NAMA : LUKE CHABU

KELAS :4B
ENSERA BAYA BEGAU
Sekumbang Pelanduk ke bekirah mandi ngerindang diri muai bekau darah ke udah di insap Lemetak nya iya
endang nadai runding bukai, tak chukup ngerindu ke ati laban ngulih ke ai sungai nya ti chelap serta muai ikak iya ke
udah belanda penapat inat ngambi ke Lemetak nya tingkil nginsap darah Pelanduk nya tadi.

Nama agi deh bekau Pelanduk nya tadi ke mandi nyau bebau lang anak sungai nya serta keruh mirah rarat ke
ili. Ensium bau lang darah Pelanduk nya , Baya pan lalu begau meda utai tak bengat nyelai nyadi. Baya pan lalu
beguai guai mudik ke ulu laban ka nemu nama kebuah ai sungai nya tau ngemalat nya bebau lang serta keruh
ngemirah nya. Iya meh nyau sepemeda ari ili Pelanduk ke mandi dia Baya lalu tepeda ke Pelanduk ke benung
mandi. Tudah Pelanduk pan lalu tekenyit meda Baya nya datai ngenyemak iya ke mandi.

“Nuan nya aki, ka bejalai kini ke nuan ?” pia ku Pelanduk nanya Baya nya tadi.

Tudah Baya pan lalu tekenyit laban ke ngumbai Pelanduk nya enda nemu iya bisi mansang kia. Baya pan lalu
madah ke kebuah diri ke mudik ai sungai nya ngagai Pelanduk.

“Aku mih tu, nyau berasai lapar perut aku tu udah ke ensium bau darah ke rarat ari ulu sungai tu tadi. Nya alai aku ke
mudik ka nemu ari ni penatai bau darah nya lalu sapa bagi orang ke beempu bau darah nya. Deka makai iya, nyau
engkerau asai perut aku tu lalu bedau bisi bulih utai ke tau diempa aku sehari tu.” pia ku Baya.
Sapa kini beempu bau darah tu kini?” pia ku Baya ga nanya Pelanduk baru.

“Eh! Enda ka nya darah kera ke kena timbak anak mensia ari ulu dia tadi, tang kera nya enda mati. Nya Kera nya
bedau mengkang nat ke abi timbak ba atas puchuk kayu dia,” pia ku Pelanduk ngelimpang ka Baya.
“Ka nuan makai Kera nya aki?” pia ku Pelanduk ga nimbal baru.

Lebuh ke nyaut Baya nya ati tudah Pelandok endang tak naka iya penakut serta nangi laban nemu Baya tu sigi jai
serta ka beempa ke jelu bukai. Pelandok lalu nguing kediri nyingkang begadai gadai mansang niki ka tebing sungai
nya.

“Ka aku tu makai kera. Enda tentu milih asai nyawa aku tu laban ke lalu bedau makai,” pia ko Baya ga sambil ke
mansang semak ke semak ngagai alai Pelanduk nya tadi.
“Enti nuan ka makai Kera nya lagi ga aku madah ke iya ngasuh iya nurun ari puchuk kayu nya mansang ngagai nuan
ke sungai tu lagi. Tang nuan anang ngayan kediri, enggai ke Kera nya takut lalu lari lagi,” pia ku Pelandok ga
ngelimpang ke tudah Baya.

Ninga munyi nya Baya lalu beguai nyelam kediri baru dalam ai nganti penatai Kera ke di kangau ke Pelanduk.
Pelandok pan lalu baka ke di tikau engkechit ke tebing lalu beguai guai belanda niki ke tebing enggau penaka ulih
tulang iya.

Lebuh Pelanduk nyau datai ba punjung atas tebing sungai nya dia baru Pelanduk rauh rauh ngangau ngasuh
Baya nya pansut ari ai. Baya pan lalu beguai pansut ngumbai Kera udah bisi serta lalu melepong ke tubuh iya ke
nyau bejur bejur melintang ba sungai nya. Serta meh Baya nya pansut Pelanduk lalu nikau ke papung kayu ngagai
Baya nya tadi. Meda utai tak nyau semiup mansa pala iya dia Baya nya tadi lalu nadai runding mayuh, tak lalu ka
nangkap papung kayu ke di tikau ke Pelanduk nya tadi. Tang benasib ga iya enda nyadi nangkap laban ke tepeda ke
nya tak papung kayu ke di tikau ke Pelanduk tang ukai Kera munyi ke di padah.

