PASAMBAHAN DI HALAMAN

Sapihak dikami ko nan datang, nan sararak langkah dari rumah, sarayun lenggang
dinan golong, menuju ranah kampuang nangko, kampuang nan indah katinggian,
dipaga bukik bakuliliang, disalo gunuang tungku tigo, tigo nan cukuik sajarangan,
Batang karambie langgayuran, rumpuiknyo gatie gatilan, sawah bapiriang dinan
data, ladang bapetak dinan lereang, cando dusun batumpak tumpak, Maijau rono
parak mudo, jaguang maupiah bilang tangkai, bak timah bungo ladonyo, Buah
taruang ayun ayunan, salo manyalo kacang panjang, antimun mangarang buah.
Mangko diiliakan jalan nan panjang, jalan rayo titian batu, labuah gadang cindai
tajelo.

labuah gadang cindai tajelo kasieknyo mipih bak dipipieh, pasienyo aluih bak di
tintin, batu bulek susun barsusun,

paga iduik baliak batimba, pudiang ameh sabalah lua, pudiang itam sabalah
dalam,njiluang babatang-batang. mambelok lalu ka hilaman,

mambelok lalu ka hilaman, laman Inan indak panjang amek, malayah bungo
saliguri, marumbai bungo tali-tali, bungo tinjau sapanjangkauan, tabiklah rono
randah-randah. Mangko babunyilah bunyi-bunyian, maringiah sibalang tandai,
bakukuak kinantan cuci, marentak balam bungo kawa, talengong ka dalam parak,
cubadak lalaian baruak, kamuniang sandaran alu limau manih pautan kudo.
Tabek nan bunta bakiambang, aie janiah ikannyo jinak, kulari babondong-
bondong, bada sapek basikua-sikua, bada puyu baradai ameh, gariang malinteh-
linteh juo.

Salorong dibadan diri kami nan bak samisa buruang bondo, tabang sakawan di
udaro, babega di rimbo nan satumpak, maraok dikayu rimbun daun, tatagun
maliek rantiang, lai ko suko diinggoki.
Kinari bukan kinari sajo,sikajuik tumbuah jo hilalang, kamari bukan kamari sajo,
gadang mukasuik nan ba jalang. Badie japun di bangkahulu, panembak kapa di
muaro, bari ampun ambo dipangulu, sambuiklah salam dek juaro.

Jawab.
Waalaikum salam Wr wb
Lah panek kami dek babansi, bansi tasanda di pamatang, lak panek kami dek
mananti, baa nyo Sutan talambek datang. Dimalam samalam nangko, antah bulan
ko nan tarang, antah bintang nan mancayo, gadang hati indak tabado,kok nan
ditunggu alah datang,nan dijapuik alah tabao. Ramo-ramo di padalaman, patah
sayok tabang baranti, manukiak ka dalam ladang, usah lamo sutan di laman,
ambiak cibuak basuahlah kaki, naiak ka ateh rumah gadang. Kato nan indak
mananti jawab, gayuang nan usah Sutan sambuik, jo karajo sajo Sutan iriang kan.

