1 IRMJP

Naskah Magek Manandin

Para pelakon
1. Rajo Duo Baleh___________________
2. Bujang Salamaek_________________
3. Datauk Bandaro__________________
4. Magek Manandin_________________
5. Linduang Bulan__________________
6. Subang Bagelang________________
7. Janang________________________
8. Sutan Paliangan _________________
9. Manti__________________________
10. Rajo Kuaso_____________________
11. Puti Bungsu_____________________
12. Dubalang_______________________
13. Buruang Nuri____________________
Gurindam 1
Tanang panonton bakuliliang
Kami ka mulai bacurito
Nan ka diri Magek Manandin
Magek Manandin dicuraikan
Jo diri Subang Bagelang
Dalam nagari Sandiang Baka
Magek urang koto di ateh
Lawan jo rajo buruak paham
Di Singkarak namo nagari
Maso hiduik Rajo Duo Baleh
Nagari inyo nan mangganggam
Nyo sangko hiduik tak kamati
Dek diri Rajo Duo Baleh
Tumbuah pikiran sakutiko
Sadang barundiang inyo kini
Ap?. Tah?. Tih?.

Rajo Duo Baleh 1-1

Salamaek nan haluih budi
Nan bijak bakato kato
Bujang mandakek lah kamari
Dek denai ado nan taraso

Bujang Salamaek 2-1

Ampun baribu kali ampun
Ampuni badan diri ambo
Sapuluah jari ambo susun
Kato bana ambo sabuik juo
Hukum buang ambo ka jauah
Digantuang ambo ka tinggi
Bari dek angku kato sungguah
Nak tantu ambo manuruti
Apokoh sabab karanonyo
Mangko ambo di imbau bana
Adokoh dubalang rabuik rampeh
Dimano pangulu salah hukum
Adokoh rando dapek malu
Walau pun parik nan tarampa
Kato dek angku sungguah sungguah
Nak sanang darah didado
Asah tuanku nan manyuruah
Baban Salamaek pikua juo
Alah ka sanang hati angku

Rajo Duo Baleh 3-1

Manolah Bujang Salamaek
Nan capek kaki ringan tangan
Nak lakeh sampai nan di niaek
2 IRMJP

Salamaek cubo simak an

Mangkonyo buyuang denai imbau
Pado kutiko iko kini
Tak ado dubalang rabuik rampeh
Indak pangulu salah hukum
Baiak pun parik nan tarampa
Indak doh rando dapek malu
Nan takana di badan denai
Tapikia dalam kiro kiro
Pikiran baiak nan lah tumbuah
Mupahum kokoh nan lah timbua
Tantangan diri adiak denai
Iyolah Puti Nilam Cayo
Si Nilam lah gadih gadang
Inyo nan balun bajunjuangan
Kito pancang malah galanggang
Kito baralek anam bulan
Di bantai kabau ampek limo
Sabuang jo rambuang di adoan
Siang malam kito bajago
Panggia nan sisiak palapahan
Di jamu isi nagari ko
Di panggia anak sutan sutan
Itu nan kilanan hati
Pikiran indak bacabang
Bujang batenggang lah sakali
Hari nan elok jan tabuang
Alah kajaleh dek Salamaek
Bujang Salamaek 4-1
Kalau baitu kato angku
Hati didalam nan lah sanang
Sagalo parentah dari angku
Sabuah indak ambo tupang
Kini baitu hanyo lai
Di himpun Manti jo Dubalang
Jan siang ba habih hari
To kakok karajo surang surang
Ambo batenggang hanyo lai
Ap?. Tah?. Tih?.

Gurindam 2
Rundiang putuih kato saukua
Salamaek bajalan nyo sakali
Mancari Manti jo Dubalang
Di lapeh siriah bakapua
Pamanggia urang di nagari
Nan jauah surek malayang
Mano panonton nan budiman
Kami aliah ujuang curito
Magek Manandin kito japuik
Sadang tamanuang duduak surang
Tanyo lah tibo dek ayah nyo
Panonton mari to dangakan
Ap?. Tah?. Tih?.

Datuak Bandaro 5-2

Nak kanduang Magek Manandin
Sibirang tulang nan salapan
Bacakak ko garan lahia batin
Mangko bamanuang balabiahan
Raso dihati indak nyaman
Pikiran indak dikarajo
Alamaek uleh kamangasan
Ragi disiko binasonyo
Kok nyampang bintiak batuka
Tantu ka salah ragi kain
Turak lah latiah pulang baliak
Banang tarantang tak paguno
Jariah lai badaso indak
Arang habih basi binaso
Sabab kan ba a dek baitu
3 IRMJP

Kamuko nampak mambayang

Agak jo agiah nak batamu
Elok lah buyuang bari tarang
Kato di anak jaleh jaleh
Usahlah hati di pacewang
Adaek dunia nyato babaleh
Usah buyuang manaruah gamang
Nak oi sugiro lah katokan

