DHARMA WACANA

“Ngajegang Jagat Bali Malarapan Antuk Tri Hita Karana”

Inggih, suksma aturang titiang majeng ring pengenter  acara antuk galah sane kapica ring pasikian
titiang. Sadurung ngelantur maatur-atur ngiring sareng sami nunas ica majeng ring Ida Sang Hyang Widhi
Wasa. Malarapan antuk nguncarang panganjali umat

OM SWASTYASTU

Sane wangiang titiang bapak/ibu Panureksa

Sane kusumayang titiang para sisia pamilet lomba makasami

Punika taler, ida dane sareng sami sane tan prasida ojah titian siki-siki, sane dahat tresna sishin titiang

Ida dane sareng sami ring galahe sane becik puniki, angayu bagia pisan manah titiange, riantukan
sangkaning asung kertha waranugraha Ida, prasida titiang matemu wedana sareng ida dane sareng sami,
gumanti ngaturang dharma wacana sane mamurda Ngajegang Jagat Bali Malarapan Antuk Tri Hita Karana.

Sane mangkin yening cingak kawentenan jagate pamekasan, ring jagat Bali sampun wiakti matiosan
ring kawentenan jagat duk e rihin. Sane matiosan punika wenten ring tradisi, kebudayaan, lingkungan, miwah
bidang-bidang sane lianan. Yening rereh ring kawentenan tradisi pastika sampun macampuh sareng tradisi
saking ring jagat tiosan, punika taler ring kawentenan kebudayaan nyane. Conto sane lianan inggih punika
parilaksana warga utawi para janane sampun taler ngasoran sekadi tindak kriminal sane sayan-sayan nincapan.

Inggih ida dane sane wangiang titiang duaning kadi asapunika kawentenan byuta ring jagate, ngawit
saking mangkin sapatutnyane iraga mapidabdab nabdabang jagat Bali mangda aman tur trepti,mangda prasida
raris ngawinang jagat Baline ajeg. Pamargi sane kautsahayanaga makeh pisan sekadi sane sampun kasuratang
ring sastra-sastra agama Hindu-ne. Pamargi sane wenten ring sastra sane sampun taler kalimbakang inggih
punika Tri Hita Karana.

Ida dane, yening maosang indik Tri Hita Karana punika kawangun antuk tigang kruna inggih punika Tri,
Hita, miwah Karana. Tri mategas tiga, hita mateges bagia, miwah karana mateges ngawinang. Punika artos
sajangkepnyane inggih punika tigang soroh sane ngawinang bagia. Tigang soroh punika wantah Parhyangan,
Pawongan, miwah Palemahan.

Ida dane sareng sami, sane mangkin titiang jagi mataken, napi sane ngawinang jagat Bali kaloktah ke
dura negara? Ida dane manawi sampun pawikan boya ja tios sane ngawinang inggih punika indik budaya
mayadnya sane nyihnayang rasa bakti ring Ida Sang Hyang Widhi Wasa majalaran antuk upacara agama. Sane
kaping kalih indik paras paros manyama braya, kabaos ramah tamah sane ngawinang rasa welas asih ketah
kabaos Bali Shanti. Tur sane kaping tiga indik kaasrian jagat Bali sane tan mari nuduk kayun lan ngulangunin.
Yening selahang titiang ring sastra agama punika maka pah-pahan Tri Hita Karana.

 Inggih Ida dane sareng sami, sane mangkin lugrayang titiang ngepah pah-pahan Tri Hita Karana puniki.
Sane kapertama indik parhyangan. Parhyangan inggih punika paiketan sane kawangun marep ring Ida Sang
Hyang Widhi Wasa.  Duk rihin Sang Hyang Prajapati utawi Sang Hyang Widhi sane ngardi jagate puniki
mesrana antuk yadnya. Sane mangkin sampun sepatutnyane iraga sane meyadnya maka penaur utang majeng
ring Ida Sang Hyang Widhi. Sakewanten yening uratiang ring kahuripan para janane ring Bali ngenenin indik
meyadnya, punika kaanggen wantah masrana antuk banten sane ageng kemanten. Nika mawinan akeh para
janane setata mautsaha mekarya banten yadiastun majalaran antuk utang, memaling, miwah sane tiosan. Ida
dane boya je mesrana antuk banten kemanten iraga prasida ngaturang bhakti, sakewanten mangda presida
kadulurin antuk parilaksana sane patut manut ring sastra agama punika taler kadulurin antuk manah sane
lascarya.

Inggih ida dane sane wangiang titiang, lugrayang titiang ngelantur sane kaping kalih indik pawongan.
Pawongan wantah paiketan kramane paras paros majeng ring semeton krama sane tiosan kekawitin antuk Tat
Twam Asi. Ring jagate sekadi mangkin akeh pisan para jnanane sane malaksana corah. Sepatut nyane yening
dados jadma, dharmane sane kamargiang mangda madue kawigunan ring jagate.

Inggih selanturnyane sane kaping tiga punika indik palemahan. Palemahan punika wantah paiketan
kramane majeng ring wewidangannyane. Jagat miwah sedaging nyane punika sami wantah kekardinin olih Ida
Sang Hyang Widhi, duaning asapunika sane mangkin ngiring iraga sane mautsaha ngelestariang jagat Baline,
yening nenten iraga sire malih? Yening baosang abot sing ngerti abot, sakewanten yening sampun kadulurin
antuk manah lascarya janten prasida kamargiang.
 Inggih ida dane sareng sami yening cutetang titiang daging dharma wacana i wawu inggih
punika Tri Hita Karana patut limbakang, kakukuhang mangda jagat miwah sedaging nyane presida
nemu bagia genah linggah becik kacingak. Sekadi tatujon agama Hindu-ne “Moksartam jagaditha
yaca iti dharma” inggih punika nemu bagia sekala niskala kadasarin antuk dharma.

Inggih ida dane sareng sami, wantah kadi asapunika titiang presida matur ring rahinane
mangkin. Mogi-mogi wenten pikenoh ipun ring sajeroning kahuripan. Manawita wenten atur titiang
sane nenten manut ring arsa, titiang nunas geng rena sinampura riantukan tan hana wong swasta
analus, nenten wenten jadma sane patut. Maka wasananing atur puputang titiang antuk ngaturang
parama shanti

OM SHANTI SHANTI SHANTI OM

 DHARMA WACANA
“Ngajegang Jagat Bali Malarapan Antuk Tri Hita Karana”

SMA NEGERI 1 SUKAWATI

NAMA : SANG AYU MAYWA PUTRI BERATA

NIS : 9920

KELAS : XI BABUD