Assalamualaikum Wr Wb
Sambah sujuik dengan simpuah, sabarek bungka nan piawai, naraco laweh main
daun, indak basibak jo basisiah, bukan bainggo jo babateh, sambah kapado Niniak
Mamak Nan Gadang Basa Batuah, nan bapucuak sabana bulek, nan baurek sabana
tunggang, dianjuang tinggi diamba gadang, sandi andiko dalam kampuang,
tampuak jo tangkai di nagari.
Nan bak umpamo kayu gadang ditangah koto baurek limbago matan, badahan
cupak jo gantang, barantiang barih balabeh, babungo rimbun dek adiak, babuah
kato nan bana.
buliah baselo di ureknyo, dapek basanda di batangnyo, gantungan cupak nan
duo, partamo cupak usali, kaduo cupak buatan. Sampai kapado Imam Katik, Bila
Maulana jo Tuangku, tahu dihalal dengan haram, sarato sah dengan bata, suluah
bendang adaik limbago.
Hulu Balang jo Ampang Limo jo Manti pagawai adat, parik dalam pagaran kokoh,
cadiaknyo jo tahu pandai, nan arif jo bijaksano, tahu jo angin nan baseru, tahu
diombak nan basabuang,sarato dahan nan kama impok,Ataupun rantiang nan
kamancucuak.
tahu diujuang kato sampai, balun bakilek lah bakalam, bulanlah sangkap tigo
puluah, takilek ikan dalam aie, ikan takilek jalo tibo, lah tantu jantan batinonyo.
Sarato nan mudo pambimbiang dunie, nan capek kaki ringan tangan, capek kaki
indak panaruang, capek tangan indak pamacah, aso tarantang duo sudah, hatinyo
suci bamuko janiah, tahu dimalu dengan sopan, sarato raso jo pareso.
Taruih pulo ka Bundo Kanduang, limpapeh rumah nan gadang, sumarak didalam
kampuang,hiasan dalam nagari, kok iduik tampaik banaza, kok mati tampaik
baniaik, kaunduang-unduang ka madinah, kapayuang panji ka sarugo, amban
puruak aluang bunian, urang nan duduak jo sukatan.
Kalilawa di pulau rimbang, anak ruso mati tadabiah, kok gawa mintak ditimbang,
kok doso ampun nan labiah. Bukan tambilang mangulampai, tambilang panggali
pakuburan, bukan mambilang tando pandai, mambilang untuak dipasambahkan.
Dipanggang-panggang digatok, dikirai kirai di baka,tatangguak ikan
gulamo.dibilang bilang diatok kirai kirai di papa, dikambang sitambo lamo.
Takalo maso daulunyo, samusim maso saisuak, katiko langik basintak turun, bumi
basentak naiak, lauik sacampak jalo, tanah darek alun lai leba, nan timbua
gunuang marapi.
Lorong dek niniak muyang kito, asa usua kalau dikaji di dalam sitambo lamo,
sapieh balahan tigo jurai, sajurai kabanda cino, sajurai kabanuruhum, sajurai
kapulau ameh nangko.
Pihak di Sutan Maharajo Dirajo taniaik di dalam hati, tacinto didalam kiro-kiro,
balaie inyo maso itu, di ateh dandang nan sabuah, cukuik jo cati bilang pandai,
dek lamo dandang balaie mak di dalam lauik Baharullah, tampaklah api takijok-
kijok, gunuang suatu maso itu, di ateh puncak langgapuri, banamo Gunuang
Marapi.
Sinan sarangkak nan badangkang, sarato buayo putiah daguak, dibatu ampa
putiah, dibukik patah patigo, banamo bukik siguntang-guntang.
Dimano titiak palito, dibaliak telong nan batali, dari mano turun niniak kito, iyo di
puncak Gunuang Marapi. Basentak turun ka bawah, lah tibo di Guguak Ampang,
sinan langgundi nan baselo, sinan pulau bataratak, sabalun bakorong dengan
kampuang, sabalun bakoto jo nagari, maso badeta-deta upiah, maso bacawan
panarahan.
Dek lamo alam baputa, urang batambah kambang juo, kamanakan manjadi
banyak. Di pabuek sawah jo ladang, dibuek adaik dikarang undang, disusun
tangkai ciek-ciek, dipaku katiang panjang, makanan urang tigo luak.
Manolah luak nan tigo nan tuo luak tanah data, nan tangah luak agam, nan
bungsu luak limo puluah. Lalu karantau jo pasisia, alam surambi suangai pagu.
manuruik barih balabeh adiak, nan salilik gunuang marapi, saedaran gunuang
pasaman, sajajaran sago jo singgalang, saputaran talang jo karinci, dari sirangkak
nan badangkang,hinggo buayo putiah daguak sampai kapintu rajo hilia durian
ditakuak rajo ,sipisiak pisau anyuik ,sialang balantak basi ,hinggo aia babaliak
mudiak ,sampai kaombak nan badabua, sailiran batang sikilang hinggo lauik nan
sadidiah ,rao jo mapat tunggua sarato gunuang mahalintang, pasisie banda
sapuluah, hinggo taratak aie hitam, sampai katanjuang samalidu, pucuak jambi
sambilan lurah.
jikok dikambang saleba alam,jiko dibalun sabalun kuku ,tantang nangko basudah
kalam tambo sakiro itu dahulu.
Tungkek amaik galah dirajo sitaba dibaliak pakan
kok salah tobaik lah ambo, kok bana samo diamalkan. Ayo ma Sutan parapatiah!

