Teks Emcee Byrigther Weds Amlyn

Que :Niki Ke Pengabang

Bala maioh, diatu kitai deka ngelalu, nerima serta nyambut ke penatai pengabang ari sida
sepiak pengantin ke lelaki ari menua Sungai Brangan, Saratok enggau ari Tembawai Kapok,
Ulu Awik serta ari sebarang alai penatai sepiak sida ke lelaki niki ngagai Ruai Rumah
Catherine Tamoh, Sungai Aup.

Dilalu meh penatai sida ya ngau ati ti mentas,

Terima meh penatai sida ya ngau ati ti temegah,
Sambut meh penatai sida ya ngau penuh ati ti gaga,

Laban penatai sida ya ukai semina mai nganjung jereki, tang bisi tuju ke badas ianya deka
nyatup ke keling sida ya ari menua Sungai Brangan Saratok, ngau kumang kitai ari Sungai
Aup, Sibu baka ke lemai tok.

Nyadi diatu sida ya deka bejalai begadai-gadai, ngetu-pengetu, belubah-lubah bertemu nyau
bala ari rumah panjai kitai ke udah berintai badas megai botol tuak ngau gelas, meri sida
ngirup sebagai tanda nerima penatai sida ya, udah jauh pejalai sida ya saritu tentu nyawa sida
ya aus lalu deka ensepi bubu ke ditan ke bala maioh ba ai Aup.

Que : Pengabang duduk

Nyadi minta bala pengabang kitai ke baru datai tok tadi ulih duduk ba sebarang alai endur ke
bisi awak serta engkeman ba ruai rumah panjai kami ditu laban pengawa kitai ianya miring
udah tok legi deka belabuh enda lama dak agi. Tau serta ulih endur duduk magang ba sebelah
ruai kami tok, nadai penanggur magang laban bala kami sigi gaga ati bendar meda penatai
kita ti cukup rami baka ke lemai tok.

Que : Miring Ngelalu Ka Temuai

Keterubah ya, aku deka meri ;
selamat lemai,
selamat datai,
selamat sangkai,
selamat tikong,
selamat duduk,
selamat bertemu,
serta selamat berakup,
nuju ngagai semua bala kitai ke bisi datai nguluk pengawa rami melah pinang Byrigther
enggau Amlyn baka ke lemai tok.

Ambi enda masau jam laban jangka aku atur pengawa ngau pengerami kitai baka ke lemai
tok agi maioh, diatu kitai deka belabuh enggau pengawa Miring Ngelalu ke Temuai. Pengawa
Miring Ngelalu ke Temuai tok sigi pengawa adat asal lama kitai dikena meri berekat agai sida
ke udah nemuai ngabang agai kitai laban kitai arap ke tuju penatai sida ya tadi sigi mai tuah,
tuju ti manah, enggau ngemaie jereki agai kitai ke beempu rumah.

Nangkan ke nya tadi, diatu kitai deka ngagau ke Apai Pengantin Indu, Mr Thomas Anak Apet
ti nyadi ke Tukang Biau Piring kitai baka ke lemai tok, bala wakil ari Pengantin Indu serta
bala wakil ari Pengantin Lelaki mansang duduk ke tengah ruai ambi kitai ulih ngatur
pengawa tok. Enggau tok aku nyerah ke pangku pengawa tok agai Mr Thomas Anak Apet.

Terima kasih dituju ke Apai Pengantin Indu, Mr Thomas Anak Apet laban udah nyadi ka Tuai
Biau kitai dalam pengawa miring tok. Terima kasih mega agai wakil bala ari sepiak indu
nggau ya ka lelaki laban udah sama bela ngatur serta nembu ke pengawa miring tok tadi
enggau manah.

Que : Housekeeping ari Tuai Rumah

Bala maioh, enggau penuh tabi basa ti besai, diatu kitai deka ngagau ke ya ke dipebasa, Tuai
Rumah Catherine Tamoh Anak Liom ti deka mansang ke panggau kitu lalu deka meri jako
lalau ya udah nerima pengabang ngau temuai baka ke lemai tok serta jako ajar senentang
nama utai ke tau digaga ngau ke enda tau digaga kitai lebuh maia kitai bisi pengerami melah
pinang baka ke lemai tok. Enggau tok aku ngangkat ke Tuai Rumah Catherine Tamoh Anak
Liom.

Terima kasih Tuai Rumah, cukup manah, cukup engkeman serta cukup siru ngau mentas jako
ke udah dipansut ke nuan nya tadi. Ngarap ke setiap igi leka jako nuan nya tadi ulih dijadi ke
teladan serta cuan kitai sepemanjai pengawa berami melah pinang kita baka ke lemai tok.

