Karang Iban

Bansa Iban bisi ngembuan mayuh adat.Ambikka chunto,adat bekuntau,adat

semakai,miring,main asal enggau mangkung tiang.Tang,penemu orang Iban pasal adat nya nyau
majak bekurang kelebih agi rambau nembiak jeman diatu.Orang ti nemu pasal adat tu mega enda
mayuh agi.Semina bala sida aki ini ti nadai mayuh agi hari ba dunya tu aja ti bisi ngembuan
penemu pasal adat-adat tu.Enti sema pekara tu majak nyadi,dia adat bansa kitai deka punas.Nama
kebuah penemu pasal adat tu nyau majak bekurang ba orang rembau diatu?

Siti ari kebuah adat bansa kitai nyau enda dikenatika agi ba jeman diatu iya nya orang
jeman diatu enda nitihka pengarap Iban kelia agi.Tu laban mayuh adat iban nitihka ajar pengarap
kelia.Nitihka sidik ti bisi digaga ba menua kitai tu ba tahun 2010,orang ti agi ngenatika pengarap
asal Iban iya nya semampau 13.63% aja ari rambau ti bisi ba menua Sarawak.Mayuh raban jeman
diatu nyau udah masuk Kristian lalu enda ngarapka agi pengarap asal bansa kitai.Nya alai,adat-adat
ti dikenatika dalam pengarap kelia enda agi ditemu raban diatu.Ambikka chunto,adat bansa kitai ti
nitihka pengarap asal iya nya miring,gawa beintu-intu sereta gawa tuah.Pengawa-pengawa tu udah
tentu enda ditemu enggau digaga rambau diatu.Dia adat-adat kitai nyau punas.Nya alai,taja pan
kitai enda ngumban pengarap asal Iban agi ba pengidup kitai,kitai patut nemu pasal adat nya
awakka adat nya enda punas.

Nangkan ka nya,pengidup orang jeman diatu ti diau ba bandar mega nyadi siti ari kebuah
adat bansa kitai nyau majak enda ditemu agi.Tu laban orang ti ngembuan penemu pasal adat tu iya
nya bala aki enggau ini tinggal ba menua.Tang,raban kitai nyau tinggal ba bandar laban pengidup
ba bandar menyana agi ari pengidup ba menua.Ambikka chunto,pengidup ba menua tusah laban
nadai karan,ai ti beresi sereta nadai Internet ti amat beguna ba pengidup raban baru.Pekara tu
ngasuh mayuh orang deka agi diau ba bandar laban pengidup ba bandar jauh lebih senang ari
pengidup ba menua.Pengawa tu tau ngasuh kitai ti diau ba bandar enda ngelala orang ti bisi
penemu pasal adat bansa kitai lalu penemu adat nya enda dipadahka lalu diajar ngagai raban
baru.Nya alai,kitai ti diau ba bandar tu patut mai diri kitai pulai ke menua lalu betemu enggau orang
ti nemu pasal adat asal bansa kitai sereta nanya ngagai sida pasal adat nya.

Kelimpah ari nya,adat asal bansa Iban mega jarang dipaparka ba media rama.Enti
sema kitai deka ngiga informasyen senentang adat kitai ba media rama,kitai deka betemuka mimit
tauka nadai lansung informasyen pasal adat nya.Tu laban orang ti deka maparka pasal adat kitai ba
media rama.Enti sema kitai nemu tauka agi ngereja adat lama bansa kitai,kitai ulih ngunsika adat
nya ba media rama.Chunto iya,kitai tau ngaga website senentang adat kitai tang enti enda nemu
keni deka ngaga website,kitai tau nganjung video enggau gambar ngagai applikasyen baka
Facebook,Instagram,YouTube sereta Tik Tok.Nengah pengawa tu mayuh Agi orang ulih nemu
pasal adat kitai sereta ulih ngeransangka penemu orang tentang bansa kitai.Nya alai,orang ti nemu
pasal adat tu enda patut ngenatika penemu nya ngagai diri sida aja tang sida patut bekunsika
penemu nya enggau chara ti paling senang iya nya nengah media rama.

Bisi mayuh chara adat kitai tu ulih dikerembaika agi ngagai mayuh orang kelebih agi
ngagai raban baru.Siti ari chara ti ulih digaga iya nya sida menteri patut ngatur mayuh macham
aktiviti ti tau ngeransangka penemu orang senentang adat bansa kitai.Tu tau ngemansangka agi
minat orang deka nemu pasal adat bansa kitai.Chunto iya,aktiviti ti ulih digaga iya nya kempen adat
Iban,pekit ngajat,pekit leka main enggau pekit bekuntau.Nengah aktiviti baka tu raban jeman diatu
kelebih agi bala nembiak deka nemu sereta ngenatika adat-adat nya tadi dalam pengidup sida.Sida
mega ulih nusuika pasal aktiviti nya ngagai bala sebilik sereta bala pangan sida.Bala menteri mega
tau mantaika aktivit-aktiviti tu ba televisyen awakka orang ba rumah mega ulih nemu pasal aktiviti
ke masangka adat kitai sereta bulih penemu tentang adat nya.Nya alai,bala sida menteri kelebih agi
menteri ti bisi ba menua kitai tu patut amat ngerejaka aktiviti tu tulih meransangka agi penemu
orang pasal adat kitai awakka adat tu enda ditelan jeman ti majak moden.