Pelanduk lalu ketawa rakah rakah meda Baya mimit da nyau ka tepapa ke papung kayu ke di tikau ke iya nya tadi.

“Nadai kera ditu, enti nuan bengat enda tau enda papung kayu nya meh diempa nuan aki,” pia ku Pelanduk beduan
Baya.

Nama agi deh tak naka iya ka pengeringat Baya laban nyau nemu diri udah di kemeli ka Pelanduk. Baya nya pan lalu
udu ngeransi serta balat enda lantang ati ngagai Pelanduk.

“Nuan Pelanduk tak semina ngayah ke aku, ila asai nuan enti bisi nurun ka sungai endang aku empa aku giga lalu
aku kunyah aku kekah ambi ke nyau nadai rampang agi,” pia ku Baya sambil ke lalu nyipat iku iya ba ai dalam
sungai nnya.

.”Diatu pan aki enti nuan tak tetenguk deka makai aku tau meh. Tang nuan nitih ke aku ngagai tingkah ba tebing tu.
Aku tu lembau bendar nurun ngagai nuan kia laban nyau chelap tubuh udah bekau ke lama berendam ba ai tadi,” pia
ku Pelanduk majak ngelesei ke Baya.

Baya pan lalu nyurut kediri ka puak ai laban iya endang nemu diri enda tetiki ka tingkah tebing sungai nya ke
alai Pelandok bediri ngemata ke Baya nya nenglam dalam ai sambil lalu ketawa gaga ke Baya enda ulih makai iya..
Baya lalu bejako kediri mutap ke Pelandok ke udah beduan iya ngumbai diri ka ngangau ke Kera ambi ke bisi ke
empa iya.

“Beduan aku bendar ga Pelanduk nya tadi, gaga amat iya ketawa meda aku ke enda ulih niki tingkah tebing sungai
nya. Ila bisi maya iya enda ingat agi, enti iya ulih aku sigi endang tak lalu aku telan segala gala enggau tubuh iya
nya,” pia ko baya bejaku kediri berandau nengali lalu nyelam dalam ke agi dalam sungai nya.
NAMA : DOMINIC AZAREEL
KELAS :4B
ENSERA JERITA ANTU KARA

Nyadi dulu kelia bisi orang siku ti benama Assan. Iya tu udah bebini, jadi enggau indu siku serta
beranak lelaki siku ke benama Salau.Assan seduai bini iya gaga bendar ati meda diri bisi anak lelaki siku
ke sigat sereta sikar dalam semua main enggau pengawa. Nya alai, endang kenyau ari mit iya arap ka Salau tau
nyadi orang ke menyana ka ganti iya nampung bilik nampung pemaik sereta nyaga reta tengkira, enti lebuh nyau
datai ba maya seduai bini iya nyau udah nadai agi jemah ila.

Nyadi lebuh maya Salau nyau udah bujang, iya selalu belajar ke semua pengawa ti tau pulai ke pengidup ti
menyana kena ngidup ka diri empu. Salau tu nembiak ke rajin bendar, serta liat ati ngereja pengawa ti pedis dikereja.

Nyadi sekali lebuh hari agi tumu pagi, dia Assan nurun bejalai ngagai tembawai buah tuai ti enda berapa jauh
ari rumah sida empu. Nyau puas iya ke malik kiba malik ka kanan merening sereta nengkadah puchuk buah, dia iya
bisi tepeda ka manyi inggap sereta nepan ba puchuk kara. Puchuk kara nya enda berapa tinggi iya, tang rakah
bendar dan. Assan lalu besindang pun kara enggai ka bisi orang bukai deka ngambi manyi nya. Udah tembu iya ke
besindang pun kara, iya lalu mulaika diri ke rumah. Datai di rumah iya lalu madah ka diri deka mai Salau muar manyi
lemai nya ngagai bini iya.

Nyadi lebuh maya hari nyau penumbas iya alai nurun, seduai iya lalu mupuk mega bejalai, mansang deka
muar manyi nya tadi. Datai seduai ba pun kara, dia Salau lalu begaga ka tangga Antu nya. Salau pan lalu berengkah
maj enggau natuk batang kara. Iya pan lalu manggai ba pun dan. Udah nya Salau lalu nurun ka baruh ka baru.
Semua utai enggau perengka ti deka dikena muar manyi baka tali panjai, rintung enggau samilu endang udah sedia
magang. Baka nya mega sempun kulit engkajang ti endang udah rangkai pan nyau udah rembun-rembun udah
ditungkun ka apai iya Assan.

