PIDARTA PANTARANING SMA/SMK RING KABUPATEN BULELENG

DINAS KOMUNIKASI DAN INFORMATIKA

MURDA " KAUTAMAN AGAMA LAN AJI PANGWERUH RING SAJERONING
KAHURIPAN"
Om Swastyastu,
Matur suksma majeng ring pangenter acara antuk galah sane sampun katiba ring padewekan
titiang,
Bapak Kepala Dinas Kominfo utawi sane ngangganin sane kusumayang titiang,
Para Angga Panureksa Pacentokan Pidarta basa Bali sane kusumayang titiang,
Bapak lan Ibu Guru Pembina sareng sami sane suksmayang titiang,
Para Pamilet lan pamiarsa sareng sami sane sih tresnain titiang,
Sadurung titiang matur samatra, titiang iring ida dane ngaturang rasa angayubagia majeng
ring Ida hyang Parama Kawi, utaminnya Batara-batari sane malingga ring wawidangan iriki,
riantukan sangkaning asung kertha wara nugrahan ida, titiang asapunika taler ida dane sareng
sami, prasida mapupul iriki ngamiletin pamargi pacentokan pidarta basa bali puniki ring kahanan
rahayu. Dumadak-dumadik wekasan pamargi kadi sapuniki sayan nglimbak kawentenannyane
wastu sida ngawetuang jagat Baline ajeg.
Ida dane sameton sareng sami, ring galahe sane becik puniki titiang jagi matur samatra
ngeninin indik "KAUTAMAN AGAMA LAN AJI PANGWERUH RING SAJERONING
KAHURIPAN". Napi mawinan titiang ngangkat murda sakadi asapunika, duaning iraga sareng
sami dados jadma patut pisan uning ring sajaroning tetuek agama lan aji pangweruh sane prasida
kanggen suluh lan titi pangancan ritatkala ngamargiang swadharma dados jadma iriki ring jagate.
Manahang titiang agama lan aji pangweruh puniki patut pisan kasandang sumangdennya
kahuripanne prasida sutrepti.
Ida dane sareng sami sane wanginang titiang, yening selehin indik artos kruna agama
wantah mawit saking basa sansekerta. Wit nyane saking unteng kruna a- lan gam. A- maartos
nenten lan gam martos obah,mantuk, malecat, rusak. Ngraris agama kategesin sahananing sane
nenten malecat utawi sane nenten obah. Sane nenten obah punika madue wirasa sahananing sane
langgeng. Taler manut penempen para jana sane waged ring sosiologi, agama punika kabaos
parilaksana sane wenten ring pantaraning paiketan sistem sosial sane madue pangega ngeninin
indik kawentenan elmu supranatural sane madue kawigunan ngawetuang karahayuan. Cutetnyane

agama wantah parindikan sane madaging uger-uger panuntun marep ring para jadma sane madue
pangega marep ring silih sinunggil agama sane kaagemin.
Ring sajeroning kahuripan agama madue kawigunan sane pinih mautama pisan inggih
punika prasida pinaka silih tunggil sepat siku-siku (sumber hukum) utawi pinaka norma-norma
sane patut katinutin sajeroning kahuripan. Agama ngicenin pamargi-pamargi sane encen
nyandang iraga laksanayang taler sane encen nenten patut margiang. Majalaran antuk pamargi
sane dados lan nenten dados margiang punika, agama prasida ngicenin panuntunan majeng ring
para jadmane nyujur parilaksana sane becik manut pangajah agama sane kasungkemin soangsoang. Lian ring punika agama prasida ngicenin rasa bagia, rasa aman, lan rasa sane lianan marep
ring sang sane ngamong agama punika.
Santukan agama mapaiketan pisan marep ring kawentenan Ida Sang hyang widhi punika
taler sane maka pabuat sumangdennya iraga stata eling majeng ring Ida, stata nunas karahayuan
lan karahajengan mangdenne sami mikolihang kahanan sane sutrepti. Agama pinaka panuntun
ring sajeroning kahuripan prasida nambakin pamargine sane iwang santukan wenten sasuluh
saking pangajah agama inucap. Napi mawinan, santukan manahang titiang nenten wenten agama
sane ngicenin pangajah-ajah sumangdennya para bhaktannyane ngamargiang sane nenten patut.
Makasami agama sane wenten madue pangajah sane becik sakemawon pamarginnyane kemanten
sane malianan.
Lianan ring kautaman agama ring sajeroning kauripan wenten malih asiki sane pinih
mabuat patut kabuatang inggih punika aji pangweruh. Aji pangweruh utawi lumbrah nyane
kabaos Ilmu Pengetahuan inggih punika pangweruh sane kapolihang mlarapan antuk pamargipamargi sane sampun manut ring tatacara ilmiah. Yening tatasang pisan wenten pabinayan akidik
ngeninin indik pangweruh lan aji pangweruh punika. Pangweruh kategesin sahananing pamargi
sane kapolihang majalaran antuk pawisik (ilham) sane rauh nenten kadasarin antuk pamargipamargi ilmiah. Pangweruh puniki prasida mawetu sangkaning kabiasan-kabiasan sane sampun
katami saking nguni. Ngraris kaweruhan puniki kanggen turun-timurun oleh para jadmane.
Ida dane semeton sareng sami sane wangiang titiang, kaweruhanne punika prasida
kapolihang saking teleb mauruk sastra, tur teleb ngwacen cakepan-cakepan miwah buku-buku.
Riantukan yening ampun madue aji pangweruh punika tan bina kadi suluh sane nyuluhin awidya
ring angga sasrirane, mangda sida nyihnayang widya sastra, maka wiweka nimabangin iwang
kalawan patute . yan tan madue pangweruh nirdon urip ring jagate, tan bina luwir sekar abang
sami murub tan hana wangin ika. Iraga para yowana areng sami sumangdennya teleb mauruk
sastra, ngulati aji pangweruh. Yening rerehang imba ngruruh aji pangweruh punika tan bina kadi

