Bisi sekali bansa Dayak/Iban bepantap enggau bansa Kantu di menua Kalimantan. Nyau kepuas sida bepantap dia enda mukai mukai bungai terung dalam kampung maioh amat terebai sampai nyau nadai dipeda rampa menua. Bungai terung nya lalu terebai nuju bala Kantu. Bala Kantu lalu nadai meda utai laban mata sida nyau dibap pemaioh bungai terung. Nama agi bala Dayak Iban lalu mumpung memumpung pala Kantu.. Bala Kantu ti agi idup lalu ngerari ka diri. Cherita bungai terung tu datai diterebai ka Bungai Nuing enggau Pandak Segatak ari Panggau Libau. Tu diambi mimpi bala Dayak Iban ti udah bepantap ngelaban kantu. Pesan Bungai Nuing enggau Pandak Segatak ngasuh bansa dayak Iban ngaga pantang bungai terung ba tandan bau ngambika orang Panggau Libau ulih ngelala lalu nulung bansa Dayak Iban enti maia bamuk tauka bepantap ngelaban munsuh. Kenu ko cherita sida bemimpi madah Bungai Nuing ngasuh ngaga pantang bungai terung. Utai dichampur kena ngaga pantang nya bungai terung ditunu retong angus lalu dicampur enggau ai ari siti gua ti mansut ka ai ari menua Panggau Libau di menua nya. Sapa ti ngaga pantang nya ka nyadi kebal. Sebedau mantang bungai terung kita mesti ngaga piring dulu lalu ngangau ka orang Panggau Libau Lendat Dibiau Takang Isang. Ngangau ka sida di menua Merawa Lama Munyi Berimba Wong Nukang. Ngangau ka sida di menua sida Keling Gerasi Nading Bujang Berani Kempang, menua sida Telajan Nempap Bukit Tumpur Anchur Jadi Emperan. Tedong Nyengkong Mantok Melit Iku Bebelit Dalam Bulan