Judul Randai “ Patuah Lalu Linteh” ( TERTIB LALU LINTAS )

Pemain :
1. Mangkutak Alam : Mamak
2. Saidi Marajo : Ayah
3. Rohani : Mandeh
4. Rang Mudo : Anak
5. Nan Basa : Polisi
6. Nan Aguang : Hakim
Dendang I,
Anak kanduang oi sibirang tulang yo mamak oi
Paubek jariah palarai damam2
Rajin-rajin oi anak baraja oi kanduang oi
Sampai Tacapai citooo-cito2
Pai sikola pakai honda
Jan lupo mamakai helem
Sarato surek-surek honda
Oii anak kanduang badan denai
Adegan I ( dirumah )
Anak- Ayah- Mandeh → masuak
Saidi Marajo : Nak kanduang sibirang tulang, paubek jariah palarai
damam, kamarilah anak saketek, ado mukasuk nan ka
ayah sampaikan satantangan diri anak
Rang mudo : Ayah kanduang ayah denai…cubo ayah tarangkah
jaleh-jaleh, apo mukasuik nan ka ayah sampaikan,
buliah den danga elok-elok
Saidi Marajo : Kini anak kan alah tamaik sikola SMP, tantu ka
manyambuang ka sikola ka pasa, kiro-kiro kama anak
ka basikola
Rang mudo : Kok itu nan ayah tanyokan, ambo barencana ka sikola
ka STM yah, ba aa pandapek ayah jo mandeh tantang
itu
 Saidi Marajo : Kalau baitu kato anak, ayah sasuai… kalau manuruk
mandeh ba aaa
Rohani : Mandeh juo sasuai jo rencana anak… tapi sungguahpun
baitu nak, ado juo nan takana di mandeh, kalau iyo
anak ka sikola ka pasa, naiak oto umum sajo ba aa
manuruk anak…walaupun honda ayah ado nan ka
dipakai
Rang mudo : Mandeh kanduang tumpuan kasiah… ambo paham
tantang kato mandeh, sungguah pun baitu mandeh,
bukannyo ambo manulak kato mandeh, tapi kalau
ambo naiak oto umum mandeh, oto tu …, tiok
simpang-tiok baranti,…tiok simpang, tiok baranti,
sahinggo talambek juo ambo sampai ka sikola, ba aa
pandapek ayah jo mandeh tantang itu…
Rohani : Anak kanduang palarai damam… kalu baitu kato anak,
mandeh maklum tantang itu, tapi nak… elok-elok anak
bahonda, jan kancang-kancang, patuah ka aturan lalu
linteh, ba aa pandapek ayah tantang itu
Saidi Marajo : Kalau baitu…ayah juo sapandapek jo mandeh, elok-
elok bahonda, dijalan jan bak kato awak sen, sabok
jalan tu banyak nan punyo, sudah itulai pakai helem
dan langkok i surek-surek honda, knolpotnyo jan di
kareh-karehan, kaco sipion jan pulo di bukak, maklum
anak tantang itu
Rang mudo : Kalau baitu kato ayah jo mandeh… denai maklum
tantang itu, denai barangkek sikola lae mandeh , yah…
assalamualaikum…
Saidi marajo dan rohani : Wa’alaikum salam
Catatan : Rang mudo basalam jo saidi marajo dan rohani
Dendang 2
Lah barangkek sutan mudo
Pai sikola ka bukik tinggi
Di STM nyo basikola
Untuak mancapai cito-cito
Tapi malang bagi rang mudo
Di lampu sirah nyo jalan taruih
Dek takuik talambek sikola
Mari to danga curitonyo…
Adegan II ( dijalan raya dakek lampu merah )
rang mudo jo nan basa masuak legaran
Rang mudo : Naik honda… dan manarobos lampu sirah wakatu hiduk
Nan basa : Priiiit… ( bunyi pluit )
Oiii … rang mudo, apokoh rang mudo ndak mancaliak
lampu sirah hiduk ???
Rang mudo : Ondeee… pak polisi, iyo lai pak, bukannyo denai ndak
muah baranti pak… tapi denai lah talambek ka basikola
pak
Nan basa : Maaf rang mudo… itu bukan alasan kami manilang
rang mudo, tapi rang mudo lah malangga aturan lalu
linteh…tolong pacaliak an ka kami surek-surek honda
rang mudo
Rang mudo : Maaf pak… ambo ndak punyo surek-surek kendaraan
Nan basa : Kalau rang mudo ndak punyo surek-surek kendaraan,
ba aa mangko rang mudo barani mangandarai honda
ko… supayo dapek rang mudo ketahui, kalau malangga
aturan lalu linteh, mako rang mudo malangga undang-
undang nomor 22 tahun 2009, kini kami akan mangalua
an surek tilang untuak rang mudo, dan akan di
sidangkan.
 Rang mudo : Kalau baitu kato bapak… ambo patuah tantang itu dan
akan mengikuti aturan nan balaku.
Dendang 3
Hari raba a pukuah satu
Pai ka pakan pukuah duo
Mukasuik hati ndak kaco itu
Ruponyo tibo silang sangketo
Tantangan diri nak rang mudo
Capek ma ambiak kaputusan
Manyasa diri kasudahan
Kini rang mudo disidangkan
Nan batampek dipangadilan
Ba a carito kasudahannya
Mari to danga kaputusannyo…

