TANYA 1

Prinsip ‘Konflik tau nganchurka daya idup’ ti mai penemu iyanya: (i) Konflik ngacau
pengelikun idup, (ii) Adat enda patut diubah nitihka peneka nembiak iya, tang nembiak iya
patut nitihka adat, (iii) Belaya nya tau nganchur sereta enda ngenataika penguntung, (iv)
Orang ti ngenataika konflik patut diukum. Bejuraika prinsip ‘Konflik tau nganchurka daya
idup tradisional kitai Iban’ dalam kurang lebih 500 - 1000 leka jaku.

Dikelala Buah ari Langgu, Dikelala Basa ari Penyiru, Dikelala Bansa ari Jaku. Tu mih
sempama ti suah bendar dikena kitai ngayanka bansa diri. Ambika chunto, kitai bansa Iban
endang sigi bejaku dalam jaku Iban lalu ari leka jaku Iban tu mih kitai dikelala orang bansa
Iban. Lebuh ti begulai sereta beinteraksyen enggau bala mayuh kitai endang bisi penanggul
lebuh bekomunikasyen. Munyi ku orang, makin mayuh kitai bejaku makin mayuh penyilap
deka digaga kitai.

Ukai semina ari komunikasyen aja ulih mai penanggul ngagai diri, tang ari utai bukai
mega ulih mai penanggul dalam idup. Konflik tu mai mayuh reti chunto iya baka konflik diau
ba rumah panjai, kitai suah besengki jaku tauka penemu enggau pangan diri. Konflik ti baka
tu deka ngacau pengelikun idup nyentukka kitai diau serumah enda nyamai pending laban ti
suah belaya sereta betimbal leka jaku. Pengawa ti bakatu enda manah dipeda sida ke nembiak
laban sida jampat nunda ulah ti dikembuan kitai ke tuai lalu nangi sida betunda ba sekula.

Belaya nya tau nganchur sereta enda ngenataika penguntung. Pengawa belaya enggau
pangan diri nadai mai sebarang penguntung ngagai diri empu. Ambika banding, belaya
ketegal reta tengkira apai indai ti udah nadai. Pengawa tu suah udu mansa pending aku, diri
menyadi belaya ketegal reta. Nama penguntung ti diulih ari belaya diri menyadi ketegal reta
pengaya ba dunya. Munyi ku orang, reta pengaya nadai ulih dibai mati nadai ulih dibaya ba
pendam kitai. Ari ke belaya, manah agi kitai semadi beserakup teguh agi, buji nadai apai
indai. Penyerakup diri semadi beguna agi ari reta ke nemu ambis nya ila, tang penyerakup
enggau kaul diri semadi enda nemu ambis nyentukka seput padam dudi ari ila.

Kelimpah ari nya, adat enda patut diubah nitihka peneka nembiak iya, tang nembiak
iya patut nitihka adat. Kenyau ari ini aki kitai kelia, adat bansa Iban endang udah bisi dikena
tuai rumah tauka orang bukai ngetanka daya idup enggau asal main kitai Iban. Ambika
banding, adat ngulit tanda adat basa kitaio Iban ngagai ke parai enggau sida sebilik. Adat
ngulit endang seruan digaga kitai bansa Iban ari kelia munya lalu kitai ti nembiak enda tau
peneka ati ngubah adat kitai Iban tang kitai patut ngemeranka adat kitai Iban ngambika enda
punas sereta kitai Iban bisi identiti bansa kitai empu sampai ila-ila.
 Kepenudi iya nya, orang ti ngenataika konflik patut diukum. Ambika banding, sida
serumah bisi siku ngaga penyalah enchuri. Dia mih orang ti enchuri tu deka dirandauka ba
mua diri serumah lalu deka diatur tuai rumah. Tuai rumah mega deka berandau alu minta
penemu siku-siku bakani ka ngatur pengawa tu ngambika bisi keadilan ba diri serumah. Tuai
rumah ngena jalai ukum tauka tunggu ke lempung tauka mit agi baka enggau penyampau telu
manuk, paku lawang, mangkuk, chapak enggau pinggai. Tunggu nya dikumbai se-uta iring
manuk. Nyadi selalu dikena nimbang penyalah ke lempung sereta mega dibayar bala pengari
baka bala pangan enggau kaban belayan orang ke bempu penyalah. Pengawa ukum tu patut
digaga nyema bisi penyalah digaga ngambika penyalah ti sebaka enda digaga baru jemah ila
lalu ukum ti diletakka nyadika teladan semua orang.