ambo
sambah tibo pado Sutan. Pihak dikami sipangkalan, ditampaik hujan nan barasa,
paneh nan papuhun, nan manyusun maatokkan pakarjaan di rumah nangko.
Sakironyo ado kato sapatah kabasabuik, rundiang sabuah nan katangah. Iyo kan
tarabik dibadan diri ambo. sungguahpun tarabik dibadan diri ambo bukanlah
ceceh karano aka, bukan nyo gendeng karano kain, sorong lompatan
digalanggang, tapi ambo kok pai lai jo rundingan, nan tingga lai jo mupakaik.
Apolah nan manjadi buah parsambahan nan kabatibokan ka bakeh Sutan, adok
kabadan diri kami sipangkalan, dek sarik bakisa dinan sampik, suka batinggang
dinan tidak, mangko satantang panantian kami disiko, mungkin basuo sumbang jo
salah, sasek jo gawa, kok tibo indak tapabasokan, datang nan indak ta muliekan,
kok indak basuo tampan jo taratik, lelo jo karenah, nan patuik talatak diulu
tailiekan, ipa bisan kok taparampiangkan, maaf dimintak banyak- banyak,
karelaan sutan gadang gadang sakian sambah pado Sutan.

JAWAB

a iyo ma nyo sutan bandaro

lai sutan

sambah tibo pado sutan

manitahlah
Walaupun ka Sutan surang tampek ambo maantakan sambah, tapi nan manjadi
ujuik mukasuik ambo bana iyolah kapado angku-angku niniak mamak, nan gadang
basa batuah, urek tunggang pucuak nan bulek dinagari, dahan rampak daun nan
rimbun jo pusako, putiak labek buah nan ranun, makanan urang sa alam nyo,
langkok sarato imam katik, palito nan indak kunjuang padam, suluah nyalo
didunia bendangnyo sampai ka akhirat,nan duduaknyo bacamin kitab, tagaknyo
rintang jo pitua. Taruih kapado cadiak pandai urang nan arif candokio, pandai ma
agak maagiahkan, kok runciang indak mancucuak, tajamnyo indak malukoi, pasak
kungkuang kunci nan taguah, sumarak koto jo nagari, mangko nak salangkok
ganok nyolah salam sambah ambo kapado silang nan bapangka, karajo nan
bajunjuang, nan maarak nan maijo, nan mananai malatakkan pakarajaan, diateh
rumah gadang mangko, ujuang pasambahan kapado Sutan bandaro.
Alah nan manjadi buah pasambahan ambo, mandanga imbauan Sutan cako,
gumanta sagalo batang tubuah, bakipeh paluah kadado, bakaja darah kamuko,
apolah sabab dek baitu, lahiak kabadan ambo sutan, ibaraik biduak kaciak nan
jolong sudah, kalangkapan balun lai cukuik, balaie ditapi tapi katangah takuik
digalombang kapulau garik dek buayo, lakek pituah Sutan juo,
lakek pituah Sutan juo ,baburu kapadang data, dapeklah ruso balang kaki, dialau
katangah padang, Baguru kapalang aja, baru baraja baguru guru mati, disilau
surek, sureklah hilang, baguncang bumi jolangik, barombak lauik sailan,
bakumpua karang katapi, kok karam ambo tantang itu sutan.

