datuak Kalek. Denai
bajalan hanyo lai.

SCENE 4. RAJO BABANDIANG JO DATUAK KALEK

Rajo Babandiang : Manolah Datuak Kalek janyo denai, tantangan
pintak dari Datuak lah denai paiyo patidoakan,
iyo jo mandeh Sabai Nan Aluih, tapi baalah
mangatokan, pintak nan indak inyo bari, kandak
nan indak inyo palakukan. Alah katarang tu dek
Datuak.
Datuak Kalek : Oii Tuan Rajo Babandiang, pandai manulak
pintak denai, pintak nan indak tuan bari, kandak
nan indak tuan palakukan, tamui dek tuan tuanku
Rajo Nan Panjang, etan dibukik pahaunan,
disawah nan ketek-ketek, disika duduak bapilin
tigo, disinan gantiang nak nyo putuih, disinan
biang nak nyo cabiak. Alah katarang tu dek tuan.
Rajo Babandiang : Sabana kareh hati Rajo Nan Panjang, pihak
kapado diri denai, asa rambuik dibalah tujuah,
denai tak takuik jo Rajo Nan Panjang. Alah
katarang tu dek Datuak.
Datuak kalek : Manolah tuan Rajo Babandiang, denai nan utang
manyampaikan sajo, kini baitu malah dek tuan,
tinggalah tuan dinan sanang, denai bajalan hanyo
lai.

SCENE 5. DATUAK KALEK JO RAJO NAN PANJANG

Datuak Kalek : Manolah tuanku Rajo Nan Panjang, Nan
disuruah denai lah pai, pai karumah Rajo
Babandiang, mambawo siriah nan jo carano
untuak maminang Sabai Nan Aluih, tapi baalah
mangatokan pintak nan indak inyo bari, kandak
nan indak inyo palakukan, ditulak sajo sacaro
matah.
Rajo Nan Panjang : MANOLAH DATUAK KALEK JANYO
DENAI !!!
 Sabana barani Rajo Babandiang, pandai manulak
pintak denai, kini baitu malah dek Datuak, japuik
pandeka nan baduo etan ka ranah gulanggang
rami, japuik-japuik tabawo, alah katarang tu dek
Datuak.
Datuak Kalek : Kalau baitu kato tuan, sugiro denai tantang itu.
Tinggalah tuan dinan tanang denai bajalan hanyo
lai.

SCENE 6. DATUAK KALEK JO PANDEKA NAN BADUO

Pandeka : Mano Datuak Kalek janyo denai, mancaliak
Datuak nan alah tibo, kalibuik urang di
galanggang, apo mukasuik datuak datang kamari,
curia papahkan ka bakeh denai, nak jan bahati
ragu juo.
Datuak Kalek : Manolah pandeka nan baduo, maangko nyo
denai datang kamari, denai disuruah dek tuan
Rajo Nan Panjang untuak manjapuik pandeka
nan baduo, kok japuik, japuik tabawo indak
dapek batangguah lai, Alah katarang tu dek
Pandeka.
Pandeka : Kalau baitu kato datuak lah siang cando nan bak
hari, lah tarang cando nan bak bulan, moh lah kito
samo bajalan, dahulu datuak agak salangkah kami
mairiang dari balakang.

SCENE. 7. RAJO NAN PANJANG, DATUAK KALEK JO PANDEKA

Rajo Nan Panjang : Manolah pandeka nan baduo, mangkonyo kalian
denai japuik, denai handak bajalan-jalan, etan ka
bukik pahaunan disawah nan ketek-ketek, disika
duduak bapilin tigo, iyo pai manamui Rajo
 Babandiang. Kok datang silang jo salisiah, kok
tibo banta jo kalahi, raso kapayah badan denai,
pandeka malah manolong denai, Alah katarang tu
dek pandeka.
Pandeka : Manolah tuanku janyo denai, sugiro kami
tantang itu, tapi ado saketek nan marusuah ka
badan diri tuan, kok jariah tantangan labo, kok
payah tantangan buliah, mak alun tuan tantang
itu.
Rajo Nan Panjang : Jan itu nan pandeka rusuahkan, lah mak alun
denai tantang itu. Kini baitulah dek pandeka, bia
denai imbau datuak kalek elok diulang langkah
pandeka.
Manolah Datuak Kalek janyo denai, ado sabuah
lai pintak denai, elok lah datuak ulang langkah
pandeka, nyak sanang raso dihati, sunyi didalam
kiro-kiro. Alah katarang tu dek datuak.
Maulang Langkah Sampai Selesai
Datuak Kalek : Manolah tuanku janyo denai, lah denai ulang
langkah pandeka, raso ka manang pihak kito, alah
kasanang hati tuan.
Rajo Nan Panjang : Kalau baitu kato datuak lah sanang raso dalam
hati sajuak di dalam kiro-kiro.
Manolah Pandeka nan baduo sabalum hari tinggi
bana, kutiko paneh lai alun garang, kito bajalan
hanyo lai.

