RANDAI LAREH SIMAWANG

TOKOH :
Lareh simawang : Rahmat Fadli Ramadhan
Siti jamilah : Yelina Khairunnisa
Siti darama : Melisa Putri
Asamsudin : M. Fikri Hanif
Siti rawiyah : Adella Cici Permata
Siti rohani : Aisyah Hirrohmah
Sutan mudo
Sutan batuah

PASAMBAHAN:
Bismillah Di Awa Kato
Alhamdulillah kato mamuji
Basusun jari di kapalo
Rila jo maaf mohon dibari

Rila jo maaf nan kami mintak

Taradok nan tuo jo nan mudo
Antah kok mambari jo bakandak
Mangko kami sampai disiko

Takalo kami bamain

Jari sapuluah kami susun
Tolok dek dunsanak lahia jo batin
Ka tuhan kami maminta ampun

Kaba carito kami bukak

Lareh simawang namo caritonyo
Randai ka kami baok tagak
Maafkan kami kasadonyo

Jo bismillah kito mulai

Bismillahirrahmaa nirrohiim

DENDANG 1 DAYANG DAINI:

Mano sagalo, niniak jo mamak
Cukuik panonton kasadonyo…. 2x
Maaf jo rila nan kami pintak
Sagalo kami anak mudo… 2x

Ampun baribu kali ampun

Ampunkan kami dek rang banyak ... 2x
Jari sapuluah nan kami susun
Randai kan kami baok tagak … 2x

Legaran 1:
Simarantang
Kaik bakaik rotan sago
Nan takaik di aka baha 2x
Tabang ka langik tabarito
Jatuah ka bumi jadi kaba 2x

Banda urang kami bandakan

Banda nak urang koto tuo 2x
Kaba urang kami kabakan
Urang duto kami tak sato 2x

Balayia kapa di siboga

Kapa nak urang ka batawi
Mamuek tantang koto padang
Sialah urang nan takaba
Siti jamilah mambunuah diri
Sabab karano lareh siamawang

Adegan 1 :
Situasi dirumah kediaman siti jamilah, lareh simawang baru pulang komisi setelah sekian lama
tidak pulang (Siti darama, Asamsudin, Lareh Simawang, Siti Jamilah)
Siti Darama : Ayah kanduang dek badan diri

“Kuliah – kuliah tabang batali

Hinggok dibatang bungo rayo
Lah putiah mato dek mananti
Ayah nan di nanti ndak kunjuang tibo”

Baa ayah talambek pulang ?

Asamsudin : “Lamo bana ayah ka pakan
Lah putiah banang dek batarak
Lamo bana ayah bajalan
Lah hanguih hati dek taragak”

Lareh Simawang : mangko ayah lambek di ladang

Anjalai banyak nan rabah
Mangkonyo ayah talambek pulang
 Bangkalai banyak nan tak sudah
Nak kanduang siti darama, Duo jo bujang asamsudin, Anak kan lah samo
tahu, Ayah ko lareh di nagari, manjadi lareh di Simawang, Adaik urang
manjadi lareh, siang di seso dek karajo malam di seso angan-angan Ayah
nan baru pulang kumisi, etan karanah Batusangka.

Siti Darama : Taganang aia di jajaran

Bandakan lalu kamuaro
Tagamang kami ayah tinggakan
Kami lah ayah aja manjo

Asamsudin : Parik Malalo garan kolah

Aia taganang dalam padi
Sakik kapalo garan ayah
Barubah rupo kami pandangi

Siti jamilah : Tuan kanduang lareh simawang, Junjuangan nyao badan diri, Tumpangan
hiduik lahia jo batin, Denai caliak denai pandangi, Tuan barubah dari biaso
Danga dek tuan pantun denai.

