Lutung tekén Kancil

Kacerita di tengah alasé ada buron makelo suba mekasihan. Buroné ento madan I Lutung
tekéning I Kancil. Dugasé ento sedeng musim panes. Sekancan tetumbuhané pada layu kerana
makelo sing tuun ujan. Di tengah alasé I Kancil ngilag ngamah padang ané suba tuh. Sedek seleg
I Kancil ngamah, nengok I Lutung ngelanting di punyan kayuné.
Kenyel suba I Kancil mangantiang. Clega-clegot bungutné ulian dot. Poosné ngetel
ngepah ngelel mangantiang tuara entungin nyambu baan I Lutung.
Jengah pesan I Kancil, lantas ia magedi nuju sisin tukadé. Ditu ia nginem yeh tukad. Saget
tingalina ada umah tabuan amon sirahé. I Kancil negak bengong di betén punyanné ané misi
umah tabua. Sedek bengong I Kancil, nengok I Lutung sambila tag-taag kabetekan.

Sang Nandaka muah Prabu Singa Kapisuna

Kacrita di alas Malawane ada kone lembu jagiran aukud, madan Sang Nandaka. Ane dadi
rajan alase ditu Sang Prabu Singa. Panjaknyane sawatek asu alase. Pinaka pepatih madan Patih
Sambada, I Nohan tekén I Tatit. Sang Nandaka muah prabu Singa, masawitra becik-becik. Sang
Nandaka ngelarang kapanditan.
Sang Prabu Singa nyambran dina mlajahin tutur kadarman nginutin solah Sang
Nandakane sadina-dina mamukti padang, suud mamati-mati, suud mamangsa daging. Dening
keto keweh sawatek asune, krana tusing bisa neda padang, ambengan muah don-donan. Ditu
lantas paum di batan kayu kalikukune.

I Mencéng Ajak I Polos

Ada katuturan satua I Mencéng matimpal ngajak I Polos. I Mencéng ngoyong di sisin
alasé, melén ngajak I Polos. I Polos ngoyong di tengah alasé. I Mencéng anak mula mencéng
pesan, demen ngorah-ngorahin timpal. Yén I Polos anak mula polos pesan tusing demen ngorain-
ngorain timpal.
Sedek dina anu, I Mencéng ajak I Polos ngalih saang di tengah alasé. Sagét teka ujan
bales. I Mencéng tusing nyidaang mulih. Kacerita ané jani, I Mencéng ngoyong di umahné I
Polos. Suba koné sanja, kondén masi endang. I Mencéng seduk basangné nagih madaar. Dingeha
munyiné I Mencéng tekén I Polos.

Nb. Durasi waktu 2 jam

 Joged Jaruh
Ngempengang koping kuusan suriak anaké mabalih jogéd dibi sanja di wantilan banjar
Umanyar. Anaké mabalih ngedig-ngedig tangkah, tangkahné padidi, tangkah timpal-timpalné
ngaukin jogédé apang nyak jawata. Jogédé jegég-jegég, bajang-bajang, moleh-moleh, manis-
manis, oohh jaruh-jaruh. Pangawitné tiang sing nyak ajaka mabalih baan timpalé, kewala
kakapiserengin. Lek atiné ngucingin. Nah kewala pang tawang, pang sing ningeh orte dogén,
tiang nyak ajaka bareng, yadiastun buin mani semengan lakar ngantor.
Sekaa jogédé ané lénan suba pepes tawang, éné koné jogéd ané paling buanga. Cara kebo
matlusuk, tiang nyak paida milu mabalih. Saja, igel jogédé lemuh, sledetné ngincang, elogan
jitné aduuh, sing ja kasamping dogén, kewala nglawan arus.