Magek Manandin 6-2

Manolah mandeh kanduang diri
Sarato ayah kanduang ambo
Mangko tamanuang ambo tadi
Lai basabab bakarano
Ambo nan sadang duduak duduak
Dibawah kamuniang jantan
Lah datang surek sapucuak
Bujang Salamaek ma anta an
Surek panggilan ka galanggang
Galanggang Puti Nilam Cayo
Nan sadang mancari judu
Adiak dek Rajo Duo Baleh
Diranah kampuang Singkarak
Lah limo bulan galanggang rami
Alek nyo rami siang malam
Lah banyak rajo nan datang
Cukuik jo anak sutan sutan
Balun basuo nan sasuai
Ka judu Puti Nilam cayo
Sabuang nan rami tiok hari
Darah ayam bak dibandakan
Patah taji bak di sukati
Siriah manjadi sarok balai
Pinang manjadi dama tondeh
Gambia manjadi tanah liyek
Itu lah sabab karano nyo
Mangko tamanuang ambo tadi
Niaek dihati alah lamo
Nak mancaliak galanggang rami
Kini baitu lah dek ayah
Duo jo mandeh kanduang diri
Ambo mintak kato sapatah
Lapeh lah badan ambo pai
Indak pai raso tak mungkin
Antah urang mancubo kito
Bari lah ba a ambo izin
Nak sanang darah di dado
Ba apo pikiran ayah

Linduang Bulan 7-2

Nak kanduang balahan badan
Kalau lah itu kandak hati
Kami lah suko malapeh an
Asah lai luruih pulang pai
Kok sampai anak ka balai
Usah lamo bajalan jalan
Jikok taragak nak bajudi
Atau manyabuang jo ba dadu
Hati usah di paturik an
Habih pitih main baranti
Jan sampai mambukak baju
Maluluih kain di badan
Randah banso sabab dek itu
Hilang rono takucak roman
Rusuah kan budi ka tagadai
Jan sampai paham tajua
Sampai ka cucu piyuik kito
Manjadi cacek tu nak kanduang
Usah manyasa kamudian
Itu nyo pasan dari mandeh
Di ayah kok lai katambah nyo
Kok nyampang singkek tak tauleh
4 IRMJP

Sasa kudian tak paguno

Paham kan bana tu dek buyuang

Datuak Bandaro 8-2

Nak kanduang Magek Manandin
Rundiangan mandeh iyo pulo
Nak sunyi lahia jo batin
Melah bajalan jo kutiko
Melah kutiko iko kini
Kutiko bungo sadang kambang
Ajuang balahia di musimnyo
Danga lah pasan dari ayah
Kok hanyo sipek mudo matah
Buruak jo baiak kapadoman
Larang pantangan adaek minang
Sipaek nan tigo kok dikaji
Jadi pituah dek nan tuo
Simak dek buyuang ayah bincang
Partamo Bujang Parisau
Kaduo Bujang Pangusau
Katigo Bujang Pusako
Kok hanyo Bujang Parisau
Tagak katangah nyo bamegu
Tagak katapi nyo managun
Siang malam bahati gamang
Patang pagi bahati ragu
Malam di gilo angan angan
Siang di bimbang agak agak
Cadiak malam nan binguang siang
Paham sarupo gatah caia
Iko elok itu katuju
Sarupo pimpiang di lereang
Bak aia di sandiang pulau
Tunggang kian dareh kamari
Kok hanyo Bujang Pangusau
Suok kida mamacah parang
Mangusuik alam nan salasai
Mangaruah aia nan janiah
Asuang siantek balabiahan
Jungkek jo patiang di hati nyo
Sayang di urang ka bacarai
Banci di urang nan ka elok
Kecek gadang timbangan kurang
Tinggi ruok dari boto
Nan dek urang sagalo bukan
Nan dek inyo sagalo iyo
Lonjak bak labu di banam
Sarupo kambiang dek ulek
Kok hanyo Bujang Bapusako
Tau di rantiang ka manyangkuik
Tau di duri ka mancucuak
Tau di tinggi ka ma impok
Tau di gadang ka malendo
Tau di bayang kato sampai
Nan tau jo koroang kampuang
Nan tau jo ipa bisan
Pandai mangaji baso basi
Pandai manggantang aia lauik
Pandai manyalam dalam bumi
Pandai ma uleh rumin putuih
Paga adaek benteang pusako
Itulah sipaek ka dipakai
Banamo mudo bapusako
Bogo tatungkuik tagulampai
Bapantang rusak rumah tanggo
Paham kan bana elok elok
Padoman pagi jo patang
Asah nan baiak kito kakok
Tuhan manoloang di balakang
Alah ka jaleh tu dek buyuang
5 IRMJP

Magek Manandin 9-2

Pasan pitaruah dari mandeh
Pituah dari ayah tadi
Bak dawaek lakek ka karateh
Indak kamungkin lupo lai
Kok lupo antaro lalok
Lalok di ambiak karasian
Tasintak takana pulo
Alah kasanang hati ayah

Linduang Bulan 10-2

Nak kanduang sibiran tulang
Sidingin tampa dikapalo
Sanang hati bukan kapalang
Nasehaek kami batarimo
Kini baitu hanyo lai
Iko lah ameh limo kaco
Baolah ayam biriang balang
Ambiak lah taji sacukuiknyo
Elok kini buyuang bajalan
Sabuah lai anak kanduang
Anak kan alah tau juo
Buyuang kan alah batunangan
Jo diri Puti Galang Banyak
Batunangan kain pandukuang
Mintak lah izin ka bajalan
Baitu juo nan biaso
Buruak jo baiak tak bacarai
Garak alah si apo tau
Salah kito manuruik adaek
Sungguah pun awak samo awak
Adaek nan usah ditinggakan
Nak salamaek langkah bajalan
Turuik lah Subang Bagelang
Jo do’a kami ma iriangkan
Untuang capek babaliak pulang
Kito bacarai hanyo lai

Magek Manandin 11-2

Kalau baitu ka baiak nyo
Jan rusak enggeran budi
Kito bacarai samantaro
Ambo bajalan hanyo lai
Ap?. Tah?. Tih?.

