PIDARTA RING SAJERONING NYANGGRA RAHINA SARASWATI

Om Swastyastu,

Inggih ida dane sareng sami sane kusumayang titiang, titiang rumasa bagia pisan riantukan
prasida masadu ajeng sareng ida dane iriki, ring rahina puniki, sane pinaka pujawali Sang
Hyang Aji Saraswati. Sadurungnyane ngiring sareng-sareng nyihnayang rasa pangayu bagia
majeng ring Ida Hyang Parama Kawi sangkaning sih asung kerta wara nugraha ida, titiang
pingkalih ida dane ngamangguhang karahajengan.

Ida dane sareng sami, waluya kadi nasikin segara titiang purun ngadeg iriki jagi
nguningayang suksman Rahina Saraswati, sane minabang titiang ida dane sami sampun tatas
uning. Nanging sangkaning meled manah titiang, titing malih ngaturang majeng ring ida dane
sami.

Yening inargamayang titiang Sang Hyang Widhi pateh ring Betara Surya sane madue sinar,
sinar punika sane marupa lambang Sang Hyang Aji Saraswati sane nyinarin jagate makasami,
mangdane prasida ngmolihang kalanduhan miwah karahayon. Sapunika taler kawruhane
punika marupa sinar ring i manusa mangdene uning ngunadikayang sane patut kalawaning
tan patut. Iraga sareng sami patut mangayu bagia majeng ring Ida Sang Hyang Saraswati,
santukan Ida sane ngicenin karahayuan, kawicaksanan, kawibawan, miwah sakancan
kawruhane sane katiba ring i manusa majalaran antuk sastra.

Ida dane sane kusumayang titiang, manawita ida dane sareng sami sampun uning, Rahina
Saraswati punika rauhnyane ngenem sasih apisan, inggih punika rikala Saniscara Umanis
Watugunung. Kawentenan pralambang ring sajeroning palawatan Ida Sang Hyng Aji
saraswati,sane makeh madaging simbul lan artosnyane soang-soang, titiang jagi mautsaha
nlatarang manut napi sane kauningin titiang. Ring lambang Saraswati punika kawentenan Ida
marupa anak istri ayu, madue tangan patpat, ida nglinggihin angsa, taler magenah ring
luhuring tunjung. Mangkin jagi uningayang titiang siki ping siki :

1. Sane kapertama, Ida rabin Betara Brahma tur maraga ayu sane pinaka simbol
prabawan sane ageng, taler pangwruhan punika ngulangunin manah sang sapasira
sane satya malajahin.
 2. Ida matangan patpat sane soang-soang ngamel genitri, lontar, rebab, lan sekar tunjung.
Genitri pinaka simbul pangweruhan punika tanpa wates, lontar pinaka simbul
kawruhan, rebab pinaka simbul kebudayaan tur masuara ngulangunin nyihnayang
pangwruhan punika ngulangunin, tunjung punika pinaka simbul sekar mahasuci
pinaka lambang pangweruhan punika suci.

3. Angsa pinaka praciri buron sane wicaksana, sane nyihnayang yaning sampun wikan
sinah i manusa prasida kadi patapan i angsa sane sida ngrereh amah-amahan ring
endute kutek.

Sapunika prasida antuk titiang ngaturang indik palawatan Ida Sang Hyang Saraswati, sane
pinaka palawatan pangwruhan. Mungguhing ngenenin indik sapulah palih parindikan rahina
saraswati punika wenten tigang rentetan inggih punika :

1. Ri kanjekan rahina Saraswati punika, saking semeng jantos tajeg surya, iraga sareng
sami maturan ka sanggah utawi ka mrajan soang-soang miwah mantenin buku utawi
lontar druwene. Sakewanten sadurung maturan nunas trirta dumun ring ida pranda
utawi ring sesuhunan ragane soang-soang. Sasampun banten punika kaantebang raris
kasiratin tirta saraswati ping lima. Wusan punika wawu ragane siratin tirta ping tiga,
kainum ping tiga taler karaup ping tiga. Tetujon iraga nunas tirta saraswati punika tan
lian wantah mangda ida ngicenin karahajengan miwah kawruhan sane mautama. Tirta
punuka taler dados angge nyuciang raga, ngicalang sakancan keletehan sane wenten
ring angga sarira.

