BABAK I

Ayah : Ondeh… Yo lah malang nasib Ambo pagi ko. Biasonyo pagi-pagi ko, kopi lah
talatak di ateh meja, tapi… sampai kini alun juo Nampak nyo lai. Kama lah Saleha tu?
Rancak Ambo panggia inyo lai. Saleha…..Saleha…..oi Leha…
Ibu : Iyo Da, maaf Da. Apo garan nan tajadi? Mangko uda panggia Leha ko. Buliah nak
sanang dalam hati, Sajuak di dalam kiro-kiro.
Ayah : Mangko Uda memanggia Leha.Karano kopi indak ado diateh meja,biasonyo pagi-
pagi bana lah ta ending kopi dari Leha.
Ibu : Kok itu nan Uda katokan maaf kan Leha nan sakali mangko,bukannyo Leha sangajo
kan,tapi karano leha talambek jago.
Ayah : Apo kah garan nan tajadi? Mangko Leha talambek jago.
Ibu : Janiah aia nyo sungai tanang sajuak mandi di hari lah patang pulang nyo hari lah
kalam. Hati Leha indak kamaraso tanang manunggu anak bujang pulang lah jam 2
tangah malam.
Ibu : Bajalan kaki pai ka Bonjo kiro nyo hari alah kalam tibo di pasa ganggo hilia Denai
tanyo anak bujang kito, manga pulang tangah malam kironyo sato balap lia.
Ayah : Kalau inyo jago beko tolong Leha aja anak bujang kito tu. Supayo inyo indak
mangulang karajo ko, kini baitu lah di Leha dek hari batambah tinggi juo. Uda nak pai
bakarajo lai batanam padi di sawah tapi, beko jam 10 tinggi hari tolong Leha antaan
nasi jo kopi.
Ibu : Kok itu nan Uda mintak jo sanang hati Leha karajokan!

BABAK II
Leha sama Udin lagi berada disawah, tiba-tiba anaknya datang meminta uang.
Ayah : Oi…Nawan, anak kanduang…..manga Nawan pai kamari ado apo nan ka
disampaikan? Padi kuniang di tangah sawah banyak di makan buruang bondo, Ayah jo
Mandeh manyuruah sakola supayo manjadi anak baguno.
Anak : Makasuik Nawan datang kamari minta pitih ka ayah jo amak, agiah Den pitih 500
ribu untuak mambali kandar pot resing.
Ibu : Nawan anak kanduang amak danga di Nawan elok-elok sungguah lamak gulai ikan
tanak nasi dalam dandang, lai dapek juo kito makan walau dapek pagi, habihnyo
patang.
Anak : Oi…. Amak jo Ayah kini dima dapek nyo ndak tau Nawan lah, nan jaleh beko
malam lah ado pitih tu 500 ribu pambali kandar pot resing jo taruahan balap lia.
Ayah : Ondeh….. yo sabana santiang baang Nawan, lah ayah balian ang onda BA nyo ba
bukak, kaco spionnyo batanggaan, kini kandar pot nyo batuka lo samo kandar pot
resing, yo…. manyalahan aturan lalu lintas bana karajo ang ko. Ka ang karajoan lo
 balap lia tangah malam beko. Yo….. ndak ta kao di ayah karajo ang ko lah Nawan.
Sekola pamaleh lo, masyarakat taganggu pulo. Apo lai di tangkok polisi lalu lintas,
jan manyusahan urang tuo jo lai karajo tu.
Anak : Ayah jo Amak jan banyak ceramah kini zaman anak gaul, pitih yang ka di sadioan
500 ribu.
Ayah : Anak bincacak anak bincacau anak singiang ngiang rimbo,sarupo anak indak bapang
ajaran dari ketek Den gadang kan lah gadang malawan pulo. Kini baitu malah di
waang baayah baamak ka urang lain, barangkek kini juo waang dari siko.