Hari nan galok-galok paneh

Jamua di halaman sadang ta kaka
Gabak di hulu tando ka hujan
Hati nan harok-harok cameh
Buruang pamenan dalam sangka
Bak raso bapindah tangan

Lareh Simawang : Diak kanduang siti jamilah, Ubek jariah palarai damam, Sidingin tampa di
kapalo. Danga dek adiak kato denai :

Usah rusuah kayu kasingka

Kok singka den pataduah kan
Dibawah batang lagundi
Usah rusuah adiak kok tingga
Kok tingga den pataruahkan
Ka bakeh urang dalam nagari

(Siti rawiyah masuk)

Siti Rawiyah : Lah lamo denai tak Kamari, taragak bana den jo anak den, lah tigo jo
kapatang , darah didado bagumirok, saraso lai nan tak sanang.
Maliek kalian kini, sanang rasonyo hati mandeh, lah gadih siti darama,
asama sudin alah bujang pulo, lai sanang malah kalian ?

Siti Darama : mandeh kanduang badan dek dir, pihak kadiri badan kami, lai sanang-
sanang sajo, ayah juo nan barubah
Dahulu padi belendokanKini lah talang tapi rimbo
 Dahulu kami bamanjokan
Kini sayang lah baparinggo
Asam sudin: Sialang bukik bajojo
Dihilia ranah palembayan
Dilua sanang kiro-kiro
Didalam mabuak paratian.
Siti rawiyah : lah cadiak anak den kini, lah tahu dirantiang kamanyangkuik,
Lah tahu dibatang kamahimpok, sanang bana hati mandeh, kamalah jatuah
aia tuturan, kok indak palimbahan, jikok bakonyo urang cadiak, sampai ka
anak cadiak juo.
Siti Jamilah : Kakak den siti rawiyah, lah lamo kakak tak Kamari, kakak taragak kami
tacinto, duduak-duduak kakak dahulu, denai nak pai kabalakang.
Siti jamilah, siti darama, asam sudin pergi kebelakang
Lareh Simawang : Kakak denai siti rawiyah, untuang bana kakak datang, kok tidak denai ka
datang juo, pai manjalang kakak kanduang.
Urang baralek tangah sawah
Mambao niru nan jo tampian
Caliak dek kakak jariang lawah
Baitu kusuiknyo paratian

Siti Rawiyah : Adiak denai lareh simawang kito baduo badunsanak, apo bana nan tarumik
susah nan kito bagi duo, adiak tarangkan jaleh-jaleh, nak sanang dalam
hati, sajuak dalam kiro-kiro
Lareh Simawang : Aia lah bulek ka pambuluah, kato lah sudah ka mufakaik, lah dapek kato
nan saiyo, iyo jo urang batusangka, denai ka manikah patang kini, Iyo jo
gadih siti rohani, Alek ko alek sabalah, Di batusangka sajo baralek nyo
Sabuah pintak pado kakak, Siti jamilah laun lai tau, Tolong jo kakak jo
bicaro, manyampaikan ka bakeh inyo.
Siti Rawiyah : Den tak suko – den tak suko, Den tak suko tu diak kanduang, Talingo tak
suko ka mandangakan, Mato tak suko ka maliek, Kito manjadi buah
gunjiang, Abih dagang baganti dagang,
Kanalah maso nan dahulu, Samaso adiak tukang kabun, Tukang kabun
tuanku mandua, Etan di ranah padang panjang
Dek tunggang jalan manurun
Baok malereng tampek lalu
Samantang daun kini lah rimbun
Kana lah rangeh nan dahulu
Lareh Simawang : Itu nan usah kakak sabuik, Lai den kana guno tanah, Takana guno siti
jamilah, Samaso denai tukang kabun, Jamilah jadi tukang masak, Di sinan
kasiah bamulai, Siti jamilah nan maaja, Mangko den tau tulih baco,
Sampai den manjadi juru tulih, Takalo tabukak jabatan lareh, Siti jamilah
nan mahusuakan, kapado tuanku mandua, Mangko den lareh di simawang
Siti Rawiyah : Kok adiak lai mangana, Lai takana guno tanah, Takana jaso siti jamilah,
Nambeklah babini surang lai. !
Lareh Simawang : Kakak nan indak marasokan, Malu nan denai tangguan kini, Ilia mudiak
urang bagunjiang, Satinggi nangko lah pangkaik denai, Sajombang nangko
 badan denai, Awak gagah babini dagang, Bak cando urang indak laku, Nan
sakarang iko kini, Malu bak raso lai katalampok, Denai dapek babini
gadih, Jo nan jombang siti rohani