anak sane matapa, ring sajeroning tatwa carita kasinahang kateleban kayun ida sang Arjuna
matapa ring gunung indrakila antuk kapagehan ida matapa raris ida batara siwa mapaica panah
pasupati sane kanggen senjata melanin swarga lokanne. Punika patut pisan anggen pratiwimba
tetleb mauruk sastra mangda molihang pangweruh. Cutet nyane, yening mangkin iraga
masekolah sumangdenya sumeken nyantos molihang ijazah, tan bina kadi panah pasupati paican
ida batara siwa, kaweruhanne punika kanggen nyanggra uripe wekasan, mangda uripe nenten
nemu kasengsaran, maka pabuat jadma luih guna. Kaweruhanne maka suluh ikang prabha, sane
pacang prasida nyuluhin ngulati karahayuan. Karahayuan maka piranti kabecikan.
Ida dane semeton sareng sami, banget-banget mawiguna pisan daging agama lan aji
pangweruh punika. Nanging elingang, risampun dane madue aji pangweruh, sampun pascat ring
sajeroning kawigunan sampunang kawigunan punika kanggen sane nenten patut. Santukan akeh
ring aab kadi mangkin aji pangweruhe sane sampun kapolihang pinaka bekel ring sajeroning
kauripan punika kanggen piranti nglaksanayang parilaksana sane nenten manut sane mrasidayang
ngawenang byuta. Maka imba, ipun Amrosi pascat pisan, dueg, wikan makarya bom nanging
kaweruhane punika kanggen ngamargiang sane nenten patut. Mawastu kanggen ngamademang
jadma akeh, punika banget tan maguna kaweruhane punika. Antuk punika aji pangweruh sane
sampun kapolihang sumangdennya tetep kadasarin antuk nelebang daging-daging agama mangda
wenten panuntun sepat siku-siku ngamargiang swadharma ring kahuripan puniki.
Ida dane semeton sareng sami maka cutuet unteng babaos titiang inggih punika :
1. Dados jadma sampun pastika patut nyungkemin agama, santukan agama madaging
kawigunan sane banget luih inggian prasida ngwetuang rasa aman, rasa bagia,
madaging sepat siku-siku sajeroning ngamargiang kahuripan.
2. Lian ring agama, ring sajeroning kahuripan patut ngruruh aji pangweruh, majalaran
antuk sering ngwacen sastra, cakepan, miwah buku-buku. Aji pangweruh punika
prasida kanggen bekel nyanggra uripe wekasan, mangda uripe nenten nemu
kasengsaran, maka pabuat jadma luih guna. Kaweruhanne maka suluh ikang prabha,
sane pacang prasida nyuluhin ngulati karahayuan. Karahayuan maka piranti
kabecikan.
3. Aji pangweruh sane sampun kapolihang sumangdennya kanggen ngrahayuang jagat,
sampunang anggena piranti ngamargiang parilaksana sane kaon. Antuk punika
majanten pisan aji pangweruh punika stata kadasarin antuk aji agama, mangda
wenten sepat siku-siku ring sajeroning kahuripan.

Inggih ida dane sameton sareng sami wantah kadi asapunika prasida titiang ngaturang
pidarta ring rahina mangkin. Ritatkala titiang ngaturang pidarta iwau sinah sampun kantun akeh
kakirangan nyane. Antuk punika titiang nunas geng rena sinampura. Puputang titiang antuk
ngaturang parama santi.
Om Santih,Santih,Santih, Om