Katuturan Bé Tatelu
Ané malu ada katuturan Talaga madan Ala Sagara, kalintang krasmian talagané ento.
Akéh sarwa kusumané ngiderin talaga punika. Sakancan sekaré sané layu sami ulung
katoyantalagané. Waluya kadi pasraman Ida Bhathara Yama. Mawinan asapunika, santukan
surupaning tunjungé sami wénten irika. Ditu pada lega sakancan béné lumincak di sor tunjungé.
Kocap ada bé dadla gapanyamaan ajaka tatelu. Kaliwat tresnannyané manyama, séloan sareng
sinareng. Ané pinih keliha madan I Nangga Widuta, ané panengah madan I Prédyum Nantaka,
ané nyomanan madan I Bawisyati. Maka tatelu tusing taén késah uli di talagané ento. Makejang
tustarena idepnyané marebut sabuktiaan. Tusing pesan ia taén tekén katkanan pakéweh. Réh
telagané linggah tur tan papada dalem yéhnyané.

Bhagawan Domia
Kacerita dugasé pidan, ada pandita sakti mapeséngan Bhagawan Domia. Ida madué koné
sisia telung diri, luiré: Sang Utamaniu, Sang Arunika, muah Sang Wéda. Murid Idané tetelu ento
kapintonin buat kapagehan muah pasubaktinné marep ring Ida Dang Guru. Kacerita di subané
Sang Arunika makarya di carik, suba koné jani tumbuh wit padiné tur suba pada mawoh sada
kuning-kuning, nadaksara koné ada ujan bales pesan mawastu toyané blabar. Sang Arunika
digelis mecikin sakancan pundukan carikné ané gembid. Sabilang kabecikin, buin lancer blabar,
buin embid. Kanti telah rasa winayan Ida Sang Arunika sawiréh bes gedénan yéh ané nglancah
tetandurn padiné di cariké.

Tukang pancing
Di pasisi kangin ada anak mondok padidiana pesan, madan I Aget. Gegaéné lemah-
peteng, tuah maboros ka alasé tekéning mamancing dogen. Lemahné luas maboros, petengné ia
negakin jukung ka tengah pasihé ngaba jukung.
Sedek peteng, galang bulan luwung pesan, ia lantas nyemak jukung tekén pancingné,
ngalaut ia ngatengahang lakar mamancing. Beh apa kaden lega kenehné ningalin ombaké ané
kasunarin baan i bulan. Sasubané ia neked di tengah, ditu lantas ia mulang pancing. Tusing
makelo, saget marasa suba ada ngedétin pancingné. Ditu lantas tingtinga pancingné, nanging
sing ja bé bakatanga, tuwah kaang atebih ngetet sik pancingné. Ditu laut kaangé ento entunganga
buin ka pasihé. Pancingé buin koné jangina bebaren, lantas pulanga. Buin kejepné marasa ada bé
ngedétin, lantas tingtinga, buin koné kaang bakatanga. Nganti suba gedég pesan I Aget, baan
sabilang tingtinga pancingné, tuara lénan tekén kaang dogén ngetet di pancingné.

Siap Sangkur Metaluh Mas

Ada tuturan satua ané malu, kacrita I Pagul makurenan ajak Ni Luh Lancah. Ia ngubu di
sisin Désa Kalajangu. Ia ngelah tegal pabianan linggah. I Pagul sabilang dina ka tegalné,
magarapan ditu. Punyan nyuhné marerod-rerod buka anak mabarisan. Punyan biuné malingseh-
lingsehan. Ia masih mamula undis muah kacang dawa. Paék tekén pagehané ada punyan seré
majomprot-jomprot muah umbi-umbian kal basa masih ada. Pikolihan abiané ento anggona
pangupa diri.
Luh Lancah jemet maubuh-ubuhan. Serati ubuha limang ukud. Makejang mokoh-mokoh.
Ia ngelah pangina tetelu sayanganga pesan. Ané mabulu selem adadina I Badeng. Ané buluné
barak adanina I Biing. Ané buin aukud siap putih tur ikutné sangkur adanina I Grungsung, krana
buluné mapelitan jering ngarempiak.