Gurindam 3
Kato putuih Magek bajalan
Mandeh malapeh inggo janjang
Tingga lah ayah tangah rumah
Takana Magek jo tunangan
Rang gadih Subang Bagelang
Dek lah suruahan dari ayah
Takana di anak mamak
Raso bakucak sandi iman
Maranyai paluah didado
Raso tadanga rang manyorak
Magek ma himbau di halaman
Mari to danga baritonyo
Ap?.Tah?.Tih?..

Scene 3
Ket: Magek Manandin berada
diluar legaran. Dia berbicara
dan dijawab oleh Subang Bagelang
dari dalam lingkaran.

Magek Manandin 12-3

Diak kanduang Subang Bagelang
Sibiran tulang nan salapan
Jaweklah salam joloang datang
Ambo maimbau dihalaman
6 IRMJP

Subang Bagelang 13-3

Tuan kanduang Magek Manandin
Tunangan dibadan diri
Nan dicinto pagi jo patang
Ba a bak cando urang lain
Itu cibuak basuah lah kaki
Tingkek dek tuan anak janjang

Magek Manandin 14-3

Subang Bagelang nan budiman
Parintang mandeh jo ayah
Dek tagak ambo dihalaman
Disangko adiak tak dirumah
Gadang lah niaek nan takana
Lah tigo hari jo iko
Walau indak disuruah bana
Namun ambo ka naiak juo

Subang Bagelang 15-3

Putiah kapeh nak samo nyato
Putiah hati ba ka a da an
Dirumah kito bacarito
Lapiak nan alah dibantangan
Tuan oi naiak lah sakali
Ap?. Tah?.Tih?

Ket: Magek Manandin masuk kedalam

lingkaran diantar dengan galombang.

Magek Manandin 16-3

Diak kanduang pamenan mato
Lah habih siriah sakapua
Dek ambo joloang kamari
Pado bahabih hari juo
Lah patuik mambukak tutua
Ambo sabuik kilau dihati
Nan taraso raso di lidah
Takana dalam kiro kiro
Pikiran bulek tak bacabang
Mupahum kokoh nan tak sumbiang
Niaek mungkasuik dalam hati
Nak pai bajalan jalan
Karanah kampuang Singkarak
Badan tacinto kagalanggang
Kagalanggang Puti Nilam Cayo
Adiak dek Rajo Duo baleh
Itu di denai nan takana
Sambia mancaliak kampuang urang
Lapeh denai jo saba rela
Untuang capek babaliak pulang
Apo pikiran adiak kanduang

Subang Bagelang 17-3

Tuan kanduang Magek Manandin
Tunangan dibadan ambo
Mandanga tuan mintak izin
Caia anggota katujuahnyo
Sabab kan ba a dek baitu
Kasiah nan baru kito mulai
Sayang nan baru kito pupuak
Tuan bao bajalan jauah
Indak koh hibo diri tuan
Maningga kan badan diri ambo
Katingga jo hati rusuah
Bangkalai sadang tagamba
Jo tuan mangko nyo sudah
Kok tuan nak pai juo
Nak samo sanang dalam hati
Bao lah badan diri ambo
Elok lah kito samo pai
Itu di ambo nan taraso
7 IRMJP

Ba a pikiran hati tuan

Kok buliah pai baduo
Bara kasanang paratian
Tuan ma alum tantang itu

Magek Manandin 18-3

Adiak kanduang pamenan mato
Kalau itu adiak kato kan
Nak pai kito baduo
Sulik di ambo ma iyo kan
Indak baniaek nak malarang
Bukan sangajo maninggakan
Nan jadi adaek digalanggang
Indak bacampua parampuan
Lapeh lah ambo pai surang
Pasanang sajo dalam hati
Kok lai hayat samo panjang
Kudian kito samo pai

Subang Bagelang 19-3

Oh tuan yang baiak baso
Kalau baitu kato tuan
Ambo manuruik tak dibao
Indak koh ibo maninggakan
Oh tuan nan manih muluik
Sayang tak dapek dipaduo
Namuah bana ambo manuruik
Tuan tak namuah ka mambao
Rusuah hati rusak pikiran
Mandanga tuan ka pai
Bakucak iman dalam batin
Jikok jauah tuan bajalan
Sabalun tadanga mati
Indak diganti jo nan lain
Kok lamo tuan bajalan
Mambuek hati wak ragu
Antah pabilo kapulangnyo
Tadoroang kasiah bakeh tuan
Bak anak arek manyusu
Dicarai apo kagunonyo
Kok lamo bahati ibo
Hanyo manyarah pado Allah
Kasiah surang ambo kironyo
Bak pisau tajam sabalah

Magek Manandin 20-3

Usah adiak barusuah juo
Adiak kanduang Subang Bagelang
Kok pai bana badan ambo
Niaek mancaliak dunia urang
Kasiah sajak dirahim ibu
Adiak tingga malah dirumah
Haram balain dihati ko
Namuah basumpah kalamullah
Jo kok nyo kasiah nan diganggam
Dek nan banyak indak ambo ragu
Urang lain dipandang haram
Adiak surang sunaek paralu
Indak elok adiak manangih
Maaf kan kato nan talangga
Adiak nan layuak gunuang mipih
Salamaek sajo malah tingga
Denai bajalan hanyo lai
Ap?.Tah?.Tih?.

