Disusun Oleh :

M. FARID ALWARITSI

SMP NEGERI 2 SAMPANG

2017
 PANTUN MADUREH

Namen cabbi namen babang

Terrong perrat gabay jamo
Ajar ngaji ajar bajang
Dha’ aherat gabay sango

Nyaba’ lappa neng romana

Nyambi assem pamolena
Ajja’ loppa dha’ agamana
Odhi’ marem ban arena

Ka bajem melle katombar

Mano’ poter kaka’ towa
Pabajang ba’na se ajar
Ma’le penter kalamon towa

Kampong Cena e temor daja

Gula palo e romana
Pong pong ba’na gi’ dha-ngodha
Ja’ malo anya tanya
 PUISI MADUREH

TALEKKO
ngalèbâdhi bhut-ombhut, èbbhâ’ moso ghi-bighiân
è mosèm nambhârâ’, ghu-lagghu sè èoburi ebbhun
pandhengnga mata ghi’ taalang bun-arbun
sambi ngèjhung bi’ saronèn sè ètopè dhâghâ kalowar ra’-ora’ èlè’èrra

toju’ kadhibi’ân è bâto karang è pèngghir sèrèng

mano’ talekko la paḍâ ombâr, cè’ locona, cè’ manèssa lèlèbâna
mano’ sè èsebbhut kèya dhârâ tasè’
amarghâ para’ paḍââ bi’ mano’ dhârâ

buluna èsak abârna bu-abu

cocco’na abâk lanjhâng bân lancip

èmot ka alè’ sè raddhin, sè maghreggheddhân atè

pon la abit bulâ sè nyarè dhika, bâḍâ èko’imma ma’ taḍâ’ kabhârrâ
ḍu alè’ dhika raddhin tor manès amara talekko,
sè ngabbher è bâng-abâng, pangabângnga ngatang rè-lèrè

malar moghâ èpastèaghi jhâ’ dhika pajhât pèlèan atè bulâ

ḍu Pangèran kabbhulaghi pangaterro abdhi dhâlem
ka alè’ sè raddhin sè amara talekko,
sè ngapèncotè atè.

KEMBHANG MALATHE
Tang malathe molae ngembang
Badha se mekko badha se mekkar
Tombu e seddi’na labang
Patamanan arum sekkar
Ro’om asreddhengngan
Mossa’e patamanan
Bernana pote tor ngetthak pole
Sengko’ senneng tor komenak pole
Sekkar pote
Epetthega
Sasemba’an
Dha’ tresna ate
GHI' NYAPO' SOBBHU
Ajhâlân kadhibi’ân è rem-oremma cajâ
Bâḍâ è nga-tengngana sèttong kennengngan, akadhi ngarbâng
rassana bhâdhân.
Mo-temmona tapanggghi sareng alè’ raddhin buwâna atè,
ta’ man-toman bulâ ngrassaaghi atè kapèraghân.
Biyasana lè’ dhika ta’ toman marḍuliaghi bulâ polè,
sejjhegghâ dhika bân bulâ pon abit apèsa.
Pajhât tapèsa ongghu

Tabegeggennan nalèka dhika asanappel ka bulâ

pèpèna sè ghi’ bâcca adhrisdhisân aèng mata, nalpè’ ka pèpè bulâ
palèrègghâ dhika lè’ matalka atè
rassa caltong sè ampon abit bâḍâ èḍâlem atè
dhâddhi ngobbhâr ḍâḍâ sè èpossa’è rassa tarèsna sè èsto

bit-abit polè dhika pas ngèṭèsaghi prasaan bulâ

atè bhingong ta’ karowan, mon tarèsna lè’ torè bi’ ongghu
ḍu... jhâ’ kangsè’ bulâ ngen-bângennan
dhika ngandhika tarèsna namong dhika ta’ kobâsa
ghun coma pandhengnga dhika mènangka cacana atèna
dhika sajân jhâu ḍâri bulâ,
ètabâng.. sâjân ètabâng sajân ta’ kacapo’

Atè ḍeg-gâḍegghân,.. tako’ kaèlangan dhika polè

Bulâ jhâghâ è teng-pettengnga
È… taona bulâ ghun coma amèmpè
Namong atè talanjuk bhunga bân kapèraghân ongghu

Ta’ anapè makko ghârowa ghun coma mèmpè

Ca’èpon, … mèmpè kembhângnga tèḍung
Pajjhâr pon para’ ngombârrâ
Ajâm saroju’ paḍâ akongko’, monyèna sanget lantè
Bhâjjhrâ ghi’ nyapo’ sobbhu!!

