CONTOH PUISI BALI ANYAR

MARGARANA

Driki tiang nguntul ngebiosang yeh mata

Kangen manah titiang ngantenang
Tugu para pahlawane sami
Majujuk ngebekin tegalan
Pahlawan-pahlawan sane tan madue pamerih
Nyikiang raga melanin negara
Ngicalang meseh jagi mewali
Nyajah gumin I raga
Duk punika tahun 1945
Jagat Indonesiane sampun mahardika
Truna-truni dados pamucuk
Sakadi satria wira nangkepin meseh
Pejah ring rananggana
Punika kasengguh pahlawan
Kasub makuub jagat I raga
 Olih : Wayan Rugeg
Nataran

WATUGUNUNG

Watugunung ica jail

Tan ngenga I Biang
Dewi Sinta malih ngandika
Apang cening tatas nawang
Cedanan pinaka cihna
Yastun ke cening lampus
Cihna nora bisa ilang
Mangda cening tatas uning
Ibu ngrangsuk aji wulan
Tetep ayu tanpa obah
Kadi anom ya selawas
Katon kadi anak kania
Watugunung ya tong ngugu
Tur matilar ngungsi taman

Olih :Keresna D
 PANGELING-NGELING

Dumun

Selae tiban sane langkung

Daweg genine murub kadi gunung Agung

Gita merdeka utawi mati

Pinaka tungtungin manah

Kalaning panca baya nyuduk sarira

Puspaning manah tan keneng layu

Lila sarira sinarengan

Ring tung-tung manah

Unteng manah punika

Pinaka geni astra

Mapas saka luwiring meseh

Mangkin

Buate sampun ring tangan

Winihe sampun maurip

Wit siniram

Pudira lan toyan maspa

Tan keneng wini lang

Wenang Sang Mahyun eling

Olih Sang Mahyun eling

Kaketus Saking Kembang

Rampe Kesustraan Bali Anyar

GENDING JALAN MULA

Luh,
Yan beli teka mulih
gen kenehe tusing dadi tombahang
Nepuk anake buka nyai
Beli ngelah keneh tuah abungkah
Dija lakar pejang
Isinne tuah besik
Luh,
Eda bas ngebet
Jemak baitane
Ngliwat segara katempuh balah blabur
Padaduanan
Da sangsaya
Numitis pisan jengahe alih
Katungkul nyongkok
Apa ko tuara maan
Luh,
Buin pidan yan suryane embang langite galang
Jalan ditu jumunin buin raosang
Kuda lakar ngubuh bangkung
Patutne medagang
Jalan
Beli di sisin nyaine madandan tangan
Depang anake ledap ngenahang manah duleg
Nyai teken beli
Adake ane lenan buin kenehang
Kan

Luh, ditu di temboke

Pejang melahang gegawene
Mani puan ajaka luas
Katengahing alas wayah
Ngalihin kidang
Ngulungin buah celagi
Luh, pulesang deweke
Tungkulang kenehe
Saget bulan ulung di pabinan nyaine
Sadiane dong bareng

Olih : Windu Sancaya

 MANGGIS

Ireng katon
Putih jaton
Amunapi kepitan ring sisi ajajar
Amunika kaputan ring dalem jejer
Wimbanika ya ki karma pala juju
Nitiasa kajejer
Tan jojor-jojor
Sampunang ja kapecik
Ngwetuang tan becik
Olih : I Made Suarsa

WATUGUNUNG RUNTUH

Watugunung runtuh
Alas telas kadi sapuh
Segara mancuh pasisi lepah-lepuh
Manusa bincuh
Inguh
Ngancuh
Kangin katon kauh
Arta kama rinuruh
Dharma campuh capuh
 Olih : I Made Suarsa

MEME

Meme ...
Mangkin wau titiang uning
Sapunapi pisarat meme
Miara tiang
Saking kantun taluh
Sasampune tutug wulan
Meme ngarod asih ambat
Uripe magantung bok akatih
Meme ...
Titiang eling
Titiang budal saking meplalian
Babak belur gelar-gelur
Meme gipih nyasab cendana
Ngolesin tur mapasihin
Ngasih-asih
Wangine titiang tengkejut nyerit
Ngipi gulgul sarwa aeng
Meme matangi kapupungan
Ngambil bawang tur mabasma
Macangkriman ngantos semeng
Meme...
Durung polih titiang yasa
Meme matilar tan matulak malih
 Inggih...ratu Betara
Lugrayang memen titiang
Genah patut ring jagate wayah

Olih : I Made Sanggra

GENDINGAN GUMI

Majalanke ,

Yan mabudi nepukin galang

Suargane sing ja joh

Di tuktuk lidahe, di tengah sirahe

Idupe nglana-lana

Ngumbara di matan gumine

Sambil makpak karma pala

Ah ,mula ento madan idup

Astitiang pesan,

Apang tepuk sunaran galange

Da runguanga bulane sendeh ngauhang

Ia lakar mabalik

Nyunarin gidate makejang

Gending-gending

Gendingan gumine

Tuah apti usaha laksana

Ne ngatehang mulih karahayon

Magendingan ke
Nanging da ngebug belek puyung

Siur munyi sing ada isi

Olih : Nyoman Tusthi Eddy

Tutur Tuturang
Jani makejang suba dueg nutur
Kemu mai ngaba tutur
Ulian tutur anak bisa dueg
Ulian tutur bisa sugih
Ulian tutur mase bisa lacur
Ulian tutur demenin timpal
Ulian tutur muane benges
Sing bisa nutur
Orahanga jlema belog
Kedekin timpal
Dueg nutur
Kema mai ngaba tutur
Marasa bonggan
Kema mai nutur
Tutur buin tuturang
Ane medik dadi liu
Ane besik dadi dua
Ane bawak dadi lantang
Pelih bisa dadi beneh
Beneh mase bisa pelih
Engkuk engkur....
 Nglidang awak belog
Gelar gelur ngedengang goba
Kauk – kauk pang kaden dueg
Beh ....
Liunan tutur med ningehang

