Drama pasal Tumpuan na Marsitungkolan, Marsipatoguhan, ampa na

Marsipardiateian

Babak 1
Bani ruang tamu, hundul sahalak inang namabalu. Dob ai, roh ma sahalak niombahni naboru
hubani, patugahkon pasal pelunasan pinjaman online ni na dob jatuh tempo.

Boru : Mak..
Inang : Eh, roh ho. Hunja ho ai? Mahua ai, baya?
Boru : Hun kampus, mak.
Inang : Mahua ai, baya?
Boru : Santabi parlobei da, mak. Mangindo maaf au bamu. Domma lepak au.
Inang : Ih, mahua ai? Gagal use ujian mata kuliahmu tene?
Boru : Lang ai, mak. Anggo ai, lulus do au.
Inang : Jadi, mahua mangindo maap ho?
Boru : (tartangis) Domma jatuh tempo pinjaman online-ku, mak.
Inang : Aha do pinjaman online on, baya?
Boru : Manginjam duit au bai halak, mak.
Inang : Aih, mase manginjam-injam ho bai halak? Kan domma hubere uang
jajanmu.
Boru : Ai ma da mak. Laho mamboli laptop do au untuk kuliah. Hubotoh do
lang dong duit ni mamak. Jadi, manginjam ma au. Humbani duit
tabunganku do hucicil pinjaman ai, mak. Hape, lang targalari au.
Inang : Aih borungku, kan boi ipatugah ho bani mamak. Boi hinan do huusasahon laho
mamboli laptop-mu ai, baya.
Boru : Santabi da, mak.
Inang : Ai sadiha gatni pinjamanmu ai, baya?
Boru : Tolu juta nari maningon galaronku, mak.
Inang : (tangis) Aih baya, mase sonin bahatni? Domma lang dong be bapamu.
Mamak pe pitah marjualan kueh do. Hunja ma ibuat hita duit laho
manggalari utangmu ai?
Boru : Ulang ipatugah ham bani abang da, mak. Holi pasti manggila tumang do ia
bangku.
Inang : Antigan ma batas akhir na maningon galaranmu sitolu juta ai, baya?
Boru : Sidokahan ma haduan, mak. Anggo lang lunas, iposting atap ipamasuk
sidea ma foto pakon identitasku bani media sosial, mak. Maila ma au,
Inang : Aih lakan baya, sosak ma huahap sonari. Hunja ma ai itorihi hita?
Boru : Santabi tumang bamu da, mak..
Inang : Ea borungku. Martonggo ma lobei hita bani Tuhan, manjalo gogoh
humBani…
Dob ai martonggo ma inang on pakon boruni, ase ipargogohi Tuhan sidea mandompakkon na masa
on.

Babak 2
Akhirni, ihubungi inang ai ma piga-piga hasomanni aima seksi inang i kuria ni sidea. Ipatugahni
ma ganup na masa ai bani piga-piga hasomanni. Ipangindohon ma ase ipinjamni ma lobei duit ni
piga-piga inang i kuria ai.

Inang 1 : Santabi eda, adong sonari masalahku.

Inang 2 : Mahua ai, eda?
Inang 1 : Iboli borungku laptop untuk keperluan kuliahni. Hape lang ibagas botohku.
Inang 2 : Ea da. Jadi mahua, da?
Inang 1 : Hape manginjam do gan ia hun pinjaman online, da. Tinggi tumang bungani,
ase lang targalarsi. Jadi, haduan ma jatuh tempo pelunasan pinjaman ni ai, da.
Inang 2 : Ih, nai do? Sadiha gatni utangni?
Inang 1 : Tolu juta, da.
Inang 2 : Bahat ni ai lo. Jadi sonaha rencanamu, da?
Inang 1 : Anggo boi, hupinjam ma lobei duitmu, da. Domma mapingor ulungku
mamingkiri ai. Lang hubotoh be huja torihonku.
Inang 2 : Ea da, ulang gabe stress ham halani ai. Anggo au, lang boi bahat huurupi.
Tolu ratus ribu do hansa na boi hubere sonari, da.
Inang 1 : Nai do, da? Tarima kasih ma parlobei bamu tene, da.
Inang 2 : Ea da. Sehat-sehat ma hita tene, da.

Akhirni, ihubungi inang ai ma use piga-piga nari hasomanni laho mangindo pinjaman. Dob honsi
adong 4 halak na ihubungini, tong do lang boi gok duitni tolu juta rupiah. Hape panorang jatuh
tempo tading sadari mando.

Babak 3
Halani domma buntu dalan ni inang on laho manggoki na tolu juta ai, ipaksa inang on ma dirini
laho manghubungi niombahni sidalahi, age pe ilarang boruni.

Inang : Hallo bapa, sonaha kabarmu ijai?

