TANJUNG MENANGIS

Tanjung menangis yanansi singen tanjung pang ano siup semawa. Pang samandunung ana, anak
dadara Datu Samawa ya kena leng penyakit ade nonda sopo­ sopo tau pang Samawa ade bau seterang na.
Datu Samawa kamo lalo lako datu Dompu, datu Bima ya buya sandro rea ade bau seterang anak
na. sepida­pida mobulan sakit, tapi no poda tau atawa sandro ade bau seterang na. Sopo ano, DatuSamawa
pina pasamada lako sarea tau pang Samawa luk ya buya tau ade bau saterang penyakit anak na. sai­sai
tau bau seterang anak na, lamen soai ya senadi anak Datu, lamen selaki ya senadi nantu ya senika ke
anak na. rungan reata napat jangka Datu setoe let, Datu Ujung Pandang. Sepida­pida tau, sepida­ pida sandro
datang lako pang Datu Samawa ya gita anak dadara Datu samawatapi nopoda satau­tau ade bau seterang na.
Sopo ano, ada mo tau loka datang lako pang Datu Samawa. Tau ta ya sepan diri datang kaleng Ujung
Pandang, kamenong rungan luk anak dadara Datu Samawa ya kena leng sakit keras. Kaleng diri datang sate
ya roba medo anak Datu na kena roa ada berkat Nene koasa. Kewa koasa Allah Ta'ala, ola ima ke pangeto
Daeng Ujung Pandang ta, anak dadara Datu Samawa bau sehat mara biasa. Dapat mo masa ya tagi jangi
Datuluk sai­sai tau bau saterang anak na, lamen selaki ya sanika ke anak na. benru ya gita
kebali Daeng Ujung Pandang nan, loka, rongko, no roa ate Datu Samawa ya sanika ke anakna. Kaleng
beling Datu ke Daeng Ujung Pandang luk sate ya satukar hadia na. No dadi ya sanika ke anak
na, tapi ya beang harta meloe­loe ya sate. Daeng Ujung Pandang no roa, kaleng mole rebalik ko Ujung
Pandang kewa sampan ode belabu pang Tanjung Menangis. Anak dadara Datu Samawa, ya laloturet Daeng
Ujung Pandang ko palabu kaleng ya gita Daeng loka rongko nanbenru entek ko bao sampan teres beroba jadi
tau teruna gera nonda jangka. Kaleng nangis anak dadara Datu Samawa ya pedi diri kewa rasa ate lako
daeng Ujung Pandang. rena nangis, berari ya turet sampan Daeng Ujung Pandang  jangka tenga let no pato
diri nyelam, kaleng mate pang tenga let rena nangis. Kaleng tuter ta, nan bua ya sa singin tanjung ta tanjung
menangis.
 LAMPAK LENONG KEBO

Muntu saman dungung pang samawa adamo sopo maraja marenta kewa adil bijaksana ke
keras ya beri ling rayat. Adamo ade yakamaeng ling diri dewa maraja yanansi lampak ade
keras yaberi kayapina kalis lenong kebo. Ade kalis satoe kanan kayapina kalis lenong kebo
mslaki, ade satoe kiri kayapina kaling lenong kebo sawai. Berkat karoa nene kuasa, sadua
lampak nan to bakarante yam manusia biasa, tapi yato ling baesi. Lampak satoe kana nada
rasate, luk sate basawai ke lampak satoe kiri, karing dadimo sadua nya sawai ke salaki.

Adamo sopo waktu diri dewa maraja balangan-langan pang deng bala kaberu sinang ujan ke
kayakenang lampak nan. Dapat waya petang, diri dewa maraja sate mo nyap, karing kayasioq
ling diri lampak pameri nan pang bawa ranjang atawa lampak basa nan ramamung. Penomo
tikes dating karampp sate yaset yakakan. Muntu yato luk nan, lampak kanan beling lako
sawai “ Adi, tususa kita. Mamo gita luk peno tikes dating sate kakan kita.” Lampak kiri,
sawainya keras bingung ke kataket. “kaka, mamung perana kita ta ke yamenong ling diri
dewa, musti yatulungmo kita ling diri. Lamin nanmo luk mamo tutunas lako nene gama
yasanadi kita tikes ma momo yakakan tuling tikes-tikes nan.” Ling nampak kiri beling lako
salaki, karing sadua baca doa. Tikes salaki ke tikes sawai ade rango, karing tikes-tikes peno
ade kasate kakn nya dadi kataket sarea.

Marang nawar, muntu meleng diri dewa maraja, keras benjar kesal apa nongka yatumpan
lampak pameri diri pang bawa ranjang ade yagita ling peno tikes barari lalo dating pang
dalam kamar diri. Mikirmo diri, tentu tikes nana de kakakan peno ngaranga pang dalam bala,
yakalekmo ling diri dewa, joa-joa diri yasuru buya bodok baeng yabau saboe tikes-tikes ade
basangaru nan.

“Adi, keras kuhawatir ada bodok-bodok nan pang bala ta.” Ling tikes salaki lako sawainya,
karing yasamung ling sawanya kewa kataket. “Kaka e, nosi balaong ke lamin tutunas lako
nene kuasa ma bau yasadadi kita bodokmo banomo yakakan kita ling bodok-bodok nan,
“rena ngingo lako kiri kanan, luk keras kataket nakena ada bodok-bodok ada sate baunya.
Sadua tikes nan bacamo doa, tikes dua nan yalawan ke yasua bodok-bodk lin ade ada pang
bala nan karing amanmo dadi dalam balan nan. Dewa maraja keras gamporo ke senang ate
diri.