Adegan III ( dipanagadilan )

Ket : rang mudo- nan aguang…mangkutak alam…saidi marajo…rohani, masuak legaran
Nan aguang : Sudaro rang mudo … ( dalam persidangan di kantua
pulisi )
Wakatu sudaro menerobos lampu sirah di jalan
gadang…pado waktu itu sudaro alah malangga undang-
undang nomor 22 tahun 2009 pasal 275 ayat 1 jo pasal
28 ayat 2 nan babunyi “ satiok urang nan ma akibatkan
gangguan pado guno tando lalu linteh, marka jalan, alat
pembari tando lalu linteh, fasilitas pajalan kaki, dan alat
pangaman pangguno jalan” mako sudaro di dando Rp.
250.000;

Wakatu patugeh manyuruah sudaro mampacaliak an

 SIM , juo sudaro ndak bisa mampacaliak an SIM
kapado patugeh, mako sudaro malangga pasal 281 jo
pasal 77 ayat 1 nan bunyinyo” indak punyo SIM, indak
dapek mampacaliak an SIM nan sah, mako sudaro di
dando Rp. 1.000.000;
Katiko patugeh manyuruah mampacaliak an STNK, juo
sudaro ndak bisa lo mampacaliak an, sudaro malangga
pasal 288 ayat 1 jo pasal 106 ayat 5 huruf a, mako
dandonyo sabanyak Rp. 500.000, plat nomor kendaraan
sudaro di rubahlo, ndak sasuai jo nan di agiah pulisi,
sudaro malangga pasal 280 jo pasal 69 ayat 1, dandonyo
Rp. 500.000; mako pado saat kiniko pasidangan
mamutuhkan dando kapado sudaro sabanyak Rp.
2.250.000; sakian putusan sidang.
Rang mudo : Pak hakim nan terhormat… kalau itu lah aturan
hukum… ambo taat aturan.
Keterangan : mangkutak alam-saidi marajo- rohani
( hanyo manghadiri persidangan.

Dendang 4
Indak disangko rigo-rigo
Pipik sinanduang makan padi
Indak den sangko yo ka co iko
Yo Panyasalan nan tajadi
Padonyo mangguang rigo-rigo
Elok ka pulau yo palayaran
Bialah denai mambayia dando
Untuang kok isuak jadi pelajaran
Kini rang mudo nyo pulang
Pulang kumbali ka rumah nyo
Supayo curito labiah tarang
Kini to danga kalanjutannyo
Adegan IV ( dirumah rang mudo )
Mangkutak alam-saidi marajo-rohani-rang mudo ( bakumpua dirumahnyo )
Rang mudo : Ayah jo mandeh kanduang, sarato mamak denai…
bukannyo denai ndak ma iyoan kecek ayah jo mandeh
sarato mamak, tapi sabalunnyo ambo minta maaf, ateh
kasalahan nan alah ambo pabuek, wakatu tu ambo
tagageh ka pai sikola, ruponyo lampu sirah hiduk
pulo…sahinggo ambo manarobos lampu sirah tu
Mangkutak alam : Kamanakan denai rang mudo… untuak salanjutnyo
patuahilah aturan lalu linteh tu…kok honda jan di gaya-
gaya pulo, nan biaso-biaso selah, aturan lalu linteh tu
gunonyo untuak kesalamatan kamanakan juo no.
Rang mudo : Jadiah mamak…
Rang mudo manyalami mamak sarato ayah jo
mandehnyo

Dendang panutuik
Ampun baribu kali ampun, maaf dipinta ka rang banyak
Sagalo kami anak randai sana oiii…………
Bukik biaso timbunan aso, lurah biaso timbunan aia
Pituah juo dinan tuo
Dari pado ba habiah maso, dari pado bahabih hari
Eloklah randai disudahi sanak oiii….
Talempong mairiang dibulakang
SELESAI……………..