Que : Persembahan Ngajat Ngelalu ke Temuai

Bala maioh, sebedau bemban dianyam nyadi tikai udah tentu ya deka diraut sama bela dulu,
bakanya mega pengawa kitai baka ke lemai tok, sebedau kitai belabuh jauh agi, udah tentu
kitai bisi persembahan pembukaan munyi ko jako urang diatu. Persembahan pembukaan
kitai tok diberi nama Ngajat Ngelalu Temuai ti deka dipersembahkan menyadi pengantin indu
ke biak sekali ianya, Elwyn Entalai Anak Thomas. Enggau nya kitai ngangau ke Igat Elwyn
Entalai Anak Thomas.

Terima kasih agai Elwyn Entalai Anak Thomas laban udah ngajat ke kitai tadi, bala maioh
enti kitai sama ka nemu, ia ukai mina madik pengantin indu ke pengambis biak sekali tang
mega siko-iko ia aja sida semadi empai bisi tawing. Ia ukai semina dasuh kami ngaga
persembahan pembukaan, tang enti kitak ari sepiak ke lelaki bisi mai manuk indu lebih, ulih
mega disabung enggau manuk laki kami Elwyn Entalai tok. Tapi, mesti ka nanya Indai
Tugang dulu. Ka nanya Indai Tugang anang lebuh ya maia ya main Candy Crush, ambis utai
sebut ya legi.

Que : Ngurus ka diri

Bala maioh, diatu kita deka meri awak timpuh sejam agai bala kitak semua kena ngurus ka
diri empu dulu, engka sida ke datai ari jauh nya deka belelak dulu kini. Kena meh awak tok
legi lebuh maia aturcara rasmi kitai empai bepun, kena kitai berkelala enggau pangan diri,
kena kitai berandau enggau pangan diri, kena kitai bertusut enggau pangan diri kini, nie ke
jauh beri sempil agi, nie ke petang beri terang agi, nie ke ngai nyadi beri kitai mujur agi serta
nie ke ka ba diak meh, serta jako tesau agai bala ke empai bisi tawing, ulih mega ngena awak
tok kena kita ngetan baur gintik kita, nie nemu ngait kini, ulih gak sama dirantar serta dirami
kitai baka ke lemai tok. Nyadi ke udah bisi tawing nya anang ga nguji ka ngau urang ngeruh
ai ngetan ke baur gintik, sayau ke baur gintik nya udah ambis warranty, nadai ulih endur
claim agi ila. Nyadi kitai bertemu baru takah sejam ari diatu. Mupuk enda lama aku.

Que : Makan Malam

Bala maioh, udah cukup timpuh sejam lalu diatu kitai deka begulai baru. Jam diatu pan asai
ku dalam kitai din udah asai ke digeremai bayak. Diatu kitai deka sama bela belaboh matah
ke lengan enggau cukup maioh engkayu iban ke udah disedia ka rakyat rumah panjai
Caherine Tamoh. Tang sebedaunya, diatu kitai deka ngagau ke Tuai Rumah Catherine Tamoh
ti deka ngulu ke kitai dalam sampi beberkat ke pemakai. Enggau nya kitai ngangkat ke Tuai
Rumah Catherine Tamoh. Sama bela berdiri kitai.

Terima kasih tuai rumah atas ulu nuan dalam sampi beberkat ke pemakai nya tadi. Nyadi
diatu kitai ulih sama bela belaboh makai. Ditu mega bisi jako gerah, kitai bisi nyedia ke dua
jenis pemakai baka ke lemai tok ianya pemakai halal enggau non-halal. Pemakai non-halal
tok ulih ditemu serta diulih ke kitai ba alamat ruai no 5 enggau no 7 serta pemakai halal tok
ulih ditemu serta diulih ke kitai dalam bilik tuai rumah. Anang irau, pemakai halal tok
dikatering khas ari Ustaz Izuan ari SK Sungai Sepiring/Sungai Tepus. Tang enti ke makai
halal tok ka nguji ngambi pemakai agai bahagian non-halal kin pan ulih ga meh, dialu-alukan
ga. Pemakai kitai pan cukup maioh baka ke malam tok, cukup untuk semua orang. Anang
malu anang segan, sama bela nyengkau, enti malu legi lapar meh perut.

