Jaku Pemuka

Uji anang guai inggar kita bala pengajar ke nyandar duduk di mija
Uji ngetu dulu kita bejaku enggau dagu dabung segala
Uji anang guai randau bukai meh kita wai bekenang ke rambai pekara
rama.
Uji anang ragak meh kita ke biak ngetu nyulik handphone Oppo
Ninga ke bala kami sebuat ngatur langgur pengawa sekula
Mantaika kereja jurai ngi kami wai lagi meh kita ninga
Enti iya ngena ba penemu kita,nya ke digiga, ngambika iya tau diguna
Enti bisi salah tau dibulah ngambika berubah nyadi
Menyana
Awakka pulai lagi ma kitai wai penuh bepinat
Awakka kereban ngi kitai bedunjung munju bepadat
Laban kitai deka naburka jaku Iban standard
Awakka bala nembiak sekula pandai macha pandai nyurat
Ngujungka sida ila landik bejaku bejurai ke surat
Ngambika kitai enda punas bansa, enda lenyau adat
Teguh bediri enda mudah rarat Dipebasaka mensia
dikelala ba adat
Aram meh kitai nyain surat sempekat
Ngemeranka jaku Iban ngibun temeran temuku adat
Ngambi kitai bansa Iban bediri sama chechegi
duduk sama entap Penuh pengarap nadai penimpang

Nyadi nama aku tu Mackla Peter Langan

Ukai laki ribai datai ari julut menua Tasik
Ukai Dayak penakan ke nguan Kalimantan, Indonesia
Ukai mega laki Pilipin Tagalog ke
burak sigat tampak rita
Nama Mackla tu mega nadai kala disebut sida lemambang
dalam leka timang jeman kelia.
Ukai mega ngangkatka nama sida niang aki ke dulu rimpi mabun laya.
Jadi nama tu,datai ari nyerumba pengerindu apai enggau indai jeman
kelia. Nama ti udah ditetapka dalam sempekat surat pengada,ditepu
dalam tenki kad pengelala

Enti pemandai, penau enggau gamal tu wai.

Bangat nadai enda baka pemayuh skru rantai lipan,penau enggi diri enda
ngemayuh sulur paku penuh emperan, anak gamal pan enda ga baka
penyigat anak penakan.Tang ketegal ka sayauka jaku enggau lati bansa
diri lenyau ,nyanggup meh aku wai, dianjung bala Tuan-tuan PPD ke
Mengeri Kuching ngarika Mengeri Maling nuntut penemu..