PASAMBAHAN KA PULANG

Perumpamaan :
Tuan Mudo sebagai Si Pangka (Tuan Rumah)
Sutan Basa sebagai Si Alek (Tamu)
===================================

SI ALEK : *(Tuan Mudo).!

SI PANGKA : Lai, *(Sutan Basa)
SI ALEK : Buah parundiangan ditibokan ka bakeh *(sutan)
SI PANGKA : Laluanlah *(sutan).
SI ALEK : Sambah manyambah dipulangkan kapado Allah
Salawaik jo salam dipuhunkan ka bakeh nabi,
Buah parundiangan ditibokan ka bakeh *(tuan).
SI PANGKA : Sabuik *(sutan)
SI ALEK : Aa yolah nan ka manjadi buah parundiangan di ambo ka bakeh *(tuan)
Manuruik alua jo papatah, Sabab basiang di nan tumbuah
Jaleh manimbang di nan ado, Tumbuah sarupo iko kini

Diajak ajak malangkah, Dicubo cubo mamandang,

Taserek pandang ka sanan, Nyato ka ruang tangah rumah
Tagah dek adaik bainggiran, Pusako nan balukih
Basuo kato bidaran, Tasasak puntuiang ka hulu, Ka bawah kumpalan tali
Asa samulo kato nan daulu, Tigo limbago nan tarjadi

Suatu garak jo garik, Pancaliak ereang jo gendeang

Pamandang tuggang taruan, Pamenan mato di nan rami
Kaduo, sambah manyambah
Sambah manyambah dalam adaik , Tali batali undang undang
Katigo, baso jo basi. Iyolah siriah nan jo pinang

Lah asah dimandang mato, Dek lazat pangana diri,

Kasasi nyo banan nan tumbuah
Putiah bak cand kapeh dicabiak, Janiah bak awan tagantuang
Bak ambun taserak pagi, Bak paneh tasinga patang

Tan kato iyo baitu, Cupak adaik labuhan kato, Naraco lautan budi
Ulasan suri nan tagantuang, Isinyo gantang nan tatagak,
Suri tuladan sampai kini
Dek adaik babungo kambang, Pusako babuah ranun

1
 Asa dek buah kato kami,
Lamo duduak panek kok datang, Lamo tagak paniang kok tibo
Nak maurak selo nan padek, Nak maayun langkah nan gontai
Manuju tampek masiang masing
Supayo nak dilapeh jo muluik nan manih, jo ati nan suci
Sakian buah parundiangan dianta
Dianta sampai ka bakeh *(tuan)
SI PANGKA : Sampai *(sutan)
SI ALEK : Sakiro alah *(tuan)
SI PANGKA : Dikumbalikan buah parundiangan ka bakeh *(sutan)
SI ALEK : Sabuik *(tuan)
SI PANGKA : Yo ma *(sutan).!
SI ALEK : Lai *(tuan)
SI PANGKA : Sambah manyambah dipulangkan kapado Allah
Salawaik jo salam dipuhunkan ka bakeh nabi,
Buah parundiangan dikumbalikan ka bakeh *(sutan).

Aa lah nan kamanjadi buah parundiangan di *(sutan) kabakeh ambo

__(kemudian diulang parundiangan Si Pangka)__

… … … … Mangko lalunyo *(tuan).?

SI ALEK : Sabananyo *(tuan)

SI PANGKA : Sapanjang buah parundiangan *(sutan) nan ka tangah.
Alah di adaik nan bapakai, nyato dicupak nan baisi.
Tapi sungguah samantang nan bak nan tun
Nan rajo kato mupakaik, nan bana kato baiyo
Dibao kato jo mupakaik, mananti *(sutan) sakutiko
SI ALEK : Sampai *(tuan)
SI PANGKA : Dibilang alah *(sutan)
SI ALEK : Aratinyo, Sapanjang buah parundiangan ambo nan ka tangah.
Alah di adaik nan bapakai, dicupak nan baisi.
Tapi sungguah samantang nan bak itu
Nan rajo kato mupakaik, nan bana kato baiyo
*(sutan) ka mambao kato jo mupakaik, manantian ambo sakutiko
Mangko lalunyo *(tuan)
SI PANGKA : Sabananyo *(sutan)

2
SI ALEK : Samulo kato taranta kabakeh *(tuan)
Binjai banamo timbang langkat, kudo bararak nak ka medan
Baolah kato jo mupakat, mananti ambo sakutiko
SI PANGKA : Ambo ka mambao kato jo mupakat,
*(sutan) mananti lai kabasaba.?
SI ALEK : Sakiro – kiro
SI PANGKA BAIYO JO NAN TUO/ NINIAK MAMAK