Que : Ngiga Pengantin Indu

Bala maioh, diatu kitai deka belaboh enggau pengawa ke dikangau ke kitai Ngiga Pengantin
Indu. Pengawa tok mega siti ari main kitai lebuh pengerami melah pinang. Ambi pengantin
lelaki nya ngasai ke pemedis bakanie ngiga indu menua kitai aup kitu, tajapan ya diau ba
nanga Jalai Aup diak aja. Nyadi pejalai pengawa tok legi bakatu, Pengantin Lelaki, Mr
Byrigther Unner Anak Limping, ngemai apai indai ya enggau semua bala ke udah dipadu ke
ya mangku pengawa tok, deka nginga pengantin indu ke diambi ya nyadi ke bini ya lemai tok
ari bilik ke bilik sampai ya tertemu ke din alai endur pengantin indu nya. Nyadi malam tok
kitai meri pengantin laki ngau bala ya diskaun mimit meh, anang guai ngecas sida ya enti
salah bilik laban pengawa kitai malam tok agi panjai. Enda alah legi pengantin laki peda kitai
giyuk-giyuk duduk ba pelamin alu tumbang ya dahnya. Nama penyadi deh, tama TVS ya
dahnya, laban malam tok kitai bisi ngagau ke wartawan TVS ga. Enti udah tembu pengawa
tok legi ulih ngecas ya, nie ko kitak nya mantai ke pengaga bulih menantu ngau ipar baru.
Pesan kami mega, arap ke Byrigther agi ingat ke mua bini ya Amlyn meh, laban ba rumah
panjai tok agi maioh indu dara, baka Indai Gelas enggau Inik Baun nya agi dara nya. Tuai
Rumah pan agi dara meh.

Enggau tok arap ke sida pengantin lelaki enggau bala ya udah bersedia, laban kitai berlabuh
diatu.

Que : Pengantin Indu udah ditemu

Pengantin indu udah ditemu, diatu kitai diminta sama bela berdiri. Ditu bisi jako gerah, bala
wartawan ke ka ngambi gambar ulih ngambi gambar asal anang ngempang jalai. Bala maioh,
enggau penuh temegah ati diatu kitai deka mandangka keling serta kumang sehari kitai
bejalai begadai-gadai, bertitih-titih, serta berlubah-lubah nuju agai pelamin seduai ya.

Que : Kata Sapaan dan Alu-aluan (udah pengantin duduk ba pelamin)

Ukai tubai sebarang tubai,
Tubai digaga orang iban,
Ukai datai sebarang datai,
Datai ka ngambi bungai di laman.

Buah langsat, buah petai,

Tumbuh galak ditisi ensabi,
Bajik sigat pengabang datai,
Ngulu ngerami gawai lelabi.

Sirih ditempap, pinang dibelah,

Disadung agai temuai kami,
Bertanya udah, bertunang udah,
Datai ba ari pengantin dirami.

Keterubah ya, aku deka meri ;

Selamat Bertemu ba menua Sungai Aup, menua ke cukup balat dibiau takang isang.
Selamat Rami Melah Pinang,
Selamat Gawai Lelabi,
Selamat Berkelala,
Serta Selamat Hari Gawai Dayak Gayu Guru Gerai Nyamai Lantang Senang Nguan Menua
Ohhh….haaaa….

Dituju ke ngagai ;
1. Ya ke Dipebasa, Tuai Rumah Catherine Tamoh Anak Liom ari Sungai Aup, Sibu
2. Ya ke Dipebasa, Tuai Rumah Jenalius Unchie Anak Anthony Lim ari Sungai Brangan,
Saratok
3. Ya ke Dipebasa, Tuai Rumah Dullah ari Sungai Tuah
4. Ya ke Dipebasa, Tuai Rumah Ason ari Tembawai Kapok, Ulu Awik
5. Tuai Rumah-tuai rumah enggau semua ketua masyarakat
6. Mr Thomas Apet enggau Mdm Elizabeth Sepun, Apai Indai Kumang Sehari
7. Mr Limping Junit enggau Mdm Siti Saat, Apai Indai Keling Sehari
8. Raban JKKK Sungai Aup
9. Raban JKKK Sungai Brangan
10. Bala ari PPD Selangau (aku empu ngari ke sida ya)
11. Bala Kepala Pengajar ngau Pengajar
12. Rombongan Pengajar ngau Staf ari SK Sungai Sepiring / Sungai Tepus, Selangau
13. Rombongan Pengajar ngau Staf ari SK Long Lellang, Baram
14. Bala alumni Institut Pendidikan Guru Kampus Keningau, Sabah
15. Bala alumni Institut Pendidikan Guru Kampus Rajang, Bintangor
16. Bala Pemesai perintah ngau swasta
17. Semua bala kitai ke bisi bergempuru ba ruai rumah Catherine Tamoh baka ke malam
tok
18. Serta kelebih agi nuju agai keling enggau kumang sehari kitai baka kelemai tu ianya
Mr Byrigther Unner Anak Limping enggau Madam Amlyn Junai Anak Thomas.

