Om Swastyastu

Ibuk Guru sane wangiang titiang, tur timpal-timpal sane tresnain titiang, ngiring sareng-sareng
ngaturang puja pangastuti ring Ida Sang Hyang Widhi Wasa, saantukan antuk kerta waranugrahan Ida,
Iraga sareng sami prasida kacunduk ring galahe mangkin. Ri kalane puniki, titiang pacang ngaturang
dharma wacana indik “Rahina Pagerwesi”

ISI
Inggih ida dane, ring galahe sane becik puniki titiang jaga nartayang indik kasuksman ring rahina
Pagerwesi sane jagi kelaksanayang ring rahina Buda Kliwon Sinta sane jagi rauh. Pastika Ida dane
sampun sering miragi kruna Pagerwesi. Kruna Pagerwesi madue arti Pageh miwah Besi. Punika
mawinan Pagerwesi pinaka lambang perlindungan. Seluir sane kepagehin pastika sampun sane
meaji sane mautama mangdane nenten keusik utawi keusak. Rahina Pagerwesi sering kebaos rahina
magehang raga utawi magehang awak. Raris sane keastawayang utawi sane kepuja ring Rahina
Pagerwesi punika wantah Ida Sang Hyang Widhi sane maperagayang Sang Hyang Pramesti Guru.

Inggih ida dane sami sane dahat wangiang titiang, munggwing kewentenan Ida Hyang Pramesti Guru
nenten ja wenten tios wantah Ida Sang Hyang Siwa sane pinaka guru ring Bhuana agung taler
sedagingnyane. Kewentenan I manusa ring jagate sepatutnyane nunas peajahan ring Ida Hyang
Pramesti Guru mangdane setata ngemolihang pemargi sane becik mangda presida meparilaksana
sane nganutin tutur agama, turmaning mangda I manusa nenten kepetengan.

Rahina Pagerwesi kelaksanayang nyabran nem sasih ritatkala nemonin rahina Buda Kliwon Sinta.
Indik rahina Pagerwesi punika mungguh ring lontar Sundarigama, munggwing dagingnyane sekadi
puniki: “Budha Kliwon Sinta Ngaran Pagerwesi payogan Sang Hyang Pramesti Guru kairing ring watek
Dewata Nawa Sanga ngawerdiaken sarwa tumitah sarwatumuwuh ring bhuana kabeh”. Teges ipun:
“Rabu kliwon sinta mewasta Pagerwesi ngastawa Ida Sang Hyang pramesti Guru sane kairing olih
watek Dewata Nawa Sanga sami ngrastitiang sehanan sane embas taler sane tumbuh ring jagate
mangde setate ajeg”.

Dadosnyane, rahina Pagerwesi punika patut kelaksanayang olih Para Pandita mejalaran antuk
upacara Ngarga lan Mepasang Lingga. Raris ring tengah wengi mangdane umat sami ngelaksanayang
yoga semadhi. Banten sane keanggen serana ngastawa Sang Hyang Pramesti Guru inggih punika
“Sesayut Panca Lingga” medaging daksina, suci praspenyeneng miwah banten penek. Yadiastun
suksman rahina pagerwesi wantah ngelaksanayang Yoga lan Semadi olih para Purohita, umat
Hindune maka sami patut taler nyarengin mesedana antuk natab Sesayut Pageh urip, prayascita
miwah dapetan kejangkepin taler antuk daksina, canang lan sodaan.

PENUTUPAN

Makadados pamicutetnyane wantah pinaka patinget i manusane maurip ring jagate mangdane state
madue pamikukuh idep, sane malarapan antuk dharamaning susastra. Sampun majanten i manusa
tanpa sastra pinaka peteng tanpa sundih, pati kaplug, pati grepe, nenten prasida magawe.

Inggih wantah asapunika presida antuk titiang ngaturang uningayang inggian karuksemaan rahina
pagerwesi punika. Riantukan akeh titiang matur pastika sampun akeh taler iwangyane, duaning
punika titiang nglungsur pangampura. Pinaka pihaka panguntat titiang ngaturan parama santhi
“om santih,santih,santih om”