Udah tembu ngeruku indah, dia Salau pan lalu mupuk niki. Dia iya ngambi tali enggau semua utai bukai ti
dikena, lalu ditanchang ka iya ba punggung iya magang. Udah nya iya lalu mansang bejalai gadai-gadai serta
ngeradayau niki ngagai dan ti endur manyi nepan ba puchuk kara.

Lebuh iya ke berengkah niki tadi malam endang udah jauh, lalu panchar bulan pan enda berapa terang, laban
bulan baru ka tumbuh, tambah agi laban bisi mua hari, ujan bisi beberis sereta mesi-mesi mimit. Nya kebuah
sempun Salau enda berapa mayuh bara lalu enggai merumum.
 Lebuh iya baru datai ba pun kara ke alai manyi nya nepan, dinga iya daun kara nyau gerisih. Puchuk kara lalu
berenyang tiga kali. Meda utai baka nya, dia bulu iya lalu tumbuh, bulu pegu lalu nyeregu, tapak kaki lalu pegeremai
asai sepi iya, laban kelalu takut sereta geli bendar ati. Iya lalu enda engkebut, agi engketut ba pun dan kara, agi
nganti utai ti ngasuh puchuk kara nya berenyang ayan.

Nyau kelama udah Salau ke ngetu baka puyu mabuk ambuh, ngenung baka empelekung mabuk keruh, Antu
kara pan lalu ayan lalu nangkap Salau. Nadai daya meh tudah Salau tu tadi, laban ba puchuk kayu nadai jalai tudah
tuai ngelaban. Antu kara tu tadi lalu nelan iya segala-gala. Semina pah iya sepiak agi digalau antu nya. Pah Salau
sepiak nya tadi lalu disimpan Antu kara ke dalam rintung, serta lalu diulur iya ka baruh.

Meda rintung bisi diulur bakanya, dia Assan lalu gaga, nyangka Salau udah tembu muar manyi ba puchuk
kara. Nyau kelama rintung ke begitang kating-kating lama agi baruh agi ga rintung peda iya dalam petang dia Assan
tepeda ke utai dalam rintung baka pah mensia dalam nya. Lebuh rintung nyau ulih tilik iya nya baru Assan nyau
ngelala nya pah Salau dalam rintung nya. Pedis ati ka anak ti pemadu dikesayau ka iya digaga Antu baka nya,
Assan lalu narit tali rintong nya enggau pengabis tulang iya. Dinga iya lalu semerap sereta lalu meredup labuh ari
puchuk kara, tak mereding ninggang tanah.

Udah nya Assan lalu bejalai belubah-lubah nuju ngagai endur utai ti labuh. Datai dia, iya lalu tepeda ka
bangkai Antu nyau abis tebelimbur untak kiba kanan, pala pechah tepangka sebelah bandir kara engga kayu bukai ti
nyaruk batang kara nya.

Enda berapa lama udah nya, dia Assan lalu bisi ninga nyawa orang munyi tu, “Isa antu kara.” Suah bendar
nyawa orang nya didinga Assan, tang tubuh nadai dipeda iya.
Iya pan berasai takut sereta geli, lalu beguai-guai ngambi pah Salau, lalu ditaban ka iya pulai ka rumah sida. Dia deh
Assan seduai bini enda nemu utai nusah nya ngenang anak ti dikerindu seduai nadai enggau begulai sejalai agi.
Ngutuk diri meh tudah Assan laban ti udah mai anak iya muar manyi, laban enti enda dibai iya muar manyi tentu
enda ga anak tulih ka badi enggau penusah ke baka nya.