Tempap ke jari kitai.

Nyadi baka ka lemai tu, kitai deka bejadi lalu ngerami seduai Igat Byrigther Unner enggau
Endu Amlyn Junai tu jadi melaki bini. Nyadi pengawa kitai baka ka lemai tu besai bendar reti
iya, kelebih agi ba seduai iya empu, enggau sida iya sebilik laban tu meh pengawa ka suah
disampika bala apai indai ianya ka meda anak sida nirika rumah tangga. Baka nya mega bala
bujang dara, pengawa ka baka tu endang sigi digiga, endang sigi dianti.

Nyadi raban pengabang maioh,

Bisi rambai jaku orang putih ti ngemai reti enti dalam jaku Iban; “Pengerindu endang enda
kala minta, tang selalu deka meri belama”. Nya alai sapa-sapa ka idup dalam pengerindu
sama bela bulih pengasih enggau penyayau ari pangan diri, ukai semina ari seduai iya tang
mega ari bala entua, ipar enggau bala kaban belayan.

Enti sama bulih pengasih enggau penyayau, utai bukai anang telah agi, endang sigi bulih
laban pengasih enggau penyayau tu meh kunchi penyenang sida begulai nyadi melaki bini
lalu enda ulih dibeli kitai ngena mata duit. Nya alai pengerindu ka pangan diri beguna amat
ngambika pengidup sida belaki bebini senang lantang sereta meruan, taja pan dituntung
penusah.

Que : Biodata Pengantin Lelaki enggau Indu

Nyadi diatu bala maioh kita deka berkelala enggau semak agi enggau pengantin lelaki enggau
pengantin indu baka ke lemai tok. Seduai ya udah cukup sigat enggau bajik dipeda baka ke
malam tok mina kitai empai nemu enggau silik agi senentang utai ke patut ditemu kita ba
seduai ya.

Nyadi keterubah ya aku ngepun ke ngau ari sepiak Pengantin Indu dulu.
Nama : Amlyn Junai Anak Thomas
Tarikh Lahir : 18 Disember 1996
Umur : 27 Tahun
Asal : Apai ya asal ari Sungai Aup, Sibu (minta dinga nyawa urang Aup)
Indai ya asal ari Sungai Tuah, Kanowit (minta dinga nyawa urang
Tuah).
Anak : Anak ke 2 ari 3 iko menyadi
Pekerjaan : Pengajar
Alai Kerja : SK Sungai Sepiring/Sungai Tepus, Selangau
P’nglama Gawa : 2 tahun

Nya meh bala maioh, serba sedikit perkara munyi ko jako laut ke patut ditemu kitai pasal
pengantin indu. Enti kitak bisi utai ka tanya ngau ka nemu lebih agi enggau silik agi, ulih
nanya Endu Amlyn empu, tang anang lebih-lebih, pedis isi dijeling bujang Sungai Brangan
sepiak nya legi.

Nangkan ke nya diatu kita berkelala enggau Pengantin kitai ia ke lelaki.

Nama : Byrigther Unner Anak Limping
Tarikh Lahir : 18 Disember 1994
Umur : 29 Tahun
Asal : Apai ya asal ari Sungai Brangan, Saratok (minta dinga nyawa urang
Sungai Brangan) indai ya asal ari Tembawai Kapok, Ulu Awik, Saratok
(minta dinga nyawa urang Tembawai Kapok)
Anak : Anak ke 3 ari 3 iko menyadi
Pekerjaan : Pengajar
Alai Kerja : SK Long Lellang, Baram
P’nglama Gawa : 6 tahun

Nya meh bala maioh, serba sedikit perkara munyi ko jako laut sekali dak agi ke patut ditemu
kitai pasal pengantin lelaki. Enti kitak bisi utai ka tanya ngau ka nemu lebih agi enggau silik
agi, ulih nanya Igat Byrigther empu, tang anang lebih-lebih, laban nangi ke entua ya ke lelaki
nya ari nyadi tukang biau nyadi tukang miau urang ke tanju legi.
Nyadi diatu, bakanie rintai seduai ya tok bepun ari berkelala nyentuk ke ulih nyadi melaki
bini kini? Bisi kitak kala nanya seduai ya? Seduai ya sebenarnya enggai madah ke urang tang
laban emcee keran ka nemu terpaksa seduai ya nusoi lalu utai tok udah diberi pemendar
seduai ya empu ditusoi agai bala maioh baka ke lemai tok, sapa ke nadai baka ke lemai tok
ranjur meh enda nemu cerita pasal sejarah seduai ya ari berkelala ngejung ke seduai ya jadi
melaki bini.