Berindik arinya, konflik ti tau nganchurka daya idup tradisional kitai Iban patut amat
diputarkka ngambika nembiak rebak baru enda nunda tauka nitihka singkang kitai ti udah
salah jemah ila. Kitai ti tuai patut meri chunto sereta teladan ti manah ngagai nembiak rebak
baru gambika ila sida enda idup dalm konflik baka ke diatu.

(561 leka jaku)

TANYA 2
Beratika leman komunikasi traditsional kitai Iban di baruh tu. Terangka tuju komunikasyen
nya, gaya jaku ti dikena ngemantaika juluk ati, prinsip berunding enti bisi dikena, enggau
etika ti bisi diayanka dalam leman komunikasyen tradisional nya. Panjai karang dalam
kurang lebih 500-1000 leka jaku.

Ke baruh rumah anang meda

Enggai ka dikumbai orang ngiga
Serenti babi belang.
Ke gelanggang anang nentang
Enggai ka dikumbai orang ngiga
Tugang manuk labang.
Ke ruai anang nampai
Enggai ka dikumbai orang ngiga
Orang bujang.
Ke bilik anang nilik
Enggai ka dikumbai orang ngiga
Ningka tajau beluyang.
Ke sadau anang ngilau
Enggai ka dikumbai orang nilik
Burit tibang terentang.

(Diambi sereta dibali sepil ari Leka Main Iban, Anthony Richards, 1966)
Komunikasyen tu siti proses ti sistematik, interaksyen ti ngena lambang, bejadi enggau
meratika reti. Munyi ku Joyce M. Hawkins (2008), reti komunikasyen iya nya ngenataika
penerang tauka pengasai ati tang leka jaku mega mai reti ngenataika penemu, runding tauka
buah pikir. Nya alai, komunikasyen tu siti chara dikena kitai mensia bejaku enggau pangan
diri, bekaul tauka berinteraksyen. Enggau chara bejaku sereta berinteraksyen enggau pangan
diri, kitai mega ulih ngerapatka agi kaul enggau pangan diri lebih agi enti kitai diau begulai
ba rumah panjai. Ari tu tadi, orang bukai ulih meda kaul kitai manah tauka enda ari ke meda
chara berinteraksyen enggau diri serumah.

Tuju komunikasyen tu meri empas ti chukup besai ngagai semua kitai. Kebuah pia
laban enti nadai komunikasyen, pedis kitai deka ngatur sebarang pengawa kelebih agi
pengawa ti diatur begulai enggau orang mayuh. Ambika banding, lebuh nyadi pengajar ba
sekula. Kitai patut ngembuan pengelandik dalam komunikasyen lebuh ngajar nembiak ba
sekula sereta berandau enggau apai indai nembiak. Tu mih kebuah komunikasyen ti bekualiti
beguna bendar ngambika enda ngemediska ati orang ke ninga kitai bejaku sereta
komunikasyen ti engkeman mega deka meri penerang ti chukup terang enggau enda nusutka
runding nembiak.

Kelimpah ari nya, komunikasyen mega beguna bendar dalam pengawa penyerakup
bala mayuh. Ambika chunto, pendiau kitai ba nengeri. Kemaya hari diatu, kitai Iban mayuh
udah diau ba nengeri laban ke bekereja lalu meli rumah ba nengeri. Diau ba nengeri, kitai
deka betemu enggau mayuh raban bansa bukai baka Melayu, Cina enggau India. Chara
komunikasyen sereta daya idup siti-siti raban bansa bebida. Nya alai, kitai suah dilalau idup
dalam konsep 1 Malaysia sereta belajarka chara komunikasyen enggau daya idup bansa bukai
ngambika kitai ulih idup beserakup enggau pangan diri.