ASAR MABA
Ebara’ langnge’na ngadarbang
Ngeyase gir sereng gunong se tenggi
Cajana nyennengagi
Tata’anna berse tor maperna
Ngeyas caja ngoker bang-abang
Alamma eparas snneng tor asre
Kapencot ate bula
Jellingngagi caja aar maba
Emanna adhu eman, aman
Ja’ aggi’ dhika elang
Eman
Dhari mata pon samar
Ta’ kobass aba’ bula
Se badhi alanglang
E bara’ langnge’na pon sorem
Cajana se asre elang laonan
Jai aggi’ badhi ngerrem
Dinggalagi berta tor ngen-angen
 CERPEN MADUREH

JOKOTHOLE APERRANG
ALABAN PANGERAN NAGARA KELLING

E kacareta’aghie neng nagara kelling gapaneka settong raja se sanget sakte mandrgunana
tor tadek se bisa nandinge. Raja gepaneka andhi’ settong potra se anyama Dempo Awang ( San
Po Tualang ). Saamponna potrana ampon dhibasa, Dempoawang esoro kaangguy lekkas akabin
sareng potre peleanna.

“ Nak, satiya be’na la dhibasa sapantessa bekna lekkas akabin, pele ban sare potre se
be’na senneng, deggi’ pas elamara ban sengko’ “

“ Bunten pak, abdhina tak akabina tor nyare potre se raddhin. Namong abdhina andhik
pangaterro sakabbhinna bebini’ se gi’ paraban, abdhina terro anikmadhagiye tanpa tedhung
apolong “

Ngedhing pangaterrona potrana se tak masok akkal kasebbhut, bapakna sanget tarkerjet
tor tacengngeng. Namong amargha Dempoawang aropa’aghi potra se sanget ekasayange, sagala
parmintaan ban pangaterrona e torodhi.

Saamponna gapaneka Dempoawang minta kaangghuy eghabayaghi settong parao se bisa

ngabang neng beng – abang se e lengkabhi kalaban awak tor paraladhen perrang. Sakabhinna
parmintaanna jughan etorodhi.

Saamponna ghapaneka Dempoawang mangkat alajer nojju dha’ nagara Cena. Saamponna
depak neng lun – alun, kadetengnganna Dempo Awang e sambut kalaban dhalam istana, tor pas
etanya’aghi tojjuenna dateng ka naghara Cena.

“ Kennlaghi nyamana Dempo Awang potra dhari Rato Bernama. Kadhatengnganna kami ka
dhinna’ kaangghuy ngala’ ban anikmadhi parabanna paraban gadis naghara Cena tanpa tedhung
abereng”

Kaisar Cena takerjhat ngedhing maksod kadhatanganna ban Kaisar Cena ausaha se –
sanget kaangghuy nolak pangaterrona. Akibad kadhaddhien ghapeneka andhaddhiaghi
paperrangan saengghana bennyak dhari tentara Cena tebas. Ta’ abuthoaghi bakto abit Naghara
Cena bisa etaklukkan saengghana Dempo Awang bisa alampiasaghi pangaterrona.

Saampon ghapaneka Dempo Awang nojju dha’ Naghara laen ban sakabbinna bisa
ekalaaghi tor ekuasai.

Ta’ abid saellana ghaneka Dempo Awang nojju dha’ Tanah Jaba, saterrossa Dempo Awang
ngire utusan se eberri’ tugas kaangghuy ngiba sorat dha’ Rato epon Majapahit, akhirra Karajaan
Majapahit bisa ekala’aghi kia.