Seduai ya bertemu ba Facebook, nemu kitak nama reti Facebook enda? Jarang kitai nadai
Facebook kemaia ari tok, Bob pun bisi Facebook, ulih anjung friend request kitak agai ya,
Bob Tutupoli nama ya ba Facebook. Ba Media Sosial, cinta Facebook seduai ya asal ya, aku
enda nemu sapa bagi seduai ya dulu nyukil sapa dulu chat sapa dulu, tentula manuk ke lelaki
enda, enda patut manuk indu dulu, enda ga ku nanya. Nya kebuah kita ke empai bisi tawing
anang putus asa, Facebook kan ada. Ambi peluang belajar ari seduai ya, berkelala ari
Facebook tau ngujung nyadi ke laki bini, maioh urang madah cinta Facebook pedis ka nyadi,
tang tok seduai ya deh bukti Facebook ulih nemu ke jodoh melaki bini.

Pemuas-muas seduai ya bertanya ba Facebook tadi, diak Igat Byrigther mai Endu Amlyn
bepangan kena ke aribulan 26 Jun 2020. Dahnya ati ya ke lelaki tok alu enda tan agi meda
pemajik anak Mr Tagir, diak ya alu mai apai indai ya nanya endu Amlyn tekena ke aribulan
25 Disember 2021. Nasib ga ati Amlyn tok ka, alu setuju meh Amlyn tok tadi, laban dalam
penemu ya ke udah empai kala ga ya terpeda ke laki ti cukup sigat baka Byrigther tok ko ya.
Ati Byrigther tok majak kasak-kasak, ukai nama laban palan pengawa seduai ya jauh ari
pangan diri, irau meh ya tadi, diak tadi siti lemai udah ya makai lemai ya berunding, bakanie
daya ya ka nanchang endu Amlyn tok laban bala kaban ya bisi madah ke ya, bala laki kelebih
agi bala pengajar ba Selangau din cukup maioh sigat-sigat serta mentas ati. Dini enda ati ya
majak agik deh enda ternah. Ya lalu berumban mai endu Amlyn nanggam tali semaia enda
mudah terkelecut ba jari ba JPN Sibu, kena ke 11 Mac 2022. Diak tadi deh bala maioh, ati ya
bisi lantang mimit laban ko ya, nadai ulih lari agi manuk dah ditambat ku ko ya, nadai lebih
ari celak jari tanggam semaia tua ya ba JPN ko ya. Tang nya meh tadi ya agi irau seagi ya
enda nesau serta mandang ke ba bala maioh Endu Amlyn tok mina empu ya siko aja, mina
kumang ba ati ya siko aja. Diak ya matak bala ya berkayuh mudik ari ai Sungai Brangan,
pansut agai batang rajang, tama Ai Igan lalu terengkah ba Ai Aup, maioh pati ai endur ya
bekayuh kena ya ngulih ke Endu Amlyn, siko iko anak dara Mr Tagir ngau Mdm Elizabeth
diatu, nasib indai tugang enda ngasuh menantu ya bekayuh tama agai ai tuah, nya jauh agi
pejalai nya. Diak seduai ya ngujung ke baka dipeda kitai baka ke lemai tok, dirami kitai
terkena ke 28 Jun 2023. Tempap ke jari kitai bala maioh. Semua takah taun pengawa seduai
ya tok bertakah ke setahun-setahun magang, laban enda sabar ka nangkal getah kahwin tauka
Cut The Rubber Married ko Aunty Pendek, ukai nyamai mega let the rain change my tears ko
Aunty Pendek. Nya seduai ya enda ngambi timpuh ke lama iga ka bergelar laki bini.

Que : Randau Adat/Ngugi/Bergeliga (TR Catherine, TR Jenalius, Mr Thomas, Mr Limping)

Tuai Rumah Catherine Tamoh Anak Liom
Diatu kitai enggau penuh tabi basa deka ngagau ke ya ke dipebasa, Tuai Rumah Catherine
Tamoh Anak Liom ngari ke rakyat Sungai Aup ti deka sama nyada ke jako lalau ngagai
semua bala kitai ke bisi ngulu pengawa rami melah pinang baka ke lemai tok. Enggau tok
kitai minta ya mansang ke panggau kitu.
Bakanya meh tadi munyi sada jako serta tebah ari Tuai Rumah Catherine Tamoh Anak Liom.
Ngarap ke utai disebut nya tadi ulih mega nyadi ke chuan serta teladan ngagai seduai ke baru
ngepun ke pengidup nyadi laki enggau bini enggau kitai semua.

