Gurindam Pambukaan
Ampun baribu kali ampun
Rila jo maaf dikandak-i
Rundiang jo langkah kok nyo ragu
Ap...Tah...Tih…
Keterangan
Kato-kato untuak gurindam Dayang Daini nan di ateh ko, tadiri dari duobaleh barih,
tabagi pulo dari ampek kalompok. Ciek kalompok tadiri pulo dari tigo barih,
kasadonyo tu buliah diganti atau dituka samo sakali jo nan ado ditampek sasaran
kito surang-surang, atau dituka jo nan diajaan guru di sasaran kito. Kalau nan iko ka
dipakai, mako pado titiak-titiak nan ado tu ditambah jo namo nagari namo kota atau
kabupaten, baru kudian namo jorong tampek sasaran kito barandai. Kalau gurindam
Dayang Daini ko alah salasai dilaguan, mako sasudah gurindam Dayang Daini, anak
randai dibao tagak dek tukang gore untuak mambuek legaran, kalau bisa sambia
manampak-an langkah silek. Sasudah anak randai duduak, barulah masuak sapatah
kato atau sakapua siriah. Di bawah ko, kito mambuek-an pangkanyo sajo,
tambahannyo tasarah kapado palatiah randai di daerah kito surang-surang, atau
buliah juo diganti samo sakali, ijan tapaku kapado nan alah diagiahan contohnyo,
dek adaik salingka nagari.
Gurindam Legaran 1
Nan akiraik kasalamonyo
Sipaek iman tahan dayoan
Warih dek datuak nan baduo
Ap…Tah...Tih...
Keterangan
Sabalun anak randai nan balegaran duduak, mandeh jo ayah si Umbuik Mudo alah
masuak ka dalam legaran. Untuak si Umbuik Mudo kalau inyo sato bamain dalam
legaran, inyo tagak sasudah diimbau dek mandehnyo, buliah dianta jo tapuak tangan
sajo, kalau Umbuik Mudo indak sato main dalam legaran, Umbuik Mudo tatap
barado dilua legaran, mako sasudah diimbau dek mandehnyo baru masuak ka
dalam. Untuak mampasingkek wakatu, Umbuik Mudo alah siap di tapi legaran,
untuak ma-antanyo masuak caronyo tatap samo, buliah jo tapuak tangan sajo kalau
wakatu singkek, buliah juo jo galombang silek kalau wakatu cukuik panjang, sudah
tu baru bakato-kato.
Mandeh Umbuik Mudo (1-1)
Nak kanduang si Umbuik Mudo
Ubek jariah palarai damam
Anak kamari sakutiko
Kami nak barang dikatoan
Hap…Tah ...Tih …
BAGIAN 2
Gurindam Legaran 2
Kandak buliah pintak balaku
Sanang rasonyo kiro-kiro
Dapek pangaja dari ayah
Keterangan
Kato-kato guru jo anak murik nan di bawahko, buliah ditambah jo kato-kato spontan
asah lai sasuai jo maso nan sadang baguru, atau sahabih kato-kato nan dibawahko, si
Umbuik Mudo di aja lansuang dek gurunyo buliah juo.
Gurindam Legaran 3
Kato putuih paham saukua
Sanang hati si Umbuik Mudo
Mulai mangaji hanyo lai
Keterangan
Dari mulai baguru si Umbuik Mudo indak kito caritoan, caro balimau indak kito
caritoan, hanyo disampai-an sajo jo lagu baraso lah tigo tahun Umbuik Mudo
baguru, kutiko Umbuik Mudo diimbau guru inyo sadang duduak di dalam legaran,
lah kanai imbau dek gurunyo baru tagak, buliah mambuek langkah silek joloang
basuo jo guru sambia manyambah, atau maunjuak-an salam kagurunyo, tantu sajo
dajawek pulo dek gurunyo.
Keterangan
Untuak pindah kahilaman antaro guru jo si Umbuik Mudo, dianta jo tapuak tangan
sajo atau jo galombang nan indak pakai lagu, Umbuik Mudo mampakameh diri
untuak mamutuih-i silek jo gurunyo angku syeh panjang jangguik, dalam mamutuih-
i silekko buliah ditambah jo kato-kato spontan, tapi jan lari dari kondisi kito nan
sadang baguru, dek karano si Umbuik Mudo alah manyalasai-an ilimu batin nan
dituntuiknyo, sudah mamutuih-i silek, Umbuik Mudo lansuang mintak karila-an ka
gurunyo untuak pulang ka kampuang.