Pah anak iya nya tadi lallu dikubur ka seduai ba pendam sida serumah. Assan seduai bini lama ngulit ngenang
penusah tinggal anak parai ditangkap serta dipakai Antu Kara.
NAMA : HARRISON DEXTER
KELAS: 4B
Ensera Mayau enggau Chit
Dulu kelia, mayau enggau chit tu bepangan bendar, dataika sida nyau besaum pengidup sereta begulai
pemakai. Nyadi tu cherita ti madahka kebuah alai mayau enggau chit badu bebakih enggau pangan diri agi lalu
bemunsuh.
Nyadi sekali bisi siku chit diau begulai enggau pangan iya mayau. Seduai iya berumah dalam lubang kayu
ti besai, lalu jauh mega ari jelu bukai. Ngelama seduai iya udah begulai, sekali pen enda meh kala mansutka
jaku jai nganu pangan diri. Genap hari seduai iya endang nurun begulai bejalai ke kampung ngiga pemakai.
Hari siti, lebuh seduai iya bejalai ngiga pemakai, dia seduai iya bisi tepedaka budu dagin jelu. Gaga meh
ati seduai iya meda diri nemu utai bakanya. Ku runding seduai iya, dagin nya deka ditaruh ngambika bisi
pemakai seduai maya hari runggur ujan ila. Maya nya ila pemakai tentu pedis bendar alai ngiga.
Dagin nya tadi lalu ditaruh seduai iya dalam lubang kayu. Udah nya seduai iya lalu angkat pulai ke
rumah.
Nyau kelama udah nyau, dia tudah chit tu tadi bisi berunding deka nguji ensepi asai dagin ti ditaruh seduai
iya nya tadi. Nyau kapuas iya berunding deka makai dagin nya, iya pen bulih runding siti. ”Pagila aku deka nguji
ensepi dagin nya,” ku ati iya. Liur iya pen lalu neritic ngenang diri deka makai dagin nya.
Nya alai, hari siti chit tu lalu madahka mayau, iya enda ulih enggau bejalai ngiga pemakai sehari nya.
Kenu ku iya, iya udah dipadahka orang, kaban iya bisi rabat lalu iya deka enggau orang nyenggai orang ke mati
nya. Mayau lalu tusah ati ninga pemati kaban chit munyika dipadahka iya. Iya pen lalu enda mega mai chit
bejalai sehari nya.
Enda lama udah nya, dia deh tudah chit tu tadi pen lalu nurun. Iya enda enggau orang nyenggai orang ke
mati kenu ku iya nya tadi tang lalu bejalai nuju pun kayu ti endur seduai iya ngelalaika dagin. Datai iya din, iya
lalu berengkah makai dagin. Udah iya kenyang, iya lalu mulaika diri ke rumah seduai iya.
Hari siti enda lama udah bekau nya, chit lalu bejaku baru enggau mayau, madahka diri pedis isi, pedis
pala enggau pedis perut. Iya madahka diri deka berubat ngagai manang. Amat mega iya munyi nya, tang tuju ati
iya endang sigi deka napatka pun kayu nya tadi, ngambika ulih makai dagin ti tinggal dia. Nyadi sekali tu, iya
makai dagin nya sampai abis. Mimit pen nadai meh agi tinggal.
Nyadi hari siti, dia mayau bejaku, ku iya, ”Semua pemakai tua tu udah abis, lalu kampung pen basah
endur ngiga pemakai. Badas tua ngambi dagin ke ditaruh tua dalam lubang kayu suba.”
Seduai iya lalu mupuk ga bejalai berimbai-rimbai nuju pun kayu nya tadi. Nyau kelama, seduai iya pen
datai ba pun kayu nya. Tudah mayau lalu ngachukka jari iya ke dalam lubang kayu nya tang jari iya nadai
tegamaka utai. Udah nya baru iya tepedaka bekau kaki chit ba mua lubang kayu nya. Iya lalu malik ngagai chit.
”Nuan tu meh orang penchuri!” ku mayau nganu chit. ”Aku ngelamatu arap bendar ke nuan, tang nuan dua kali
udah ngemulaka aku. Nuan makai dagin tua melakangka aku. Nuan tu meh orang rangka. Nya alai enti bakatu
mati meh tua tu laban pemakai nya nadai agi. Dagin tua abis ditengali nuan kediri,” pia ku mayau nganu chit.
Tudah mayau pedis amat ati. Iya lalu deka nerekam chit dia tang meh chit tu lanchat bendar,lalu engekechit
tama lubang kayu nya.
Lalu belabuh ari maya nya, mayau endang selalu begigaka chit, laban agi deka bebalaska diri ti udah
diakal siku nya. Nya meh pun mayau bemunsuh enggau chit.
Baya ke nengelam kediri nya tadi lalu berarat ngili ai sungai nya. Ati Baya nya endang tak lalu bedau nyamai laban
ke udah serta irau ati bekau ke di keduan Pelanduk. Baya lalu mupok ngili ai ngarap kediri tau bulih jelu bukai ke tau
diempa iya laban ke udah kelalu lapar enda makai.