Pada Lingsa Pupuh

PUPUH SINOM
Susilane utamayang
Setiane anggen ngembanin
Keto munggah di agama
Kukuhang mandennya pasti
Eda mamuikin aji
Ida sungsung maka guru
Sweca ngicen kerahayuan
Tunasin pangalang ati
Maka suluh
Gigisan paling di jalan

PUPUH SEMARANDANA
Magantung ban bok akatih
angkihane yan umpama
kadi manyuhun gedahe
matatakan batu lumbang
yening pelih magunjitan
tan urungan pacang labuh
dekdek buyar tan tuptupang

PUPUH MIJIL
Seken tuhu
Malajah magending
Ngawe manah rena
Rasa galang
Manahe setata
Antuk tutur
Lintang mautami
Manyalinin budi
Bawos laksanane patut

PUPUH MASKUMAMBANG
Cening Komang
Cening Dharma pelajahin
Eda cening nakal
Bapane sai nuturin
Krana cening panak bapa

PUCUNG
Mangkin masuk
Tugase nyatet ring buku
Kalanturang maca
Kembangang budi pekerti
Anggen tanggul
malaksana ring sekolah

PUPUH PANGKUR
Nunas agung sinampura
Ratu titiang ring ida dane sami
Mangrencana ngawe kidung
Pungkure anggona tembang
Mapi bisa belog pongah sipok sigug
Tuara jengah kakedekang
Ngulahang payu kakawi

GINADA
Ede wanen ken rerama
Yening cening suba bakti
Hidupe lakar bagia
Reramaneento guru
Siaga patut nyayangang
Kadi titi
Sayang I meme ken panak

GINANTI
Saking tuhu manah guru
Mituturin cening jani
Kaweruhe luir senjata
Ne dadi prabotan sai
Ka anggen ngaruruh merta
Saenun ceninge urip

DURMA
Da mamadat mamotoh mangutang-utang
Da ngadu daya lengit
Solah apang melah
Mabanjar mapisaga
Eda manguunin rusit
Astiti ring hyang
Bhakti ngayah ring gusti

PUPUH DANGDANG GULA

Titiang takut keni munyi manis
Ngaku tresna gampang nagih nadtad
Anak eluh uli dini
Batangin selaka siu
Joh para bakatang beli
Saling ke baan kemikan
Makemulan galir bungut
Dije pacang saup jemak
Tuyuh ngucap adayan suba manengil
Keh manundun dakin basang