1.

Karangasem Katemu
Olih I Putu Suweka Oka Sugiharta

Tolih je kota Karangasem kiterin yangubu

Gobane gilik buka bubu
Miribang anake di beten tusing ada rungu
Yen tuturin tiang masi tusing bakal kagugu
Karangasem ngarad keneh anake joh
Murang murang laku
Lakar nau yan suba neked ditu
Buin pidan lakar sida matemu?

Rasaang ja daatan sasih kaneme sedeng parus

Bungan pucuk rejunane kembangne pangus
Bungan teleng birune aasang angin nglinus
Kela- kelaning nadak kelangan mamaan alus
Nanging polone tusing buin sanget kebus
Lakar ke makada kimud matemu?

Di bukite ene tanahe makecap madu

Anake makasihan itep ngidu
Saling sopin bubuh anget masidu
Nyaruang gesite nyengetin cara tledu
Lakarke ngae lud matemu?

Iwasin ja tiing jlepunge ngedengang begerne

Tusing lek nglumpasin tapihne
Nanging tusing ada rungu maninggahin
Medangne atep suba sadia ngenitin
Lakarke ngarad tangar matemu?

Buin pidan ja iraga lakar las matemu dini

di Karangasem
Lan sineb janji-janjine masem
Lan ilangang rasa kimude apang remrem
Lan engkebang rasa tangare nganti kelem
Jalan pade aduang pangrasane dalem
Jalan tegul kapitresnane diastun paningalane ngidem
Jalan undukang kenehe apang tusing buleh gulem
2. TRESNA MAGUYANG MAKAYANG KAYANG
Olih Made Suweta Aryawan

Tresnan adi
Nelekep di muncuk alis adi
Meliah nuluh bucun paningalan
Mengkeb di sujenan pipin adi
Ngudiang demit makenyir
Ngetel poos beli
Edot ngadab keneh adi
Liang idepe
Galang kenehe
Ne jani ujan
Kerug tatit krebek galak
Nguyak keneh beli jengah
Tusing sida beli ngelipat
Awak beli teteh sedih
Aget enu ada ngedekol
Sisan angkian di kekolongan
Ento tekek ngisengin beli
Kedeh nunden beli idup
Apang sida nulungin
Entikan tresna sujati
Ne nyandah di keneh adi
Beli satia maguyang
Makayang-kayang ngajak adi
Elingang tresnan beli ken adi
 3 NGEPUNG LAWAT UYANG
Olih Made Suweta Arawan

Yan apa kaden kepunga

Semengan rengas sing masugi
Kanti sepanan nganti baju
Ngepung lawat rengas ngindang
Nulengek pati kaplug
Makuug gradag-grudug
Ngagen lakar ngepik bunga
Miyik ngalub ngebek ambara
Liu pada maboya
Wireh gumine remuk uwug
Makejang masebeng kenyir saja
Nyeledet ngentungin nau
Ulian tendas puruh saru

Matan aine saja ngenter

Nanging tebelan guleme selem
Mebrarakan ngabekin langit
Kanti ilid enteran bintange
Sing pesan ada angin nulung
Nampatang ebet sebet ati
Malali makisi-kisi
Nyaruang kenehe mati
Dija kepung punyan naune
Makejang keskes reges kaput ngenges
Dija bitbit tongos girange
Makejang nyelangkang magaang
Aruhhhhh.......
Bareng buduh aduh-aduh
Cicing jaruh ngamah bubuh
Ento kepung kanti labuh
Jalan ja suud inguh
Negak matimpuh mitbit pupuh
Apang tepuk ane ruruh
Nuluh munduk unduk
Nuncap gunung pengung
Ditu mare suud
Ngipi melali melali
Jalan gantasang
Suud uyang maguyang.
4. SEKARE NGANYUDANG RASA
Olih. Made Suweta Aryawan

Baang tiang sela

Titiang misadia nyanggra nyewaka
Sampunang malih sumandangsaya
Titiang sampun sayaga
Ring dije genah margine
Ngiring pastikayang
Mungpung kari wenten galah

Baang titiang sela

Yan sampun Sanghyang Ratih
Macingak nyundar teja
Titiang sampun sayaga
Nyanggra jenyana
Titiang sampun matimbang rasa
Ngiring puputang
Duaning sampun panemaya
Diastun megaleng jengah
Titiang tan pacang matulak
Wireh niki subayan titiang
Duk kari mesaput garba
Malih titiang nyekenang
Malih pidan wenten pemargi
Duaning sampun pangelong
Sabehe ngapah masa
Nganutin ombakan rasa.