Gurindam Legaran 4
Rundiang putuih kato batimbang
Subang Bagelang nyo nak pai
Magek tak namuah nyo mambao
Tatagun gadih ateh janjang
Dek kasiah baru bamulai
Dilapeh jo hati hibo
8 IRMJP

Si Magek bajalan panjang

Manuju koto rang Singkarak
Ka kampuang Puti Nilam Cayo
Baru tibo ditapi galanggang
Janang batanyo lapeh harak
Mari to danga barito nyo
Ap?.Tah?.Tih?.

Scene 4
Janang 21-4
O Sutan nan baru tibo
Disabuik gala balun jaleh
Kito batamu sakali ko
Balun basudi basiasek
Sabuik lah kato jo nagari
Namo siapo rang imbau an
Nan niaek sutan kamari
Lai kok babuah tangan
Itunyo tanyo nan mandatang
Malabiahi kok sio sio
Adaek basuo di galanggang
Tanyo batanyo lah biaso
Ba apo pikiran sutan

Magek Manandin 22-4

Manolah Janang di galanggang
Tonggak galanggang nan ampek
Adaeknyo masuak kato urang
Tantu basudi basi asek
Kurang pareso sio sio
Kurang ilimu suluah padam
Adaek janang itu biaso
Lah jaleh buek nan ba ganggam
Gala ayah Datuak Bandaro
Mandeh banamo Linduang Bulan
Di Sandiang ambo gadang
Magek Manandin namo ambo
Gala nan balun baimbauan
Dek alun karumah urang
Limbak nan dari pado itu
Walau kok indak mamak tanyo
Lah tabayang bak kilik camin
Lah nyato ayam ambo bao
Tantu sangajo nak bamain
Tigo tanyo limo pambari
Tak ado kurang agak ciek
Jan siang bahabih hari
To cubo main baketek ketek
Ba apo pikiran Janang

Janang 23-4
Kalau baitu buni kato
Jan kito balalai lalai
Tanang lah Magek sakutiko
Nak ambo tanyo urang balai

Ket: Janang menanyakan pada orang

di Gelanggang tentang
apa permainan yang akan dibuat.
Sementara itu, Magek
bermain dahulu dengan yang lain.
Dalam permainan itu Magek
menang. Kemudian, Rajo Duo Baleh masuk.

Rajo Duo Baleh 24-4

Siapo urang baru ko jang?

Janang 25-4
Disusun jari nan sapuluah
Maaf ka angku dipuhunkan
Ampuni badan diri ambo
9 IRMJP

Hukum buang ambo ka jauah

Tuanku juo kahilangan
Kato bana disabuik juo
Inyo rang ranah Sandiang Baka
Banamo Magek Manandin
Nan niaek hati inyo bana
Taragak jo angku nak bamain
Lah kami cubo malawan
Baketek ketek caro kampuang
Pitih kami bakisa tangan
Kini niaek nyo nak manyabuang
Ayam kuriak bataji gadang
Lawan jo Biriang Sanggonani
Sabuang salapeh hari patang
Kalah manang pambali sugi
Ba apo pikiran angku

Rajo Duo Baleh 26-4

Kalau baitu kato Janang
Sanang rasonyo dalam hati
Lambek tibo ka kito jalang
Kini lah datang nyo kamari
Datang inyo lai dipanggia
Surek Salameak ma antakan
Lah bak biduak dikayuah ilia
Lah main juo nan den angan
Kini baitu hanyo lai
Nak sanang hati didalam
Jan siang bahabih hari
Mintak lah tampin taruah ayam
Janang sugiro tantang itu

Janang 27-4
Kalau baitu kato angku
Jan siang bahabih hari
Tingga tanang angku da ulu
Ambo batenggang hanyo lai
Saba tuanku sakutiko

Ket: Spontan. Janang meminta taruhan

untuk ayam kepada
Magek.Magek memberi taruhan besar.
Dia bahkan akan
membuka pakaiannya jika tidak punya
cukup uang untuk
menambah taruhan. Namun, Magek kalah.
Pakaiannya dibuka
secara pakasa oleh dubalang Rajo Duo Baleh.
Ap?.Tah?.Tih?.

Gurindam 5
Ayam kalah main salasai
Magek bajalan hanyo lai
Jalan manyese nyese kampuang
Kain jo baju lah tagadai
Dek ulah bamain judi
Dingin nan indak ka tatangguang
Dek latiah litak lah tibo
Nyo cari kandang tak baunyi
Di sinan badan bakalaian
Dek sansaro timpo batimpo
Tacemo mamaliang jawi
Panonton mari to dangakan
Ap?.Tah?.Tih?.

Scene 5
Ket: Dialog spontan. Orang kampung
menuduh Magek mencuri
sapi. Dia disiksa dengan berbagai pukulan.
Tidak lama
kemudian tiba lah Rajo Duo Baleh
menanyakan hal yang
10 IRMJP

terjadi. Kemudian, orang kampung

memberi penjelasan

Sutan Paliangan 28-5

Ampun baribu kali ampun
Ampun sabaleh jo kapalo
Sapuluah jari kami susun
Kato bana di sabuik juo
Kok urang nan kami bao
Lawan tuan ku main tadi
Nyo mangusuik dikampuang kito
Sampai inyo mamaliang jawi
Takajuik urang ateh rumah
Heboh taranak dalam kandang
Ka angku kato tasarah
Antah pajako katabuang
Rundiang bapulang pado angku

Rajo Duo Baleh 29-5

Manolah Manti dalam kampuang
Kalau baitu pakabaran
Lah asah siang bak hari
Lah nyato tarang bak bulan
Kami baitu Manti tuo
Nak jan ta ulang duo kali
Kabek an pajako di pondok rundo
Nak tampak dek urang rami
Kok untuang lalu rang kampuangnyo
Tantu ka sampai pasan awak
Pasan nan indak baturuti
Itu nyo kato dari ambo
Jan malam ba habih minyak
Manti batenggang lah sakali

Manti 30-5
Kalau baitu kato angku
Sanang rasonyo paratian
Tingga tanang angku da ulu
Titah ka kami karajoan
Kami sugiro hanyo lai
Ap?. Tah?. Tih?.