Siti Rawiyah : Bia bak mano alasan adiak, Denai tak suko tu adiak kanduang, Adiak
babini surang lai, Indak di den manyampaikan kabakeh siti jamilah.
Manuruik paham hati denai, dalam hiduik barumah tanggo, asa lai sasaik
jo sasanang, kabuki samo mandaki, kalurah samo manurun, surang jadih
adiak babini.
Lareh Simawang : Den jo padi den,
Indak sia nan kamanyiang
Aden barajo jo hati den
Indak sia nan malarang
Siti Rawiyah : Adiak den lareh simawang, Kok tak amuah adiak den larang, Kana dek
adiak pasan denai ko
Barisuak hari ka salasa
Urang bakadai pagi hari
Isuak adiak jan manyasa
Kok tak di muluik dalam hati
Siti jamilah masuk dengan kedua anak nya….
Siti rawiyah: Adiak den siti jamilah, Sakik kapalo tibo-tibo, denai nak pulang lah
dahulu, sabuah pasan pado adiak,
Kok tumbuah tali bapilin
Usah adiak rantang surang
Baduo kito mahelonyo
Kok tumbuah tangih dalam batin
Usah adiak tangguang surang
Ratok nak kito bagi duo.

Siti Rawiyah berangkat……

Dendang 3 suntiang patah batikam

Lareh simawang kareh hatinyo

Siti rawiyah indak lah suko
Lareh simawang mambagi cinto
Mambuek hati jamilah luko
Alah bajalan siti rawiyah
lareh simawang tamanuang surang
hati barek kamangatokan
pikiran susah Kamari pentang
sadang nyo duduak tamanuang surang
lareh takajuik ado nan datang
iyo siti jamilah nan datang
hati nan sadang alang ka palang
Adengan 2
Lareh simawang : Diak kanduang siti jamilah, ubek jariah palarai damam, tumpahan kasiah
badan diri, danga dek adiak elok-elok.
Pihak di badan diri adiak, salaruik salamo nangko lauik nyo dalam,
rimbonyo tanang, padang nyo laweh, pikiran lapang. Nan sakarang kini
nangko, hadok ka badan diri denai, Kaki tataruang inai padahnyo, Muluik
tacalua ameh padahnyo, tataruang kaki di batusangka, tabuek karang jo
buatan.
Balam timbago tigo gayo, Balam pamenan rang simawang, Kini balam
kabasangka duo, Sabuah sangka di simawang, sabuah di batusangka, Bak
mano timbangan hati adiak

Siti Jamilah : Tuan kanduang lareh simawang, junjuangan nyawo badan diri, pihak
dikami rang padusi, indak sakik sasakik nangko, indak padiah sapadiah
iko, pamenan di ambiak urang.
Tapi baalah mangatokan, tuan tapacik di hulu pisau, denai tapacik di
matonyo, kadihelo tangan kok luko.
Lareh Simawang : Diak kanduang siti jamilah, sungguah denai di Batusangka, di rumah siti
rohani, hati den tingga di simawang, jamilah indak den lupokan.
Karani mati di duli
Bakubua di kampuang cino
Jamilah Talukih dalam hati
Antah pabilo kaluponyo.
Siti Jamilah : Tuan kanduang lareh simawang, tuan kini rang bapangkaik, tuan urang
bakuaso, tuan tasabuik urang mulia, lah patuik dunia tuan kacak, sabuah
pintak pinto denai, mananti tuan satahun lai, nantikan anak basikola, si
darama alun lai gadang, si asam sudin alun lai Baraka.
Lareh simawang : Ha.. yayai..
Kini gata bisuak digauik !!, lah cadiak bana kau kini.
Hai siti jamilah !!..... alun juo kau tau lai ??
Iko lareh simawang, aden basutan di mato den, aden barajo dihati den,
kandak den pantang tak balaku, pinto den pantang tak kabuliah.
Sadangkan di kakak kanduang denai, indak katahambek tabulintang,
konon di anak dagang sansai..
Usah den dipatah-patah
Tapatah pucuak jilatang
Usah den ditagah-tagah
Itu pantangan lareh simawang
Siti Jamilah : Tuan den lareh simawang, indak patuik tuan kato baitu, mangatokan denai
dagang sansei, urang dagang paibo hati.
 Den tau jo padi den,
Padi den padi anjalai
Den tahu jo diri den,
Diri den dagang sansai.
Lareh simawang : Kalau kau tahu jo diri kau, lah tau diri urang dagang, indak basuku jo
basako, indak bakampuang bahalaman, aden usah ditagah—agah, kalau
kau indak suko, kahilia labuah tarantang, kamudiak indak bapaga,
tinggakan nagari simawang, babaliak kau ka asa kau.
(kapado urang jago gadang )
Manolah urang jago gadang, capek sugirolah Kamari !!Langkok kan kudo
nan putiah, kanakkan palano kamalereang, denai barangkek kini juo !!
Siti Darama : Ayah kanduang nambek ka pakan
Kaladang padi dahulu
Ayah kanduang nambek bajalan
Nantikan gadang kami dahulu
Asam sudin : kok ayah ka pakan juo,
Dimano jaguang ayah tugakan
Antah kok di dalam parak
Kok ayah baajalan juo
Jo sia kami ayah tinggakan
Mandeh nan indak badunsanak
Lareh berangkat dengan marahnya, siti darama dan asam sudin mengejar, memegang baju
lareh simawang. Lareh simawang menolak kedua anaknya, sehingga jatuh tergolek. Lareh
simawang berangkat. Siti jamilah menangis mengangkat kedua anak nya sambil membawa ke
dalam rumah…

