PASAMBAHAN MINTAK PULANG**

oleh RAO-RAO CHAT pada 12 Februari 2010 jam 0:01

> Pakieh Sutan

> Manolah Sutan Bandaro, silang nan bapangka, karakok nan bajunjuang.
> Sungguhpun Sutan surang nan basabuik namo baimbaukan gala.
> Nan tinggi tampak jauah, dakek joloang basuo.
> Wujuik sambah nan talewakkan, salam taseba ka nan banyak.
> Ninik mamak rang sipangka, nan gadang basa batuah.
> Nan bapucuak sabana bulek, nan baurek sabana tunggang.
> Taruih kapado cadiak pandai, langkok jo nan mudo arif budiman.
> Cukuik jo mandeh bundo kanduang, dalam panggilan ambo sadonyo.
> Salam di Sutan batimpokan.
>
> Limbak nan dari pado itu, dalam hari sahari nangko.
> Puntiang talatak di hulu, di bawah kiliran taji.
> Asa rundiang kato dahulu, tigo limbago nan tajadi.
> Partamo sambah-manyambah, kaduo baso jo basi, katigo makan jo minum.
> Sambah-manyambah dalam adat, kato bajawab gayuang basambuik.
> Tasabuik bamuluik manih, tapakai baso jo basi, sarato ereang dengan gendeang.
> Muluik manih pangarang baso, budi baiek tali pikatan.
> Panghubung silaturrahmi, banamo sopan dengan santun.
>
> Tantangan baso jo basi, dek diundang kami datang.
> Karano dipanggia kami tibo, lah tibo kami di siko.
> Dek elok baso rang sipangka, tibo kami di bukakkan pintu.
> Janjang ditingkek bandua ditampiek. Lah duduak di tangah rumah.
> Hutang dek diri sipangkalan, silang nan bapangka.
> Karakok nan bajunjuang, minum jo makan basadiokan.
> Jikok saloroang tantang itu, nan bak pituah Sutan juo.
> Adat limbago dilawikkan, pakai pidoman jurumudi.
> Nan tahu di pasang turun-naiek, tahu di ombak nan basabuang.
> Dek pandai janang manatiang, tahu jo garak dengan raso.
> Lah tadanga piriang ba bunyi, iyo di dalam padapuran.
> Lah ditiliak dipandangi, cukuik barisi cawan pinggan.
> Tagak badiri si rajo janang, tangah manatiang ka ruangan selo.
> Takanak kupiah di kapalo, lakek sampiang tanun arab, bugih makasar rang
> namokan.
> Manatiang nasi dengan gulai, nan bak santano fajar tabantang.
> Teko gadang mamacah ruang, cangkia ketek babilang tangan.
> Nan bak umpamo bintang di langik, santano ombak di lawikkan.
> Jikok dilayangkan pandangan jauah, ditukiekkan pan dangan dakek.
> Langkok lah sudah jamba talatak, datang manyambah si rajo janang.
> Jamba talatak mintak dibuka, nasi ta hidang mintak dimakan.
> Dapek kato nan sa ukua, bulek samo digoloangkan, picak samo dilayangkan.
> Pintak buliah kandak balaku, lah samo sanang dalam hati, sajuak dalam
> kiro-kiro.
> Minum alah tibo di nan sajuak, makan lah sampai di nan kanyang.
>
> Sutan Bandaro,
> Kok nan dimakasuik alah sampai, nan ta niek alah takabua
> Nan di ama alah pacah, pintak lah buliah kandak lah balaku.
> Bajalan lah sampai ka bateh, balayia lah sampai ka pulau.
> Limbak nan dari pado itu, satantang alek nan datang, sabondoang lalu satampuah
> suruik.
> Duduak lah taraso panek, selo mintak diurak, nak pulang ka koroang kampuang.
> Manjalang tampek nan dahulu, pulang ka rumah masiang-masiang.
> Pulang maklum bakeh sipangkalan, sakitu sambah bakeh Sutan.
>

Stn Bandaro

Dikumbalikan pasambahan kapado Pakieh Sutan.

Tapi sungguahpun kapado sutan hambo mangumbalikan parsambahan,
nak sarapaknyolah kapado pangulu nan gadang basa batuah,
tuanku nan duo tigo parsilaan, sarato sialek nan satampuah lalu
sabondong suruik, tampat hambo mangumbalikan parsambahan.
Tidak tarhatap tarbilang gala akan pahatap jo pambilang,
nak sambah lah dimuliakan jo sambah.
Bukanlah hambo bak raso malampau jo malinteh disilang nan bapangka
karajo nan bapokok, niniak mamak pangatuo Simabua sarato nan punyo rumah,
sado nan mangandalikan pakarjaan.
Karano alah izin kato jo mupakat, alah dilapeh jo hati nan suci
jo muko nan janiah. Lai dari hambo tabiknyo parsambahan manjawek
panitahan Pakieh Sutan.

Adopun nan manjadi buah parsambahan Sutan,

kok jauah lah bajalang, kok hampia alah baturuik,
lah batingkek janjang, lah batapiak bandua,
lapiak takambang alah bakaduduak'i, rokok baguluang alah baisok,
siriah dicarano alah alah bakunyah.
Pihak makan jo minum alah salamaik samparono kaduonyo.
Bak kato sutan juo ; minum alah tibo di nan sajuak,
makan lah sampai di nan kanyang.
Kok mukasuik umpamo alah sampai nan diama umpamo alah pacah.
Aa tonyo lai, nan banamo takana dihati nan tahelang dimato dipanghulu
nan gadang basa batuah, tuanku nan duo tigo parsilaan, sarato sialek nan
satampuah lalu sabondong suruik,
karano ; hari lah barembang laruik, kok buliahlah bari jo pinto,
disilang nan bapangka karajo nan bapokok,
pai nak jo mupakaik tingga nak jo parundiangan,
nak mintak dilapeh jo hati nan suci jo muluik nan janiah,
selo nan mintak diurak - nak pulang katampaik masiang-masiang.
Saba'itulah sambah dipuhunkan kapado sutan Bandaro.
Kan baitu bana Pakieh Sutan ??
> Yobana sutan.

Maano Pakieh Sutan.

Sapanjang buah parsambahan Pakieh Sutan, alah suri tuladan kain,
cupak tuladan gantang, banalah tibo pado tampaiknyo.
Tapi sungguahpun baitu bana, bak pitua dinan tuo ;
duduak surang basampik-sampik,
duduak basamo ba lapang-lapang,
Karano lai dihadapan silang nan bapangka karajo nan bapokok
niniak mamak pangatuo Simabua,
Sakironyo dibao kato baiyo, bajalan bamolah,
laikoh adat nan baitu, laikoh pusako nan bak kian,
Dibao kato sutan jo mupakaik, diambiak kato jo paiyoan,
dijapuikkan bana nan sado itu.
Mamintak hambo dengan sambah, mananti sutan jo panitahan,
laikoh banamo dalam adat, sambah kumbali kapado sutan.