BABAK III
Ugal Ugalan
Kawan : Lah panek Denai mancari Nawan masuak kampuang kalua kampuang, kironyo
Nawan disiko.
Nawan : Dari pado indak ado karajo jan mambuek kapalo pusiang, naiak lah kawan ka ateh
onda ko pai main kito ka Lubuak Sikapiang.
Kawan : Sangka buruang dari pimpiang untuak pamikek buruang bondo, ragu Denai pai ka
Lubuak Sikapiang, ba helem indak ba SIM tido.
Nawan : Urang pan cameh mati anyuik urang pagamang mati jatuah, Nan itu usah waang
sabuik nan mambuek hati jadi rusuah.
Kawan : Kok baitu kato Nawan marilah kito pai barangkek.
(Suasana lawak di atas onda)
Polisi : (mengadakan Razia lalu men stop onda Nawan) Mano SIM kalian?
Nawan : Indak ado lah pak.
Polisi : Mano STNK onda kalian?
Nawan : Indak ado juo lah pak…tingga di rumah pak…
Polisi : Kalian lah malangga tata tertib peraturan lalu lintas, kalian harus di tilang…!
Nawan : Ampun pak….. jan di tilang kami lai pak!…..kami jauah pak pitih kami lah habih
pulo pak…!.
Polisi : Kalian alah malangga peraturan lalu lintas…… Partamo, indak pakai helem. Kaduo,
indak punyo SIM. Katigo, indak pakai kaco spion. Kaampek, lah manarobos lampu
merah.
Nawan : Ampun pak… kami memang salah pak….! Indak kami buek lai pak…! Jan tangkok
kami pak…!
Polisi : Kini ko kalian pai ka kantua polisi dulu.
Nawan : Jadih pak…
BABAK IV
Guru : Assalamu’alaikum…..
Ayah/ibu: Waalaikumussalam..,silahkan masuak buk…!
Guru : Perkenalkan Bapak jo Ibuk…, Ambo banamo Susi Susanti guru BK di SMA Nagari
1 Bonjol, mukasuik ambo datang kamari kunjuangan karumah siswa ambo. Tanam
siriah di halaman tanam tabu disabalah kapuak diambiak urang tiok hari…, siswa
ambo banamo Gunawan tiok baraja matonyo mangantuak tiok tabanta pai permisi.
Ikan banyak di Lubuak Bunta pai kasinan naiak oto, masuak BK tiok sabanta tugas jo
UH indak sato. Jikok tuan pai kapasa jan lupo bali gado – gado Nawan ba onda pai
sakola ba helem indak ba BA tido.
Ibu : Nawan kanduang anak amak jo ayah, tugas UH indak tuntas , karajo Nawan alah
salah… malangga undang-undang lalu lintas.
Guru : Batua kato urang tuo Nawan tu. Bungo malati tumbuah di taman baun nyo harum
sampai sanjo…..tampek nyo di bonjo dakek Equator, patang diundang POLRES
Pasaman untuak datang ka SMA Nagari 1 Bonjol guno sosialisasi kandaraan ba motor.
Nawan : Ampun jo maaf ka amak jo ayah sarato ibuk Susi Susanti, kini Nawan mangaku
salah lah insaf bana dari hati…..!
Ayah : Mandanga kato dari Nawan sajuak rasonyo dalam hati sanang di dalam kiro – kiro,
Makannasi basamo samo panggang lauak pakai santan dirumah makan urang piaman
di bonjo dakek Equator, Iyo sabana hebat SMA Nagari 1 Bonjol dibawah pimpinan
Bapak Mardanis Darasan di undang nyo POLRES Pasaman maagiah sosialisasi
tantang undang – undang kandaraan ba motor.
Pak Mardanis Darasan Hebat, Pak Mardanis Darasan Mantap, Pak Mardanis Darasan
Oke.
Guru : Tunggu sabanta! Karano SMA Nagari 1 Bonjol Hebat…Mantap…Oke…, dibawah
pimpinan pak Mardanis Darasan, cubo kito caliak pulo kesenian salayang dulu.
Ibu : Apo kesenian nyo tu?
Guru : Tari Piriang mainjak kaco. Sudah itu baru wak tutuik carito wak ko…..
Selamat Menyaksikan!