Dendang 4 urang lawang mangilang tabu

Rumah gadang batingkok tidak
Kamalah angin nan ka lalu
Antah kok kaliang lantai
Hati nan rusuah tasingkok tidak
Sialah urang nan ka tahu
Antah kok samo nan marasai

Kaba baraliah sakutiko

Etan ka ranah batusangka
Iyo siti rohani
Sadang mananti marapulai
Alah basandiang lareh simawang
Basandiang jo gadih siti rohani

Hati sanang alang kapalang

Alah basuo kandak dihati
Alek di arak sabalik kampuang
Si anak daro jo marapulai

Adegan 3
Disambut dengan tari pasambahan
Pidato pasambahan :
Sutan Mudo : angku sutan batuah di ujuang… ! sambah di paniaik pado angku,kok nan
di nanti alah tibo, nan di tunggu alah datang, nan di cinto laah buliah,
marapulai alah duduak jo anak daro, sananglah mato mamandangi, pihak
di kami si pangkalan, mahadokkan siriah nan sacabiak, pinang nan
sagatok, siriah sacabiak mintak di kunyah, pinang sagatok mintak
dimakan, sudahan sambah pado angku,
Sutan Batuah : Angku sutan mudo nan di pangka,..!
Diateh sambah manyambah, pasambahan angku juo nan di anjuang tinggi
di ambiak gadang, sapanjang bunyi nan di danga, siriah sacabiak mintak
dikunyah, pinang sagatok mintak dimakan, dek alek nan datang jamu jo
nan tibo, iyo baitu pasambahan angku ?
Sutan Mudo : Angku sutan batuah, karano siriah alah bakunyah, pinang alah bamakan,
pihak kami sipangkalan, kami nak maramikan alek kito, iyo jo pamainan
anak mudo-mudo, kandak mintak dilakukan, pinto minta dipabuliahkan,
kasudahan sambah pado angku.
Sutan batuah : Jikok baitu kato angku, pihak dek kami alek nan datang.
Kambanglah jalo di serakkan
Kanai lah anak tali-tali
Barang nan ado diadokan
Kok tidak samo kito cari.
Penampilah tari hiburan
Dendang 5 ratok lawang

Babaju satin biludu

Bajaik jo banang suto
Putuih suto uleh kulindan
Disiko hati mangko ragu
Kabau dibari bapalano
Kudo dibari bapasangan.
Babaliak kaba ka samulo
Karumah siti jamilah
Sadang tamanuang garan kini
Takana untuang jo parasaian
Oi lai oi….
Indak den sangko si rigo-rigo
Pipik sinanduang mamakan padi
Indak den sangko nan bak nangko
Kasiah hati kini lah pai

Oi lai oi…..
Tabanglah rumpun mudo-mudo
Ditoloang ambiak untuak sariak
Kamalah untuang ka dibaok
Itu nan labiah den risaukan

Oi lai oi…..
Siti jamilah hancua hatinyo
Lareh simawang babini duo
Kini jamilah lah putuih aso
Samo di danga curitonyo

Adegan 4

Siti Jamilah : manolah urang jago gadang, capek sugirolah Kamari..

