BIAU MINTA TULUNG Sa dua tiga empat lima enam tuuuujuh. Ooooo...

ho (3x) Baka nya aku ke miau ke manuk indu manuk kelabu, manuk bejalak manuk bekuak, manuk jelayan manuk enseriban, manuk kunchit manuk papit, enkechong terus adong mutus.

Aku ke miau ke manuk tu, ukai aku mungkal ukai nanjal, ada taki ada tini, nampung adat orang ke kelia, orang ke menya, meda perengka tu udah seda, asi udah bisi aum.

Kami ngangauka petara aki petara ini, orang kelia orang menya, orang parai udah nadai. Ngangauka orang ke punggu, nyadi sudu orang ke lela nyadi sawa, pumpung nyadi tedung. Ngangauka orang ke tau pandang tau serang, orang ke berani ke tau padi.

Kami minta tulung minta sukung kami minta diri minta degi Endu Dayang Kumang Betty, karung segi tiang medang, Endu Dara Jimat ke karung pengerat tanggung kalang, Endu Kumang Dara Bandung, baka ripung nelan engkarung,

Endu Dara Sinjar karung gelegar perin semadang, Endu Kumang Dara Mipau entam tukang tibang terentang, Endu Dara Tipong entung perabung batang pinang, tebang jentik tendur tarik nyanduh tubuh pulai ka bilik.

Ni kumang Dara Senu, karung pintu bandir tapang, Endu Kumang Dara Samban, karung tempuan baka sampan lawai bekejang, Endu Kumang Dara Lenta, karung para ke bereba baka jawa nganjung pasang, Endu Dara Sendur, karung dapur balai indai mayau belang, Endu Dara Bajik baka tasik ledung lelinang, Dara Lengudan, karung luan entam burit telaga bujang, Dara Jinap karung telenga atap baka ringka bubung peninggang. Tangkai jawa jambai temempas ninggang idas, Pating bungai piling ke perenching mandang lupang, karung beras kuning ke perenching mandang lumpang.

Oooo...ho (3x) Sapa ke diasuh ngambi mansang ngabang, Kati kita empulu tau? Kami empulu enda tau burung mambung. Ni kita Kak tau ngambi mansang ngambi ngabang, Kami Kak enda tau meh laban burung kereniung. Sapa tau diasuh kami ngambi ngabang ngambi mansang? Orang Lebah tau, tinggang karak leka lingkau, orang munggu baru tau tinggang telinsau langgu kemayau, orang berumah tiang ka siti puput ka ribut enda bekiuh, gelegar ka selinsar anak bekejengkak enda labuh, Atap sengkawan hari ujan enda tuduh, menua manuk kepiat, menua manuk bejalak teda tetak ninting hari, menua manuk kapiat minta sayat ninting pagi. Anang kita ngaga kami munyi nya, segi apai kami enda pejalai,

malik ke bilik bekelega tajau lama, segi lelaki kami enda berani, malik ka ruai betekua ringka antu pala, segi indu kami enda pandai tegasa tangga pua, segi kami enda tau ngaga utai bekerendang kain mata.

Kita manuk kelabu, betelu ninting hari, manuk bejalak beteratak ninting pagi, kami ngasuh kita ngambi masang ngambi ngabang enti kita ka. Nama kabuah kami enggai, udah puni asi burit periuk, kami udah puni ai burit chapuk, lalu beradu manuk sidu, bulu nyeregu neresang ke belakang, lalu besikap meh manuk kapiat iku lebat baka rajang, iku manuk kelabu rundu-rundu nepas laman. Kami udah diungki benang redam, patuk rasuk bentuk tinchin bersuran, lalu ngelantar jelayan muda baka sawa terebai, manuk tawai baka puna terengkah ba tanah langgur tarah, terengkah ba urat langgur pansap. Sapa ngambi mimpi dalam lenyap terangkat nyadi raja, Kejang ke ari nya manggai di batang lintang tapang menua bujang simbang, Gemurung penyimpan wang mata suku.

Nyadi kami tu gawa, kereja, gawai umai gawai empalai, gawai kebun gawai taun, Minta tulung petara ke udah dikanggau udah ditesau, Kita mai ubat mai retat, batu randau batu pupu, batu asi batu ai,

batu unak batu lemetak, mai pemai, mai pengembai ubat jedian kena kami besimpan, kena nganti perengka nganti tengkira kami, Kena nganti ai nganti asi, engkah ke ba ading ba piring, engkah ke ba ai ba asi, kami tu minta kaya minta raja, minta pandai minta pulai, bulih mudah bulih gerah, minta tanggung minta untung, minta bekebug baka lubuk minta betuchung baka Saduk, minta bedunju baka kerangan tampak baka bulan, betuchong baka bukit bekebung ba langit. kami minta tampak rita jelai nama, minta gerai minta nyamai, senang lantang, minta panjai ai panjai genturung luar langit luar tengkira. Tanggung manang keliling tuchung lubang benama, tepan manang Jaban manggai ba kah rinda, tiki manang Jelapi ngagai lenggi lenggang telaga.

Nyadi kami tu gayu ku antu, gerai nyamai ko sempandai, nadai apa nadai nama ku petara, enda pedera enda rengga nguan menua belama iya. Asuh rajin asuh lansik bidik, sida ke tuai asuh pengerai, sida ke dara enggau bujang asuh bulih laki bulih bini, sida ke anembiak asuh besai asuh kembai, sida ka kereja bulih tengkira bulih reta bulih wang duit ringgit, anembiak sekula asuh belajar bebendar

ngulih ke pemintar ba dunya IT, masuk Universiti bulih graduat nyadi chigu, nyadi lawer nyadi lutur. Nya baru iya, ulih meh kita datai ba WAWASAN 2020, nitih ka juluk ati Perdana Menteri, bala menteri, Tan Sri Menteri Kepayang enggau ke bukai, lama udah bekempen ngemeranka pemansang menua.

GERAI NYAMAI BELAMA IYA BA TAUN KA DEKA DATAI BULIH BELIMPAH BULIH TUAH ARI TAUN KA UDAH.....

Dikarang : Imang Unting (Ulu Kakup Entabai, Pakan Sarikei) Diseruri : CHEMENDA MANAN (uchu Imang)

***********28/12/1998*********************************************