RANDAI

SUTAN PEMENAN
PELAKON
1. SUTAN PAMENAN
2. TUANKU RAJO TUO
3. RAJO ANGEK GARANG
4. RANIK JINTAN
5. URANG URANG DI GALANGGANG

DENDANG SAMBAH:
Manolah niniak nan jo mamak
Sarato urang nan cadiak pandai (2X)

Rila jo amaf nan kami pintak

Sagalo kami yo anak randai (2x)

Eloklah rndai di bao tagak

Supayo sanang urang disiko (2x)

DENDANG SIMARANTANG
Dijapuik kaba rang daulu
Kaba tuanko rajo tuo
Bapak dek sutan pamenan

Junjuangan puti linduang bulan

Urang tasabuik sajak daulu
Urang kiramaik sati pulo

Curito habih gurindam masuak

Sinan bakato sutan pamenan (2x)

SUTAN PAMENAN
Manolah ayah kanduang denai
Agak kamari molah tagak
Ado mukasuik nan k di sampaikan

TUANKU RAJO TUO

Anak kanduang sutan pamenan
Apo sabab ayah dipanggia
Curai papakan bakeh ayah
Nak sanang dalam hati
Nak sajuak dalam kiro kiro

SUTAN PAMENAN
Maksudnyo ayah denai imbau
Lah tadangan galanggan rami
Etan di ranah kayu tanam
Galanggang rajo angek garang
Bari izin denai di ayah
Pai manampuah galanggang nantun
TUANKU RAJO TUO
Galanggang angek garang nan ka di turuik
Angek garang lain adaiknyo
Urang mamakan masak matah
Urang indak tau salah jo bana
Maukua panjang k inyo
Manimbang barek ka inyo

SUTAN PAMENAN
Ayah kanduang janyo denai
Bari izin molah dek ayah
Pado denai lalok di anjuang
Elok mancaliak galanggang urang

TUANKU RAJO TUO

Jiko baitu kato nak kanduang
Dangakan bana nasehat ayah
Kok sampai anak disinan
Iduik di kampuang urang
Tak usah tinggi bana dari pucuak
Tinggi pucuak biaso patah
Tak usah randah dari tunggua
Randah tak ado tampek jatuah

SUTAN PAMENAN
Kalo baitu kato ayah
Denai bajalan hanyo lai

DENDANG (IRAMA TANTI BATANTI)

Lah bajalan sutan pamenan
Diiliekannyo labuah nan panjang
Manuju ranha kayu tanam
Ka galnaggang rajo angek garang (2x)

Dek lamo lambek di jalan

Lah tibo candonyo kini
Galanggang rami alang kapalang
Sinan taguncang dalam diri (2x)

RAJO ANGEK GARANG

Mano lah kalian nan di galanggang ko
Danga kecek den elok elok
Simakkan bana baiak baiak
Aden banamo rajo angek garang
Batarak di bukik siguntang guntang
Supayo nak rami galanggang nangko
Molah kito bamain sepak rago

“rajo angek garang jatuah dek main sipak rago, urang basorak kasadonyo. Rajo angek garang
tagak, berang mancaliak sutan pamenan sato basorak.
RAJO ANGEK GARANG
E, waang paja ketek
Sato pulo manyorak an den

SUTAN PAMENAN
Ampunlah ambo dek tuanku
Ampun baribu kali ampun
Bukan ambo surang nan basorak
Urang basorak kasadonyo

RAJO ANGEK GARANG

Waang ko anak bincacak
Anak bincacak anak bincacau
Anak singiang ngiang rimbo
Anak kaladi taleh ladang
Anak sicangkiang panarahan
Anak sariduang sarok lauik

SUTAN PAMENAN
Usah tuanku tadorong bana
Urang mandorong gadang kanai
Urang panggaman mati jatuah
Urang pandingin mati anyuik

RAJO ANGEK GARANG

Usah marandang dikuali
Sambirek jalo katapian
Usah ang ulang duo kali
Maramang bulu kuduak den mandangakan

Anak cacak samo cacak

Samo batalua diateh pagu
Kok iyo waang samo bagak
Sensengan molah langan baju

SUTAN PAMENAN
Kok iyo kareh bana hati tuanku
Molah kito cubo agak sajamang
Untuak pamasiah masiah langkah

“sutan pamenan kalah dalam pertarungan”

SUTAN PAMENAN
Ampun... ampun tuanku

RAJO ANGEK GARANG

Lai ka minta ampun juo wa ang
Bangang ..!! awak ketek masuak pulo ka galanggang
Baru wa ang tau kini sia waden
Iko nan banamo rajo angek garang
DENDANG (Irama :
Lah kalah sutan pamenan
Kalah dek rajo angek garang
Sutan tatangkok maso itu
Tangkok nan indak talapehan