Nitihka chunto leka main di atas, gaya jaku ti dikena ngemantaika juluk ati ti
keterubah iya nya babi belang. Babi belang iya nya bansa babi ti bebulu burak apus tauka
jaku kelaung dikena nyebut orang putih. Bekenaka jaku kelaung dalam leka main manah
amat laban jaku kelaung tu mantaika identiti kitai Iban sereta ngasuh nembiak rebak baru
belajarka jaku kelaung ti enda kala didinga sida iya. Jaku kelaung tu siti ari leman jaku ti
dibungkur jaku sempama. Jaku tu endang dikena kitai Iban besehari-sehari. Tu ngayanka kitai
Iban chukup siru, bisi pemanah basa enggau ngena jaku kelaung tu ngambika ngelaung utai ti
tau nganu nyawa.
 Prinsip berunding mega beguna bendar lebuh kitai ke deka mansutka leka jaku lebuh
ti berandau enggau orang bukai. Kebuah pia laban ari jaku mih orang nemu beratika pendiau
kitai. Ambika banding, lebuh ti deka neletakka ukum ngagai orang ti udah enchuri ba rumah
panjai, nuan ti tuai rumah patut ngatur pengawa tu ngambika enda ditunda orang bukai
kelebih agi sida nembiak tuai rumah mesti berandau enggau diri serumah lalu meri tunggu ti
engkeman ngagai orang ti enchuri nya tadi. Diak mih tadi proses komunikasyen beguna
bendar lebuh dikena berunding dalam ngatur pengawa.

Dalam komunikasyen, etika lebuh bekomunikasyen enggau orang bukai mega patut
dikemeratka kitai. Etika tau ditisih kitai ari gaya jaku (baka jaku positif), deskriptif,
pengesah, beterus terang, jaku lalau, silup, kelikuh enggau jenaka lebuh bekomunikasyen lalu
semua leman nya tadi tau mega dipeda ari bansa enggau struktur sesebengkah randau.
Struktur randau ngembuan mayuh macham chunto iya baka orang bejaku chara ‘spontan’
tekala nya tauka enggau asai ati maya nya sereta nadai merambuka topik sida. Etika lebuh
berandau bisi empat lalu keterubah iya nya ‘Authenticity’ meri reti randau ti lurus, enggau ati
ti nyamai laban utai disebut nya relevan sereta enda ngakal orang. Bekomunikasyen ngena
etika tu deka meri mayuh pemanah ngagai semua orang laban randau tu deka semitan sereta
enda ngemediska ati orang bukai.

Etika ti kedua iya nya ‘Empathy’ meri reti kitai ngasaika diri ba endur orang ti bejaku
enggau kitai nya. Bekomunikasyen ngena etika tu deka ngasuh kitai kitaio beratika sereta
ngasaika bakani asai ati orang ti bejaku enggau kitai nya. Ambika banding, Kepala Menteri
tauka Tuai Rumah meri licha ngagai kitai serumah senetn]ang chara nyeliahka diri ari kena
rampiyt penyakit Covid-19 ti majak nyerekai kemaya hari diatu. Tang enti nyema kita
serumah nyau mantah atur ti betul,kitai patut berunding pengasai ati sida iya. Nya kebuah
kitai patut meri respons ti positif ngagai komunikasyen ti positif mega.

Kelimpah ari nya, ‘Confirmation’ iya nya meri runding ti ulih diasai orang manah
tauka orang enda ngasaika diri betul tauka salah lebuh berandau enggau kitai. Chunto baka
Tuai Rumah ti benung meri licha ngagai kitai serumah, Tuai Rumah nya patut berunding info
ti semitan ngambika runding Tuai Rumah datai ba runding diri serumah mega. Kepenudi iya
nya, ‘Presentness’ iya nya mandangka diri ninga sereta bekaul runding enggau orang ti
bejaku baka kitai nanya pasal utai ti kerandauka orang nya. Dalam konteks tu kitai patut
bekaul tauka betanya pasal utai ti dikerandau orang nya nagmbika komunikasyen nya semitan
agi.
 Ba penemu aku, komunikasyen chukup beguna bendar lebuh ke diau ba rumah panjai.
Kebuah pia ketegal lebuhka ngembuan etika komunikasyen, kitai ulih ngerapatka kaul antara
diri sama diri lebih-lebih agi lebuh ke diau ba rumah panjai. Ketegal pia laban kitai diau
serumah lalu mesti bisi kaul ti manah ngambika idup kitai senang lantang nadai pemenchi
antara diri serumah. Etika komunikasyen dalam bejaku mega ulih ngayanka info ti ditusui
nengah ruai pangan diri nya jelas didinga sereta semitan. Enti nyema info ti dipadahka enda
semitan dia kitai tau saru penemu ni bagi ke betul tauka salah. Kena nyimpul ke tu,
komunikasyen ti manah chukup beguna bendar enggau pendiau kitai besehari-hari.

(902 leka jaku)