Akan tetapi Sasudah ditimbang maana kato, disilau maana ragi, nyatolah nan kato
wajib dijawab, nan gayuang wajib disambuik,

baa tantang dari pado itu adok kabadan diri ambo kiniko, tapek bak mamangan
urang juo, saibaraik urang pai menyumpik komah Sutan, dicari kutiko baiak,
dipiliah maso nan elok. Mako diambiaklah galah salapan, lalu bajalan masuak
hutan, lah tibo dirimbo nan satumpak, dipandang hilie jo mudiak, diliek kiri jo
kanan, tampaklah siburuang nuri, hingok dikayu nan sabatang, sadang mangirai-
ngirai sayok, sadang malapeh-lapeh payah, lalu diambiak sumpitan gadang, sarato
damak nan baipuah, disumpik buruang ateh dahan, satibo damak diateh, bagaluik
jo bungo kambang, babenda jo buah ranun, babega-bega jo awan, mangko
samantaro buruang nak katangan, diwalak kan kato sakutiko, mananti Sutan
samantaro laiko dalam bana Sutan?

JAWAB SIPANGKA
Yo lah sampai st parpatiah
Sakiro alah
Sapanjang buah kabanaran sutan tadi lah susunan adaik jo limbago, kalau adat
ado batangkai, pusako ado batampuak, kok undang ado talinyo, mangabek
undang jo sakato, mangabek kato jo mupakaik, itulah bana ka dituruik, baa nan
kini tatabik niak dek Sutan, tumbuah pangana dalam hati, nan mambao kato jo
baiyo, mancari bana nan sabuah diadaik itu basuruah, kandak undang nan
baamalkan, mujua batimpo jo nan elok, tuah
lah lakek jo nan mulie, usahlah ragu tantang itu, kami mananti baritonyo.sakian
pambari dari ambo
Alhamdulillah mamakai kan ambo

mak sutan mudo

lai
dek awak kato nan sapatah
salam tajelo ka nan rapek kato tatabua di nan banyak jo parsambahan mamak
ambo jalang
ujuik nyo sambah nan ta timpo pado mamak
nyato tawalak di ukuran tabayang barih jo balabeh bana ba andai kato bida
dek curiang barih dahulu,di awak kato nan sapatah .,sambah tibo di alek jamu
nan datang dari pihak si pangka ba tu nyo lai kini karano sasuai juo bak undang
kato mamak ,babiduak kan iyo bak nahkodoh mak bajalan ba nan tuo mangko
tarado sambah jo titah dari sipangka kapado alek ambo tatiangkan ka nan tuo
kato bajawab gayuang basambuaik ka dari mamak tarabik nyo..sagitu sambah
kapado mamak st mudo

alah sampai st parpatiah

arti nyo sambah jo titah stn parpatiah sajo di amba gadang di anjuang tinggi arti
nyo ndk ka baulang bana panitahan st parpapatiah diulang itu juo nan ka basabuik
ko bana pai jo st parpatiah di bao kato jo mufakat manjapuik an nan kabari nyo
manti st parpatiah.
inyiak rajo ameh arti nyo sabalun pasambahan ambo tibo kan adat barundiang jo
inyiak bari maaf ambo nyiak
arti nyo sambah jo titah nan ka ambo tibokan kabakeh inyiak nan bak kini nangko
lah tibo ulak di karajo nan bapokok disilang nan bapangka nan manjadi ulak di
karajo nan bapokok silang nan bapangka tantangan rela jo maaf kok lai lah
duduak ko nan indak pado tampaik nyo taduduak an iyo bana karajo nan bapokok
silang nan ba pangka mintakan rela jo maaf kapado ninik jo mamak sarato jo
pangulu nan pai sabondong pulang satampuah taranta jo panitahan bakeh ambo
ndk bajawab nan kabari nyo kapado pokok silang nan bapangka di adat kato nan
ba iyo duduak jalan bamuah itu nan ka ambo japuik an kabakeh inyiak