Sinan tamanuang sutan pamenan

Malu kamano ka dilapehkan
Panek bamanuang inyo bapikia
Cakak nan musti babalehkan

Kaba baraliah hanyo lai

Namun baraliah sinan juo dijapuik kaba rajo tuo
Lah tasirk darah di dado
Antah ko apo nan tajadi
Dipanggia bujang salamaik

Rundiang putuih kato salasai

Babaliak pulang sutan pamenan
Diapuik bujang salamaik
Ka galanggang rajo angek garang

“gerakan legaran”

DENDANG (Irama :
Malu tacoreng pado kaniang
Sutan pamenan pai bajalan
Mancari ilmu bakeh tagak
Iyo ka bakeh inyiak paladang

Alah bajalnan sutan pamenan

Manuju inyiak rang paladang
Mancari ilmu bakeh tagak

Lah di ilia kan labuah nan panjang

Masuak ka rimbo kalua rimbo
Masuak ka kampuang kalua kampuang

Sutan baraja bamacam ilmu

Sudah baraja bilangan musim
Maso ka pulang hanyo lai.

Babaliak molah sutan pamenan

Iyo ka ranah camin taruih
Nak manamui ayah kanduang
SUTAN PAMENAN
Manolah ayah kanduang denai
Lah baliak denai manuntuik ilmu
Iyo dari inyiak urang paladang
Nan sakarang kini nangko
Denai nak babaliak ka kayu tanam
 Ka galanggang rajo angek garang
Jukok kandak buliah pintak balaku
Tantu lai tajajak tanah tapi
Maklum ayah tantang itu

TUANKU RAJO TUO

Harimau mati maninggakan balag
Gajah mati maninggakan gadiang
Ayah lah maklum tantang itu

Namun samantang pun baitu

Adat di lauik bajuru mudi
Adat di galanggang bajuaro
Adat di kampuang bapangulu
Dima aia di sauak, disinan bumi di pijak
Dima sumua di kali disinan rantiang di patahkan
Hanyo sakitu dari ayah
Pulang maklum pado nak kanduang

“geraan legaran barandai”

RAJO ANGEK GARANG

Ba a ko waang datang kamari
Nak maadu ayam roman iko
Ayam waang ketek saketek dari balam
Gadang saketek dari puyuah
Lah k waang adu pulo jo ayam den

SUTAN PAMENAN
Kok ketek bana ayam denai
Lai ko talok dek ayam tuanku
Namun sabalum ayam diadu
Denai batanyo sungguah sungguah
Manang kan lai manarimo
Kalah kan lai ka mambaia

RAJO ANGEK GARANG

Tasarah dek wa ang

SUTAN PAMENAN
Kalau baitu kato tuanku
Marilah kito padan ayam kito
Sabalum ayam ka dibulang
Ikolah intan tigo boto
Kataruah dari ambo
Mano taruhan dari tuanku
RAJO ANGEK GARANG
Ikolah pitih dari waden
Alah k sanang di hati wa ang
Capek lapehan ayam wa ang tu
Nak capek pulo patah lihia nyo

SUTAN PAMENAN
Manuruik aturan di galanggang
Taruhan harus satimpalan
Dibandiang jo pitih tuanku
Daripado intan di pataruahkan
Jo pitih nan sabanyak itu
Labiah elok intan ko den buang k lautan

RAJO ANGEK GARANG

Banyak carito wa ang
Nan jaleh ayam ko di adu dulu
Kok manang wa ang
Ambiak pitih ko, ambiak si ranik jintan
Tunangan den tambah nyo

“ayam rajo angek garang kalah”

SUTAN PAMENAN
Kini baitu lah dek tuanku
Lah samo kito caliak ayam balago
Manang kalahnyo lah jaleh pulo bak janji kito samulo
Tandonyo ambo nan manang
Tantu taruhan ambo bao

RAJO ANGEK GARANG

Indak waang danga dari tadi
Kalah indak mambao
Manang indak manarimo
Taruhan apo nan wa ang mintak
Antah kok tumik nan ka dapek di wa ang

SUTAN PAMENAN
Kalau baitu pandapek tuan
Kalah jo manang ndak batimbang
Bia bacarai lihia jo badan

“rajo angek garang bacakak jo sutan pamenan sampai mati”

“ranik jintan datang manangih dimayat rajo angek garang”

RANIK JINTAN
Manolah tuanku rajo angek garang
Apokoh garan nan lah tajadi
Ba a ko tabujua maik tuan disiko

Ondeh tuanku rajo angek garang

 Lorong dibadan diri ambo
Sudahlah garak jo takadia
Sadang arek bancano tibo
Latiah tubuah lamah lah tulang

