Anda di halaman 1dari 4

LEKA MAIN IBAN

Geliga
Penerang : Pengawa geliga suah disadaka maya pengerami lantang pia mega
maya rabat. Geliga dilichaka ba mua mensia mayuh.
Tuju : Dikena nangkan tauka ngelalau bala ka bisi datai ngulu pengawa
tauka pengerami.
Kereban : kelia-selebuan tawak; kemaya hari tu-mikrofon

Selamat lemai ari kami ti bediri ditengah ruai


Ukai madahka diri lebih agi dalam pemansang
Tang laban ti udah diadu ke pengulu sereta disagah sida tuai rumah.
Nyadaka leka geliga malam tu.
Anang ragak kita ke nembiak
Tang dinga ka licha geliga ti betuai ke pengajar Andrew Geliga Anak Jalin
Enggau basa nya nyua ke ngagai pengajar Andrew Geliga.

Terima kasih tukang kangau.


Keterubah aku ngari ka bala dipeda
bediri reremba mantaika adat enggau basa
ti patut dititi ditali ke lalau ke pelansar adat enggau atur maya pengerami.

Keterubah,
Enti kita bisi belaya, bebukut pala kita deka ditinggang adat ngeruga pengerami
enggau sepenyampau seratus ringgit Malaysia.
Kedua,
Pia mega lebuh begagai bebungah bebuti betundi,
anang kelalu kasar enggaika ngemutus tali tengak,
betingkilka jam dilengan betainka antin sida ka dara
enti pekara tu nyadi, sapa ti ngerusak dipinta nganti barang ti dirusakka iya.
Ketiga,
Sapa laki tauka bini tekelalu dikesayauka,
anang mega diteju enggau begagai betundi laban tebu dinding tau ngasuh ati jai
runding ransing chemburu kelalu.
Keempat,
Sapa ke bisi pengaruh anang nguji deka munuh,
tang anjung ke kampong ngambi bala nyumbuh nadai beterauh nguyaska pisang
tau mega ditan di bukit melabang kena munaska jugam ke suah ngeruyakka dan
tekam di kampong puang.
Kelima,
Enti sema pemakai ti dibantai endai mayuh nyamai nitih ke ati,
enti ai irup nadai ulih ngapus ka aus sepemanjai pagi ngari ke penyeluk pengerami
minta ampun, nadai empa nadai, bisi irup bisi.
Kepenudi,
Begulai, sejalai, begagai mih enggau pengelantang,
rami beati-ati bala semua,
bejalai betungkat ka adat, kaul bepanggal ka hormat.

Selamat malam.
Muka Kuta
Penerang : Kuta pintu didirika di pelaman rumah panjai ba jalai pintu buluh.
Tuju : Dikena munggah jalai basa ngagai pengabang ka datai ngulu
pengerami. Lebih agi pengerami tikah.
Kereban : Gerebang pintu, daun pengelagu (daun nyiur tauka daun mulung),
bungai, gunting.

Selamat lemai, tabi basa diberi aku ngagai semua.


Taja pan lemai udah nyangkai jam lapan,
Ukai nunjukka malam udah tegaman pagi hari,
Peda aku semua kita udah bela bediri chechegi,
Bala semua udah sedia ningaka jaku buka kuta disadaka Pengajar Bana ti berita
tebilang pegari,
Dipeda enggau pelaba kereban di dalam bungkus kuta lama,
Dilagu enggau bungai tawai, dibeli ba kedai taukey Cina,
Demalam endang kami temu manah udu basa seribu enda alah kira,
Tu meh tanda gaga besai dibantai ka nyadi basa kitai,
Tang penemu aku nadai enggau malu ngerebakka pintu tanchang kuta,
Ngena duit ringgit seratus Malaysia,
Enggau bulu kebal aku muka kerebak silak pintu dada,
Tama mih kami tu enda nyilu belama-lama.

Terima kasih wai bakih, laban meri kami ulih nyeripih muka pintu basa.
Sekali agi terima kasih.
TlMANG ANAK.

O-o-o-wai —— ah.
Naka penyuma aku nelenga
Ka rasa dabong gigi.
Nyerumba linda lemai hari,
Nyerumba petang penyarang
Rumah menchegi.
Tang ukai jawang aku
Ka nimang sulu tunang ambai ati.
Ukai lambu aku ngelulu
Ka sida sanu ibu kedi.
Tang semadi tinda aku
Udah alah asoh sida ke empu kereja
Pun pengerami,
Bebelah ka jeragang pinang penguji.
Nya alai seit pinang kunchit
Alit di burit lega di ati,
Leka pinang segala dibelah dara Jata
Di baroh singka miga ngeledi.
Kumang ka tebilang tambun puji,
Pandai di chunggai ujong jari,
Indu sida di Liu Nyatu Padi.
Lalu disimpan sida ibu uman
Dalam jelanan tanggam demam resam ransi.
Udah nya baru tembai bejalai pansut ka ruai
Ngiga apai tangkai mengadi.
Lalu besangin indai mempulu lilin
Munyi Baketan palin ngua lilin madu rari,
Lalu muchau indai burong bangau
Munyi Melanau nimbau tukau tanjong Keladi.
Oh! Ni kita deh Sapungga, Sapuntang Medang
Ke udah ngundang aku di simbang papan paji,
Enda ninga kita anak tua endun dara
Nebah nyawa nyabak berai.

Oh! Nama kabuah enda ninga deh indai dara,


Uji surong kitu deh indai endu bini kami.
Tak lalu disua ka indai puna bangka
Lantang anak randa enggau tapa jari beresi,
Lalu sambut apai sempidan bangkut
Enggau kukut ujong jari.
Lalu betimang apai Kumang
Bedindang badi-adi.
Adu-adu kemah ko iya,
Anak aku tak lalendu
Baka lamba batang kayu peru
Tumboh di ulu Seblak menchegi.
Linga-linga kera lantang anak randa
Baka lamba batang kayu kara
Ke tumboh di ulu dia
Pumpong sadepa rarah jelenga
Pangka ka bua pusin bebuli.
Melan-melan salantang anak pinan
Baka lamba batang kayu tekam
Tundan delapan semilan begulor tali.
Lenggi-lenggi anak diri indah enda baka
Lamba batang kayu tuwi
Ke tumboh menoa ili ngerapi madang papi,
Kemah ko timang sida menimang karong beridi.
Nya alai, diatu deh Endun Dara
Ke agi meraya nebah nyawa nyabak berai,
Tang enti tinda iya
Nyau udah jementa dara mereti.
Nyau udah tinggi di lepi sanggul diri,
Pandai di chunggai ujong jari.
Ukai enda iya digela kitai
Kaban mengua karong beridi
Ngagai anak pekaban
Ikan enseriban padi,
Ke begamal lanji-lanji
Betanjak di kaki
Kerangan nunggang.
Wai —— ii.