PUN PENATAI IBAN

Dulu kelia lebuh maya Iban agi begulai sejalai enggau orang Panggau Libau enggau orang Gelong ti betuaika Keling seduai Tutong , sida diau ba Semitau Tuai di tebing Sungai Kapuas , Kalimantan. Udah nya sida pindah ke ulu agi ngagai Semitau Lempa ti alai sida mendam diau lebih seratus taun. Ba menua nya sida nya pen beranak betelesak lalu nambah mayuh semayuh. Ari nya sida mindah ngagai menua siti ti dikumbai Tampun Juak . pun buah ti ditanam sida tu agi bisi dipeda ba menua nya nyentuk ke sehari tu. Maya ke diau ba Tampun Juak sida bisi kena rampit penyakit ti nyelai amat . mayuh bendar sida lesi bebadi laban penyakit nya.

Udah penyakit nya , sebengkah penusah ti nyelai amat mega nyadi. Bansa Dayak sereta bansa bukai diserang tekura beraban mayuh ti pansut ari ai. Sebulan udahnya bala ikan kenyulung mega pansut ari ai lalu nyerang sida baru . mayuh bendar sida mati. Enda lama udah nya , mayuh bendar mensia mati ditebak jarum ti nyelai sereta enda temu

penatai. Meda bakanya , Keling enggau Tutong lalu mai bala iya pindah ngagai Nanga Sepakat , pati Batang Kapuas .

Lama sida diau ba menua baru sida nya. Tang enda mukai-mukai , Sempurai ti bejuluk Bunga Nuing ngaga ulah ti medis ati mensia mayuh . Balat iya dianu Keling enggau Laja . Nyepi diri malu digaga orang bakanya , Sempurai pen ringat lalu ngujungka iya bejamah enggau Laja ari pagi sampai ke silau . Meda nya bakanya , dia seduai lalu dianu Indai Abang . Udah ti malu meda ulah Sempurai enggau Laja , Keling pen bekira deka mai bala iya pindah . Meda Keling pindah , Tutong pen mai bala iya pindah mega .

Udah ti beserara enggau orang Panggau Libau enggau Gelong ba Nanga Sepakat , bansa Dayak lalu pindah ngagai Lempa Entaya ti alai sida begaga ka rumah panjai ti betuaika : Bui Nasi , Putong Kempat , Lintan Lengan , Pulang Belawan , Bejit Manai enggau Retak Dai , apai Serapoh . udah ti diau dia beratus-ratus taun , bansa Dayak pen pindah baru ngagai Sungkong . Ditu sida diau maju sereta mansang agi ari ti udah ba bemacham macham bidang . Tubuh sida pen betambah mayuh . Ari Sungkong bansa Dayak bepechah ngagai dua raban .

Seraban pindah ngagai Sungai Beduai , seraban agi pindah ngagai Sungai Kembayan , pati Batang Kapuas .

Mendam diau ngentapka diri diau ba siti siti endur . Pati pampang sungai Silau maya matahari nyau ka padam . Mansang betambah manah agi ari selama ,.