Tambah agi,entara chara ti lain ti ulih digaga iya nya adat tu ulih diajar ba sekul a
ngagai bala nembiak.Nengah tu,bala nembiak sekula kelebih agi nembiak bansa kitai tau ngelala
senentang adat bansa kitai.Ba sekula,adat bansa kitai tau diajar lebuh kelas Iban.Nembiak mega
ulih nguji adat baka ngajat,betabuh sereta leka main lebuh kelas Iban.Kelimpah ari nya,nembiak
patut bisi rambau ngajat enggau tabuh ba sekula.Rambau tu tau ngaga persembahan maya bisi
majlis-majlis ti diadaka ba sekula.Sekula mega tau mantaika adat asal kitai nengah hari rami Gawai
ti diadaka ba sekula.Maya hari rami nya pengajar patut ngaturka mayuh macham aktiviti sereta
pekit dikena ngemansangka penemu bala nembiak pasal adat bansa kitai.Nya alai,bala nembiak
sekula deka nemu pasal adat bansa kitai enti sema adat tu diajar tauka dipadahka bala pengajar ba
sekula.

Udah nya,apai indai mega bisi tanggung pengawa ti dalam mansangka penemu
rambau baru senentang adat bansa kitai.Tu kebuah sida tau mansangka penemu anak sida pasal adat
bansa kitai nganti sida ngajar anak sida pasal adat tu ari mit agi.Sida tau mai anak sida ngagai
aktiviti-aktiviti ti bisi ngajar pasal adat kitai,ngasuh anak sida ngambi mata pelajar jaku Iban maya
ba sekula sereta mai anak sida ngagai kelas ngajat.Ukai nya aja siti ari pun pengawa ti patut digaga
bala apai indai ngagai anak-anak sida awakka tau ngetanka adat bansa kitai iya nya bejaku enggau
anak-anak sida ngena jaku iban.Mayuh apai-indai diatu nyau bejaku enggau anak sida dalam jaku
Inggeris ari mit agi.Keni bala anak sida deka nemu pasal adat Iban enti semina bejaku iban aja pan
enda nemu.Nya alai,apai indai bisi tanggung tu besai dalam nanam adat kitai dalam diri anak sida
nengah ajar sereta nusi pada adat kitai ngagai anak-anak sida lebuh ari mit agi.

Nama penguntung ti diulih kitai lebuh kitai bisi ngembuan penemu pasal adat bansa
kitai?Siti ari penguntung nemu pasal adat kitai iya nya iya tau ngemansangka bansa kitai.Tu kebuah
raban orang ti dalam bansa kitai tu enda nitih chara idup baru lalu agi ngerejaka pengawa dalam
pengidup sida baka aki Ini kitai kelia menya.Penemu kitai tu pan tau ditu sui ka ngagai bala
anak,ucu,icit kitai jemah hari ila.Adat kitai nya pan enda punas jemah hari ila nganti sema kitai
deka nemu lalu ngerejaka adat nya dalam pengidup kitai.Bansa kitai Iban ti udah bisi ba menua tu
ari kelia menya mega agi bisi nama sereta deka mansang ba menua tu ninting hari ila.Nya alai,kitai
patut bendar ngenatika tauka ngekalka adat bansa kitai tu laban iya tau ngemansangka bansa kitai.

Ukai semina nya aja,nengah adat kitai tu mega pengidup kitai deka meruan .Tu laban
adat-adat tu tau ngajar kitai penemu ti amat beguna dalam hidup kitai besehari-sehari.Chunto iya,
nengah adat bekuntau dia kitai ulih nemu baka ni deka ngenatika diri lebuh bisi orang ti deka belaya
enggau kitai.Tambah agi,ari adat begawai dia kitai tau belajar baka ni deka meri terima kasih ngagai
semua utai ti diulih kitai dalam pengidup kitai.Adat tu mega tau ngasuh kitai nya orang ti
beradap.Ambikka chunto,ari adat tu kitai deka ngembuan hati ti manah serta enda bejaika orang
bukai kelebih agi orang ti dulu agi makai garam ari kitai.Nya alai,adat tu patut Amat dikenatika
rambau kitai jeman diatu awakka rambau kitai tau nyadi mensia ti menyana.

Nangkanka nya,lebuh kitai bisi penemu pasal adat bansa kitai tu,kitai mega tau
ngembaika agi penemu orang pasal bansa kitai ngagai orang ti diau ba menua lain.Pekara tu tau jadi
enti sema kitai bekunsika penemu kitai pasal adat nya ngagai media rama Laban utai ti dipaparka ba
media rama tu Ukai semina ulih dipeda orang ti ba menua kitai tu tang ulih peda dipeda sida ti
diau ba menua lain.Nengah nya,sida ke diau ba menua lain tau rindu ati Laban meda adat kitai ti
lain adat enggau pengidup sida.Sida ke selalu bejalai mega deka datai ngunjung menua kitai Laban
deka meda orang ngerejaka adat nya ba depan mua sida.Nya alai,Enti sema kitai rajin bekunsika
pasal adat kitai ngagai orang,dia bansa kitai tau ditemu mayuh agi orang ba benua tu.

Simpul iya,adat kitai patut amat ditatka kitai kelebih agi raban kitai diatu laban dia
kitai deka mayuh bulih penguntung sereta iya ulih ngelakka adat kitai tu ari punas.Bala menteri
patut ngiga mayuh chara dikena ngemansangka adat kitai tu,bala pengajar patut amat ngajar bala
nembiak sida pasal adat tu enggau bala apai indai patut mantaika penemu sida pasal adat kitai tu
ngagai anak sida.Nya alai,kitai patut madahka pasal adat kitai tu ngagai bala rebak baru baka
rutabaga tampung danan,baka ijuk tampung penduk ,baka ai tampung tali.