lah sampai buah panitahan sutan mudo

ma sutan mudo
lai
arti nyo sambah jo titah di sutan mudo sajo diamba gadang di anjuang tinggi nan
manjadi panitahan sutan mudo di maso nan cako tankato lah tibo pulo ulak dari
krajo nan ba pokok si lang nan bapangka a ko lah nan manjadi ulak dek karajo nan
bapokok silang nan bapangka namo nyo tu kini tantangan ka duduak inyiak jo
mamak sarato pangulu sagalo adang adok di tangah rumah kok duduak ndk pado
tampaik nyo iyo bana karajo nan bapokok silang nan bapangka minta rela jo maaf
kapdo inyiak jo mamak sarato jo guru sarato jo adang adok tangah rumah kok
ado duduak ndk pado tampaik nyo iyo bana karajo nan bapokok silang nan
bapangka minta rela jo maaf kapado inyiak jo mamak sarato guru sarato nan
hadang adok tangah ruamah.satantangan panitahan kapado tuan mudo lah
bajawab nan kabarinyo kapado karajo nan bapokok silang nan bapangka iko nan
ambo japuikan ka inyiak rajo ameh kan baitu bana lalu nyo st mudo
iyo bana nyiak
dek lai itu panitahan tibo dari karajo nan bapokok silang nan bapangka namo nyo
tu kini tibo dibadan diri ambo taantak rueh kabuku tasanda alu ka dindiang
sabanyak parmintaan karajo nan bapokok silang nan bapangka namo nyo kini lah
dalam adat sungguah pun dalam adat namo nyo tu kini kok lai katukuak tambah
nyo bana bantai sampai ka st mudo
lah sampai nyiak
alah
arti nyo sambah jo titah di inyiak sajo di ambang gadang di anjuang tinggi samaso
cako taranta di ambo panitahan ka bakeh inyiak baa tibo nyo di inyiak kabuaah
bari nyo di inyiak kandak babari pintak balaku arti nyo bari relah jo maaf di inyiak
jo mamak sarato guru si alek karapatan tangah tumah ..nan bak lampisan dari
pado itu kok ado katuak tambah nyo bana di sarahkan kabakeh st mido
kan iko bana kalaluan nyo nyiak
iyolah
dek hujan ba puun paneh barasa ambo anta ka asa nyo nyiak...
lah sampai dek st mudo..
arti nyo sambah manyambah pado Allah kito kumbalikan nan manjadi panitahan
st mudo samaso cako takato ado pulo nan manuruik pasa biaso dek hujan nan
bapuhun di paneh nan barasa itu dianta ka asa nyo kan mantun panitahn stn
mudo
ka lai bana sapai paham sa ukua anta ka asa nyo st mudo ..
ambo anta ka sa nyo nyiak
ancak

st parpatiah
manitahlah
arti nyo sambah jo titah di nan cako sajo di amba gadang di anjuang tinggi samaso
cako taranta dek stn parpatiahn panitahan bakeh ambo baa tibo nyo di ambo lah
ambo bao bakato baiyo bajalan ba muah pado niniak jo mamak sarato jo guru nan
pai sabondong pulang satampuah suruik maanta si marapulai dapek lah kato nan
sa iyo bulatan kato samufakat sabanyak parmintaan karajo nan bapokok silang
nan bapangka kok kandak babari pinta balakukan arti nyo babari rela jo maaf dek
niniak jo mamak sarato jo guru karapatan tangah rumah limbak lampisan dari
pado nantun kok lai katukuak tambah nyo bana bsarahan ka st parpaatiah ..
sakian bana sampai bakeh ambo
lah sampai dek st mudo
alah
rupo nyo dek mak st mudo kok kato ambo nan satitiak lah balauik kok nan sakapa
lah bagunuangkan tu mah lah mamak baok kato ba iyo bajalan bamolah alah
baduduak kan di urek nyo alah basandakan di batang nyo ,aratinyo bana lah ba
elok kato mufakat sampai ka pado ninik jo mamak baa nan sabagai anta nyo pado
ambo kini ko santangan maaf ba maaf rupo nyo kandak lai buliah pintak lai
balakukan dek kito pihak si alek kn ko ,kamudian dari pado itu kok kato manjawab
gayuang manyambuik ka di ambo tarabik nyo kan baitu bana mak st mudo

ndk do lai diambo kn ko kok ilmu yo ba amalkan kok pituah ba pakaikan tapi
samntang pun baitu luluih basalami hanyuik bapinteh ilang dicari ko mak...
dalam adat
tantang parundiangan kito
kito bateh

Ayoma Sutan Bandaro !

