Om Swastyastu

Ida dane sareng sami sane tresna sihin titiang, utamin ipun Ibu/Bapak guru sane wangiang titian,
sadurung titian ngelantur matur, ngiring sareng sami ngaturang suksemaning manah, pamekas majeng
ring Ida Sang Hyang Widi Wasa, malarapan antuk pasuecan Idane, irage prasida mapupul iriki, manggihin
karahayuan sekadi mangkin.

Ibu/Bapak guru sane dahat wangiang titiang, ring galahe sane becik puniki, lugrayang titiang matur
samatra nganinin indik “ Karmaphala Lan Punarbhawa”.

Makesamian sane maurip ring jagate puniki patut uning napi sane mewasta karmaphala. Karmaphala
inggih punika hasil parilaksana irage sane kapiolih yening irage sampun malaksana. Yening irage
melaksana sane becik , becik karmaphala sane kapanggih, sapunika taler yening kaon parilaksanane,
kaon sane kapanggih, utawi “ Ayu kinardi ayu kapanggih, Ala kinardi ala tinemu “.

Karmaphala kakepah antuk tigang soroh, inggih punika:

1. Sancita karmaphala inggih punika hasil parilaksana ring kauripan sane dumun durung telas katrima,
malih katrima ring kauripan sane mangkin.

2. Prarabdha karmaphala innggih punika Pakardi ring kauripan mangkin, katrima ring kauripan sane
mangkin, ketah kasambat karmaphala cicih.

3.Kryamana karmaphala inggih punika hasil parilaksana ring kauripan sane mangkin durung telas,
katrima malih ring kauripan sane jagi rawuh .

Ring sejeroning pepalajahan Agama Hindu karmaphala mapaiketan sareng Punarbawa utawi manumitis
Manumadi malih sawireh jagi nebus parilaksana sane kaon ring kauripan riin. Saantukan asapunika
manumadi dados manusa punika dahat mautama yening saihang dados buron utawi entik-entikan,
sawireh numadi dados manusa sane prasida nulungin atmane saking samsara, melarapan antuk
nincapang parilaksana sane becik mangde molihan kerahayuan, napi malih polih bagia lestari utawi suka
tan pawali duka, moksha pinaka tetujon utama iraga maurip.

Ida dane sareng sami sane kesumayang titiang, wantah asapunika prasida aturang titiang ring tepengang
kadi mangkin cutet atur titiang, ngiring sareng sami ngawit mangkin melaksane sane becik utawi dharma
mangde irage manggihin kerahayuan ri wekasan.

Prade wenten ring sejeroning atur titiang wawu, wenten menawi kruna sane nenten menggah ring
kayun ida sareng sami lugrayang titiang nunas geng rena sinampura. Pinaka ping untat sineb titiang
antuk parama santhi,

Om Santhi……Santhi……Shanti……………Ommm…