2. Rentetan sane kaping kalih wantah masambang semadi. Ri kala masambang semadi
patut majagra sinambi ngwacen lontar-lontar suci kaagaman. Ring masambang
semadi punuka iraga patut mabrata tan dados mapunyah-punyahan. Tetujon mabrata
punika wantah marupa latian natingin gegodan sadripune, ngwacen lontar utawi buku-
buku kaagaman pinaka tangkis majagra, sinambi nunas pangwruhan majeng ring Sang
Hyang Saraswati.

3. Rentetan sane kaping tiga inggih punika mabanyu pinaruh risampun awengi majagra,
mabrata nglaksanayang sambang semadi. Benjang semengane raris mabanyu pinaruh
ka beji utawi ka segara tur matirta. Tetujon iraga mabanyu pinaruh wantah nyuciang
raga turin nyupat sekancan letehe.
Sapunika tigang rentetan sapulah-palih acara sane patut iraga laksanayang rikala nemonin
Rahina Saraswati.

Inggih ida dane sane kusumayang titiang, manawi asapunika sane prasida aturang
titiang majeng ring ida dane sami ngenenin indik Rahina Saraswati puniki. Manawi ring
sajeroning napi sane baosang titiang i wawu wenten iwang antuk titiang matur, titiang nunas
pangampura. Puputang titiang antuk panyineb atur.

Om antih,antih,antih Om
ring galahe puniki, titiang jaga nyurat conto pidarta Basa Bali sane mamurda "Nincapang
Kesucian Angga Sarira Melarapan antuk Ngelaksanayang Brata Siwaratri"
Ngiring Cingak, wacen tur tureksa daging conto Pidarta ring sor.
**************************************************

Inggih susksma aturang titiang majeng ring pangeter baos antuk galah sane kapaica ring
dewek titiang.

sane wangiang titiang, Kepala UPT Disdikpora Kecamatan Denpasar timur

Sane wangiang titiang, Bapak Kepala Sekolah
Sane wangiang titiang, Bapak miwah Ibu Guru
sapunika taler para sisia warga sekolah puniki sane dahat tresna asihin titiang.
Sedurung titiang ngelanturang atur pinih ajeng lugrayang titiang ngaturang rasa angayu bagia
ring sajeroning manah majeng ring Ida Sang Hyang Widhi Wasa, duaning sangkaning
paswecan Ida, iraga presida matemu ring genahe tur galahe sane becik puniki melarapan
antuk nguncarang pangastungkara:
OM SWASTYASTU,
Ainggih ida dane sane wangiang titiang, minab sampun uning indik kewentenan Rahina
Siwaratri. Rikala rahina siwaratri punika akeh kramane sane ngelarang acara-acara makemit
ring Pura Kahyangan Tiga miwah ring Pura sane tiosan. Rikala mekemit punika taler
kelaksanayang acara tiosan sekadi ngaturang pamuspan ring galah jam 6 sore, jam 12 tengah
latri, miwah jam 6 semeng benjangnyane. Ring mekemit punika taler kelaksanayang Dharma
wacana, Gita santhi, miwah ngwacen satwa I Lubdaka.

Rahina Siwaratri punika kalaksanayang nyabran awarsa ring ketekan saka nemonin Panglong
14 sasih Kepitu. Akeh wacana sane wenten ring umat indik kasukseman ngelaksanayang
rahina siwaratri punika, sekadi wenten sane ngucapang yening presida makemit nenten arip
ring wengine ring rahina punika pacang presida ngicalang Dosa sane wenten ring suksma
sarira. Wenten taler umat sane maosang, ngelaksanayang rahina siwaratri mangda sida nebus
dosa sane sampun kelaksanayang.

Inggih ida dane, sane mangkin jage atur uningayang titiang indik kasukseman Rahina
Siwaratri manut sekadi kecaping sastra sane munggah ring kakawin Siwaratri Kalpa sane
kasurat oleh Mpu Tanakung. Daging kakawin Siwaratri Kalpa punika wantah nyaritayang
Pemargin juru boros sane mapesengan I Lubdaka sane presida ngamolihang genah ring
Siwaloka sangkaning ipun ngelaksanayang Rahina Siwaratri Kalpa.