Gurindam 6
Magek lah jatuah duo kali
Ibaraek di impik janjang
Kini ma unyi pondok rundo
Jikok santano kito rasai
Tak mungkin kampuang katajalang
Mungkin ka larek salamonyo
Mano panonton nan budiman
Kami aliah tujuan kaba
Nan ka diri Rajo Kuaso
Nyo turuik anak kanduang badan
Jawi pambajak nan takana
Mari to danga barito nyo

Scene 6
Rajo Kuaso 31-6
Nak kanduang balahan diri
Subang Bagelang asa namo
Mangko ayah turuik kamari
Ado dek ayah nan taraso
Nan takana di badan ayah
Tapikia dalam kiro-kiro
Urang lah ka mulai ka sawah
Jawi pambajak alun ado
Ayah taniaek nak bajalan
Ka ranah kampuang Singkarak
Kok untuang pambari Tuhan
Dapeklah jawi ka pambajak
Itu di ayah nan takana
Sangajo mancari jawi
11 IRMJP

Sabalun hari tinggi bana

Lapeh di anak ayah pai

Subang Bagelang 32-6

Manolah ayah kanduang ambo
Pambimbiang pagi jo patang
Kalaulah itu ka baiak nyo
Tak mungkin ambo ka malarang
Ambo lapeh jo suko hati
Hari nan baiak jan tabuang
Kok lah basuo nan dicari
Capek ayah babaliak pulang
Apo pikiran hati ayah

Rajo Kuaso 33-6

Kalau baitu kato anak
Malapeh ayah bajalan
Ka tuhan kito mamintak
Sasuai sajo palangkahan
Nak kanduang Subang Bagelang
Sabuah lai nan takana
Tapikia di badan ayah
Taga dek ayah kabajalan
Kok hanyo sipaek rang padusi
Nan talukih didalam adaek
Jadi bincangan dek nan tuo
Tabagi tigo anak kanduang
Partamo padusi Simarawan
Kaduo Rembang Tali Awan
Katigo padusi Sabananyo
Disabuik padusi bapusako
Jikok padusi Simarawan
Paham nyo bak gatah caia
Bak aia di sandiang pulau
Tunggang kian dareh kamari
Itu elok iko katuju
Kian sayang kamari kasiah
Bahati bimbang salalu
Jikok nan Rembang Tali Awan
Iko padusi tinggi hati
Lonjak bak labu di banam
Bak kacang di habuih ciek
Suko mamuji muji diri
Nan di awak sagalo rancak
Nan di urang sagalo bukan
Diam di rumah nyo pantangan
Gilo malala ilia mudiak
Sarupo kambiang dek ulek
Larangan adaek kok kau tampuah
Syarak kok namuah malongkahi
Narako juo tantangan nyo
Di akiraek antah bak mano
Jikok padusi Bapusako
Tapakai taratik jo kurenah
Tau di ereang nan jo gendeang
Tau di sopan nan jo santun
Tau di duri ka mancucuak
Tau di rantiang ka manyangkuik
Nan tau di paruik litak
Marasokan hauih jo lapa
Kok pai kalua rumah
Kok tak bakawan ndak bajalan
Bajalan manakua nakua
Mangana asa mulo jadi
Patuik anak bao bapikia
Pakaian padusi bapusako
Walau bak mano dayo dunia
Bapantang rusak rumah tango

Subang Bagelang 34-6

Nan ayah tarangan tadi
Itulah kato sabana nyo
12 IRMJP

Di simpan dalam runggo hati

Jadi padoman salamo nyo
Siang di ambiak kapadoman
Malam ka banta kalang hulu
Simpai lah kokoh di ganggaman
Ma’alum ayah tantang itu

Rajo Kuaso 35-6

Nak kanduang sibiran tulang
Alah mah taguah iman didado
Sanang hati bukan kapalang
Nasehaek ayah batarimo
Kini baitu lah dek anak
Lah sanang hati ayah pai
Sabalun hari tinggi bana
Ayah bajalan hanyo lai

Gurindam Legaran 7
Salasai rundiang maso itu
Lah bajalan Rajo Kuaso
Manuju kampuang rang Singkarak
Indak ado bahati ragu
Sudah barundiang jo anak nyo
Mancaliak taguah paham anak
Dek lamo inyo bajalan
Bajalan bagageh gageh
Maranyai paluah di dado
Alun lai lapeh palak badan
Batamu Rajo Duo Baleh
Sinan tabukak kato kato

Rajo Duo Baleh 36-7

O tuan Rajo Kuaso
Nan cadiak nan biyo pari
Ado kok niaek jo sangajo
Mangko sampai tuan kamari
Heran sungguah denai mamandang
Tapikia dalam kiro-kiro
Elok lah tuan bari tarang
Nak sanang darah di dado

