Selamat pagi sereta tabi basa ngagai semua ke besemuka duduk betentang, ke udah

begelumu datai nandang kelebih agi ngagai pengelicha sereta urang ke datai ninga randau
kitai baka ke pagi tu. Tuju aku degi-degi ba mua kita sebala,ukai jegak enda bebasa tang
nyungkaika pengawa nembuka kereja. Aku ditu deka besebut pasal budaya rama ke berkait
enggau siti jaku sempama ke bebunyi ‘bejalai betungkatka adat, tinduk bepanggalka
pengingat’.

Bala pangan semua,

Kala tauka enda lebuh nuan ngagai palan rama ti udah bisi papan tanda nagang
orang nginsap tang bisi tepedaka orang ke enda malu-malu nginsap dia? Kala tauka enda
nuan tepedaka deriba neriba kerita lalu ngelanggar lampu trafik tauka neriba kerita ba alur
emergensi? Suah tauka enda kitai meda orang muai uras sebarang endur nyengkaum muai
uras keluar ari kerita sida? Semua tu, iya nya chunto ulah ngelanggar atur ke seruran amat
nyadi. Pekara tu ulih dipeda ba dini-dini endur di Malaysia. Sida ke ngereja pekara tu ukai
semina nadai ngasai diri salah, tang mega nadai berasai malu ke ulah ti enda manah nya.
Tu mih ke ngasuh kitai betanya dalam ati diri katika hal ngelanggar atur nya sebengkah
pekara muntang tauka pengawa ke tauka ngasuh diri gaga ati?

Realiti iya, pengidup kitai mensia endang penuh enggau aturan. Tu mih ke ngasuh
ulah mensia bebida-bida lebuh betapi enggau aturan. Bisi orang bagas nitihka atur genap
maya. Orang ke baka tu suah dipeda orang bukai enggau runding ti sinikal lalu dikumbai
sida orang ke ‘rurus bendul’. Anggap ti baka tu ke bendar ukai anggap positif tang balat agi
anggap ke ngemelika orang.Bisi mega sida ke enda tentu ibuhka atur. Sida ke baka tu
nitihka atur "maya sida bisi mood" tauka ngena jaku bukai, nitihka atur maya ke patut ba
runding sida aja. Ambika banding, enti bisi polis, baru sida nitihka atur. Enti enda, semua
aturan deka dilanggarka sida.Baka nya mega sida ke ‘udu ngelanggar’ tauka hardcore
ngagai semua leman atur. Ba orang baka tu, aturan enda relevan tauka enda engkeman
nitihka prinsip idup iya. Nya kebuah, nama bisi atur, sigi lalu dilanggar iya. Ba individu ke
baka tu, ngelanggar atur nya ngasuh iya temegah ati, lantang sereta berasai besai ari orang
bukai.

1
 Enti diperatika ari sukut rama, bisi atur ti betulis lalu bisi mega iya ti enda betulis.
Atur betulis nya atur ti udah dipesetujuka raban mensia mayuh lalu enti enda dititih deka
ditinggang ukum. Ambika banding, atur betulis ti bisi kaul enggau jalai raya, atur kereja di
opis, undang-undang menua, ukum-ukum pengarap enggau ti bukai.Tukuh atur ti enda
betulis nya dipeda rama agi ari ke betulis. Atur bansa tu bisi kaul ti rapit enggau adat lama
tauka budaya sesebengkah komuniti lokal. Ba atur bansa tu, enti enda dititih, ukum iya lebih
ngagai ukum sosial. Atur enda betulis tu balat agi bekaul enggau hal-hal adat basa baka
basa maya begulai enggau pangan diri, laki-bini, nembiak-pengajar tauka basa ulah baka
basa maya makai, basa lebuh nerima penemu tauka pelajar enggau ti bukai. Nya alai
kadang-kadang kitai bisi ninga orang besebutka jaku ‘biar mati anak, anang mati adat’. Ba
hal tu, adat bansa diri mesti ditan lebih agi ari nanka anak diri.