Saellana bedha neng Majapahit Dempo Awang ngerem sorat dha’ Madura se etojjuaghi ka
Arya Kudapanole.

Saamonna soratta etarema tor e baca, Arya Kudapanole dukan kalaban ahentak bumi,
sambi ngocak ka otosanna.
“ Ngoca’ ka tuanna be’na, soratta la etarema ban apa maksodde la sengko’ kataoe. Bile’e
bhei tuanna be’na se nyerbu aperrang sengkok paggun alaban. Ben pole ngocak ka tuanna bakna,
mon jet lake’ mara aperrang settong labhen settong”.

Marena ruwa otosan jeriya langsong mangkat ka Majapahit. Sadhepa’na e Majapahit,

otosan ganika alaporragi ban nyampayyagi apa se edhabuwagi Arya Kudapanole. Dempo Abang
ngamok saamponna ngeding laporan otosan genika. E bakto ruwa kiya Dempo Awang mangkat
neteni kapalla nojjhu dha’ Sumenep.

Tak abit salastarena ghapaneka, Arya Kudapanole ngoladhi parao lebet langngi’ dheri laok,
marena ruwa Arya Kudapanole adikani jerenna Si Megaremeng pas langsong nompa’ ka
tengngana jerenna. Jerenna Si Megaremeng ngabbher ka langngi’ gebey nyambut paraona Dempo
Awang.
 Sekaduwa sajen semma’ ban akherra deddhi peperrangan e attas langngi’ se cokop abit.
Sekaduwa saleng tabra’an tape, sekaduwa tadhe’ se kalah polana padhe kowat. Polana ruwa
Dempo Awang karepodhen ban posang oreng nompak jeren bisa ngabbher.

Samentara ruwa datenglah Adirasa ban Adipoday noro’ nolongi aperrang. Polana jeriya
Dempo Awang arassa kalah pas mole ka Majapahit. Tape Arya Kudapanole tak aberri’
kasempadhan, Arya Kudapanole nabheng parao ruwa.

Saellana dhepa’ dhepa’ e attassa tase’, parao bisa etabheng pas deddhi paperrangan.
Parao Dempo Awamg peccah polana tandhu’anna jerren Si Megaremeng. Marena jeruwa Dempo
Awang adikane bapakna pas langsong bapakna abento perrang.

Tak abit marena ruwa, Dempo Awang arassa kalah ban tak bisa agebhey apa-apa akhirra
atobhet. Tape Arya Kudapanole tak nanggebbhi, pas langsong Arya Kudapanole meccot ngangguy
comettena se nyebabbahi Dempo Awang mate ban paraona ancor pas nyellem ka tase’.

Rengkes careta marena paperrangan, Adipoday langsong ajalen le-lere nojjhu dha’
Karaton. Saat ruwa Arya Kudapanole nemmoni pottrana se teppak ju’-toju’ e korse abereng binina,
katepadhen Arya Kudapanole acaca masala perrang gelle’.

E saat Arya Kudapanole oneng bapakna rabu, Arya Kudapanole sareng binina toron dari
kalongguwenna ghebey nyambut karabuanna sambi asallim ka bapakna.

Teppa’na abdi Keraton ngoladhi Adipoday, pas langsong nojjhu dha Keputren sambi
apareng oning dha’ Raden Ayu Pottre Koning.

“Towan pottre, pottrana towan pottre karabuen tamoy lalake’ se salerana merep pottrana
towan puteri.”

Ngedhing laporan inangnga Pottre Koning, langsong kalowar dhari Kaputren nojjhu
Pendopo. Sadhepa’na neng Pendopo, Pottre Koning tagherjet polana ngataoe tamoyya se
emempeaghi saat atapa. Pottre Koning langsong adhetengngi pas nyembheh sambi nangis.
“Saongghuna kandalah se hamba cepta molae lambha’, buru samangken kanda muncol
samarena pottrana raja”

“ Jha’ nangis malolo dinda amargha kadetengnganna sengkok ka dhinna’ kaangghuy

atemmo moso ba’na “