Rajo Kuaso 37-7

Rajo Duo Baleh nan budiman
Nan bijak bakato kato
Kalau itu nan batanyoan
Danga kan malah baritanyo
Mangko sampai denai kamari
Ka ranah koto Singkarak
Niaek hati mancari jawi
Mancari jawi kapambajak
Bulan Syawal alah sapangga
Ka masuak bulan Zulhijjah
Nak niaek hati ambo bana
Dibulan haji nak ka sawah
Itu nan niaek jo sangajo
Dek hari ka musim hujan
Jawablah kato dari ambo
Nak samo sanang paratian

Rajo Duo Baleh 38-7

Kalau baitu niaek hati
Lah jaleh tujuan kato
Lai basuo nan dicari
Ado di ambo kini nangko
Badannyo indak gapuak amek
Di indak taranak rang Singkarak
Badan kuruih dagiang saketek
Tapi lah elok ka pambajak
Kalau di inok dimanuangan
Mungkin taranak Sandiang Baka
Kok lai katuju tu dek tuan
Harago indak maha bana
13 IRMJP

Itu nyo kato dari ambo

Alah ka sanang hati tuan
Nak tantu baiak buruaknyo
Melah to caliak ka pautan

Rajo Kuaso 39-7

Kalau baitu nan ka baiak
Lah samo sanang paratian
Nak capek ambo babaliak
Elok kini kito bajalan
Ap….Tah….Tih….

Randai Cepat
Ket : Sebelum Rajo Duo Baleh dan
Rajo Kuaso masuk, Magek
dipukuli oleh Dubalang. Magek kemudian
terpekik melihat
pamannya dan langsung berbicara
dengan harapan akan
dibantu oleh pamannya.

Magek Manandin 40-7

Oh mamak Rajo Kuaso
Bari lah baa ambo aia
Indak tatahan lai rasonyo
Tulang salapan lah raso caia

Rajo Kuaso 41-7

O buyuang Magek Manandin
Lai mah tantu di nan lapa
Lai mah taraso hauih badan
Manga namuah mamaliang jawi
Indak ang timbang salah bana
Kini badan ang manangguangan

Ket: Rajo Kuaso pun ikut memukul Magek.

Setelah lelah baru bicara.
Rajo Kuaso 42-7
Mano Dubalang ka ampek nyo
Tagak kamari kini kini
Ba apo balalai juo
Sumbao kolai makan gaji
Kabek malah si buyuang ko
Arak lah kaliliang kampuang
Padeh lado nak nyo raso
Paja indak tau di untuang

Linduang Bulan 43-7

O tuan Rajo Kuaso
Apo bana salah si buyuang
Mangko tuan bunuah badannyo
Bapikia baa tuan kanduang
Jikok sabab ameh jo perak
Lai banyak ambo manaruah
Sipaek Rajo indak marusak
Apo lai sampai mambunuah
Utang ameh ambo mambaia
Hukum buang kami nak jauah
Patuik tuan bao bapikia
Banyak lai jalan ka ditampuah
Kok Rajo bana di nagari
Kok sutan bana di kampuang ko
Sasek suruik talangkah kumbali
Suruiknyo ka bana juo
Alun di usua di pareso
Asuangan urang ba iyo an
Tuan lah jaleh sio sio
Sasa kok tumbuah kamudian

Rajo Kuaso 44-7

Usah kau banyak carito
14 IRMJP

Usah ma ambek mahalangi

Jan kau manciracau juo
Aden kan Rajo di nagari
Buek di koto nan bajaja
Dusun taratak nan ba umpuak
Mulo nan dari Sandiang Baka
Panyinggahan jo Muaro Pingai
Sumani jo Koto Sani
Kok batali buliah den irik
Batampuak buliah den jinjiang
Buliah den ampiang picak picak
Buliah den giliang bulek bulek
Buliah den hitam den putiah kan
Bulek sagolek kato wak den
Dek ulah bamain judi
Sampai manjua jo manggadai
Habih pitih mamaliang jawi
Kini bia lah nak nyo rasai
Pantangan niniak sajak dulu
Urang pancilok jo pamaliang
Dari pado mambuek malu
Bia den tungga babeleang

Puti Bungsu 45-7

Mano lah mamak kanduang ambo
Indak elok talampau dandam
Kurang pareso sio sio
Kurang ilimu suluah padam
Pandang mamak di lahia sajo
Nan batin babuang ka balakang
Ba alah nasib badan ambo
Badan baduo tingga surang
Kok iyo bana mamak Rajo
Alun jaleh salah lah batimbang
Patuik di usua di pareso
Jan nan kalamak di mamak surang
Sungguah pun salah tuan ambo
Mamak ka bana balun tantu
Dek pandoroang gadang bahayo nyo
Bao bapikia lah da ulu
Rusuak jalan lah mamak tampuah
Pantang lah jadi pajatian
Adaek rusak agamo runtuah
Alamaek mamak ka jahanam
Alun takajuik lah ma ambua
Baru takakok tabae an
Sulik manjapuik nan talanjua
Sasa kok tumbuah kamudian

Rajo Kuaso 46-7

Usah kau manciracau juo
Aden pulo nan kau ajari
Kandak den Rajo Kuaso
Usah ma ambek ma halangi
Mano Dubalang nan barampek
Basigap kalian kini kini
Agak pa arek malah kabek
Kito bajalan hanyo lai

Dubalang 47-7
Kalau baitu titah angku
Kami nan indak ka manumpang
Tingga tanang angku da ulu
Kabek nan lungga nak di ulang

Ket: Selesai mengikat, Magek bicara.