Anak Dalahi : Horas mak. Sehat do au ijon. Ham sonaha kabarmu, mak?
Inang : Au sehat do bapa. Botoumu pe sehat do. Sanggah ija do ham on?
Anak Dalahi : I kantor do au nuan mak. Ham ija, mak?
Inang : Mamak i rumah do sonari. Sonon do ai bapa, adong sihol patugahon
ni mamak hubam. Boi do panorangmu kan?
Anak Dalahi : Ea mak. Boi do. Mahua ai, mak?
Inang : Borat sonari pingkiran ni mamak. Lang hubotoh be huja patugahkon.
Anak Dalahi : Mahua ai gatni, mak?
Inang : Nini botoumu, lang pala ipatugah namin hubam, bapa. Tapi nini
uhurhu seng dear sonai. Ho do anakku, seng dong be bapanima.
Huja nari ma mamak marsungkun anggo lang bam. Jadi sonon, manginjam
duit botoumu hubani pinjaman online.
Anak Dalahi : (ibagas nada na tinggi) Aha mak? Manginjam duit ia? Benahani ai,
mak?
Inang : Sabar bapa. Tangar lobei. Ia laho mamboli laptop untuk kuliahni.
Hape seng mampu uang tabunganni manggalari pinjamanni ai, halani
tinggi tumang bungani, bapa. Jadi anggo lang igalari pinjamanni ai,
isebar do gan fotoni botoumu pakon identitasni hu media sosial.
Anak Dalahi : Ai ma da mak. Bahaya do pinjaman-pinjaman online on, mak. Mase
lang ipatugahni hubangku anggo sihol mamboli laptop do ia untuk
kuliahni?
Inang : Mamak pe lang mambotoh-botoh pasal ai, bapa. Jadi, patar ma jatuh
tempo pinjamanni ai, bapa.
Anak Dalahi : Sadiha mak?
Inang : Tolu juta ganupan.
Anak Dalahi : Mase sonai bahatni, mak? Lang untuk na berfoya-foya gendo ia ai?
Tongon do ia mamboli laptop? Domma ididah ham laptop na iboli ni ai
gatni, mak?
Inang : Tongon do, bapa. Adong do laptop na iboli botoumu ai. Jadi, domma
marusaha mamak maminjam bani piga-piga hasoman seksi inang i
Gareja. Dapot ma 2,5 juta sonari. Tading 500 ribu nari na mando.
Tapi lang hubotoh be hunja torihonku, bapa.
Anak Dalahi : Aih mak, maila ma hita sonon mak. Mase pala ipinjam ham hubani
na legan mak? Mase lang parlobei ipatugah ham hubangku?
Inang : Sidea do hansa na ibagas uhurhu na boi mangurupi mamak. Ai pe
domma malas tumang uhurhu, ra sidea mangurupi mamak, seng
pala das hata-hata ni sidea na lang dear hu darat an, bapa.
Anak Dalahi : Ea mak. Sintong do ai. Tapi au kan niombahmu do. Patugah ham ma
namin parlobei hubangku, mak.
Inang : Lang ibere botoumu, bapa.
Anak Dalahi : Sonon ma ai mak, tolong paulak ham ma sonari ganup na ipinjam
ham hubani hasomanmu ai. Paulak ham sonari da, mak.
Inang : Anggo hupaulak, sonaha ma holi manggalari utang ni botoumu ai?
Anak Dalahi : Adong do tabunganku, mak. Ai ma ipakei hita. Ase sonari hutransfer ma
bani mamak. Tolong galari ham da, mak.
Inang : Nai ma, bapa? Jadi naha ma holi mamak paulakkon duitmu ai?
Anak Dalahi : Mase ipaulak ham, mak? Pakei ham ma ai, mak. Ai lang ipodahkon
bapa ondi pakon ham do hubannami ase marsitungkolan, marsipatoguhan,
pakon marsipardiateian hita sadokah goluhta i tanoh on, mak? Au pe
malas do uhurhu manangar halani sirsir hasoman ni mamak i gareja
mangurupi ham, mak.
Inang : Aih bapa, idingat ho do hape tonah ni bapamondi tene. Tarima
kasih ma bani Tuhan anggo sonai, bapa. Tonggohon anjaha ajar-ajari ma
botoumon da bapa, ase hulobeian ni ari on lambin pangkei- pangkei ia
bani sisonon. Borat tumang do sebelumni pangahap ni mamak. Hape
sonari domma hampung huahapkon. Tarima kasih ma bani Tuhan.
Anak Dalahi : Ea mak. Ham pe sehat-sehat da mak. Patugah ham ma hubangku
anggo adong sipingkirhononmu, mak. Anggo lang tarbere hanami
duitnami, panorangnami pe boi do ibere hanami mak. Anggo lang tarbere
hanami panorangnami, gogoh pakon tonggonami do tong ibere hanami
hubamu, mak. Ai do na iajarhon nasiam hubannami kan mak? Lang iajari
nasiam do hanami ase marsiurupan saboi ni gogohta?
Inang : Ea bapa. Sahali nari tarima kasih ma bam da bapa. Sehat-sehat ho ijai
da bapa.
Anak Dalahi : Ea mak. Horas ma da, mak.

Hatorangan:
Drama on boi ikembangkon domu hubani situasi pakon haporluan i Kurianta bei. Tujuan
ni drama on aima laho patugahkon paboa salah sada makna ni Natal banta aima marsibere-
bere. Halani Naibata pe domma mamberehkon Anak-Ni Na Sasada in banta, aima Jesus
Kristus, na partubuh-Ni ipestahon hita bani panorang on. Marhitei na marsibere-bere ai
do taridah na marsitungkolan, marsipatoguhan, ampa marsipardiateian hita samah hita.