Tuai Rumah Jenalius Unchie Anak Anthony Lim

Nangkan ke jako ari Tuai Rumah Catherine Tamoh Anak Liom nya tadi, diatu kitai enggau
penuh tabi basa deka ngagau ke ya ke dipebasa Tuai Rumah Jenalius Unchie Anak Anthony
Lim ngari ke rakyat Sungai Brangan ti deka sama nyada ke jako lalau ngagai semua bala kitai
ke bisi ngulu pengawa rami melah pinang baka ke lemai tok. Enggau tok kitai minta ya
mansang ke panggau kitu.

Bakanya meh tadi munyi sada jako timbal serta tebah ari Tuai Rumah Jenalius Unchie Anak
Anthony Lim. Ngarap ke utai disebut nya tadi ulih mega nyadi ke chuan serta teladan ngagai
seduai ke baru ngepun ke pengidup nyadi laki enggau bini enggau kitai semua.

Mr Thomas Anak Apet

Diatu kitai enggau penuh tabi basa deka ngagau ka Tuai empu pengawa, Mr Thomas Anak
Apet, Apai kumang sehari kitai baka ke lemai tok ti deka mantai ke jako pengelalu serta jako
lalau ngagai semua bala kitai ke bisi ngulu pengawa rami melah pinang baka ke lemai tok.
Enggau tok kitai minta ya mansang ke panggau kitu.

Bakanya meh tadi munyi sada jako serta tebah ari sepiak pengantin indu. Ngarap ke utai
disebut nya tadi ulih nyadi ke chuan serta teladan ngagai seduai ke baru ngepun ke pengidup
nyadi laki enggau bini.

Mr Limping Anak Junit

Nangkan ke jako Apai Kumang sehari nya tadi, diatu kitai ngagau ka Tuai pengabang ari sida
ke lelaki, Mr Limping Anak Junit, Apai keling sehari kitai baka ke lemai tok ti deka mantai
ke jako pengelalu serta jako lalau ngagai semua bala kitai ke bisi ngulu pengawa rami melah
pinang baka ke lemai tok. Enggau tok kitai minta ya mansang ke panggau kitu.

Bakanya meh tadi munyi sada jako serta tebah ari sepiak pengantin lelaki. Ngarap ke utai
disebut nya tadi ulih nyadi ke chuan serta teladan ngagai seduai ke baru ngepun ke pengidup
nyadi laki enggau bini.

Que : Sembiang
Enda nyamai asi diempa tuchi enti nda dipegulai ke ngau lauk, bakanya mega pengerami kitai
enti enda diberekat, diatu enggau penuh tabi basa, kitai ngangkat ke Paderi Ningkan ari
Gereja Methodist Iban Sungai Aup ti deka ngulu ke sampi beberkat kitai baka ke lemai tok.

Terima kasih nuju agai ya ke dipebasa Paderi Ningkan atas sampi beberkat ke udah diulu ke
ya nya tadi. Ngarap ka pengerami kitai baka ke lemai tok terus bejalai lancar serta dijauh ke
ari sebarang penanggul.

betuchung baka bukit, bekebung baka langit, bepunchak baka jala, chelap lindap
nguan menua, bulih duit, bulih ringgit, bulih anak bulih telesak.

Bakanya meh sampi serta andal kitai dituju ke ngagai keling serta kumang sehari kitai baka
ke lemai tok.
Que : Persembahan Utama
Bala maioh, diatu sekali dak agi kitai deka diperindang enggau 3 bengkah persembahan
semua ya. Kesemua persembahan tok didatai ke kitai khas ari Kampung Budaya, ukai
Kampung Budaya Sarawak, tang ari Kampung Budaya 1 Malaysia ba kaki Bukit Aup diak
aja. Persembahan keterubah tok diberi sida ya gelar Ngajat Indu Pulai Mandi Lemai Ari Ai
Aup, penari-penari persembahan indu tok diwakilli oleh Mona Fendy Sunday, Sekelin
Valentine, Nimo Lom Sherry enggau Nini Becky. Terima meh persembahan ari sida ya ke
diberi nama Ngajat Indu Pulai Mandi Lemai Ari Ai Aup.

Terima kasih ke semua penari kitai atas persembahan nya tadi.

Nangkan ke sida indu ke ngajat nya tadi, diatu kitai deka diperindang enggau persembahan
ngajat lelaki ke diberi nama Kajat Bujang Song ke deka dipersembahkan oleh penari ke diberi
nama Juka Sunday. Terima meh persembahan ke diberi nama Kajat Bujang Song.

Terima kasih agai Juka Sunday atas persembahan ngajat nya tadi, cukup manah cukup landik
ya ngajat.