Magek Manandin 48-7

Manolah mandeh kanduang ambo
Diak kanduang balahan badan
Bari lah maaf nan malangko
Rila kan sado nan tamakan
15 IRMJP

Rilakan aia susu mandeh

Ambo ko diseso untuang
Jaso mandeh alun tabaleh
Mungkin ka larek dari kampuang
Adiak bunsu tingga lah tingga
Jago lah ayah jo bundo
Di baliak papan nan sabilah
Adiak ka denai kana juo
Lapeh lah denai jo hati suci
Rilakan sajo nan tamakan
Budi ka denai anjuang tinggi
Maafkan sagalo kasalahan

Dubalang 49-7
Oi Magek dangakan bana
Kato nan indak ang pikia kan
Rundiang sarupo katiak ula
Nan indak ado kasudahan
Bantuak sarupo urang elok
Pandai bana babaso basi
Rancak nan baiak wa ang kakok
Dari pado mamaliang jawi
Kini baitu hanyo lai
Usah ang banyak banyak kecek
Dek hari basarang tinggi
Elok kini kito barangkek
Ap….Tah….Tih….

Gurindam Legaran 8
Magek di irik ilia jalan
Si bunsu marauang jo mandehnyo
Indak tabado hati ibo
Mano panonton nan budiman
Kami aliah tujuan kato
Ka diri si Buruang Nuri
Salamo buruang Nuri tabang
Tatukiak pandang nan dakek
Hati nan indak sanang lai
Dalam lurah satungka banang
Tampak urang sadang bakabek
Andailah jatuah dek si Nuri

Buruang Nuri 50-8

Manolah tuan janyo ambo
Disabuik gala indak tantu
Bari luruih ambo batanyo
Dek kito baru batamu
Ba a koh asa jo mulonyo
Mangko co iko parasaian
Curaikan ba a pado ambo
Nak samo sanang paratian

Magek Manandin 51-8

Kalaulah itu Nuri tanyo
Mangko co iko parasaian
Dek ulah judi nangko juo
Sampai tacemo tangah pakan
Tacemo mamaliang jawi
Di ranah koto Singkarak
Mangko tabuang di nagari
Ambo ko dihukum mamak
Mamak ambo Rajo Kuaso
Titahnyo pantang di tupang
Indak nyo usua nyo pareso
Hukum jatuah ambo tabuang
Salah tak buliah mintak ampun
Kok sasek tak buliah suruik
Kato mamak malu lah batimbun
Bana tak dapek ambo sabuik
Kini baitu hanyo lai
Dalam batanyo kanai tanyo
Toloang katokan asa Nuri
16 IRMJP

Nan punyo siapo pulo

Buruang Nuri 52-8

Kalau baitu kato tuan
Iyo pulo itu kironyo
Asa Nuri nan batanyoan
Dari subarang Aia Gilo
Tigo hari lamonyo tabang
Mangko sampai ambo ka siko
Jikok nan punyo ajuang pelang
Banamo Puti Taruih Mato
Ibaraek dagang basandaran
Inyo nan punyo badan ambo
Sakadar panjawek tanyo tuan
Alah ka sanang kiro kiro

Magek Manandin 53-8

Mandanga kato dari Nuri
Lah sanang dalam kiro kiro
Kini mamintak ambo ka Nuri
Toloang lah bukak kabek nangko

Buruang Nuri 54-8

Mandanga kato dari tuan
Itulah kato sabananyo
Dek ambo indak batangan
Tantu balambek bakarajo
Nak ambo ansua lah mancotok
Walau sahari duo hari
Asah nan baiak kito kakok
Untuang tajajak tanah tapi
Gurindam Legaran 9-Minang
Dek yakin Nuri Mancotok
Tabukak kabek kasadonyo
Nuri nyo aliah tampek inggok
Jalan kalua dicarinyo
Magek mandaki hanyo lai
Mandaki jo manau sonsang
Taruih bajalan nyo sakali
Tibo dijalan tigo simpang
Dapeklah kaba maso itu
Pasan di bao rang panggaleh
Tunangan lah dapek judu
Iyo jo Rajo Duo Baleh
Dek diri Magek Manandin
Taruih ka sumua Subang Bagelang
Tibo di sumua balantai camin
Maimbau Subang Bagelang

Subang Bagelang 55-9

O tuan nan baru tibo
Gala siapo rang imbao kan
Indak tuan batanyo tanyo
Sumua lah nyato balarangan

Magek Manandin 56-9

Kalau itu nan Puti bincang
Maaf kan ambo tantang itu
Ambo kan urang baru datang
Dusun nagari indak tantu
Ambo di bao untuang buruak
Kini tacinto ambo mandi
Bak tapuang jatuah ka luluak
Indak ka mungkin elok lai
Itu sabab sumua ditampuah
Ambo lah lamo indak mandi
Mamintak ambo sungguah sungguah
Usah lah Puti ketek hati
Sabuah lai pintak ambo
Adiak kanduang Puti nan datang
Bari luruih ambo batanyo
17 IRMJP

Kampuang ko dek baru ambo jalang

Apo namonyo kampuang nangko
Siapo Rajonyo di nagari
Dulu ambo mandapek kaba
Maso ambo diam di kampuang
Nan bagala Rajo Kuaso
Ado surang bakamanakan
Nan geneang di Sandiang Baka
Iyo disabuik urang bana
Juaro ditangah balai
Banamo Magek Manandin
Dulu ambo lai basuo
Kiro satahun nan talapeh
Itu nyo tanyo dari ambo
Guno jan sampai ilang bakeh

