BATAMAT KAJI

Karya : alif rila spdi

Pemain randai :
1. Saidi Marajo : Bapak
2. Salamah : Mandeh
3. Bujang Salamaik : Anak
4. Sutan maruhun : Mamak
5. Tuanku surau : Guru ngaji

Dendang I
Dari pauah ka bukik tinggi
Singgah sabanta di bukik macang
Jikok kurangnyo randai ko kini
Ukua jo jangko kami nan kurang

Satu rabaa rami pasanyo

Di aua tajungkang manjua tuduang saji
Kami ka mancubo bacurito
Nan bajudul batamat kaji

Di surau aua urang batamat kaji

Hari akad tapek harinyo
Dari pado bahabiah hari
Rancak to danga curitonyo
Adegan I ( dirumah si salamaik )
Siti Salamah : Nak kanduang bujang salamaik… paubek jariah palarai damam,
kumarilah anak sabanta, ado di mandeh ka disampaian, satantangan
diri anak
Bujang salamaik : Mandeh kanduang janyo denai… apokoh garan ka mandeh
sampaikan, tarangkah malah jaleh-jaleh, buliah sajuak dalam hati,
sanang dalam kiro-kiro
Siti salamah : Nak kanduang bujang salamaik, rajin-rajinlah salamaik mangaji,
supayo pandai salamaik mangaji, sabab harapan ayah jo mandeh

1
 tatompang pado salamaik, nan kamandoakan ayah jo mandeh.
Saidi marajo : Anak kanduang bujang salamaik, apo nan disampaikan mandeh
salamaik tadi, itu kato nan sabananyo, usah salamaik malawan
kapado guru mangaji, aa nan disuruah guru mangaji karajoan, aa nan
ditagah guru tinggaan, sopan jo santun modal utamo salamaik
dalam baraja.
Bujang salamaik : Ayah jo mandeh kanduang denai… siang tampek mangadu, malam
tampek mandapek an kasiah sayang, apo nan ayah sampaikan tadi,
siang salamaik ambiak katungkek, malam salamaik ambiak
kasuluah, buliah sanag hati ayah jo mandeh.
Ayah… mandeh… salamaik pai mangaji dulu
Saidi maraja/ siti : Jadih nak… elok-elok dijalan
salamah ( salamaik basalaman jo ayah dan mandeh )
Dendang II
Alah barangkek salamaik mangaji
Pai mangaji karumah guru
Tibo disinan inyo mangaji
Baraja mangaji kapado guru

Kami bacurito didalam randai

Untuak paubek hati nan ibo
Bujang salamaik tasabuik pandai
Di aja ciek nyo dapek duo
Adegan II ( disurau tampek salamaik mangaji )
Tuanku surau : Assalamualaikum wr.wb
Ba aa anak-anak lai sanang kasadonyo
Lai pak… ( dijawab anak randai )
Salamaik… lai sehat salamaik…
Bujang salamaik : Alhamdulillah lai pak…
Tuanku surau : Syukurlah kalau baitu
Kini awak mulai mangaji lai, bukak surek an-nas ayat 1-6
Alah babukak kasadonyo ???
Alah pak…( jawab anak randai )

2
 Sia nan kamambaco talabiah dulu ???
Bujang salamaik : Awak pak…
Tuanku surau : Aaa cubo baco salamaik
Bujang salamaik : Bujang salamaik mambaco al-quran sampai sudah
Tuanku surau : Lai bisa salamaik ma aratian surek nan di baco tadi tu…???
Bujang salamaik : Lai pak…( salamaik ma aratian surek nan di baconyo )
Tuanku surau : Iyo hebat bana salamaik !!!
Baiklah anak-anak kasadonyo…dek kito lah manamaik an mambaco
alquran sampai juz 30, mangko alah manjadi tradisi di surau kito ko
untuak ma adoan acara tamaik mangaji, jadi tolong beko sampai
dirumah sampaian ka urang tuo kalian masiang-masiang, bahaso
disurau awak akan di adokan acara tamaik mangaji
Jadih pak.. ( jawab anak randai )
Bujang salamaik : Buliah batanyo pak…
Tuanku surau : Apo tu salamaik … ???
Bujang salamaik : Bilo awak adoan acara tu pak …???
Tuanku surau : Insya Allah kito rencanakan pado hari akad tanggal 22 mai
Bujang salamaik : Ooo iyo pak… tarimo kasih pak.
Dendang III
Bujang salamaik nyo lah pulang 2x
Yo lah pulang dari mangaji
Dari mangaji basanang hati 2x

Ba aaa mangkonyo basanang hati 2x

Bujang salamaik ka batamaik kaji
Batamaik kaji di surau aua 2x

Kini salamaik alah dirumah 2x

Tibo dirumah manuka baju
Lalu manamui ayah jo mandeh 2x
Adegan III
Bujang salamaik : Ayah jo mandeh janyo denai…
Tadi salamaik disurau mangaji, disuruah dek guru mambaco al-