batibokan juo sambah pada Sutan surang,
dek tinggi batang lamo karareh dek panjang jalan lambek kasampai, agak
talalai ambo mambaliakan kato karilah juo pado Sutan.
Tu mah lah sutan caliak sutan pandangi
Taradok sambah jo titah nan talewa kapado kami sialek, nan pai
sabondong pulang satampuah, alah alah dikatangah dikatapikan, baiyo iyo
kami jo mamak, batido-tido jo samo gadang, mangko buleklah jantuang di
kalupak, bulek kato jo mupakaik, ruponyo nan kamanjadi polongan asok
sambungan lidah, iyo tatapek di badan diri ambo .aratinyo bana bana tibo
dikato nan kamanjawab, gayuang kamanyambuaik, atau sambah ka
baulak-an titah kabalekok-an kato sapatah nak basabuik, rundiang sabuah
nak katangah iyo ka dari ambo ka tabiknyo.sungguah dari ambo tarabaik
nyo,nan bak ibaraik rang mengaji mah sutan, nyampang kok indak
tabacokan jo ayatnyo, indak kanai tajuid jo tilawah, nan panjangnyo
tasingkekkan, tibo nan singkek tapanjangkan, tasadiak tabao lalu, lafaz
batuka jo maana iyo batolong diSutan manyapo maulangkan, jan badoso
kito sabalik Sutan.
Assalamu'alaikum, palupuah batang malapari, pucuak manimpo aka
jumbai, dibao nakrang ka batipuah, sungguahpun ambo tagak bardiri,
bukanko ambo cadiak pandai,ujuik nyo duduak basimpuah,kasah ambun
kasah biludu batanti bajaik tapi baturap jo banang ameh lah taampai di
sandaran,mintak ampun ambo jo pengulu nan salirik duduak di tapi
saedaran madok katangah jo sambah sajo dimulikan pisau sirauik ulu
sonsang saruang nyo tareh kayu jati ulu nyo pangka kayu kamaik di
ambiak paracik buah.takuik ganta ambo mambilang pengulu banyak nan
sati tuangku banyak nan kiramaik rang gadang banyak nan batuah .
Mulo nyo jalo diserak kan kanai kulari nan bapalun mulo nyo kato di
sambahkan manyusun jari minta ampun.
Mangko maminta ampunlah ambo kapado pambilangan pengulu malin
manti jo dubalang di ateh jinih ampek martabat nan mampunyoi kabasaran
dalam kampuang jo nigari.ama bakdu adopun kamudian dari pado itu
mangko mamuji manyanjuang mamuhun kan sambahlah ambo kabakeh
silang nan bapangka karajo nan bapokok.sialah urang nan maatok
mahampin kan pakarjaan di ateh rumah nagko iyolah urang cakapan
biopari.kajirek tabang ramo ramo hinggok mancangkam lidi saga kadabuak
lalu ka tanah.kitek indak di sabuik namo gadang indak di sanjuang gala
sambah jatuah katangah tangah .
Kamanolah galah di rambah kan kasamak dalam baluka,kanailah balam
lalu mati.kamano sambah di sambahkan iyo kapihak sipangka rela jo maaf
ma iriangi.
A yo ma nyo sutan bandaro
Di malam samalam nangko hari elok kutiko baiak ,ombak tanang angin
salasai hujan taduah kabuki pun tarang.kinilah marawa nan baturiah kinilah
dipadan nan ba ukua.tibo dijanji di taguahi ikara dimuliakan.mangko datang
lah kami dek di panggia.alah tibo sapanjang adat tarapak dilaman rumah
gadang ,rumah gadang sambilan ruang nan salanja kudo balari silatak
kuciang malompek salayang tubin malayok .sandi banamo sandi adat
tunggak banamo kasandaran pancaung turang alang katabang cucuran
labah ka inggok,gonjong nyo rabuang mambacuik timah mamutiah di ateh
nyo paran jamba si ula ngiang batatah bamego mego ukia banamo batang
padi aka cino ragam tak sudah .rauik jadi tukang tabunuah tak dapek
maniru lai.lantai data bak lantai kulik dindiang licin bak dindiang kaco ka