Olih : Dian Saputra

Galang Idep Matilar Narkoba

Ulung sunaran bulan di petenge,

Sing makrana galang sang maninggal
Silib – silib kakuwubin inguh nyujur galang
Idepe mabucu kangin kauh
Paling mangalih galang idep
Makrana peteng seng manumadi
Elah alih nglaih idup
Dharmane sing ada nakonang
Kaline mamurti wisesa
Kewala ....
Sing ada wiguna yen galang idepe sirna
Yadiapin ....
Menek tuun nyakupang tangan nyujuh widhi
Sinambi ngutang dewek ngembahang angkara
Mimpas – mimpas ngeledin jalan peteng
Tuah ja idup karasa kajajah baan I Madat
Peteng ulian bayune membah
Kadi lilir embahan toyane paling
Karasa ngembeng ya tan padaya
Tuah mangalah mangalih bucun luan – luanan toya
Engsap dewek....engsek hati....
Tuah narkoba na kadutunin
Tuah raksasa ne kaparekin
Lipia ulian nilar wiweka
Ada ke luungan...
Idupe makipu – kipu di buk narkoba?
Ada ke luungan...
Ngetohang idup nglempasang dharma tetimbang?
Ulian salah ulah
Majalan ngalih peteng
Ngadu ngetohang margi hayu
Kewala ....
Puyung mamogol
Tuah....
Sayan – sayan manelahang idup
Di jalan narkoba
Buka tumperan rokone
Ngreredang maawu manilar urip

Olih : Arya Paduhungan

WAYANG
Tak ...tak...tak
Siat wayange rames
Watu wetu kadi wacakan
Switra tan mitra ring kuruksetra
Sempal sinempal
Saling sempal
Wantah pakaryan sang dalang
Nanging dalang tan makanten ring kelir
Tak ....tak....tak
Sane seda mapupul – pupul
Seda tan dados nyeneng
Nyeneng tan dados seda
Nyeneng dados seda
Sami masikian ring kropak
Wantah kakawian sang dalang
Tak ....tak....tak
Dalang sane tan seda-seda
Nanging tan makanten ring kelir
Sayang akeh dalang tan pawayang
Sane seda tan nyeneng ngakehang
Sane nyeneng ngakehang seda
Dados dalang sida nalangin
Yadiastun tan sida seda
Yan seda wantah.......tak..........tak
 Olih : Kasub Sidan

UYAH PASAH SAKING PASIH

Napi dadosnyane

Prade uyahe pasah saking pasih?

Nenten wenten uyah

Prade tan wenten pasih

Yening tan wenten uyah

Janten mati rasa tan wenten rasa

Uyahe ngwetuang rasa

Uyahe ngwetuang jaen

Uyahe ngwetuang pakeh

Uyahe ngwetuang pahit

Napi penadosnyane

Prade pasihe telas

Jaga nenten wenten uyah

Nenten wenten rasa

Prade uyahe pasah saking pasih

Nenten jagi wenten rasa

Mati rasa

Manusane tanpa rasa

Tan pangrasa!!!!
 Olih : I Kt Gde Suryadala

Gambar Jagat

Nirgamayang titiang tukang gambar

Titiang ngagem kuas

Ngawit ngawi daging jagat

Paksi ngaksi mendak semeng

Nyanggra nyantos baskara nundung wengi

Barak, gadang, pelung, kuning, pakibeh jagat

Alon, enggal, aeng, bagus, malomba ring cacentok

Aduh, melah katon yan katonton

Aduh, santosa yan karasayang di rasa

Sami prasida kasurat

Nanging dewek titiang tan mungguh

Ring gambar sane kasurat

Lali.....

Olih : I Nyoman Budaya

 Apa Buin Pangenang

Apa buin pangenag

Apa buin selselang
Buka kenehe ibuk madusdus gembong api
Yan tuara dewek lan nyama braya
Nyen lakar ngisinin basang kola?
Sawai – wai mupuh yeh mata bakal daar
Pangenang awake tiwas
Ibi sanja ningehang orta :
Unduk I maling nguyutang maling
Gumanti teken I maling
Ada maling ada maling
Ciri malinge masuryak maling
Cerik – cerike mabiki :
Magending “diktatur absolut”
Ngekatang sinapang karet
Bebekan dekil
Maingket dadi bal mariem
Ndikapan bakal sida madingehang?
Olih : I Ketut Suwija

Majugjag
Ki Darmatula matakon
Matungked bangkiang
Nguda keto ane malu
Makejang bakat gugu
Makejang kaden tuhu
Ki Gugontuhon masaut
Masikut ukudan
Mula keto uli malu
Makejang patut gugu
Makejang tuah tuhu
Ki Darmatula magebras
Nyambilang tudang tuding
Dong iwasin
Beli manana ngulik sastra
Dong iwasin
Adi wicara ngamong sastra
Dong ingetin
Satinut teken bapa tatwa
Ki Gugontuhon mamengos
Nyambilang sambang – simbing
Tonden karuan
Duege magarang beneh
Tonden karuan
Duege mungahang keneh
Tegarang edengang
Encen melaha demen majugjag
Olih : Ki Dusun