3
 quran, salamaik bisa mambaconyo mandeh…, dan sasudah tu
disuruah guru pulo ma aratian, juo salamaik bisa ma aratian yah…
Siti salamah : Salamaik anak kanduang denai…
Mandangakan apo nan anak samapaikan sabantako… rasonyo
taubek jariah mandeh menganduang salamaik salamo sambilan
bulan dulu
Saidi marajo : Ayah juo baitu salamaik…
Ta apuih rasonyo paluah ayah mancari nafakah untuak salamaik
Bujang salamaik : Ayah jo mandeh kanduang denai…
Tarimo kasih yah,,, mandeh,,,
Ayah jo mandeh… cako disurau, guru mangaji manyampaian,
bahaso akan di adokan acara tamaik mangaji, ba aaa pandapek ayah
jo mandeh tantang itu…???
Siti salamah : Mandeh sangat satuju tu salamaik… kalau ayah ba aaa…???
Saidi marajo : Ayah juo satuju…
Bisuak bia ayah turuik dulu sutan maruhun mamak salamaik…
untuak manyampikan kaba ko kini
Dendang IV
Lah bajalan oi saidi marajo oi tuan oi
Iyo baduo… iyo baduo jo bujang salamaik
Pai karumah… pai karumah sutan maruhun
Tibo dirumah… oi sutan maruhun yo tuan oi
Baru tabukak…
Baru tabukak…oi kato-kato
Adegan IV ( dirumah sutan maruhun )
Saidi marajo : Mamak salamaik,,, sutan maruhun
Sabalunnyo ambo minta maaf kapado mamak, karano sakali-kali
bana dapek manjalang mamak kamari
Sutan maruhun : Ndak ba aaa bagai doh saidi maruhun
Apo garangan saidi marajo kamari…???
Saidi marajo : Iko mak,,, kapatang si salamaik mambaok kaba dari guru
mangajinyo, keceknyo akan di adokan acara batamaik kaji di surau
tampeknyo mangaji, ba aaa pandapek mamak tantang itu…???

4
Sutan maruhun : Kalau di mamak… satuju tantang itu…
Tapi pasan mamak ciek kapado salamaik… meskipun salamaik lah
batamaik kaji namonyo,,, tapi mambaco al-quran jan baranti pulo,
jadikan al-quran tu sabagai padoman hiduik, dalam kahidupan
sahari-hari
Saidi marajo : Ba aaa salamaik… lai tadanga kecek mamamk
Bujang salamaik : Lai yah… apo nan disampaikan mamak tadi, akan salamaik paciak
arek, ganggam taguah
Saidi marajo : Ooo yo mak… kecek guru mangaji salamaik, acara tu akan di
adokan hari akad mak, tanggal 22 mei, kan lai samo-samo pai kito
ka surau mak…???
Sutan maruhun : Insya Allah… kalau lai sihat-sihat sajo badan mamak
Saidi marajo : Jadih mak… nampaknyo hari lah galok-galok lo mak, kahujan
bantuaknyo… kalau kami ansua ka subarang ba aaa mak…
Sutan maruhun : Jadih… ndak ba aa doh
Saidi marajo : Assalamualaikum…
Bujang salamaik
Dendang IV
Alah babaliak saidi marajo
Iyo baduo jo bujang salamaik
Baliak nan dari rumah mamaknyo
Manyampaian pasan bujang salamaik

Kini mananti akad di muko

Ka batamaik kaji si salamaik
Kaba baraliah kasamulo
Ka bakeh diri si salamaik
Adegan V : ( disurau tampek salamaik mangaji )
Tuanku surau : Assalamualaikum wr.wb
Inyiak-inyiak, angku-angku, apak-apak, ibu-ibu nan ambo hormati,
pado hari kini saramon biaso, disurau mangaji kito ko, sudah
manjadi kabiasoan bagi kito basamo, bahaso satiok anak-anak nan
lah tamat mambaco al-quran, mako di adoan acara batamaik

5
 mangaji, dengan arti kato, sasudah acara ko, anak-anak baranti
mangaji…??? Ndakk …!!!, tapi acara ko kini batujuan supayo anak-
anak kito ko labiah basumangaik lai baraja dan mamahami isi al-
quran
Sutan maruhun : Guru ngaji nan ambo hormati,,, ambo mahon maaf talabiah dahulu,
agak lancang ambo mangecek…
Tuanku surau : Ndak ba aaa doh nku… apo garangan nan ka angku sampaikan
…???
Sutan maruhun : Ndak ado rasonyo lai,,, hanyo dapek manyampaian tarimo kasih
kapado guru, karano salamoko anak-anak kami lah guru aja mangaji,
dari ndak tau manyurek,,, kini lah tau manyurek,,, dari ndak tau
mambaco,,, kini lah tau mambaco, sahinggo lah batamaik kaji pulo
inyo kini, sakali lai ambo sampaian tarimo kasih banyak kapado
guru
Tuanku surau : Alah sampai nku….
Sutan maruhun : Alah guru
Tuanku surau : Nan di ambo sabagai guru mangaji… harapan ambo lah pandai
anak-manulih jo mambaco al-quran, itulah lah labiah dari sagalo-
galonyo mah nku,
Jadi,,, inyiak-inyiak, mamak-mamak, ibu-ibu kasadonyo, mari kito
ikuti acara batamaik kaji ko dari mulo sampai akhia nyo nantik.
Sakian dari ambo, tarimo kasih.
Salasai…………

Indomo di saru aso, mangkudun di sumaniak

Urang tasabuik cadiak pandai
Ampun baribu kali ampun, maaf dipintak ka rang banyak
Sagalo kami anak randai
Dari pado bahabiah hari, dari pado bahabiah maso
Eloklah randai disudahi sanak oi
Talempong mairiang dibulakang.