PASAMBAHAN KA MAKAN

Perumpamaan :
Tuan Mudo sebagai Si Pangka (Tuan Rumah)
Sutan Basa sebagai Si Alek (Tamu)
*( Atau Gelar bisa di ganti)
Si Pangka duduak di bawah (Pintu Masuk)
Si Alek duduak di ateh
===================================

SI PANGKA : *(Sutan Basa).!

SI ALEK : Lai, *(Tuan Mudo)
SI PANGKA : Buah parundiangan ditibokan ka bakeh *(sutan)
SI ALEK : Sabalun kato bajawek, gayuang basambuik
Dek ambo duduak ba nan tuo
Baiyo ambo, basaba *(tuan).
SI PANGKA : Ambo pakai sipaik mananti

SI ALEK BAIYO JO NAN TUO/ NINIAK MAMAK

SI ALEK : Laluanlah kato baliau, *(tuan).

SI PANGKA : Yo, Ma *(sutan)
SI ALEK : Lai, *(tuan)
SI PANGKA : Sabalun buah parundiangan ambi tibokan
Dek kito duduak diadapan niniak dengan mamak
Sarato dunsanak nan basamo, rila jo maaf ambo pintak
SI ALEK : Kapado Allah
SI PANGKA : Sambah manyambah dipulangkan kapado Allah
Salawaik jo salam dipuhunkan ka bakeh nabi,
Buah parundiangan ditibokan ka bakeh sutan.
A yolah nan ka manjadi buah parundiangan di ambo ka bakeh *(sutan)

Maagak dihari nan barlalu, Tigo hari sampai kini

Pihak disilang na bapangka, Ateh karajo nan bapokok
Malapeh anak mudo surang jo baduo
Nan capek kaki malangkah nan pasiah lidah bakato
Masuak ka kampuang nan baompok ka nagari nan babanja
Manamui niniak dengan mamak sarato dunsanak nan basamo

1
 Jikok dibaliau nan sado nan tun, Janji bakarang bamuliakan
Padan baukua batapati, Batampuah labuah nan goloang
Baturuik jalan nan pasa, Kasiak takaka bapijak
Batu balonggok balangkahi, Lah tibo di laman tango

Janjang tarangkai batingkek, Bandua tarampa batapiak

Lah lalu ka ruang tangah, Lapiak takambang bakaduduak i
Kok duduak lah saamparan selo, Kok tagak lah saedaran tapak
Marokok lah sapadam baro, Mangunyah lah sakariang sapah

Pun baatonyo lai kini

Pihak disilang nan bapangka dikarajo nan bapokok
Manganangahkan sapanjang adaik

Ayolah di adaik nan katangah

Sadudun cerek jo teko, Sairiang jamba jo hidangan
Ditiliak dipandang rupo disilau dipandang roman
Bilangan cukuik susunan samparono

Balayia nak manantang pulau, Bajalan nak manantang bateh

Jamba katangah nak mintak baparenai
Sakian buah parundiangan dianta sampai ka bakeh *(sutan)

SI ALEK : Sampia *(tuan).

SI PANGKA : Dibilang alah *(sutan).

SI ALEK : Dikumbalikan buah parundiangan ka bakeh *(tuan).

Sambah manyambah dipulangkan kapado Allah

Salawaik jo salam dipuhunkan ka bakeh nabi,
Buah parundiangan dikumbalikan ka bakeh tuan.
A yolah nan ka kumbalinyo di ambo ka bakeh tuan

Maagak dihari nan barlalu, Tigo hari sampai kini

Pihak disilang na bapangka, Ateh karajo nan bapokok
Malapeh anak mudo surang jo baduo
Nan capek kaki malangkah nan pasiah lidah bakato
Masuak ka kampuang nan baompok ka nagari nan babanja
Manamui niniak dengan mamak sarato dunsanak nan basamo

