LEKA SAMPI KENA MIRING BA PENDAM SaDuaTigaEmpatLimaEnamTuuuuujoh!

Enda aku busong ngelangkah gunong, Enda aku tulah ngelangkah tanah, Enda aku danjan ngelangkah bulan, Enda aku tumbang ngelangkah bintang! ONama pemusong, nama pengelunggong, Nama penulah, nama pengerbah? Kaki aku bediri di segi besi belumpong, Ngeli aku ngetup badi pendawan busong, Lengan aku ditanggam enggau beringan lanchum selong, Pala aku dibap enggau singkap jalong jebong, Belakang aku tinggang saludang baju burong. Aku ukai muntang, ukai nengkebang. Aku endang tiris, endang pantis. Endang tambak, endang telesak, Endang puchok, endang sumbok. Endang nampong, endang nerujong. Nampong aki, nampong ini, Nampong apai, nampong indai, Baka wi nampong tali, Baka rutan nampong danan, Baka pendok, nampong ijok, Baka tengang nampong bulang. Pechah periuk tanah, ganti periuk tani, Charik labong batik, ganti labong betawi, Parai orang ke tuai, ganti tuboh kami. Kami tu ngintu gawai saritu, Lalu ngangau ka kita ke lama udah nadai di ulu Mandai Rawai, Nungah kita ke dulu tumbang di ulu Mandai Puang. Aku ngangkat ka kita ke lama udah timpat, Tinggang urat sebangki api, Aku nyungkang kita ke lama udah tumbang, Tinggang batang tebelian wi. Aku nyerungkai kita ke lama udah parai, Keranjai indai imbok kedidi. Kami tu mai kita makai, mai kita nandai, Mai kita mansang, mai kita ngabang. Angkat samoa, angkat sareta, Angkat ambis, angkat lengis. Kami tu ukai ngangau ngapa, ngangau pia, Tang kami mai piring, mai ading, Mai letup, mai pulut, Mai penganan, mai penyaran, Mai tuak, mai arak.

Kita ke ngabang bakanya mega, Anang tuboh puang, tuboh sabatang, Mai tuboh murus, tuboh untus, Tang mai ubat teruba ingat, Mai batu teruba nemu, Mai pengaroh gembar tuboh. Anang engkah ngapa, engkah pia, Engkah ba priing, engkah ba ading. Ayan ka ba tegalan, Lengka ka ba pedara, Sikap ka di ketupat, Ngambi ka kena peda, kena tela, Kena iching, kena perening. Awak ka kena gengam, kena simpan, Kena sandoh, kena taroh, Kena japai kena pegai. Kami di dunya tu bakanya mega, Arap ka kita senang lantang, Dini alai kita diau. Dinga ka kangau anak mensia, kangau anak uda, Minta tulong, minta sukong. Nampong bilik, nampong penaik kita, Ngambi ka pulai senang, pulai lantang, Pulai bidik, pulai lansik, Pulai gerai, pulai nyamai. Arap ka kita anang belebu kangau aku, Ngambi ka kami gayu guru nguan menoa. Oooooohoi X 3 Compiled by Gregory Nyanggau Mawar,