Subang Bagelang 57-9

Kalau baitu kato tuan
Lah patuik ambo bari tarang
Tanyo sarupo ka kiasan
Raso manyuruak di nan tarang
Kok iyo tuan lai basuo
Jo diri Magek Manandin
Tuan bao lah pasan ambo
Pasan sarato jo pakirim
Sabab kan ba a dek baitu
Nak ambo kato kan bana
Nan banamo Magek Manandin
Inyo tunangan badan ambo
Batunangan kain pandukuang
Antah lai hiduik inyo kini
Sabab di buang ayah ambo
Dek asuang Rajo Duo Baleh
Nyo cemo mamaliang jawi
Sampai babuang jauah jauah
Kalurah satungka banang
Antah dima lah inyo kini
Mungkin di dalam gaib Allah
Tanyo tuan alah di bari
Ka tuan rundiang tasarah

Magek Manandin 58-9

Kalau baitu bunyi kato
Nak tabukak sumangek diri
Satali juo tanyo ambo
Jo nan adiak kato kan tadi
Kok lai hiduik inyo kini
Nak ambo sampai an kapadonyo
Ado koh adiak duo hati
Lai kok suko manarimo
Kok pasan nan ambo bao
Salamo inyo tabuang
Banyak cobaan ditangguang nyo
Bansaik balabiah dari urang
Sabab kan ba a dek baitu
Barito sampai ka inyo
Adiak alah mandapek judu
Rajo Duo Baleh nan kodo nyo

Subang Bagelang 59-9

Kok hiduik Magek Manandin
Bara kasanang paratian
Caliak lahia pandanglah batin
Ambo nan taguah jo janjian
Walau badantuang patuih tungga
Manggaga sampai ka hulu
Kabek di ambo tak ka lungga
Kasiah lah tiok halai bulu
Kok tibo Rajo Duo Baleh
Ulah di paso ayah ambo
Senteang kok indak dapek uleh
Ambo ka larek di kampuang ko
18 IRMJP

Magek Manandin 60-9

Lah tampak bayangan batin
Mancaliak kokoh sandi iman
Kok hanyo Magek Manandin
Ma imbau adiak kalampau an
Diak kanduang Subang Bagelang
Patuik disingkok lahia batin
Jawek lah salam rang tabuang
Kan ambo Magek Manandin

Subang Bagelang 61-9

Ondeh tuan Magek Manandin
Tuan baliku di nan tarang
Sajak tadi ambo lah yakin
Baraso tuan nan lah pulang
Lai mah dunia ka babaleh
Lai mah kasiah ka balawan
Dandam ka Rajo Duo Baleh
Kini lah patuik di balehan
Tuan pai lah ka galangggang
Pai manyabuang sakali ko
Ayam biriang bataji gadang
Lawannyo Kuriak Gadik Gudinggo
Kok kalah usah di baia
Manang kok indak manarimo
Kok nyato salah dek manusia
Lawan dek tuan jo anggota
Usah dihalang kapalangi
Sari’aek palu mamalu
Kok iyo anak laki laki
Tuah di siko mangko tantu

Magek Manandin 62-9

Diak kanduang gadih budiman
Subang Bagelang asa namo
Kalau lah itu nan ta angan
Japuik lah ayam kuriak kito
Japuik pakaian sapasalin
Sarato ameh kataruahnyo
Toloang doakan dalam batin
Tajapuik malu sakaliko

Subang Bagelang 63-9

Kalau baitu nan ka baiak
Ambo bajalan lah sakali
Ka pulang tuan kok tabatiak
Rancak disiko lah mananti
Ambo bajalan lah da ulu
Ap?tah?tih??.

Gurindam Legaran 10
Bajalan Subang Bagelang
Manjapuik ayam jo taruah nyo
Darah di dado bak katabang
Basuo nan indak disangajo
Satibo Subang dirumah
Lah dapek sagalo nan paralu
Indak taraso badan payah
Babaliak ka sumua maso itu
Pakaian dapek Magek bakameh
Nyo turuik galanggang rami
Basuo jo Rajo Duo Baleh
Rundiang bamulai nyo sakali

Rajo Duo Baleh 64-10

O Sutan nan baru tibo
Dek sutan datang talambek
Jaweklah salam joloang datang
Antah salah pandangan mato
Saroman labiah saketek
Sarupo bana jo nan hilang
19 IRMJP

Anak dek Datuak Bandaro

Banamo Magek Manandin
Lah dibuang basamo-samo
Ka hiduik raso tak mungkin
Usah lah itu dipikia an
Urang dibuang dek mamaknyo
Dek sutan tibo bak kini
Adokoh niaek jo sangajo

Magek Manandin 65-10

Kalau itu angku tanyo an
Itulah kato sabananyo
Malenggang babuah tangan
Adaek galanggang alah biaso
Sabab baitu kato ambo
Ambo bao ayam bataji
Tuah lah tampak dirupo nyo
Mungkasuik ambo kamari
Niaek manyabuang nan tacinto
Dek angku kandak nak babari
Itu nyo kato nan talatak
Untuang tasarah ka Ilahi
Cubolah timbang jo gamak
Lai koh samo dalam hati
Pulang ma?alum pado angku

Rajo Duo Baleh 66-10

Kalau baitu parundiangan
Pucuak dicinto ulam tibo
Lai ka buliah nan diangan
Nanti dek sutan sakutiko
Denai barundiang jo rang balai

Rajo Duo Baleh ka urang balai 67-10

(Spontan tentang menyabung ayam.
Ayam Rajo Duo Baleh
kalah. Berkelahi spontan. Boleh hadirkan
Subang Bagelang
bersanding dengan Magek Manandin.)
20 IRMJP