BAGUS DIARSA Kacerita di Bancingah Majelangu bek ada dagang magenepan. Dagang kopine kesandingin dagang nasi.

Bagus Diarsa masih milu masi meli nasi ditu. Saget ada gegendong tua matungked, panganggone setset pasuranting, batisne berung, ngabe kompek tipis misi endongan. Gegendonge ento maekin dagang nasi. Sawireh bone bengu makejang anake ngedesem tur ngejoh. Nanging Bagus Diarsa maekin gegendonge ento lantas belianga nasi. Sesubane suud medaar ajakina singgah mulihne. Gelising satua ia jani suba teked jumahne. Luh Sulasih kurenan Bagus Diarsa nyagjagin, mapan ada tamiu teka. Ngencolang ia nabdabang bale, laut ke paon nyakan. Sesubane pada lebeng laut ia masagi tur bareng-bareng madaar. Bagus Diarsa, gegendonge muah kurenane mareraosan kangin kauh saling nakonin unduk. Bagus diarsa nuturang unduk kelacurane tusing ngelah karang carik angan abidang. Sube peteng orahine gegendonge mesare di umah meten. Bagus Diarsa ngajak kurenane mesare di sisian. Ngedas lemah Luh Sulasih enten, tengkejut ngadek bo miik ngalub. Kurenane laut dundune. Ia ajak dadua adeng adeng ke meten. Bengong ia ningalin metene kedas tur mekasur, maseprai petak masulam rapi. Komplek tapisne mesalin dadi kompol sutra ungu bek misi emas slaka. Tungkedne mesalin dadi tungked emas. Ngangin gegendonge ilang tanpa parawatan matra. Sujatine gegendonge ento panylewadian betara. Ditu laut Bagus Diarsa muah Luh Sulasih ngaturang suksma. Dadine prajani Bagus Diarsa dadi anak sugih ngelah brana liu medasar baan olas asih.

NI TUUNG KUNING Ada tuturan satua, anak kereng memotoh madan I Pudak. I Pudak liu pesan ngelah siap kurungan. Kurenane beling gede, merasa keweh ngencanin siap. Kacerita I Pudak luas metajen ke Denbukit. Kurenane mabesen kene Yen muani panake ubuh, yen luh tektek baang siap. Mare maketelun I Pudak luas, kurenane ngelah pianak luh. Pianakne kinsanange ke umah dadongne. Ariarine tekteka baange siapne. Pianakne adanina Ni Tuwung Kuning. Ngancan kelih ngancan jemet ni tuwung kuning megarapan. Yan kudang taun meklone I Pudak luas metajen, critayang jani ia sube mulih pipisne telah kalah metajen, tusing enu angan aketeng. Teked jumahne ia nakonang pianakne. Kurenane ngorahang pianakne luh tur suba tekteka baanga siap. Siape makruyuk, ngorahang pianakne kinsanange jumah dadongne, tur ariarine tekteka baange siap. Kakruyuk siape ento dogen, laut kurenane kaukina. Kurenane konkona ngalih pianakne ke umah dadongne. Ni Tuwung Kuning aliha ajak mulih. Teked jumah ia lantas ajaka ka alase. Di tengah alase Ni Tuwung Kuning nagih matianga. Jeg teka dedarine nyaup Ni Tuwung Kuning. Ni Tuwung Kuning siluranga aji gedebong. I Pudak sahasa nektek gedebong, abana mulih. Teked jumah baanga siapne.

BULAN KUNING Ada kone anak luh balu madan Men Bekung. Ia nongos di sisin alase gede. Geginane sai-sai ngalih saang ka alase. Kacritaang jani ia maan nuduk anak cerik pusuh. Sawireh kulitne putih gading tur muane bunter buka bulane nadarin kaadanin Ni Bulan Kuning. Sedek dina anu Ni Bulan Kuning ajaka bareng ngalih saang ke alase. Di tengah alase Ni Bulan Kuning paling tur palas ngajak memene. Ni bulan kuning jejeh pesan atine. Mara ia inget dapatanga ibane sube saupa teken I Raksasa. Ia ngetor baan jejehne. Ia sayanganga pesan baan I Raksasa. I Raksasa ngelah manik sakti telung besik liune : manik api, manik yeh, lan manik angin. Sawireh ia sayanganga, orahina ia kagunan manike makatelu ento. Katuju I Raksasa luas, plaibanga manike makejang teken Ni Bulan Kuning. Makire Ni Bulan Kuning bakatanga teken I Raksasa lantas sabata baan manike ento kanti I Raksasa mati. Ni Bulan Kuning tengkejut ningeh sabda. Sabdane ngandikayang Ni Bulan Kuning suba nyupat I Raksasa. Raksasane dadi betara tur mawali buin ka suarga. Ni Bulan Kuning mulih lantas ngalih Men Bekung. Ia kaliwat tresna muah bakti teken memene.

RARE ANGON Ada katuturan satua I Rare Angon geginane ngangon kebo. I Rare Angon dueg pesan ngambar. I Rare Angon ngambar anak luh jegeg adanina Ni Luh Lubang Kuri. Anake Agung angob nyingakin gegambaran ento. I Rare Angon kanikain ngalih anak luh Ni Lubang Kuri. Gelisang satua I Rare Angon luas ngaja kanginang. I Rare Angon kaduduk baan jero Dukuh. Ni Luh Lubang Kuri tongosne di puncak gununge kaja kangin. Rare Angon baanga manik sakti anggone ngalih Ni Luh Lubang Kuri baan Kaki Dukuh. Gelisin satua Ni Lubang Kuri bakatanga ajaka mulih. I Rare Angon baanga pianakne Jero Dukuh nganggon kurenan. Ni Lubang Kuri katur ka puri. I Rare Angon buin kanikain ngalih macan, naga muah tabuan sirah. Rare Angon nyidayang masih ngaturang ke puri. Raris tabuane makejang pesu sahasa ngincer Anake Agung nganti seda. Sasubane Anake Agung seda I Rare Angon kaadegang agung baan panjake ditu. I Rare Angon dueg ngisi gumi, nganti panjake kerta raharja tusing kuangan pangan kinum.