Ai Ansah

Nya alai kena aku ngepunka rurun leka main Iban,

Dulu aku meri selamat ngagai kita ke bekedumuk duduk betipan,
Nyangka jaku bisi pabu enda dalam,
Anang guai ga bala kita berumban nyukat ngambi penyuran,
Nyangka jaku nadai menuku enda meruan,
Nya alai aku minta padahka kita ke mayuh duduk beraban,
Ke duduk bekelenduk nyau beserak.

Nyadi tu digela aku,

Ai takang tunjang teberu terutu jemu ujan naya lemai,
Ai buah apung sepugu keberai nadai lepa di tatai,
Ai tusu tanah ladu beri antu Bunsu Sempandai,
Ai tambak bukau galak tumbuh sekeredak keruang sungai,
Ai sepeta bunga jawa tumbuh di nanga kerapa melai,
Sua enjuk suka tenduk datai ari teluk baya Bebangai,
Suruh anjung Burung Ketupung, suruh anjung Burung Beragai,
Lalu dianjung Bujang Lempung ngagai landung tanah landai,
Ujak pulut lemak ujak selepak buluh balai,
Nyau kelama nyadi deh,
Belayan padi ari kaki sampai serarai,
Peda mansang padi bangkang nunda segang pasang lemai,
Peda buah padi mudah udu manah besai tangkai,
Lalu diambi Dara Sanji isi ngagai lanji tikai kemebai,
Simpan Dara Rawan dalam pelawan tajau rawai,

Tutuk Dara Gawuk ngena ceruk ngambika nyamai,

Dipulah Seripah Dayang Ani bini dudi Patinggi Ali Datuk Intai,
Dia iya lalu disimpan sida dalam Kutak begambar singa,
Ditaruh sida teguh-teguh di supermarket kedai Cina,
Lalu dibeli Bujang Wi ngena duit pala raja,
Nyadi diatu dipeda kitai nerachah mua bala,
Laban ai Brandy champur Whisky aku tu,
Endang sigi pama pemadu-madu bisa,
Teleba ngerebahka jelu gajah begading dua,
Kena sida ke bujang belaban bungah enggau sida ke dara,
Lebuh ke besemaya di kebun bunga muzium Sarawak.

Tang ke saritu tadi,

Iya dikena aku ngansah terinting puting dabung seleka,
Enggi nuan Dr. Lambat pemegai kuasa,
Ke ngulu pengerami Pesta Borneo mayuh bebala,
Ke sama nerembi duduk besapit di tikai anyam tiga,
Ngambika seregah nuan Tuan taing-taing inggar didinga,
Munyi pusin bilun terebai enggi Sultan tuan raja,
Kena iya pulai matau menua,
Aku ga meda pala nuan Tuan nyau repa ulih idea pukul rata,
Meda belakang nyau bebendang tinggang seludang baju kasa,
Punggung nyau penuh laban gelung rajut bisa,
Meda lengan nyau enteran sangkuh tembaga,
Baju udu badas sempama kain permaidani sutera.

Nya alai nuan tu meh Tuan,

Megai tampuk jaku sempekat,
Nemu nangkap leka ujan lebat,
Ke berembat mali salah,
Nya alai nuan tu Tuan digelar aku,
Randau Jeranggau Merah,
Diuji orang ke tuai enggau babi bediri atas darah,
Puchuk bangat pengarakah, batang kemelang merah,
Nya alai diempa tau tang anang ngunyah,
Tebang tau tang anang ngerebah,
Dan juring anang matah,
Laban nuan tu Tuan begulai enggau Seragindah,
Nya orang ke tau ngaga tanah mesai langgu embawang,
Nya alai tuai ke benama Seragindah,
Nyumpah nuan enda tau enda bebuah nyelinting gagang.