Manolah urang jago gadang, baoklah sabik jo jarujik, carikan rumpuik
kudo putiah, tuanku lareh kok nyo pulang. Dilurah situngkue banang,
disinan banto mudo-mudo, disinan rumpuik gatia-gatia lan, kasinan rang
jago pai !!

Urang jago gadang : aciak den siti jamilah, manga sajauah tu denai pai ?
Denai takuik bajalan surang.

Siti jamilah : kato den nan ka didanga, bicaro den nan ka dituruik , capek sugirolah
barangkek. Kok datang urang batanyo, hadok kadiri badan kami, nan
kahibo usah dikatokan, rang dagang paibo hati.

Dedang buai anak dalam naskah :

Padonyo mangguang rigo-rigo
Elok kapulau bilang-bilang
Pado manangguang bak nan ko
Lah rilah badan kok hilang
Pado rumpuik elok lah padi
Nak murah basiang ladang
Pado hiduik bialah mati
Usah hiduik manyeso urang
Siti jamilah : mano nak kanduang kaduo nyo, jikok dihinok dimanuangkan, pihak dikato
ayah anak, itulah kato sabananyo, kito dagang tak babanso, indak
bakampuang bahalaman, indak basuku jo basako, kamalah untuang ka
disangkuikkan.
Siti darama : mande kanduang badan dek diri duo jo adiak asam sudin
 Kampuanng jambak dibaliak rimbo
Dibaliak kampuang madahiliang
Sadangkan ayah tak pahibo
Konon lah urang bakuliliang
Asam sudin : Ampun denai mande kanduang, danga dek mande kato denai, tatumbuak
biduak dibelokkan, tatumbuak aka dipikiri, kok sampik alam tampaik
tagak, baok bakisa ka nan lapang, bapikia mandeh tantang itu.
Siti jamilah : nak kanduang siti darama, kaduo si asam sudin, lah tibo garak dalam
tubuah, dihari sahari kini, kabcarai nyao jo badan, ikolah pisau rencong
aceh, pisau pusako ayah anak, jo iko nyao disudahi, mati surang mati
baduo, mati batigo manyudahi, nak sanang bana hati ayah anak, nak
dikacaknyo bana dunia nangko, usah kito jadi panghalang.
Asam sudin : manga mande sarupo iko, didayo setan jo dubilih, suruiklah mandeh ka
nan bana. Pihak kapado diri denai, alun denai mati bak kini, denai baniaik
gadang bana, kok siang basikolah, kok malam pai mangaji, denai nak jadi
lareh pulo, sarupo jo ayah kanduang.
Siti Darama : adiak den si asam sudin, usah di lawan kato mande, itulah kato sabananyo,
kok sampai bana kito gadang, malu tak mungkin kito hapuih, malu
tumbuah malu nan jaleh, luko kito luko di kaniang, tak mungkin disaok
lai, kito urang dagan sansei, indak elok urang manjadi lareh, indak elok
urang bapangkaik, urang bapangkaik lupo diri,..
Mandeh kanduang badan dek diri, bunuah di mandeh badan denai, pisau
nan usah mandeh osohkan, kok taraso padiah di den baiko, tikamkan sajo
kuaik-kuaik, jan lamo denai manangguangkan.
Siti jamilah : nak kanduang siti darama, maso ketek anak den baduang, rangik saikua
mandeh halau, alun gadang lah denai bunuah, piciang mato anak
kanduang, usah tampak pusau malayang.
Asam sudin : alah gilo mandeh den, kakak den lah dibunuahnyo…….
Oooiiiiii……… rang kampuang, toloanglah, tolong……., toloanglah baa
badan denai, denai alun mati sadang bak kini,……..
Siti jamilah : kalangik anak mamakiak, ka sia anak mangadu, indak ado urang ka tau,
pintu nan alah denai kunci, ayah ang jadi marapulai, sadang basandiang
inyo kini, sarahkan sajo diri nak.
Asam sudin: indak…! Indak….! Aden alun kamati…..! hiboi badan denai, ampun den
mande………!
Siti jamilah : Oi rang kampuang Luhak Nan Tuo, danga umanaik dari denai,
Kok tinggi usah manyundak
Kok gadang usah maimpok
Kok bapangkek usahlah sombong
 Kanalah urang nan dibawah
Bialah kami mandi dirimbo
Kain basahan kain saruang
Pado mamakai kain palakaik
Bialah kami mati batigo
Pado manyusahan urang kampuang
Kubuakan kami ciek lahaik

