SUBAKTI RING GURU

            Inggih ida dane sinareng sami, utamane majeng ring

panureksa sane dahat kusumayang titiang, para guru miwah
atiti sane wangiang titiang, pare pamilet pidarta basa Bali taler
para semeton sareng sami sane tresna sihin titiang. Sedurung
titiang ngawitin pidarta puniki, ngiring sareng sami I raga
nyakupang kara kalih nyinahang rasa angayubagia majeng
ring Ida Sang Hyang Widhi Wasa, duaning sangkaning
pasuecan Ida, titiang ping kalih ida dane sareng sami prasida
kacunduk masadu ajeng ring galahe sane becik sekadi
mangkin. Dumadak-dumadik I raga sareng sami prasida
ngamangguhang karahajengan, labda karya, nemu sidaning
don. Ngiring stata astiti bakti majeng ring Ida, majalarang
antuk pangastungkara pangayubagia.
“Om Swastyastu”
            Inggih maduluran pangastungkara duwene mogi-mogi
Ida Sang Hyang Parama Kawi sih kinasih nyuecanin ida dane
sane iring titiang ngemolihang kerahajengan. Sakemawon ping
banget lungsur titiang geng rene sinampura ring ida dane
sareng sami, riantukan kanambetan kawimudan titiang
kalintang tur prasangga purun ngelangkungin linggih ida
dane jagi maatur-atur amatra indik “Subakti Ring Guru”.
            Inggih, sane mangkin lanturang titiang, para semeton,
para pamilet sareng sami, sajeroning maosang indik subakti
ring guru, mangda janten I raga prasida nyinahang pangubakti
ring linggih sang meraga guru, sepatutne I raga uning sang
sapasira kemanten sane kabaos pinaka guru. Inggihan punika
sane mangkin jaga pidartayang titiang papalihan guru punika.
            Manawita ida dane sinareng sami sampun sauninga
ring bacakan sang sane kabaos maraga guru, inggihan punika
wantah kabaos pinaka catur guru, patpat sang sane kabaos
maraga guru, sane gumanti patut baktinin. Ingihan punika
kaping siki, sang maraga guru rupaka, I Biang kalawan I Aji.
Akeh karasa piutang iragane marep ring linggih dane, ngawit
saking ngembasang saking sajeroning garba ngantos wentene
sakadi mangkin, wantah sangkaning sang maraga guru
rupaka, sane ngupapira iraga sinareng sami, tan surut-surut
kinasih danene. Nenten ja wenten sane prasida ngasorang
kaluihan tresnan sih I Rerama marep ring pianaknyane,
mawinan asapunika I raga patut ngelaksanayang piteket-
piteket, pewarah-warah danene, make cihna I raga nyalanang
sasananing pianak tur nyihnayang rasa bakti linggih dane,
samaliha nenten dados tungkas, tulak ring sapatuduh rerama.
           
Kaping kalih, sang maraga guru pangajian, boya ja wenten tios
wantah para guru ring sekolahan. Patut pisan taler nyinahang
pangubaktin ring linggih ida, bilih-bilih I raga pinaka sisia
sakadi mangkin. Pangubaktin ragane marep ring linggih idane
kalintang andep pisan yan imbangan ring kalascaryan danene
sueca ngicenin kaweruhan pinaka bekel nincapang kauripan
kawekas ring jagat puniki.
            Sane kaping tiga, sang maraga guru wisesa, pemerintah
kabaos sekadi mangkin. Sang sane ngaryanin uger-uger,
menawi yan ring desa pakraman kabaos awig-awig sane
nyandang pisan tinutin, duaning awig-awig sane kakardinin
punika pinaka sasuluh sepat siku-siku rikalaning mapidabdab
ngamargiang parilaksana. Parilaksana nenten satata ngulurin
indria, ngulurin manah, mapan ikang manah tan adue tepi,
doh para I raga prasida nginutin. Watesin manah punika,
laksanayang antuk awig-awig utawi atur-aturan, pinak cihna I
raga subakti ring guru wisesa mangdane sinareng sami nemu
karahajengan lan kerta raharja.
            Kaping pat, wantah ida sang maraga guru Swadyaya,
Ida Sang Hyang Widhi Wasa. Wentene I raga sakadi mangkin
wantah sangkanin Ida sane ngicen pangurip, patut pisan I raga
satata eling mangubakti ring linggih ida, satata ngastiti
nunasang mangda Ida satata ledang mapica karahayuan
karahajengan jagate sami. I raga para sisia patut pisan satata
eling ring linggih Ida, malarapan antuk teleb malajahang
angga sane pinih utama tur sakala kaanggen cihna pangubakti
ring linggih idane. Mapan teleb malajah punika sampun
marupa swadarmaning pinaka sisia. Ring Arjuna Wiwaha
wenten kabaos “Wyapi wyapaka sarining parama tatwa,
durlaba kita” Ida Sang Hyang Widhi nyusup ring sarwa bawa,
taler pinaka sarining tatwa utama. Ring sajeroning malajah
nyujur kaweruhan taler kaanggen jalarang nyujur genah Ida
Sang Hyang Widhi Wasa.
            Inggih ida dane para sameton sinareng sami, mangkin
patut pisan subakti ring guru, napi malih kawentenan I raga
dados sisia patut pisan ngelarang pangubakti ring linggih sang
maraga guru, nincapang pangweruhan sane utama,
sakewanten risampune ngamolihang pangweruhan ring
anggen kaweruhan punika nincapang kauripan mangda
maguna ring padewekan tur para jana sinamian.
           
 Inggih, makadi asapunika kawentenan prasida antuk titiang
ngaturang, dumogi atur titiang wenten pikenohipun, tur
mawanti-wanti titiang nunas ngaturang geng rene sinampura
ri pet wenten atur titiang tan manut ring arsa tan nginutin
sesuduk bahasa punika wantah riantukan kanambetan titiang
kalintang. Pinaka panguntat puputang titiang antuk parama
santi.

“Om Santih, Santih, Santih, Om