Keterangan
Umbuik Mudo jo gurunyo bajalan/bacari batulak pungguang, tantu sajo kalau si
Umbuik Mudo kalua kakida si guru kalua kasuok, dek karano kato-katonyo batulak
pungguang.
Gurindam Legaran 4
Dek yakin umbuik mangaji
Pangana sadang dikarajo
Lah sudah kaji baputusi
Nyo mintak izin ka gurunyo
Gurindam Legaran 5
Kato putuih rundiang baranti
Mananti ayah dari surau
Basanang hati tiok hati
Indak ado manaruah risau
Hap…Tah…Tih…
Keterangan
Umbuik Mudo jo si Rambun Ameh samo-samo lah ado dalam legaran, katiko anak
randai mambuek galombang silek untuak duduak, sasudah anak randai duduak si
Umbuik Mudo jo si Rambun Ameh lah tagak di dalam lansuang bakato-kato.
Keterangan
Kalau dapek lagu nan kadibaoan untuak nan dibawahko, adolah lagu (irama) nan
bisa ka ampek barihnyo untuak ciek legaran, jadi ampek kali legaran atau ampek kali
lagu anak randai alah duduak, tamasuak untuak sadonyo pagu nan ampek barih
dalam ciek pantun.
BAGIAN 3
Gurindam Legaran 6
Sudah barundiang jo adiaknyo
Umbuik Mudo hatilah sanang
Kami aliah tujuan kato
Si Galang Banyak kito bincang
Dilapeh siriah jo pinang
Pamanggia urang di nagari
Lah tibo dihari nan dibilang
Alek bamulai hanyo lai
Keterangan
Sabalun angku Panjang Jangguik bakato-kato ka si Umbuik Mudo, kalau untuak
bamain wakatu lai agak panjang, buliah dimulai jo sagalo bantuak kesenian nan ado
di anak randai, kalau wakatu singkek agak ciek sajo kaluan kesenian tu, sasudah tu si
Umbuik Mudo bajalan dilua legaran, diimbau dek angku Panjang Jangguik, Umbuik
Mudo masuak kadalam legaran, lansuang bajawek salam.
Keterangan
Pandeka capek tagak sasudah diimbau dek si Umbuik Mudo, tatap sajo dianta jo
tapuak tangan paliang kurang, buliah juo ditambah jo kato-kato nan spontan, asah
lai sasuai jo pakaro basilek, atau bajawek salam, sudahtu baru pandeka capek
bakato-kato.
Keterangan
Katiko si Umbuik Mudo alah mulai malangkah silek, nan sarancahnyo mambuek
pagaluik-an/pacakak-an silek agak sakali surang, sasudah itulah Puti Galang Banyak
bajalan dilua legaran, darah si Umbuik Mudo lah tasirok dek mancaliak rancaknyo
Puti Galang Banyak, kutiko si Umbuik Mudo sadang mamintak dalam basilek,
talayang caliak si Umbuik Mudo sakali lai ka Puti Galangbanyak, awak sadang
malengah kaki pandeka capek tibo di dado Umbuik Mudo, mambuek inyo tajatuah,
tibolah cacek dek puti Galang Banyak.
Galang Banyak ( 32-6)
Lah hilang garak jo garik
Lakek kaki tibo di dado
Hati pandeka lah takilik
Dek ulah pandang nan cilako
Keterangan
Angku Panjang Jangguik jo si Umbuik Mudo kalua dari legaran, dianta jo tapuak
tangan, ayah si Galang Banyak masuak ka dalam legaran, langsuang bakato-kato jo si
Galang Banyak.
Gurindam Legaran 7
Rundiang putuih kato saukua
Sananglah hati timba baliak
Pangaja ayah batarimo
Gurindam Legaran 8
Rundiang sudah kato sasuai
Lah samo sanang dalam hati
Asa nyo niaik lai ka sampai
Lamo jo lambek ka dinanti
Keterangan
Mandeh si Umbuik jo Mandeh Rubiah dilua legaran, Mandeh si Galang Banyak
dalam legaran lansuang maimbau kapado mandeh nan baduo dilua legaran.