Jikok dibaliau nan sado nan tun, Janji bakarang bamuliakan

Padan baukua batapati, Batampuah labuah nan goloang

2
 Baturuik jalan nan pasa, Kasiak takaka bapijak
Batu balonggok balangkahi, Lah tibo di laman tango

Janjang tarangkai batingkek, Bandua tarampa batapiak

Lah lalu ka ruang tangah, Lapiak takambang bakaduduak i
Kok duduak lah saamparan selo, Kok tagak lah saedaran tapak
Marokok lah sapadam baro, Mangunyah lah sakariang sapah

Pun baatonyo lai kini

Pihak disilang nan bapangka dikarajo nan bapokok
Manganangahkan sapanjang adaik

Ayolah di adaik nan katangah

Sadudun cerek jo teko, Sairiang jamba jo hidangan
Ditiliak dipandang rupo disilau dipandang roman
Bilangan cukuik susunan samparono
Balayia nak manantang pulau, Bajalan nak manantang bateh
Jamba katangah nak mintak baparenai
Kan baantun bana buah lalu nyo *(tuan).?

SI PANGKA : Sabananyo *(sutan)

SI ALEK : Sapanjang buah parundiangan *(tuan) nan ka tangah.

Alah di adaik nan bapakai, dicupak nan baisi.
Tapi sungguah samantang nan bak nan tun
Ambo bao kato jo mupakaik, Manjapuik an ambo ka buah bari nyo
mananti *(tuan) sakutiko.

SI PANGKA : Aratinyo, Sapanjang buah parundiangan ambo nan ka tangah.

Alah di adaik nan bapakai, dicupak nan baisi.
Tapi sungguah samantang nan bak nan tun
*(sutan) ka mambao kato jo mupakaik, Manjapuik an ka buah bari nyo
mananti ambo sakutiko. Kan baantun bana *(sutan).?

SI ALEK : Sananyo *(tuan)

SI PANGKA : Samulo kato taranta ka bakeh *(sutan)

Supayo barek nak bakisa ka nan ringan
Jauah nak bakisa ka nan ampia
Ambo pakai sipaik mananti, *(sutan)

SI ALEK BAIYO JO NAN TUO/ NINIAK MAMAK

3
SI ALEK : *(Tuan Mudo).!

SI PANGKA : Lai, *(Sutan Basa).

SI ALEK : Di hari sabanta cako,

*(Tuan) manauang manuruik undang, Mananti manuruik adaik
Ambo mampaiyokan kato mampalengongkan bana
ka bakeh niniak mamak sarato dunsanak nan basamo
Kini lah dapek buah jo bari nuo
Di baliau taranta ka bakeh ambo
Di ambo mangumbalikan ka bakeh *(tuan)

Alah ka kumbalinyo di ambo ka bakeh (tuan)

Satantang kandak *(tuan) cako,
Kandak buliah, pintak balaku
Lah ka baparenai kato baliau *(tuan)
Ikolah ka buah barinyo *(tuan)

SI PANGKA : Sampai *(sutan).?

SI ALEK : Dibilang alah *(tuan)

SI PANGKA : Di hari sabanta cako,

Ambo Mananti manuruik adaik, Manauang manuruik undang
*(sutan) mampaiyokan ban aka bakeh baliau nan basamo
Kini lah dapek buah jo bari nyo taranta ka bakeh *(sutan)
Di *(sutan) mangumbalikan ka bakeh ambo

Alah ka kumbalinyo di *(sutan) ka bakeh ambo

Satantang kandak ambo cako, Kandak buliah, pintak balaku
Lah ka baparenai kato baliau
Kan baitu bana buah lalunyo *(sutan).?

SI ALEK : Sabananyo *(tuan)

SI PANGKA : Ndak lai sabuah kandak buliah, pintak lah bapalakuan

Lah sanang kironyo hati

SI ALEK : Baa nan parundiangan kito *(tuan).?

SI PANGKA : Kito pabatehan.

Balaluan sakali *(sutan)

SI ALEK : Samo jo sipangka