Nemonin Panglong 14 sasih kapitu kaucap Ida Bethara Siwa ngelarang Yoga. Kabaosang,
sapasira ja sane nyembah bhakti majeng ring Linggih Ida Bathara Siwa pastika sampun
pacang ngemolihang margi nyujur siwa loka ring sampune sanghyang atma mepasahang
sareng angga sarira. Ring Rahina Siwaratri, Ida Bathara Siwa pacang micayang kesucian ring
umat sane sareng ngelaksanayang yoga semadi.
Suksman Tilem Kapitu inggih punika sekalane jagate kapetengan, maka niasa manah peteng.
Sane ngardi manahe peteng wenten pepitu. Mangkin jagi dartayang nira saka siki.

1. Kaping siki SURUPA, punyah antuk goba jegeg wyadin bagus.

2. Kaping kalih DHANA, punyah antuk sugih arta brana.
3. Kaping tiga GUNA, punyah antuk kawagedan.
4. Kaping papat KULINA, punyah antuk wangsa lwih.
5. Kaping lima YOWANA, punyah antuk merasa nedeng teruna.
6. Kaping enem SURA, punyah antuk tuwak wyadin arak, miwah salwir tetayuban sane
ngranayah punyah, rawuhing ring salwiring Narkoba sami.
7. Kaping pitu KASURAN, punyah antuk merasa dewek wanen.

Pepitu sane ngawe manah peteng, sane ngawe manah paling, punika mawasta Sapta Timira.
Kapetengan manah punika sane patut galangin antuk majagra, mangda I raga ten masolah
dursila

Raris wenten sane kabaos brata sane patut kagelarang ritatkala ngelaksanayang rahina
Siwaratri punika, luir ipun:
- Jagra
- Upawasa
- Mona Brata

Kapertama, sane kabaos Jagra inggih punika nenten arip ring wengi ngantos semengan
turmaning setata eling ring Ida Bethara Siwa. Ping Kalih sane kabaos Upawasa inggih punika
nenten meajeng-ajengan miwah meinum-inuman. kaping tiga, Mona Brata punika suksman
ipun nenten ngemedalang suara.
Yen sampun maka tiga brata punika kelaksayang sampun kebaos ngelaksanayang Rahina
Siwaratri.
Indik suksman ngelaksanayang Jagra ring angga sarira mangdane iraga presida eling ring
linggih ida Hyang Widhi tur setata waspada ring parilaksana sane nenten manut ring sastra
agama. Ngelaksanayang Upawasa inggih punika mangda iraga nenten kaiket olih
keduniawian. Raris suksman Mona Brata mangdane iraga presida nyuciang pengucap sane
kebaos Wacika Parisudha.

Inggih ida dane sareng sami, duaning kadi asapunika buat keutaman ngelaksanayang Rahina
Siwaratri, ngiring ngawit saking laksanayang Rahina Siwaratri punika mangda sida
Nincapang Kesucian Angga Sarira turmaning raris presida mesikian ring linggih Ida Hyang
Widhi Wasa.

Inggih wantah kadi asapunika presida antuk titiang nartayang indik keutaman rahina siwaratri
punika, dumogi wenten pikenohnyane. yening wenten atur titiang sane nenten manut ring
pekahyunan ida dane, titiang nunas geng rne pangampura. maka wasananing atur sineb titiang
antuk Parama Santih,
OM SANTIH SANTIH SANTIH OM
Kamis, Juli 30, 2009
Browse Home Pidarta Bali Nyanggra Piodalan Saraswati

Nyanggra Piodalan Saraswati

Ring sor puniki pinaka imba utawi conto pidato bali utawi panyambrama ritatkala jagi
nyanggra Rahinan Jagat Saraswati. Pidarta puniki kaanggen ring lomba pidarta antuk tema
Rahinan Jagat Saraswati. Inggih durus lanturang ngawacen..
Inggih, nawegang titiang
Mantuk ring para atiti lan undangan sane wangiang titiang.
Para dewan juri sane banget baktinin titiang
miwah para pamilet lanang istri sane tresna asihin titiang.

Pinih ajeng ngiring nyihnayang rasa angayu bagia majeng ring Ida Sang Hyang Widhi,
duaning sangkaning pasuecan Ida, titiang pingkalih ida dane prasida mangguh karhajengan
turmaning sida masadu ajeng sekadi mangkin.