Bala mayuh ti dipebasa,

Nama dih tuju aturan ditempa? Tuju atur bisi kaul enggau konsep pemanah. Ari sukut rama,
konsep tu mai reti ‘ngiga pemanah lalu muai penyai tauka pengerusak’. Dalam sekeda
pengarap baka pengarap Islam konsep tu dikumbai sida ‘maslahah’. Dalam penemu Islam,
maslahah mai reti ti besai agi iya nya "ngiga pemanah lalu nulak penyai’ baka ti udah
ditentuka Tuhan sida. Reti nya pemanah ti digiga sereta penyai ti uji diseliahka mesti berkait
enggau pekara ke ditentuka Petara. Konsep maslahah ngemeratka komuniti tauka mensia
mayuh lalu ukai ngemeratka individu siku-siku.

Nya alai, ulah ke nitihka atur endang ngembuan tuju ti deka mai pemanah sereta nyeliahka
pengerusak. Ambika banding, orang ti enda nginsap deka meri pemanah ngagai pengerai
diri lalu ulih mega nyeliahka diri ari penyai iya nya penyakit. Ukai semina ngagai diri empu
aja tang mega ngagai pengerai orang bukai mega ulih dijaga. Nambahka nya angin mega
dijamin beresi.Tu madahka reti atur ngembuan tuju ti chukup badas. Mensia endang beguna
amat ke atur. Nyau deka semua pengarap ngayanka mayuh leman atur ti patut dititih mensia
baka ba sekeda pengarap ti nagang orang ngirup arak, butang, berutang, atur sembiang
enggau ti bukai. Atur tauka ukum tu digaga Petara ukai tuju iya tak pia ngapa. Pugu tuju nya
endang dikena ngara sereta nusun komuniti nyadi komuniti ti betamadun lalu idup dalam
harmoni.

2
Rambai jaku ti nyebut "atur ditempa awakka dilanggar" endang enda nemban amat. Rambai
jaku baka tu suah amat disebut lalu kadang-kadang iya dikena enggau ati ti temegah. Enti
kitai betatika semua aturan ti digaga Petara nya, dia kitai berunding enda patut Petara
ngaga semua aturan nya semina dikena mensia ngelanggarka iya. Semua aturan nya
digaga Petara laban Iya ke nemu agi ari kitai lalu nemu kitai mensia endang beguna amat ke
atur nya. Enti nadai atur, pengidup mensia sebaka enggau pengidup jelu. Nya kebuah, atur
mesti dipebasaka sereta dititih. Tiap-tiap kali kitai deka ngereja sesebengkah pengawa enda
ulih enda betungkatka adat. Genap iku ari kitai ngembuan tanggung pengawa ngagai atur
nya. Nitihka atur mega beguna kitai nyadika enselan. Dalam hal tu, kitai enda ulih enda meri
penuh perati ngagai diri empu ngambika enda ngaga utai sepeneka ati laban kitai mega
patut berundingka orang bukai.Sesebengkah atur ti udah ditempa nya enda tau enda
dikemata sereta diteritka enggau adat. Nya kebuah ba hal tu, penerit adat endang diguna
amat dikena nentuka atur nya dititih. Taja pia, pengawa penerit adat ulih dikurangka enti
raban komuniti nya empu bisi ngembuan pengering diri nitihka semua atur.

Ke pengujung jaku aku, aku ngarika raban aku ngarapka utai ke udah disebut tadi ulih nyadi
malin sereta jaku tangkan ngagai kitai sebuat. Enti pengidup kitai nadai atur, diak kitai
dikumbai urang nadai adat. Nyema kitai idup ba dunya tu enda beradat, diak kitai dipeda
enda menyana. Kebuah pia, laban mayuh penguntung diulih kitai enti kitai nitih adat. Nya
alai, aku nangkan kitai semua bepun ari seharitu, Idup meh beradat ngambika kitai idup
dikenang orang enggau pemanah baka munyi sempama ‘bejalai betungkatka adat, tinduk
bepanggalka pengingat’. Terima kasih.