ujuang surambi papek katagah rajo babandiang rangkiang tigo sajaja,di
tagah si bayau bayau balanjuang Panjang musim.di tapi sitinjau lauik
panyapo dagang kapasah di kida stan kalapa tampek batenggang urang
kampuang.dek urang pihak disiko,urang babudi elok baso dalam babudi
baradat pulo mangko di songsongkan lah carano basa tinggakan medan
nan bapaneh manuju medan nan balinduang. Dibasuah kaki jo cibuak
gadang cibuak nyo rajo manonggok salalai tasiram aia sajuak lah sampai
ka ulu hati.kan iyo dek elok tamu dibaok naiak mulia alek dibaok duduak.ko
mah lah tarapak ditangah rumah.
Lah tarapak di tangah rumah , ditanai lapiak ampa putiah tilam basusun
bakuliliang,tika nyo pandan manjalito ,dikayam anak rando gadih.dipakai
sakali balun kini lah baru tabantang nyo.
Kapueh mato mamandang langgaman adat parhiasan ,talabuah tirai langik
langik,tirai suto Panjang 9,tunggak bapaluk kain kuniang,kasumbo kasap
ka amasan.mamandang lalu kapa serek .cando camin balampih
lampih ,takanak lian jo palito,tarang lah malam bak di basuah kaja bakaja
cahayo nyo bendang nan bukan alang alang.larak lah kato di
simpani,disimpan jo parsambahan si upiak si raminah,barumah di ampek
angkek dahulu kato basitinah kudian kato basicapek capek juo karibaan
sutan ma nyo dt bandaro?
Ambo
Adopun kamudian dari pado itu nak di japuik kato di pangka di sauak
rundiang ka ulu yaitu satantangan maaf ba maaf apolah nan manjadi
parsambahan sutan tadi kok tibo indak tapabasokan duduak nan indak di
tampek nyo di tampek alun dimakan patuik,patuik di hulu ta iliakan ipa
bisan taparampiangkan ereng jo gendeang ndk tapakai tampan karenah
ndk tabao rela jo maaf ka mandatang kan baitu lalu nyo panitahan sutan?
Sabana nyo
Alah kami tukiak kan pandangan dakek dilayangkan pandangan jauah di
ereangkan pandangan ka rusuak lah tibo bana dimakan patuik lah nyato
manuruik alua.kok putiah indak ba bacak.kok hitam indak
bakurangi .jangankan cacek nan ka Nampak puji sanjuangan
batibokan .kalau dituruik jo pidoman tando dibaliak di karisai batamo adok
jo bidaran nan bak mamang di nan pandai ,barakik biduak talenggang
karucuik jo saliguri dalam rumik sutan batengang tando bamain aka
budi .pun baa to hanyo lai ,salampih nan dari pado itu adat dunia kan baleh
maambaleh .pihak dikami ko nan mandatang nan duduak di tanai lantai
nan salingka barih di tapi sabanja barih di tangah dek bacampua tuo jo
mudo nan tuo kok nyo takilaf nan mudo kok nyo tasasek mungkin kok
basuo slah cotok malantiangkan salah awa mahampehkan salah muluik
ma utangkan takirai langkah kamasuak takirah lenggang kalua tasingik
budi di nan rami mangko nyampang basuo nan ba itu sutan mambayia
kami panuah panuah mamintak kurang banyak banyak
Dilahia kami mohon maaf di batin mohon ampun.bunyi nak samo kami
danga rupo nak kami caliak balabuah kan dek sutan jo bicaro rundiang
dikarek jo buku nyo sakin dulu dari ambo
Lah sampai dek sutan parpatiah
Lah sampai
Di ambo singkek sajo ka jawabnyo \
Dek maaf gadang faedah dek rila gadang manfaat barilah rilah kito di siko
Kito luluihkan ka tanah lakang di hanyuik kan ka lawuik lapeh nan batin
pulangkan sajo pado Allah.
Alhamdulillah
St bandaro
Nak nyo tua tua salahan di kisiak kisiak sapalapah
Baa kok kito tuwuahkan tantang maaf ba maaf
Kito tuwuuahkan