"Om Swastiastu"

Ida dane, pamiarsa sinamian sane wangiang titiang.

Manut baos sang maraga pawiku, umat Hindune wantah sthiti bhakti ring Ida Sang Hyang
Widhi, nanging sane maraga wicaksana maosang antuk makudang-kudang parinama. Sinalih
tunggil sane kaangken pinaka Dewi Pencipta Ilmu Pengetahuan wantah Sang Hyang Aji
Saraswati.

Sakadi sampun kauningan, umat Hindune nyanggra piodalan Sang Hyang Aji Saraswati
ngenem sasih apisan, ring rahina Saniscara Umanis Wuku Watugunung. Rahinanne punika
ketah kabaos "Piodalan Saraswati", pinaka rahina perayaan lahirnya ilmu pengetahuan. Ring
rahinanne puniki sami umat Hindune ngaturang pangubakti majeng ring Ida Hyang Widhi
pinaka utpeti pencipta ilmu pengetahuan. Wenten anak dados profesor, bengkel, tukang,
dokter miwah sane lianan sangkaning kapaica olih Ida Sang Hyang Widhi. Punika mawinan
sareng sami patut nyanggra pawijilan pangweruhne.

Ida dane, para semeton sami sane singgihang titiang, tetujon nyanggra Rahinan Saraswati
boya wenten tios wantah ngaturang suksma ring Ida Sang Hyang Widhi, riantuk ledang
mapaica pangweruh saha mangda nglanturpasuecan Ida, gumanti wenten anggen ngeruruh
pangupajiwa. Riantuk utama pisan kawigunan kaweruhne majeng ring kauripan druene,
punika mawinan nganggen niasa Dewi Saraswati utawi Dewi Cantik. Napi mawinan Dewi
Cantik? Santukan pangweruhe punika dahat ngenyudin. Maka sami anake enyud utawi
nyaratang pisan pangweruh, sane dados kaprabotang sarahina ngruruh amerta.

Ring susastra "Sarasmuscaya" kabaosang, anake sanen nenten madue kawruhan tan bina
kadi anak buta. Asapunika kocap laran kayun anake sane nenten maduwe kawruhan.
Kawruhan sane prasida pinaka titi pangancan pacang ngenterangi manusa ngicaeng
kasengsarang uripnyane. Mangkin sapunapi tatacarane mangda makeh maduwe pangweruh?
Janten mangda jemet malajah saha setata ngastawa ring Ida Hyang Aji Saraswati. Patut teler
ngelarang semboyan "Masa Muda Masa Belajar".

Titiang naenin taler miragi, mungguing meseh i manusa sane utama wantah katambetan utawi
kebodohan. Duaning asapunika, anake sane kaliput dening katambetan majanten pacang
maoarilaksana dudu utawi tan rahayu. Malih wenten kecaping sastra, mungguing wiwit suka
dukane wantah katambetan. Katambetan punika, metu saking kaloban, loba punika metu
saking katambetan. Dadosnyane, wantah katambetan sane mawinan manusane mangguh
sengsara.

Yening selebin pisan maka sami kauripane madasar sengsara mawinan kabaos punarbhawa.
Punika mawinan ring niasa Saraswati wenten Genetri (rantai) sane nyihnayang pangetahuan
punika langgeng nenten telas-telas antuk malajahin. Malajah saenun maurip patut gelarang,
yadin ririh enu liu palajahang.

Ida dane semeton sami sane tresna asihin titiang, maosang indik agama, patut dasarin antuk
Tri Kerangka Agama inggih punika Tattwa, Susila, lan Upacara. Upacara kocap cihnan
anake maagama. Makadi piodalan Saraswati. Semengane iraga ngastawang ring Ida Sang
Hyang Widhi pinaka pencipta ilmu pengetahuan, wengine ngwacen lan maosang daging
sastra agama, raris benjang semengne mabanyu pinaruh, saha nunas tirta kaweruhan. Punika
wantah cihna druene astiti bhakti ring Ida Hyang Widhi.

Wantah asapunika titiang prasida mahbahang atur ring galahe sane becik puniki. Maka kirang
langkung atur titiang, lugrayang titiang nglungsur gung rena pangampura. Pinaka pamuput
atur, titiang ngaturang parama shanti,

"Om Shantih, Shantih, Shantih Om".(*bb/pdb)