SI PANGKA : *(Sutan Basa)

SI ALEK : Lai ambo *(Tuan)
SI PANGKA : Di hari sabanta cako, *(Sutan) mananti, ambo baiyo
Kini lah dapek buah jo bari nyo taranta ka bakeh ambo
Di ambo maantaan ka bakeh *(sutan).
Alah ka rancak ambo anta.?
SI ALEK : Nan dijapuik bana *(tuan)
SI PANGKA : Yo ma *(sutan)
SI ALEK : Lai *(tuan)
SI PANGKA : Aa lah ka antanyo diambo kabakeh *(sutan)
Satantangan kandak *(sutan) cako
Lah ka dilapeh jo muluik nan manih, jo hati nan suci
Tapi limbak nan dari pado itu, Satantangan di juadah nan ka tangah.
Kok ado umpangnyo nan badakuak, panuah nyo nan malimbak
Indak saanjuang, saarek, saisinyo, Nak mintakkan rila jo maaf,
kabakeh niniak dengan mamak sarato dunsanak nan basamo.
Ikolah ka namo buah barinyo *(sutan)
SI ALEK : Sampai *(tuan)
SI PANGKA : Sakiro alah *(sutan)
SI ALEK : Di hari sabanta cako, ambo mananti, *(tuan) baiyo
Kini lah dapek buah jo bari nyo taranta ka bakeh *(tuan)
*(tuan) maantaan ka bakeh ambo.
Aa lah ka antanyo di *(tuan) kabakeh ambo
Satantangan kandak ambo cako
Lah ka dilapeh jo muluik nan manih, jo hati nan suci
Tapi limbak nan dari pado itu, Satantangan di juadah nan ka tangah,
Kok ado umpangnyo nan badakuak, panuah nyo nan malimbak
Indak saanjuang, saarek, saisinyo, Nak mintakkan rila jo maaf,
kabakeh niniak dengan mamak sarato dunsanak nan basamo.

3
 Kan baitu buah barinyo *(tuan)
SI PANGKA : Sabananyo *(sutan)
SI ALEK : Samulo kato taranta ka bakeh *(tuan)
Supayo barek nak bakisa ka nan ringan
Jauah nak bakisa ka nan ampia
Bao lah kato jo maupakaik
Ambo pakai sipaik mananti,
SI PANGKA : Ambo ka mambao kato jo mupakaik,
*(tuan) mananti lai ka basaba.?
SI PANGKA : Sakiro – kiro.!

SI ALEK BAIYO JO NAN TUO/ NINIAK MAMAK

SI ALEK : Yo Ma.. *(Tuan).!

SI PANGKA : Lai, *(Sutan).
SI ALEK : Di hari sabanta cako, *(Tuan) mananti ambo baiyo
Kini lah dapek buah jo bari nyo. Di baliau taranta ka bakeh ambo
Di ambo mangumbalikan ka bakeh *(tuan)
Alah ka rancak ka di anta.?
SI PANGKA : Nan dijapuik bana *(sutan)
SI ALEK : Aa lah ka buah barinyo di ambo ka bakeh *(tuan)
Satantangan juadah nan katangah , Lah padeh nan bak lado,
Lah asin nan bak garam, Lah ditatangah tulang pungguang,
Tapi sungguah samantang nan bak itu, rila jo maaf dibari juo
Ikolah ka namo buah jo barinyo.
SI PANGKA : Sampai *(sutan)
SI ALEK : Sakiro sampai *(tuan)
SI PANGKA : Di hari sabanta cako, Ambo mananti *(sutan) baiyo
Kini lah dapek buah jo bari nyo taranta ka bakeh *(sutan)
Di *(sutan) mangumbalikan ka bakeh ambo.
Aa lah ka buah barinyo di *(sutan) ka bakeh ambo
Satantangan juadah nan katangah , Lah padeh nan bak lado,
Lah asin nan bak garam, Lah ditatangah tulang pungguang,
Tapi sungguah samantang nan bak itu, rila jo maaf dibari juo
Kan baitu bana buah lalunyo *(sutan).?
SI ALEK : Sabananyo *(tuan)

4
SI PANGKA : Ndak lai sabuah kandak buliah, pintak lah bapalakuan
Lah sanang kironyo hati
SI ALEK : Baa nan parundiangan kito *(tuan).?
SI PANGKA : Kito parantian.
SI ALEK : tagak kami lai *(tuan)
SI PANGKA : Kami ruangan jalan *(sutan)
SI ALEK : Assalamu’alaikum…
SI PANGKA : Wa’alaikumsalam…