Dari pado baputiah hati, bialah kami baputiah tulang, mati surang mati
baduo, mati batigo panyudahi…..!

Urang jago gadang : ( terkejut )

Angku kapalo : manolah urang jago gadang tarangkan asa mulonyo, mako tajadi nan bak
nangko.
Urang jago gdg : ampunlah denai angku kapalo, den tak namuah, den tak namuah, aden
dituduah, mambunuah aciak jo adiak den. Asa jo mulo aden tak tahu,
darah taserak den tamui..!
Siti rawiah : manolah angku kapalo, usah ditanyo rang jago gadang, tak jaleh deknyo
asa mulo nyo. Nan sakarang kini nangko. Suruah lah urang jago gadang
manjapuik lareh simawang, etan karanah batusangka, karumah siti rohani,
inyo sadang basandiang kini.
Angku kapalo : manolah urang jago gadang, barangkek juo kini-kini, gua sakali tabuah
larangan, nak tahu urang dalam nagari, apo garan nan tajadi,

Orang kampung banyak berdatangan, lareh simawang datang menyingkap mayat anak-anak
nya

Siti rawiyah : sanang bana hati adiak, papueh bana mahadang dunia, ganggam pacik
dunia nangko. Adiak urang bapangkaik, adiak urang bakuaso, di
batusangka adiak basandiang, di simawang darah taserak….!
Lareh simawang : (setegah gila)
Sia…….. ??? aden nan salah ? indak ! indak ! jamilah !!!
Kau nan cilako…. !
(dengan nada suara lunak) Indak……., kau elok jamilah, kau bana.,,,,,,
aden nan salah..!
(dengan suara keras) batigo kalian mati, barampek jo den….!
(lareh dihadang orang banyak untuk bunuh diri dengan pisau yg sama)
Angku kapalo : lah salah angku mamasangkan, adaik dimano angku pakai.
Manuruik adaik di alam ko, banamo adaik minangkabau, namun banamo
cucu adam, kok tagaknyo samo tinggi, kok duduaknyo samo randah, indak
ado babedo-bedo, urang asa jo urang datang, nan jadi poko jo pangka,
 dima bumi dipijak, disinan langik dijunjuang, dima tabilang tahantak,
disinan tanam tumbuah, adaik samo dipakai limbago samo di tuang.
Tapi… kok jalan di asak urang lalu, cupak dialiah rang mangaleh, patuik
bana angku batindak..!
Lareh Simawang : (gila)
Jamilah….! Mari diak kanduang…..!
Darama….! Asam sudin….! Mari nak ayah dukuang….!
(marah ) paiiiii…paiiiiii…., kalian cilako…..! ha…ha… ha,…. (menangis)
Angku kapalo : lah rusak padi diladang
Dituai mangko takaka
Lah malang lareh simawang
Anak mati aka batuka…..

Dendang 6 penutup

Balayia kapa ka bangkahulu

Sarek mamuek buah palo
Kappa balayia duo tigo
Randai sagitu malah dahulu
Lain wakatu di sambuang pulo
Ambiak pangajaran untuak kito

Nan kok ado jarum nan patah

Usah di simpan dalam peti
Latakkan sajo di barando
Nan kok ado kato nan salah
Usah disimpan dalam hati
Ambiak sajo sado paguno