SCENE 8. RAJO BABANDIANG JO SABAI NAN ALUIH

Rajo Babandiang : Nak kanduang Sabai Nan Aluih, ubek jariah
palarai damam, sitawa tanpa dikapalo, jarek
samato ayah kanduang, putuih jo a lah ka diuleh.
 Agak kamari anak tagak, nak samo jaleh
pandangaran.
Sabai Nan Aluih : Manolah ayah kanduang janyo Sabai, mandanga
ayah nan maimbau tasirok darah didado, gumanta
sabatang tubuah, lunak sagalo pasandian, ado kok
ayah sakik jo damam ataupun ayah ngilu jo
paniang, bari dek ayah batin sungguah, nak jan
bahati bimbang juo.
Rajo Babandiang : Nak kanduang Sabai Nan Aluih, kato nan datang
dari anak itulah kato nan sabananyo, indak ayah
sakik jo damam, bukanlah ayah ngilu jo paniang,
tapi ado sabuah nan tajana, ayah baniek nak
bajalan-jalan, etan ka pasa nan rami, pai mambali
daun jo timbakau, lapeh dek anaj musim bak kini,
pulang mak alum bakeh Sabai.
Sabai Nan Aluih : Danga dek ayah Sabai katokan, Sabai bamimpi
malam tadi yah, mimpi buruak kato urg, rumah
gadang raso tabaka yah, lumbuang padi raso lah
runtuah, ayam kinantan raso lah mati, kudo
baling raso lah hilang, itu mimpi sabai yah.
Rajo Babandiang : Nak kanduang Sabai Nan Aluih, bukan aie nan
manyuruak, aia bakelok tu mah nak kanduang,
bukan mimpi nan lah buruak, rasian elok tu mah
nak kanduang. Alah kasanang hati anak.
Sabai Nan Aluih : Ayah kanduang dibadan sabai, usahlah ayah
bajalan musim bak kini, nagari kusuik banyak
bincano, kok nyampang kalebuik nagari kito,
kamano ayah ka sabai cari, alah katarang tu dek
ayah.
Rajo Babandiang : Nak kanduang janyo ayah, tantangan pintak dari
ayah lapeh dek anak sakali nan ko, lakeh ayah
babaliak pulang, alah katarang tu dek anak.
Sabai Nan Aluih : Ayah kanduang dibadan sabai, sabai tarah indak
tatarah, bak manarah batang sampia, ditateh juo
malah kironyo. Sabai managah indak tatagah, bak
managah aia iliah, sabai lapeh juo malah nan jadi.
kok iyo ayah ka pasa nan rami, lakeh ayah
babaliak pulang, balikan sabai karupuak sanjai,
alah kasanang hati ayah.
Rajo Babandiang : Kalau baitu kato anak, lah sanang raso dalam
hati, sajuak dalam kiro-kiro. Namonyo ayah ka
bajalan, malang jo mujua indak bacarai, kok
nyampang ayah lambek babaliek, mintak lah
korih ka mandeh anak, korih pusako sajak
dahulunyo, jajak ditikam mati juo. Alah katarang
tu dek anak.
Sabai Nan Aluih : Kalau baitu kato ayah saluruah pasan jo umanat
indak ka denai lupo-lupokan, alah kasanang hati
ayah.
Rajo Babandiang : Kini baitu malah dek anak, naiak lah anak ka
ateh anjuangan, ayah bajalan hanyo lai.

SCENE 9. RAJO NAN PANJANG JO PANDEKA NAN BADUO

Rajo Nan Panjang : Manolah pandeka nan baduo, lah panek kito dek
mananti, alun juo tampak rajo babandiang, kini
baitu malah dek pandeka, pailah pandeka
manyuruak dahulu, raso ka payah badan denai,
lakeh pandeka manolong denai, Alah katarang tu
dek pandeka.
Pandeka : Manolah tuan Rajo Nan Panjang, kalau baitu
kato tuan kami sugiro tantang itu.

SCENE 10. RAJO NAN PANJANG VS RAJO BABANDIANG

Rajo babandiang tibo disawah nan ketek-ketek dan basobok jo rajo nan
panjang (improvisasi)
Rajo Nan Panjang : Manolah tuan Rajo Babandiang, lah lamo denai
dek mananti, kini malah tuan mancogok, sabana
barani diri tuan manulak pintak denai, malu
kamano ka denai suruakkan.
Rajo Babandiang : Manolah tuan Rajo Nan Panjang, lai tau juo tuan
jo malu, denai lah tau jo laku tuan, tiok kelok tiok
babini, tiok janjang tiok baranak indak suko
saketek juo denai tantang itu. Alah katarang tu
dek tuan.
Rajo Nan Panjang : oii Rajo Babandiang, usah mancaci parangai
denai, barikan Sabai ka bakeh denai, baru nyo
sanang dalam hati. Alah katarang tu dek tuan.
Rajo Babandiang : Manolah tuan Rajo Nan Panjang, bukanyo denai
mancaci parangai tuan, alah ko tuan bacamin,
tolong caminkan dikubangan kabau. Sabalun
mati diri denai, indak ka dapek sabai dek tuan.
Rajo Nan Panjang : Kalau baitu kato tuan, pantang ka badan diri
denai, pintak kok indak tuan bari, kandak nan
indak tuan palakukan, tarimo dek tuan pakiriman
denai.
Rajo Babandiang : Kalau baitu kato tuan, pucuak dicinto ulampun
tibo, sumua dikali aia pun datang, dek denai
iyolah tacinto pulo, araklah langkah dari sinan
nak denai iriang dari siko.

Rajo Nan Panjang : Pandekaa…… pandeka …… Tolong denai …

Pandeka menolong rajo nan panjang, lalu rajo babandiang pun kalah dan
sekarat.