Kebuah Angin Majak Kamah

Kemaya hari tu, ekonomi menua majak mansang beserimbai enggau pengawa industri ke
ngasilka barang eksport enggau ti bukai. Taja pia, pengawa nya bisi ngemai empas ti negatif
ngagai pemeresi angin ba menua Malaysia. Angin ti beresi beguna bendar ngagai pengerai
kitai mensia. Mayuh kebuah ti tau ngundang ngagai pengamah angin ba menua kitai.

Antara kebuah ti tau ngasuh angin majak kamah iya nya pengawa nunu sampah sengapa.
Pengawa nunu sampah sengapa nya enda patut dipejalai siku-siku orang laban pengawa
nya tau mai empas negatif ngagai pengerai tubuh kitai mensia. Kebuah pia, sampah ti ditunu
nya tadi tau ngasilka debu lalu ngujungka angin majak kamah.

Kelimpah ari nya, pengawa besehari-sehari mensia baka nguna peti ais enggau aircond
mega ulih ngasuh angin majak kamah. Lebuh gas klorofruokarbon (CFC) dilepaska ari
perengka nya, ia ulih ngenipiska lapis ozon. Pengawa nya mih ti majak ngasuh menua
majak angat.

Nangkanka nya, guna entuka ba pengidup sehari-sehari mega nyadi siti ari kebuah angin
majak kamah. Entuka baka muto, kerita, lori, bilun enggau ti bukai endang besai guna dalam
pengidup mensia. Taja pia, entuka nya mih ti ngeluarka asap chelum ti tau ngamahka angin.
Tiap-tiap iti bansa entuka nya mega ngasilka gas karbon monoksida, nitrus oksida enggau ti
bukai.

Nya alai, semua orang mesti bekerejasama nyaga pemeresi angin ngambika pengelikun
rampa menua ulih dijaga. Tiap-tiap iku nembiak patut diajar bepun ari mit senentang chara-
chara ti ulih dikena nyaga pemeresi angin. Perinta mega patut ngatur atur baka ngaga ukum
ti tau ngasuh semua orang takut deka ngereja pengawa baka nunu sampah sengapa.