Persembahan ketiga serta kepenudi ya datai ari Biro Wanita JKKK Sungai Aup. Persembahan
tok berbentuk tarian serta diberi nama Gemo Fa Mey Rey. Taja pan bisi nama Gemo, tang
nadai Aunty Gemuk ngau urang dalam tarian nya bala maioh auk. Terima meh persembahan
Gemo Fa Mey Rey ari Biro Wanita JKKK Sungai Aup.

Terima kasih agai Biro Wanita JKKK Sungai Aup atas persembahan tarian ke diberi nama
Gemo Fa Mey Rey nya tadi.

Que : Nyarung Cincin/Motong Kek/Toast

Bala maioh, kena neruska pengawa kitai baka ke lemai tok, kitai ngangau ka ya ke dipebasa
Tuai Rumah Catherine Tamoh Anak Liom, ya ke dipebasa Tuai Rumah Jenalius Unchie Anak
Anthony Lim, Mr Thomas Apet enggau Madam Elizabeth Sepun, serta Mr Limping Junit
enggau Madam Siti Saat, sama bela mansang ke pelamin ditu begulai enggau kedua-dua
keling enggau kumang sehari kitai. Diatu sama bela besaksi ke kitai bala maioh semua, kitai
deka meda kedua-dua pengantin kitai bertukar serta bersarung tinchin tanda seduai ya sah
udah jadi melaki bini baka ke lemai tok. Diatu pengantin lelaki enggau indu ulih sama
bertukar serta bersarung ke tinchin.

Nangkan ke pengawa bersarung ke tinchin nya tadi, kena seduai ya ngamin ke pengawa nya,
seduai ya dipinta sium-sium sayang-sayang pangan diri ba mulut sepengelama 10 sikin, enti
seduai ya enda datai 10 sikin seduai ya deka dicas kitai segelas siko.

Bepuput angin ke menua India,

Lindap lemai ba kaki tangga,
Kek kahwin udah pan tersedia,
Nganti pengantin ngasur ke lungga.

Nyadi kena kitai neruska pengawa kitai baka ke lemai tok, diatu kitai deka bejadi ke pengawa
melah kek kahwin lalu ngaga ‘toast’ ke pengantin baru kitai baka ke lemai tok. Enggau nya
kitai deka ngagau kedua-dua keling enggau kumang sehari kitai, apai indai sepiak ke lelaki
enggau indu serta bala tuai rumah, agi bela kekal ba pelamin ambi kitai ulih sama bela
ngerami ke agi pengawa tok.
Diatu pengantin indu enggau lelaki sama bela bepegai jari melah kek udahnya legi pengantin
laki nyuap kek agai pengantin indu, pengantin indu nyuap kek agai pengantin lelaki. Apai
Indai seduai ya nibuh meh, udah kala bersuap kek ga seduai ya suba, nyo udah puas ko seduai
ya, tang enti agi ka agi ga ulih mulai ke pengingat suba.

Diatu kitai deka ngaga toast ke seduai ya, aram kitai semua sama bela angkat berdiri lalu
megai gelas ke bisi ai bisa tauka ai oren ambi kitai sama bela ulih ngaga toast ke seduai ya.
Kitai deka nyebut Ohhhhhhaaaaa sepemaioh 3 kali udahnya, ba ujung Ohhhhhaaaaa ya ke
tiga nya kita sama bela nyebut besai-besai Selamat Pengantin Baru!

Terima kasih nuju agai semua bala ke sama bela temegah ati niki ke pelamin lalu nyempurna
ke pengawa melah kek enggau ‘toast’ nya tadi.

Que : Muka Baku

Kitai deka nerus ke pengawa kitai enggau pengawa ke diberi nama Bebuka ka Baku. Nyadi
bakanie cara kitai ngatur pengawa buka baku tok bala maioh laban kitai semua sama bela
nemu, pengawa buka baku tok pengawa bepekit antara sida lelaki sebilik ngelaban sida indu
sebilik, sapa tumu gik terbuka ke baku nya ya meh menang, dahnya ke laun terbuka ke baku
dikira alah lalu deka diukum tukang cas kitai ke udah dipadu pangku pengawa nya baka ke
malam tok. Baku urang indu deka dibaie indai pengantin indu, Madam Elizabeth Sepun, ngau
baku urang laki deka dibaie indai pengantin lelaki Madam Siti Saat. Seduai ya diatu sama
bela ngiga serta mai bala seduai ya enggau bepekit muka baku tok. Tukang cas kitai diminta
bersedia meh.

Bakanya meh tadi pengawa muka baku kitai ke udah meda bala ari pengantin lelaki/indu
udah menang dalam pengawa bebuka ke baku, tahniah ngagai ke udah menang nya, ya ke
alah anang tusah ati, ulih cuba baru, giga meh sapa ke agi ka belaki ngau bebini malam tok
kerantar ke sekali ambi kitai ulih bepekit muka baku baru malam tok ba pusingan yang
kedua.