Keterangan
Untuak ma-anta mandeh rubiah jo mandeh si Umbuik Mudo masuak kadalam
legaran, mako paralu dibuek galombang indak pakai lagu atau tapuak banyak sajo
kalau wakatu singkek, lah tibo urang nan baduo ko di dalam anak randai duduak
baliak, sudah tu mandeh Rubiah mambukak kato (Anak Galombang)
Keterangan
Anak legaran atau randai mati bagalombang sajo, indak pakai lagu untuak maanta
urang nan batigo duduak makan siriah, sudah anak randai bagalombang kutiko lah
duduak baliak, mako urang nan batigo lansuang tagak, mandeh Galang Banyak
mulai bakato.
Keterangan
Anak randai mambuek galombang, untuak maanta mandeh Galang Banyak kalua
dari legaran, dari lua legaran Puti Galang Banyak masuak, satibo Puti Galang Banyak
di dalam, anak randai duduak baliak, Puti Galang Banyak bakato-kato.
BAGIAN 4 (HABIS)
Gurindam Legaran 9
Rundiang putuih kato batimbang
Lah pulang lah ampo tangan
Rundiang di tulak dek si Galang
Malu nan indak tabadoan
Gurindam Legaran 10
Lah bajalan mandeh si Umbuik
Bajalan ka tapi rimbo
Langkah diayun suok kida
Maranyai paluah dikaniang
Pai mancari talang hanyuik
Dek lamo lambek bajalan
Tinggi bukik lah didaki
Dalam lurah alah dituruni
Hampia ka tibo hanyo lai
Iyo di Lubuak Mato Kuciang
Keterangan
Si Umbuik Mudo sadang babansi, duduak surang ditangah legaran, mambalakang
katampek si Galang Banyak masuak, bansi baranti kutiko alah tadanga suaro si
Galang Banyak.
Keterangan
Katiko Umbuik Mudo bajalan sampai di lingkaran anak randai, Galang Banyak
mamakiak maimbau …Tuan…Umbuik Mudo baranti tapi indak mancaliak ka si
Galang Banyak, lansuang sajo masuak kadalam legaran anak randai, baru gore
Keterangan
Sadonyo anak randai tagak lansuang bajalan lambek-lambek, sudahtu mambuek
gelombang (balabek) juo sangaek lambek, katiko anak randai mulai bajalan jo
bagalombang nan lambektu, Galang Banyak maratok sarupo mangecek surang jo
pantun nan dibawahko, pantunnyo buliah ditambah jo diganti, sasudahtu galang
banyak kalua, anak randai manutuik jo lagu simarantang tinggi jo pantun nan
dibawahko, kalau kadituka buliah juo, dek adaek salingka nagari.
Gurindam Panutuik
Kacimpuang pamenan mandi
Rasian pamenan lalok
Warih dek datuak nan baduo
Kok kurang tajajak tajalani
Jo maaf sajo kami atok
Ukua jo jangko nan lah tibo
Keterangan
Akia dari carito si Umbuik Mudo ko, kalau ditaruihan si Galang Banyak jatuah sakik,
dek karano cintonyo ditulak dek si Umbuik Mudo, lamo bakalamoan dek sakik si
Galang Banyak indak sanang juo, karano ramuan nan dimintak dek si Galang kapado
ayahnyo adolah umbuik nan samo tinggi jo inyo, lah pasai ayahnyo mancari masuak
kampuang kalua kampuang, namun umbuik nan samo tinggi jo si Galang tu indak
dapek, karano ayah si Galang indak tau baraso umbuik nan samo tinggi jo inyotu
adolah si Umbuik Mudo urang kampuang Aua, sasudah si Galang manjalehan
kapado ayahnyo, mako dipinanglah si Umbuik Mudo dek niniak mamak si Galang,
nampaknyo di siko basuo pulo pitua “adaik dunia baleh mambaleh” pinangan si
Galang ko lansuang ditulak dek si Umbuik Mudo, karano daulu pinangan si Umbuik
Mudo juo ditulak dek si Galang, dek sangaek manahan hati akianyo si Galang Banyak
sampai maningga, mandanga barito si Galang lah maningga si Umbuik Mudo
takajuik, tangah malam nyo bangkik kuburan si Galang Banyak dek si Umbuik
Mudo, sudahtu nyo lacuiklah si Galang Banyak jo lidi gilo, barakaek pintak katuhan
jo tingginyo ilimu batin nan ado dek si Umbuik, sampai si Galang hiduik baliak, baru
sudahtu pinangannyo ditarimo, mako kawinlah si Umbuik Mudo jo Puti Galang
banyak.