Parpati batalua ateh tanah

Kasikabu denai baok kan
Tuan bakubua di tanah sabingkah
Denai dimano batinggakan

DENDANG (Irama sedih :

Kain batiak tanun palembang
Dipakai anak muko muko
Ulang parangai angek garang
Indak badna k cando iko

Alah bajalan ranik jintan

Jalan tak tahu ka tujuan
Lah panek dek bajalan
Basuo jo sutan pamenan

RANIK JINTAN
Manolah sutan pamenan
Apokoh sabab karanonyo
Mako dibunuah tunangan ambo
Jaleh inyo tampek balinduang
Tampek balinduang badan ambo

SUTAN PAMENAN
Manolah puti ranik jintan
Tunangan dek tuanku rajo angek garang
Dangakan dek puti denaik uraikan
Simakkan bana jaleh jaleh

Salaruik samalam nangko

Tuanku rajo angek garang
Indak ado urang barani malawan
Inyo barajo di hati nyo
Inyo basutan di mato nyo
Banyak lah urang nan taniayo

Dima pasa sian maribuik

Nan ma nan rancak punyo inyo
Nan ma nan katuju inyo bao
Diajak musyawarah matonyo merah
Utangnyo salilik pinggang
Ba a dek kito mambiakannyo

RANIK JINTAN
Kalau baitu kato sutan
Denai lah maklum tantang itu
 Tapi samantangpun baitu
Inyo kan tampek denai balinduang
Kok utangnyo nan k sutan sabuik
Jo apo ka denai baia

SUTAN PAMENAN
Tak ado kusuik tak salasai
Tak ado karuah nan tak ka janiah
Usahlah cameh jo buruang tabang
Panek ka tabang ka inggok juo
Usah cameh katingga surang
Kok nan ilang ado k gantinyo

RANIK JINTAN
Mandaga kato dari sutan
Raso barangin tangah hari
Raso sakik ado ubek nyo
Raso kalam lai ka tarang
Tapi samantang pun baitu
Barek rasonyo mangatokan
Takuik takanai duo kali

SUTAN PAMENAN
Salruik salamo nangko
Lori bajalan ateh kawek
Sajak mulo kito basuo
Raso di hati nak ka mamikek
Pikek dimano ka dipasang
Raso marusuah dalam hati
Pikek tapasang burang kok tabang

RANIK JINTAN
Kalau baitu kato sutan
Sutan nak kamamikek balam
Carikan denai alu nan bapucuak
Carikan denai lasuang nan baurek
Jikok lai dapek dek sutan
Baru denai dapek dek sutan

SUTAN PAMENAN
Kok tak ado pitulo jawa
Pitulo paik denai tukakan
Kok tak dapek di dunia
Ka langik denai carikan
Manunggu adiak sakutiko

DENDANG (IRAMA :
Kain batiak raginyo cindai
Tanunang anak palambaian
Ombak cadiakgalombang pandai
Alun nan indak kanampak an
 Laruiklah samuik dek manisan
Serak talendo dek rang mudo
Baramuak lauik kinyak pamenan
Tagah dek ombak ratok sajo

SUTAN PAMENAN
Tantangan pintak jo pinto adiak
Lah denai dapek barang mantun
Ikolah alu nan bapucuak
Ikolah lansuang nan baurek
Alah ka sanang hati adiak

RANIK JINTAN
Bukan iko alu nan bapucuak
Batang rabuang tolong ambiak an
Bukan iko lasuang nan baurek
Sayak tampuruang tolong barikan

SUTAN PAMENAN
Usah adiak tingkah batingkah
Danga dek adiak pantun sabuah

Sajak denai gubalo itiak

Kabayang denai dakikan
Indak den ka bekerok lai
Sajak denai cinto ka adiak
Sumbayang lah den karajoan
Indak den baampok lai

Tasabik pucuak daun ampalam

Denai mancaliak dalam saribu
Adiak surang nan tampek hati
Nan lain buliah denai haramkan

RANIK JINTAN
Ayam kuriak lambaian taduang
Ikua manjelo masuak padi
Ambiak tampuruang bari makan
Tujuah bukik sambilan gunuang
Tuan nan surang dalam hati
Nan lain dapek denai lupokan

SUTAN PAMENAN
Kalu bak itu kato adiak
Lah samo sanang dalam hati
Molah kito samo pulang
DENDANG PENUTUP (
Batusangka balantai batu
Parak juao labuah basilang
Randai sakitu lah daulu
Talempong mairiang di balakang

Kok lai ado sumua di ladang

Buliahlah kito manumpang mandi
Mandi barang ka tapian
Kok lai umua samo panjang
Randai nan lain diulang lai
Disiko dulu diantian