Que : Sesi Bergambar

Tembu pengawa muka baku nya tadi, diatu kitai bisi sesi bergambar enggau bala pengantin
kitai. Cara kitai bejalai ke pengawa tok, aku sebagai tukang kangau deka nesau ripih ya legi
sapa ke bagi dulu bergambar enggau pengantin, ya ke enda sempat dirintai deka bergambar
enggau pengantin, kita ulih minta bergambar enggau seduai ya maia seduai ya nyadung ai
kahwin seduai ya legi.

Bergambar : Pengantin + Ibu Bapa Pengantin

Pengantin + Family sepiak Indu
Pengantin + Family sepiak lelaki
Pengantin + Family Lelaki + Family Indu
Pengantin + Family Besai Indu
Pengantin + Family Besai Lelaki
Pengantin + Bala Kawan Pengantin Indu
Pengantin + Bala Kawan Pengantin Lelaki
Bala maioh, tembu udah sesi bergambar kitai baka ke lemai tok, kitak ke enda hampit
bergambar enggau seduai ya tau nguji nangkap seduai ya maia nyadung ai kahwin legi auk.

Que : Beambu isan enggau ipar

Nangkan ke pengawa bergambar nya tadi, diatu kitai deka neruska pengawa kitai enggau
pengawa beambu isan enggau beambu ipar. Pengawa tok bisi empat pusingan semua ya.

Pusingan pertama : Bambu isan indu (Madam Elizabeth Sepun and 10 indu)
(Madam Siti Saat and 10 indu)
Pusingan kedua :Bambu isan lelaki (Mr Thomas Apet and 10 lelaki)
(Mr Limping Junit and 10 lelaki)
Pusingan ketiga :Bambu ipar indu (Madam Sherry Ngadan and 10 indu)
(Madam Stella Genta and 10 indu)
Pusingan keempat : Bambu ipar lelaki (Mr Alvin Tugang Anak Thomas and 10 lelaki)
(Mr Angkam and 10 lelaki)

Bakanya meh tadi pengawa beambu isan enggau ipar kitai.

Que : Sesi memberi hadiah

Diatu kita deka nerus ke pengawa kitai enggau sesi memberi hadiah kepada kedua-dua
pengantin, jadi nuju sapa bagi bala kitak ke bisi mai rediah, ulih nyua agai jari seduai ya
empu diatu.

Terima kasih nuju ngagai bala kitai ti udah gerah jari meri seduai ya hadiah rami melah
pinang, ngarap ke kitai lebih agi sama murah jereki udah tok.

Que : Sesi karaoke selang seli (hantar nama dan tajuk lagu)
Diatu pengantin kitai deka bertukar garik dulu laban udahnya seduai belabuh nyadung ai
kahwin seduai ya ngagai semua bala pengabang ke bisi datai baka ke lemai tok. Nyadi bala
maioh, kitai nibuh enggau seduai ya bertukar gari engka bisi utai kini ka ditusi ke seduai ya
melaki bini ke enda tau sesekali dedinga kitai. Kitai deka nerus ke pengawa kitai enggau sesi
nguji nyawa tauka ke karaoke, jadi cara pengawa tok bejalai, kitai deka minta penyanyi kitai
legi selang seli merindang kitai baik ari sepiak pengantin indu enggau baik ari sepiak
pengantin lelaki. Nyadi sida ke berminat ka belagu tok legi ulih nganjung nama enggau tajuk
lagu kitak agai bala sida Terrence Sound & Entertainment, lalu legi aku deka announce bala
kita ke berlagu nya.

Sebedau nya tempap ke jari kitai agai raban Terrence Sound & Entertainment laban enti nadai
sida enda mukai-mukai sigi timpang meh pengawa kita baka ke lemai tok. Nyadi nuju ngagai
sapa-sapa bala kita udah tok ke berminat ngena servis ari Terrence Sound & Entertainment
kita ulih ngiga sida ya empu dah tok legi lalu berpinta ke nombor talipaun binching sida ya
auk. Nyadi nuju ngagai tukang cas, nyangka dipeda aku kurang cas magang-magang sida
bandboy ari Terrence Sound & Entertainment tok, ulih dicas dulu sida ya kini, ambi lagu
ngau muzik ditebah sida ya betul serta ngam agi legi. Cunn ko Ida.

Kitai ngepun ke pengawa kitai enggau;

Apai Indu
Apai Lelaki
Wakil Indu
Wakil Lelaki

And the list goes on…..until morning…..