Pida-puda bulanmo kaliwat, datangmo waya balit, diri dewa maraja ke joa-joa diri lalomo
nganyang lako dalam olat, ke bodok-bodok nan yabilinmo pang bala. Diri dewa lamin lalo
nganyang yabawamo asu-asu baraning ke paragas bau mayung muntu nganyang nan. Muntu
yato ling bodok dua nan, bodok ade kuasal lampak nan odemo atenya, mikirmo sadua lamin
tudadi asu mustimu lebe senang atetu daripada tudadi bodok mara ta. Sadua bacamo doa
taunas lalo nene kuasa yasanadi gama ase. “O, Nene, Tunas sanadi kanyata kajulin dadi asu
ade bau turit diri dewa me lako-lako malamar diri dua.” Pangeneng nan berkat diri Allah taala
mbang-mbang sadua bodok nan dadi asu.

Lamin dapat waya diri dewa lalo nganyang, sadua asu kaasal lampak diri dewa nan mesti
yaajak nurit ngiring nganyang. Apapo ampo nosi kala cara nganyang kea pan binatang ade
yabau nan, keras pragas ke kotar, dadi diri dewa gampang yapana ling diri binatang ade
kayabau ling asu dua nan. Mole nganyang asu dua nan ya beang bagian empaq kahasil
nganyang, dewa keras benar yaberi sadua asu nan.

Waya tau nganyang kamo suda, barenangmo tau nganyang sanyaman ate, sadua asu nan
yasuru korong ling diri dewa. Luk keras yasayang, keras rasa hawatir diri lamin yalepas
menan bae, asu nan no roa ramalik sate bebas bakedek ke dengan-dengan lin. Le-le
yakurantek, beling mo asu salaki lako sawainya “Adi e, tudadi asu lamin teris ta luk, no
tuparasa nyaman pang kita.” “ Tutusi kaka e, to ya kita ya korong tu, no mo tub au bebas
bakdek yam asu-asu lin” ling asu sawai. Yaamung ling salakinya “lamin nan luk, nosi
balongke tutunas lako nene, sadua kita sanadi maraja baemo.” Sawai tedu, rena mikir karing
belingmo nya “rasate sia nan keras balong, lamin kamo tudadi maraja era, mustimo tubilin
bala ta,” sadua asu nan barari bilin diri dewa ade keras benar saying lakonya. Sadua asu nan
dapat pang sopo katokal ade do benar kales bala maraja samawa.

Sesuai ke karante sadua asu nan tunasmo lako nene lema yasanadi maraja. Doa nan yatarima
ling Nene, kewa takdir diri dadimo maraja laki ke maraja bini. Asu sawai dadi kebal ke tingi
wibawa diri. Kamo yasamanang bal area ade lampak lenong leng kebo nan ada rasate
yasatalo kerajaan samawa, tapi sarate nan kamo yasanenge ling maraja yasakala dunung ling
maraja samawa ade kuat bala cucuknya.

Maraja laki ke maraja bini kalampak lenong kebo nan bararimo ling kammo ancir
kerajaannya lako katoka do benar, pang nonda tau, jira kayasatalo ling kerajaan samawa.
Kerasnya kakuda jina Nene Kuasa nongka beang tukanyaman kalenge benar jangi kita,
dunung kita kadadi kalampak lenong kebo, ade nonda harga, yarik-rik ling tau, kareng sate
kakantu ling tike, karing tuusaha tutu lema tudadi tike.” Ling maraja kaasal lenong lako
sawainya. “Tutusi kaka e, pamendi Allah taala tusalamat bau tudadi bodok.: Samung
sawainya maraja bini nan. “Karing tutunas kabali lako Nene, bau tudadi asu dadi dengan diri
dewa lamin dapatmo waya lalo nganyang.” “Tutusi adi e, totang ke tudadi asu pragas ke
tangkas pintar tubau mayung muntu tunganyang ke diri dewa, keras lenge jangi kita, kele si
maraja beri kita, pelang tubakedek ke asu-asu ling dengan kita” ling maraja lako sawainya
kaasal lampak si. “Yasi, kusate tunas lako Nene Kuasa beang tukuasa mara maraja kita
dunung raja samawa ade rea ke luas tana lar lamat, pangeneng kita yasanturit ling Nene kele
menan adasi tau ade bau satalo kita ta.” Maraja bini ke maraja laki kaasal lampak nan keras
ngering ate yapikit jangi parananya.

Pida-pida nganomo ada pang katokal basio maraja lampak kaasal maraja samawa nan
belingmo lako maraja bini ade keras setia lako diri. “Adi balong e, sarea ke peno cara ade
kamo tupina ke tulangan, masisi ada tau nongka hargai tau, no monda tau lebe kuasa ke kita.”
Me Luk pikiran kau adi e? “waina luk kahebat rasate sia, no poda tau ade mikir nan luk.
Lamin nansi luk kahebat rasate sia, no poda tau ade mikir nan luk. Lamin nansi luk, balong
tucoba bae kaka e. “karingf sadua kewa hoso baca doa tunas lako Nene. “Ya Nene Kuasa,
sanadimo sadua kajulin ta Allah taala yammo repan lema no monda tau ade lebe kuasa yam
kajulin dua ta.” Yatunas kewa lis ai mata, mbang-mbang dating angina rea, dunia ungkap
batangkop guntir ke gelap, rante no barenang ujan teri rea benar nongka kadu ada sanopoka
ta. Pengeneng maraja kaasal lampak nan yasanenge ling Nene. Yaanti ling sadua, mbak-
mbang nongka yaparasa saduanya ramalik kabali dadi lampak lenong kebo ke nonda tau roa
kenangnya kabali.